གསར་འགོད་པས་ཀེ་ཅུན་ལ“གོར་མོ་ནས་གདང་ལའི་སྦྲག་སྐྱེལ་ལམ་རྒྱུད”དུ་ལོ་10ཡི་རིང་ལས་ལ་གཞོལ་བའི་སྐོར་འདྲི་སྐབས། ཁོང་གིས“མཁའ་ལམ་འདིའི་ཐོག་ང་ནི་མི་སེམས་འབྲེལ་མཁན་ཞིག་དང་ཕུགས་འདུན་བརྒྱུད་སྤྲོད་བྱེད་མཁན་གྱི་ཕོ་ཉ་ཞིག་ཡིན”ཞེས་རླངས་འཁོར་གྱི་སྒེའུ་ཁུང་ནས་ཕྱི་རོལ་གྱི་མུ་འབྲེལ་རི་བོར་ལྟ་བཞིན་འཛུམ་དམུལ་དམུལ་ངང་ལན་བཏབ།

འཕྲིན་སྤེལ་ཚོགས་ཆུང་བྲག་སྨུག་གྲོང་རྡལ་དུ་བཅར་འདྲི་མཇུག་འགྲིལ་རྗེས་གདང་ལ་གྲོང་རྡལ་དུ་ལོག་ནས་ངལ་གསོ་བརྒྱབ།

གདང་ལ་གྲོང་རྡལ་གྱི་ཉི་མ་ནུབ་ཁའི་མཚམས་སྤྲིན་རྣམ་པར་བཀྲ་ཞིང་། གོར་མོ་གྲོང་ཁྱེར་ནས་ཐོན་ཏེ་མཚོ་བོད་གཞུང་ལམ་དུ་སྐྱོད་པའི་སྦྲག་སྐྱེལ་རླངས་འཁོར་ལྗང་གུ་ནི། མར་གད་ཅིག་དང་འདྲ་བར་གསེར་མདོག་གིས་བཀླུབས་པའི་ས་གཞི་ཆེན་པོའི་རྒྱན་དུ་གྱུར།

ཡུལ་དེ་གའི་ཚོང་པས། འདི་ནི་གོར་མོ་གྲོང་ཁྱེར་ནས་ཁུ་ནུ་རི་བོ་བརྒལ་བ་དང་ཁུ་ཁུ་ཤིས་རི་བརྒྱུད་ཕར་འགྲོ་ཚུར་འོང་གི་ལམ་ཐག་སྤྱི་ལེ་1000ཙམ་ཡོད་པའི་གདང་ལ་གྲོང་རྡལ་དུ་སླེབས་པའི“མཁའ་ལམ་གྱི་སྦྲག་དངོས”རེད་ཅེས་གསར་འགོད་པར་བཤད།

སྦྲག་དངོས་དེ་དག་སྐྱེལ་མཁན་གྱི་སྦྲག་སྐྱེལ་བ་ནི་མཁའ་དབྱིངས་ཀྱི“ཁྲུང་ཁྲུང་དཀར་པོ”དང་འདྲ་བར་ལོ་ནས་ལོ་དང་ཟླ་ནས་ཟླ་བར་ས་མཐོའི་ལུང་གཞུང་དུ་བསྐྱོད་དེ་འཕྲིན་ཡིག་དང་ཐུམ་སྒྲིལ་རེ་རེ་བཞིན་ཐག་རིང་ལུང་ཁུག་ཏུ་སྐྱེལ་གྱི་ཡོད།

“དེ་སྔོན་ཀེ་ཅུན་ཟེར་བའི་སྦྲག་སྐྱེལ་བ་ཞིག་ལམ་བུ་འདིའི་ཐོག་ལོ་10ཙམ་རིང་བསྐྱོད་པའི་སྐོར་ཐོས་མྱོང”ཞེས་གདང་ལ་གྲོང་རྡལ་གོར་མོ་ཆིང་ཡུས་མགྲོན་ཁང་གི་སྦྱིན་བདག་མཱ་པིན་གྱིས་མྱོང་ཚོར་ཟབ་མོའི་ངང་བཤད།

