ཚེས་29ཉིན། དུས་ཡུན་ཉིན་གཉིས་ཀྱི་2024ལོའི་ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་གྱི་ཁོར་ཡུག་མཉམ་ལས་གླེང་སྟེགས་ཀོང་ཤིས་ལིའུ་ཀྲོའུ་རུ་འགོ་ཚུགས་ཤིང་། ད་ཐེངས་ཀྱི་གླེང་སྟེགས་ཀྱིས“ས་ཁོངས་ནུས་པ་འཛུགས་སྐྱོང་གི་རོགས་ཟླའི་འབྲེལ་བ་འཛུགས་དགོས”ཞེས་པ་བརྗོད་དོན་གཙོ་བོར་བྱས་ཤིང་། དེའི་དམིགས་ཡུལ་ནི་ས་ཁོངས་ཀྱི་ཁོར་ཡུག་བཅོས་སྐྱོང་ནུས་པ་ཆེ་རུ་གཏོང་བར་སྐུལ་འདེད་བཏང་ནས་ཁོར་ཡུག་མཉམ་ལས་ཀྱི་ཆུ་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་རྒྱུ་དེ་ཡིན་པ་དང་། གླེང་སྟེགས་ཀྱི་འབྲེལ་ཡོད་བྱེད་སྒོ་དག་དྲ་ཐོག་དང་དྲ་ཕྱི་ཟུང་དུ་འབྲེལ་བའི་རྣམ་པའི་ཐོག་ནས་སྤེལ་རྒྱུ་རེད། ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་རྒྱལ་ཁབ་ཀྱི་ཁོར་ཡུག་སྡེ་ཚན་དང་དེ་བཞིན་འབྲེལ་ཡོད་རྒྱལ་སྤྱིའི་རྩ་འཛུགས་དང་། ཞིབ་འཇུག་སྒྲིག་གཞི། ཁེ་ལས་སོགས་ཀྱི་འཐུས་མི་300ཙམ་ཚོགས་འདུར་ཞུགས་ཡོད།

ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་རྒྱལ་ཁབ་ཀྱི་ཁོར་ཡུག་སྲིད་ཇུས་ཀྱི་སྐད་ཆ་ཤོད་རེས་དང་སྤེལ་རེས་ཀྱི་ལས་སྟེགས་ཤིག་ཡིན་པའི་ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་གྱི་ཁོར་ཡུག་མཉམ་ལས་གླེང་སྟེགས་འདི་ཉིད་ཀྲུང་གོའི་སྐྱེ་ཁམས་ཁོར་ཡུག་པུའུ་དང་ཀོང་ཤིས་ཀྲོང་རིགས་རང་སྐྱོང་ལྗོངས་མི་དམངས་སྲིད་གཞུང་གིས་ཐུན་མོང་ཐོག་གཙོ་གཉེར་བྱས་པ་ཞིག་ཡིན་ཞིང་། 2011ལོ་ནས་བཟུང་སྐབས་12གྲུབ་འབྲས་ཐོབ་པའི་ངང་གཉེར་ནས་སྤྱི་ཚོགས་ལས་རིགས་ཁག་ས་ཁོངས་ཀྱི་སྐྱེ་ཁམས་ཁོར་ཡུག་མཉམ་ལས་ནང་ཞུགས་པའི་དབང་གྲགས་ལྡན་པའི་ཐབས་ལམ་དང་སྦྲེལ་ཟམ་གལ་ཆེན་ཞིག་ཏུ་གྱུར་ཏེ་ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་རྒྱལ་ཁབ་ཀྱི་ཁོར་ཡུག་མཉམ་ལས་ལ་སྐུལ་འདེད་གཏོང་བའི་ཐད་ནུས་པ་གལ་ཆེན་ཐོན་ཡོད།