“ད་ཆ་སྤུ་ཧྲེང་དུ་ཚའེ་ཉའོ་སྡེབ་སྐྱེལ་ས་ཚིགས་བཙུགས་པ་དང་ས་ཚིགས་གཅིག་ནས་མྱུར་སྐྱེལ་ཀུང་སི་མང་པོར་སྐུར་གྱི་ཡོད་པས་གྲོང་མིས་དྲ་ཐོག་ནས་དངོས་ཟོག་ཉོ་བདེ་རུ་ཕྱིན་ཡོད”ཅེས་མངའ་རིས་ས་ཁུལ་སྤུ་ཧྲེང་རྫོང་ཚའེ་ཉའོ་གྲོང་གསེབ་ཀྱི་སྡེབ་སྐྱེལ་ས་ཚིགས་ཀྱི་འགན་འཁུར་བ་ཁྲང་ཅི་ཕེང་གིས་ངོ་སྤྲོད་བྱས་པ་རེད།

ད་ལོ་ཚུན་དུ། རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ནང་མཁོ་རྒྱ་ཆེར་གཏོང་བ་དང་འཛད་སྤྱོད་ལ་སྐུལ་འདེད་གཏོང་བའི་ལས་དོན་ལ་ཚད་མཐོའི་མཐོང་ཆེན་བྱས་ཏེ་འཛད་སྤྱོད་ལ་སྐུལ་འདེད་དང་དམངས་འཚོར་ཕན་འདོགས་རྒྱུ་ཟུང་འབྲེལ་མཐའ་འཁྱོངས་ཀྱིས་འཛད་སྤྱོད་ཀྱི་མི་མངོན་པའི་སྟོབས་ཤུགས་འཕེལ་བར་བྱས་ནས་འཛད་སྤྱོད་ཀྱི་སྤུས་ཚད་མཐོར་གཏོང་དང་རིམ་སྤོར་ལ་སྐུལ་འདེད་བཏང་བ་རེད། དུས་ཚིཌ་དང་པོ་ནས་གསུམ་པའི་བར། རང་ལྗོངས་ཀྱི་སྤྱི་ཚོགས་འཛད་རྫས་སིལ་ཚོང་གི་བསྡོམས་འབོར་སྒོར་དུང་ཕྱུར་671.06ཟིན་པ་དེ་དུས་མཚུངས་ལས་6.2%འཕར་བ་དང་། རྒྱལ་ཡོངས་ལས་བརྒྱ་ཆའི་གྲངས་2.9ཡིས་མཐོ་བ་ཡོད་པ་དང་ལོ་སྟོད་ལས་བརྒྱ་ཆའི་གྲངས་2.4ཡིས་འཕར་མགྱོགས་པ་ཡོད་པས། འཕར་ཚད་རྒྱལ་ཡོངས་ཀྱི་ཨང་དང་པོར་སླེབས་ཡོད། 

རང་སྐྱོང་ལྗོངས་ཚོང་དོན་ཐིང་འཛད་སྤྱོད་སྐུལ་འདེད་ཁྲུའི་ཁྲུའུ་ཀྲང་གཞོན་པ་དབྱང་ཀྲན་ཧུའེ་ཡིས“ལྗོངས་ཡོངས་ཀྱི་འཛད་སྤྱོད་ཁྲོམ་ར་རྒྱུན་མཐུད་ལེགས་ཕྱོགས་སུ་འཕེལ་རྒྱས་འགྲོ་བཞིན་ཡོད་ཅིང་། དེ་ལས་མངོན་པའི་བཀྲག་མདངས་འཚེར་ས་གཙོ་བོ་ནི་གྲོང་ཁྱེར་དང་གྲོང་གསེབ་ཀྱི་འཛད་སྤྱོད་ཁྲོམ་རའི་ཧེ་བག་སྔར་བས་ཆུང་དུ་ཕྱིན་པ་དེ་ཡིན་ཞིང་། རྒྱུ་རྐྱེན་གཙོ་བོ་ནི་ཞིང་འབྲོག་མང་ཚོགས་ཕྱུག་པོ་ཆགས་པ་དང་འཛད་སྤྱོད་བྱེད་ཤུགས་ཆེ་རུ་ཕྱིན་པས་རེད”ཅེས་བཤད། དུས་ཚིགས་དང་པོ་ནས་གསུམ་པའི་བར་རང་ལྗོངས་ཀྱི་གྲོང་གསེབ་ཀྱི་འཛད་རྫས་སིལ་ཚོང་བསྡོམས་འབོར་སྒོར་དུང་ཕྱུར་123.95ཟིན་པ་དེ་དུས་མཚུངས་ལས་8.9%འཕར་བ་དང་། གྲོང་ཁྱེར་དང་གྲོང་རྡལ་ལས་བརྒྱ་ཆའི་གྲངས་3.3གྱིས་མཐོ་བ་ཡོད་པ་དེས་ལྗོངས་ཡོངས་ཀྱི་སྤྱི་ཚོགས་འཛད་་རྫས་སིལ་ཚོང་བསྡོམས་འབོར་ནང་བཟུང་བའི་བསྡུར་ཚད་18.5%ཟིན་པ་དང་ལོ་སྟོད་ལས་བརྒྱ་ཆའི་གྲངས་1.8མཐོ་རུ་ཕྱིན་ཡོད་པ་རེད།