གོར་མོར་འབྱོར་རྗེས། གསར་འགོད་པས་འཕྲལ་མར“ཕོ་ཉ”ཀེ་ཅུན་དང་འབྲེལ་བ་བྱས་པ་ཡིན།

འདི་ལོ་ལོ་48ལ་སླེབས་པའི་ཀེ་ཅུན་ནི་བློ་བག་ཡངས་ལ་སྤྲོ་སེམས་འཁོལ་བ་དང་། ཤ་རྩི་ནག་ལ་གཟུགས་པོ་རིང་བ་ཞིག་ཡོད་ཅིང་། སྦྲག་སྲིད་ལས་གོས་གྱོན་ཡོད་པས་གཟུགས་སྟོབས་ཆེ་བའི་སྣང་བ་སྟེར། ཀེ་ཅུན་ནི་མཚོ་སྔོན་ཞིང་ཆེན་གོར་མོ་གྲོང་ཁྱེར་དུ་སྐྱེས་པ་དང་ལོ་18ལ་སླེབས་སྐབས་དེ་སྔའི་ལན་ཀྲོའུ་དམག་ཁུལ་ཁང་གི་དཔུང་སྡེ་ཞིག་ཏུ་རླངས་འཁོར་ཉམས་བཟོ་བ་བྱས། 1998ལོར་དམག་ཞབས་ཐིམ་རྗེས་ཀེ་ཅུན་མཚོ་སྔོན་ཞིང་ཆེན་གྱི་སྦྲག་སྲིད་སློབ་གྲྭ་ཞིག་ཏུ་རྒྱུགས་འཕྲོད་པ་དང་སློབ་གྲྭ་ཐོན་རྗེས་མཚོ་སྔོན་ཞིང་ཆེན་སྦྲག་སྲིད་ཁོངས་གཏོགས་སུ་ལས་བགོས་བརྒྱབ་ནས་ས་མཐོའི་སྦྲག་པ་ཞིག་ཏུ་གྱུར།

2009ལོར། ཀྲུང་གོ་སྦྲག་སྲིད་ཀྱིས་མཚོ་སྔོན་ཞིང་ཆེན་གོར་མོ་གྲོང་ཁྱེར་ནས་གདང་ལ་གྲོང་རྡལ་བར་གྱི་རླངས་འཁོར་གྱི་སྦྲག་སྐྱེལ་ལམ་བུ་ཤར་གཏོང་བྱས་པ་རེད།

ལོ་མང་རིང་ཀེ་ཅུན་གྱིས“ཁྲུང་ཁྲུང་གི་མཁའ་ལམ”ཞེས་འབོད་པ་དང་ཆ་སྙོམས་ས་བབ་སྨི་4500ལྷག་ཙམ་ཟིན་ཞིང་གསོ་རླུང་ཧ་ཅང་དཀོན་པའི་སྦྲག་སྐྱེལ་ལམ་བུའི་ཐོག་ཕར་འགྲོ་ཚུར་འོང་ཐེངས་500ལྷག་ཙམ་བྱས་པར་ཁྱོན་བསྡོམས་ལམ་ཐག་སྤྱི་ལེ་ཁྲི་50ལྷག་ཙམ་ཟིན་གྱི་ཡོད་པ་རེད།

མི་རབས་གོང་མར་འཕྲད་པའི་འགྲན་སློང་ཡང་ཁོང་ལ་འཕྲད་མྱོང་ཡོད་པ་སྟེ། དགུན་ཁར་འགྲོ་ལམ་དུ་འཁྱགས་པ་ཐེབས་པ་དང་དྲོད་ཚད་དམའ་བ་དང་། དབྱར་ཁར་སྨུག་ཕྱིའི་འོད་ཟེར་ཤུགས་དྲག་ཆེ་བའི་ཁར་ད་དུང་གྲོགས་མེད་ཁེར་རྐྱང་གི་ངལ་བ་ཁྱད་དུ་གསོད་དགོས་ཀྱི་ཡོད།

འོན་ཀྱང་ཀེ་ཅུན་གྱི་སྙིང་ཁོང་རུས་པའི་གཏིང་ནས་ཕམ་ཁར་སྣང་བ་མི་གཏོང་བའི་སྙིང་སྟོབས་ཀྱིས་མུ་མཐུད་ཨམ་གཙིགས་བསྡམས་ནས་རྒྱུན་འཁྱོངས་ཐུབ་པ་བྱས་ཡོད།

