ཤིན་ཧྭ་གསར་འགྱུར་ཁང་གྲོང་ཁྱེར་ལུ་ས་ཁ་ནས་ཟླ་10ཚེས་30ཉིན་གློག་འཕྲིན་འབྱོར་གསལ། ས་གནས་དེ་གའི་དུས་ཚོད་ཚེས་29ཉིན་ཀྲུང་ཙན་དབར་ཕྱི་འབྲེལ་བཙུགས་ནས་ལོ་60འཁོར་བར་དྲན་གསོ་ཞུ་བའི་བྱེད་སྒོ་ཙན་པི་ཡའི་ལུ་ས་ཁ་ཞིང་ཆེན་ཆུང་ཀུའེ་ས་ཁུལ་གྱི་ཐན་ཙན་ལྕགས་ལམ་དྲན་གསོ་གླིང་དུ་གཟབ་རྒྱས་ངང་གཉེར་བ་རེད།

ད་རེས་ཀྱི་བྱེད་སྒོ་ནི“ཐན་ཙན་ལྕགས་ལམ་གྱི་སྙིང་སྟོབས་རྒྱུན་འཛིན་བྱས་ནས་ལས་དབང་གཅིག་མཐུན་ཚོགས་པ་མཉམ་དུ་གཏོད”ཅེས་པ་བརྗོད་དོན་གཙོ་བོར་བྱས་ཤིང་། ཙན་པི་ཡའི་ཙུང་ཐུང་ཤིས་ཆི་ལའེ་མཱ་ཡིས་ཤིས་ཚིག་སྒྲོན་སྐབས། ཙན་ཀྲུང་དབར་གྱི་སྲོལ་རྒྱུན་མཛའ་གྲོགས་མི་རབས་ནས་མི་རབས་བར་རྒྱུན་མཐུད་བྱས་ཡོད། དུས་རབས་གོང་མའི་ལོ་རབས་70པར་ཀྲུང་གོས་རང་ཉིད་ལ་དཀའ་བ་དུ་མ་འཕྲད་ཀྱང་ཐེ་ཚོམ་སྤུ་ཙམ་ཡང་མེད་པར་རེ་ཞུ་དང་ལེན་བྱས་ནས་ཐན་ཙན་ལྕགས་ལམ་སྐྲུན་རོགས་བྱས་ཡོད། རྒྱལ་ཁབ་གཉིས་པོའི་འཛུགས་སྐྲུན་པས་འགག་སྒྲོལ་དཀའ་སེལ་བྱས་པ་དང་རང་སྲོག་བློས་གཏོང་བར་མི་སྐྲག་པར་ཐུན་མོང་ཐོག་ཐན་ཙན་ལྕགས་ལམ་གྱི་སྙིང་སྟོབས་བཏོད་ཡོད། རྒྱལ་ཁབ་གཉིས་པོའི་གཞོན་ནུའི་མི་རབས་ཀྱིས་ཙན་ཀྲུང་མཉམ་ལས་ཀྱི་སྙིང་སྟོབས་རྒྱུན་འཛིན་བྱས་ཏེ་མཛེས་སྡུག་ལྡན་པའི་འབྱུང་འགྱུར་མཉམ་དུ་གཏོད་རྒྱུའི་རེ་བ་ཡོད་ཅེས་གསུངས་པ་རེད།

ཙན་པི་ཡ་རུ་བཅའ་སྡོད་ཀྲུང་གོའི་གཞུང་ཚབ་ཆེ་མོ་བ་ཧན་ཅིང་གིས། ལོ་60ཡི་རིང་ཀྲུང་ཙན་དབར་གྱི་འབྲེལ་བར་དུས་ཚོད་ཀྱི་ཚོད་བགམ་ཐེག་ནས་དེ་བས་བརྟན་དུ་སོང་སྟེ་རིམ་བཞིན་ཀྲུང་གོ་དང་ཨ་ཧྥེ་རི་ཁའི་འབྲེལ་བ་དང་ལྷོ་ལྷོ་མཉམ་ལས་ཀྱི་དཔེ་མཚོན་དུ་གྱུར་ཡོད། ཕྱོགས་གཉིས་པོས་ཐུན་མོང་ཐོག་འབད་བརྩོན་བྱས་ཏེ་རྒྱལ་ཁབ་གཉིས་པོའི་གཙོ་བདག་གི་ཐུན་མོང་ངོས་འཛིན་དོན་འཁྱོལ་ཡག་པོ་བྱས་ནས། ལྕགས་ལམ་འཛུགས་སྐྲུན་ནང་རང་སྲོག་ཤོར་བའི་སྔོན་གཤེགས་དཔའ་བོ་ཚོར་དྲན་གསོ་ཞུས་ཏེ་ཐན་ཙན་ལྕགས་ལམ་དེ་ཉིད་དར་རྒྱས་ཀྱི་ལམ་བུ་ཞིག་ཏུ་བསྐྲུན་ནས་ཡུལ་དེའི་མི་དམངས་ལ་བདེ་སྐྱིད་སྐྲུན་དགོས་ཞེས་གསུངས་པ་རེད།