2024ལོ་ནི་པེ་ཅིང་ཁ་གཏད་བོད་སྐྱོར་གྱི་ལོ་སུམ་ཅུ་འཁོར་བའི་ལོ་ཞིག་ཡིན་པ་དང་། ལོ་སུམ་ཅུའི་རིང་གི་བོད་སྐྱོར་ལས་དོན་ཁྲོད་པེ་ཅིང་གྲོང་ཁྱེར་གྱིས་ལྷ་སར་འཕེལ་རྒྱས་ཀྱི་སྟོང་ཆ་མང་པོ་སྐོང་རོགས་བྱས་ཡོད། 2012ལོར་ལས་འགོ་བཙུགས་ནས་འཛུགས་སྐྲུན་བྱས་པའི་ལྷ་ས་གྲོང་ཁྱེར་གྱི་མང་ཚོགས་རིག་གནས་ལུས་རྩལ་ལྟེ་གནས་ནི་པེ་ཅིང་གིས་རོགས་སྐྱོར་འཛུགས་སྐྲུན་བྱས་པའི་བོད་ཀྱི་གཞི་ཁྱོན་ཆེ་ཤོས་དང་། སྒྲིག་བཀོད་ཆེས་སྔོན་ཐོན། བྱེད་ནུས་ཆེས་འཐུས་སྒོ་ཚང་བའི་མང་ཚོགས་རིག་གནས་ལུས་རྩལ་ཁང་ཞིག་རེད།

ས་གནས་དེ་གར“བྱ་ཚང་ཆུང་བ”ཞེས་འབོད་པའི་ལྷ་ས་གྲོང་ཁྱེར་མང་ཚོགས་ཀྱི་རིག་གནས་ལུས་རྩལ་ལྟེ་གནས་ནི་གཙོ་བོ་ལུས་རྩལ་ར་བ་དང་། ལུས་རྩལ་ཁང་། གཡག་དངོས་མང་བཤམས་སྟོན་ཁང་། ཆུ་རྐྱལ་ཁང་བཅས་ལས་གྲུབ་ཅིང་། པེ་ཅིང་གིས་རོགས་སྐྲུན་བྱས་པའི་བཟོ་སྐྲུན་འདི་2014ལོར་བེད་སྤྱོད་བྱས་ཚུན་གྲོང་མི་མང་ཚོགས་ཀྱི་ལུས་སྦྱོང་དང་སྤྲོ་གསེང་གི་དགོས་མཁོ་སྐོང་བའི་ཕྱོགས་བསྡུས་རང་བཞིན་གྱི་གནས་སུ་གྱུར་ཡོད།

གྲོང་མི་བསྟན་འཛིན་གྱིས་རྒྱུན་དུ་འདི་རུ་རྒྱུག་ཤར་གློད་པར་ཡོང་གི་ཡོད། འདི་གའི་སྒྲིག་བཀོད་ཚང་མ་ཧ་ཅང་བཟང་ལ་རྒྱུགས་ལམ་ཡོད་པས། ལུས་རྩལ་ཐང་འདི་ནི་ལུས་སྦྱོང་བྱེད་སའི་ས་ཆ་ཡག་པོ་ཞིག་ཡིན་པར་སྙམ་བཞིན་ཡོད་ཅེས་བཤད།

ལོ་འདི་དག་གི་རིང་ལ་ལྷ་ས་གྲོང་ཁྱེར་མང་ཚོགས་རིག་གནས་ལུས་རྩལ་ལྟེ་གནས་ཀྱིས་ད་དུང་མུ་མཐུད་དུ་ལུས་རྩལ་གྱི་ནུས་པ་ཇེ་ཆེར་གཏོང་བ་དང་། མུ་མཐུད་དུ་ལུས་སྦྱོང་གི་གོམ་འགྲོས་ཁུལ་དང་། བྱིས་པའི་ཆེད་ཁུལ། པིང་ཕང་སྤོ་ལོ་རྒྱག་ས་སོགས་བསྐྲུན་ནས་གྲོང་མིའི་ཉིན་རེའི་རྒྱུན་གཏན་གྱི་ལུས་སྦྱོང་དང་ལས་གསེང་བྱེད་པར་ལོ་ཧྲིལ་བོའི་ཞབས་ཞུ་མཁོ་འདོན་བྱེད་བཞིན་ཡོད་པ་རེད།

ལྷ་ས་གྲོང་ཁྱེར་མང་ཚོགས་རིག་གནས་ལུས་རྩལ་ལྟེ་གནས་ཀྱི་ཀྲུའུ་རེན་ལིའུ་མིང་གིས་ད་ལོ་ང་ཚོས་སྒོ་ཐེངས་3300ལྷག་ཙམ་ཕྱེ་ནས་ལུས་སྦྱོང་མང་ཚོགས་ཁྲི་17ལྷག་ཙམ་ལ་སྣེ་ལེན་ཞུས་པ་ཡིན་ཞེས་བཤད།

བསོད་ནམས་དབང་འདུས་ཀྱིས་སྒྱུར། ཚེ་བརྟན་རྡོ་རྗེས་ཞུས།