གནམ་གཤིས་གྲང་བས་སྲིང་བལ་གྱོན་གོས་མང་ཙམ་འཁྱེར་བ་དང་། ཁ་བ་འབབ་དུས་སྦྱག་མ་འཁྱེར་བ། ལམ་འདྲེད་དུས་དལ་པོར་གཏོང་བ། ཉོབ་སྣང་སྐྱེ་དུས་ཡུལ་ལྗོངས་ལ་ལྟ་བ་དང་ཕར་ཚུར་འགྲོ་འོང་བྱེད་མཁན་རླངས་འཁོར་དང་རི་སྐྱེས་སྲོག་ཆགས་གྲངས་ཀ་རྒྱག་པ་སོགས་བྱེད་ཀྱི་ཡོད། དེ་ལྟར་ཡིན་ནའང་སྐབས་འགར་འཁྱགས་ནས་རྐང་ལག་སྦྲིད་པ་དང་ཡང་ན་སྦྱག་མས་གཞོག་མི་ཐུབ་པའི་གངས་གསོག་མཐུག་པོ་སོགས་ཀྱི་དཀའ་ངལ་འཕྲད་ཀྱི་ཡོད།

ཁོང་གིས“ཕྱིར་བཤོལ་བྱེད་དགོས་སྙམ་རིམ་བཞིན་ངས་རང་ཉིད་ལ་ཁྱད་བསད་མི་ཐུབ་པའི་དཀའ་ངལ་གང་ཡང་མེད་པས་སྡུག་རུས་བྱེད་དགོས་པའི་ཁ་ཏ་བསླབ་བྱ་བྱེད་ཀྱི་ཡོད”ཅེས་བཤད།

“གོར་མོ་ནས་གདང་ལ་བར་གྱི་སྦྲག་ལམ”དེ་ཡང་དཀའ་ངལ་དང་འགྲན་སློང་ཁོ་ན་ཙམ་མ་ཡིན་པར་ལོ་10ཡི་ལས་ཀའི་ཉམས་མྱོང་ལས་ཀེ་ཅུན་གྱིས་ལམ་རྒྱུད་ཀྱི“རོགས་ཟླ་ཆུང་ཆུང”ཚོའི་འཚོ་བའི་གོམས་གཤིས་རྟོགས་ཐུབ་ཡོད། ལོ་ལྟར་ཟླ་བདུན་པ་དང་བརྒྱད་པར་གནས་སྤོ་མཁན་གཙོད་ཁྱུ་དང་། རྟག་ཏུ་གཞུང་ལམ་འགྲམ་དུ་ཕར་ཚུར་རྒྱུག་མཁན་གཙོད། རྩྭ་ཐང་ཐོག་བག་ཕེབས་ངང་སྡོད་མཁན་རྐྱང་། དགུན་དུས་དྲོད་སྲུང་ཆེད་ལམ་ངོས་སུ་གསུས་པ་སྦྱར་ནས་སྡོད་མཁན་ཨ་བྲ་སོགས་དེ་དག་ནི་ཀེ་ཅུན་ལས་ཀ་བྱེད་སྐབས་ཀྱི་རོགས་ཟླར་གྱུར་ཡོད།

ལོ་མང་ས་བབ་མཐོ་བའི་ས་ཁུལ་དུ་ཕར་འགྲོ་ཚུར་འོང་བྱས་པ་ལས་དྲན་ཤེས་ཉམས་པ་དང་བྱ་བ་མང་པོ་ཞིག་ཀེ་ཅུན་གྱིས་གསལ་པོ་ངེས་ཀྱི་མེད་མོད། འོན་ཀྱང་ཁོང་གིས་དམིགས་བསལ་གྱི་ཁུག་མ་ཞིག་སྤྲད་པ་དེ་གསལ་པོར་ངེས་ཀྱི་ཡོད།

“2013ལོའི་ཐེངས་ཤིག་ང་ལ་ཆེས་མགྱོགས་ཡིག་ཆ་ཞིག་འབྱོར་བ་དེའི་ངོས་སུ་ཐོག་སོ་གཉིས་པ་ཞེས་པ་ལས་བསྐུར་ཡུལ་དང་འབྲེལ་གཏུག་ཁ་པར་ཨང་གྲངས་སོགས་གང་ཡང་བྲིས་མེད”བསྐུར་ཡུལ་མེད་པའི་ཆེས་མགྱོགས་ཡིག་ཆ་དེ་འབྱོར་བས་ཀེ་ཅུན་ག་བྱེད་འདི་བྱེད་མེད་པར་གྱུར།

