ཀྲུང་གོའི་མི་དམངས་ལ་ལྷིང་ཞིང་ལྷོད་པའི་སྟོབས་ཤུགས་དང་དེ་བཞིན་ཁེངས་སྐྱུང་དང་སྙིང་རུས་ཆེ་བའི་གཤིས་རྒྱུད་ལྡན་ཞིང་། ལོ་མང་རིང་། ཀྲུང་གོའི་ཚན་རྩལ་དང་། རྨང་གཞིའི་སྒྲིག་བཀོད། སྤྱི་ཚོགས་འཕེལ་རྒྱས་སོགས་ཁྱབ་ཁོངས་ཁག་ལ་ཐོབ་པའི་ཡར་རྒྱས་ཧ་ཅང་ཆེན་པོར་ངས་དཔང་པོ་བྱེད་ཐུབ། ཐེངས་ཤིག་ང་མྱུར་བགྲོད་མེ་འཁོར་ལ་བསྡད་དེ་པེ་ཅིང་ནས་ཧྲན་ཏུང་ལ་ཕྱིན་པ་ཡིན། མེ་འཁོར་དེ་ཆུ་ཚོད་རེར་སྤྱི་ལེ་300ལྷག་ཙམ་གྱི་མྱུར་ཚད་ནས་བྱ་འཕུར་བ་ལྟར་བརྟན་པོར་བསྐྱོད་པ་དེ་ཐོག་ནས་ཀྲུང་གོའི་ལག་རྩལ་ངོ་མ་གང་ལེགས་མངོན་ཡོད། ཀྲུང་གོའི་གྲོང་ཁྱེར་ཅན་གྱི་འཕེལ་རིམ་དང་དེ་བཞིན་གྲོང་ཁྱེར་དང་གྲོང་གསེབ་ཀྱི་རྨང་གཞིའི་སྒྲིག་བཀོད་མཉམ་སྦྲེལ་མཉམ་མཐུད་ལ་ཡར་རྒྱས་ཆེན་པོ་བྱུང་བར་རང་ཉིད་ལ་སེམས་འགུལ་ཆེན་པོ་ཐེབས་བྱུང་། ཀྲུང་གོས་ཐོག་མཐའ་བར་གསུམ་དུ་དེང་རབས་ཅན་གྱི་གྲུབ་འབྲས་ཀྱིས་མི་དམངས་ཡོངས་ལ་ཕན་འདོགས་པར་གཞོལ་བཞིན་ཡོད། མིག་སྔར་ཀྲུང་གོ་འདི་ཉིད་གོ་ལ་ཧྲིལ་པོའི་ཚན་རྩལ་ཡར་ཐོན་དང་། གྲོང་ཁྱེར་འཕེལ་རྒྱས། ལྗང་མདོག་ནུས་རྒྱུ་འཕེལ་རྒྱས་བཅས་ཀྱི་སྣེ་ཁྲིད་པར་གྱུར་ནས་དམངས་ཚོགས་ཀྱི་འཚོ་བའི་སྤུས་ཚད་མཐོ་རུ་བརྟན་པོ་ཕྱིན་ཡོད།

ཀྲུང་གོའི་ལུགས་ཀྱི་དེང་རབས་ཅན་གྱིས་རྒྱལ་སྤྱིའི་སྒྲིག་ལམ་ལ་འགྱུར་ལྡོག་འགྲོ་བར་ཤུགས་རྐྱེན་གཏིང་ཟབ་ཐེབས་ཡོད། “རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་འགོས་རྒྱལ་སྤྱིའི་མཉམ་ལས་ཀྱི་གོ་སྐབས་རྒྱ་ཁྱབ་ངང་བཏོད་དེ་མཉམ་སྐྲུན་རྒྱལ་ཁབ་ཀྱིས་ཡུན་རིང་གི་དཔལ་འབྱོར་རོགས་ཟླའི་འབྲེལ་བ་འཛུགས་པར་སྐུལ་འདེད་བཏང་ནས་ཕྱོགས་ཁག་ལ་བདེ་སྐྱིད་བསྐྲུན་ཡོད། ཀྲུང་གོའི་ལུགས་ཀྱི་དེང་རབས་ཅན་གྱིས་འཛམ་གླིང་འདི་ཉིད་དཔལ་འབྱོར་འཕར་སྣོན་དང་། ལག་རྩལ་གསར་གཏོད། ཁོར་ཡུག་རྒྱུན་མཐུད་ཆོག་པའི་རང་བཞིན་བཅས་གལ་ཆེ་མཉམ་དུ་འཛིན་པའི་འབྱུང་འགྱུར་ཕྱོགས་སུ་སྐྱོད་པར་སྐུལ་འདེད་གཏོང་གི་ཡོད། ཀྲུང་གོས་ཚན་རིག་ལག་རྩལ་དང་། ལྗང་མདོག་འཕེལ་རྒྱས། རྨང་གཞིའི་སྒྲིག་བཀོད་བཅས་ལ་མ་འཇོག་ཤུགས་ཆེན་བྱས་ནས་རྒྱལ་ཁབ་གཞན་དག་ལ་མིག་དཔེ་བསྟན་ཡོད།