“གོར་མོ་ནས་གདང་ལ་བར་གྱི་སྦྲག་ལམ”དེར་མི་ཉུང་ཞིང་ཁ་ཐོར་དུ་གནས་ཡོད་པས་གལ་སྲིད་རེ་རེ་བཞིན་བཙལ་དགོས་ཚེ་དེ་ནི་དཀའ་ལས་ཧ་ཅང་ཁག་པོ་ཞིག་རེད། སྟབས་ལེགས་པ་ཞིག་ལ་ཀེ་ཅུན་གྱིས་རྒྱུན་དུ་གྲོང་ཚོའི་མང་ཚོགས་དང་འབྲེལ་གཏུག་མང་པོ་བྱེད་པའི་ཉམས་མྱོང་ལ་བརྟེན་ནས་ཁོང་ལ་ཡིག་ཆ་དེ་ལེན་མཁན་རྙེད།

ཀེ་ཅུན་གྱིས་མཚོ་བོད་ས་མཐོ་ནི་སའི་གོ་ལའི་ཐོག་གི་ཆེས་གཙང་ཤོས་ཀྱི་ས་ཁུལ་གྱི་གྲས་ཤིག་ཡིན་ཞིང་། དམིགས་བསལ་གྱི་རང་བྱུང་མཛེས་ལྗོངས་དང་སྐྱེ་ཁམས་ཁོར་ཡུག་ལ་མི་རྣམས་ཧང་སངས་ཀྱི་ཡོད་ཅེས་གསར་འགོད་པར་བཤད། མཚོ་བོད་ས་མཐོའི་སྦྲག་སྐྱེལ་ལམ་བུའི་བང་ཆེན་ཡིན་པའི་ཀེ་ཅུན་དང་ཁོང་གི་ལས་རོགས་ཚོས་ཀྱང་རང་ཉིད་ཀྱི་ཐབས་ལམ་ལ་བརྟེན་ནས་དག་ཞིང་འདི་ལ་སྲུང་སྐྱོང་བྱེད་བཞིན་ཡོད།

སྦྲག་དངོས་སྐྱེལ་རིང་ཁོང་ཚོས་ཁོར་ཡུག་སྲུང་སྐྱོང་གི་གཏན་འབེབས་ལ་བརྩི་སྲུང་ནན་པོ་ཞུས་ནས་གད་སྙིགས་གང་བྱུང་དུ་མི་དབྱུག་པ་དང་། སྔོ་ཁེབས་ལ་གཏོར་བཤིག་མི་གཏོང་བ། རི་སྐྱེས་སྲོག་ཆགས་ཀྱི་འཚོ་བར་འགོག་རྐྱེན་མི་བཟོ་བ་བཅས་བྱེད་ཀྱི་ཡོད་པ་མ་ཟད། རླངས་འཁོར་ནང་གད་སྙིགས་སྒམ་དང་གད་སྙིགས་བླུགས་སྣོད་སོགས་ཀྱང་གྲ་སྒྲིག་བྱས་ཡོད། དེ་དང་ཆབས་ཅིག་ལམ་རྒྱུད་དུ་གད་སྙིགས་བསྒྲུགས་པ་དང་གད་སྙིགས་རི་གཤམ་དུ་འཁྱེར་རྒྱུ་དེའང་ཁོང་ཚོའི་ལས་ཀའི་རྒྱུན་རྣམ་ཞིག་ཏུ་གྱུར་ཡོད།

2020ལོར་གཟུགས་པོས་རྐྱེན་པས་ཀེ་ཅུན་གོར་མོ་ནས་མོང་ཡ་བར་གྱི་རིམ་གཉིས་སྦྲག་ལམ་དུ་སླེབས་ཀྱང་མཚོ་བོད་གཞུང་ལམ་གྱི“གོར་མོ་ནས་གདང་ལ་བར་གྱི་སྦྲག་ལམ”གྱི་གཏམ་རྒྱུད་ད་དུང་རྩོམ་བཞིན་ཡོད།