ཀྲུང་གོ་དེང་རབས་ཅན་གྱི་ཕྱོགས་སུ་བསྐྱོད་པ་དེས་རྒྱལ་ཁབ་ཁག་དང་ལྷག་པར་དུ་འཕེལ་རྒྱས་འགྲོ་བཞིན་པའི་རྒྱ་ཆེའི་རྒྱལ་ཁབ་ལ་གོ་སྐབས་ཆེན་པོ་མཁོ་འདོན་བྱས་ཡོད། ཀྲུང་གོས་གློག་སྒུལ་རླངས་འཁོར་དང་། བསྐྱར་སྤྱོད་ཆོག་པའི་ནུས་རྒྱུ། མི་ཐབས་རིག་ནུས་སོགས་ཁྱབ་ཁོངས་ཀྱི་ཆེད་ལས་ཤེས་བྱར་བརྟེན་ནས་དེང་རབས་ཅན་ལ་སྐུལ་འདེད་གཏོང་བཞིན་པའི་འཕེལ་རྒྱས་འགྲོ་བཞིན་པའི་རྒྱལ་ཁབ་གཞན་དག་ལ་རེ་བ་སྦྱིན་ཡོད། ཀྲུང་གོས་ཕྱོགས་ཁག་ལ་མཉམ་ལས་ཀྱི་གོ་སྐབས་མཁོ་འདོན་བྱས་ཏེ་ལས་ཞུགས་ཀྱི་གོ་སྐབས་བཏོད་པ་དང་དཔལ་འབྱོར་འཕར་རྒྱུར་སྐུལ་འདེད་གཏོང་བ་དང་འབྲེལ། བཟོ་ལས་ཅན་གྱིས་སྐྱེ་ཁམས་ཁོར་ཡུག་ལ་བཟོས་པའི་ཤུགས་རྐྱེན་ངན་པ་ཆུང་དུ་བཏང་ཡོད།

ཀྲུང་གོའི་ལུགས་ཀྱི་དེང་རབས་ཅན་གྱིས་རྒྱལ་སྤྱིའི་ཐོག་ཤུགས་རྐྱེན་ཐེབས་ཚད་དཔལ་འབྱོར་གྱི་ཁྱབ་ཁོངས་ཁོ་ན་མིན། ཀྲུང་གོས་རྒྱལ་སྤྱིའི་འབྲེལ་བ་གསར་པ་འཛུགས་རྒྱུར་སྐུལ་འདེད་བཏང་ནས་ཕྱོགས་ཁག་དང་མཉམ་དུ་དེ་བས་རྒྱུན་མཐུད་ཆོག་པའི་འབྱུང་འགྱུར་གཏོད་པར་གཞོལ་བཞིན་ཡོད། ལོ་70ལྷག་ཙམ་རིང་། ང་ཚོ་དང་ཀྲུང་གོའི་རོགས་ཟླའི་མཉམ་ལས་ཀྱིས་འབྲེལ་བ་ཡུན་རིང་འཛུགས་པ་དང་འབྱུང་འགྱུར་གྱི་འགྲན་སློང་ལ་ཁ་གཏད་གཅོག་པའི་ཁས་ལེན་བྱས་ཡོད། འབྱུང་འགྱུར་ལ་རྒྱང་ལྟ་བྱེད་སྐབས། དབྱིན་ཇིའི་ཚོགས་པ་48པའི་སྤྲོ་སྐྱིད་ཁང་དང་ལོན་ཏོན་ཕྱིར་གཏོང་ཀུང་སིས་རྒྱལ་སྤྱིའི་མཉམ་ལས་ལ་སྐུལ་འདེད་གཏོང་རྒྱུར་མུ་མཐུད་གཞོལ་ནས་ཚོང་དོན་དང་། གསར་གཏོད། རྒྱུན་མཐུད་རང་བཞིན་བཅས་རྨང་གཞིར་བྱས་པའི་མཛེས་སྡུག་ལྡན་པའི་འབྱུང་འགྱུར་གཏོད་རྒྱུར་རམ་འདེགས་བྱེད་ཀྱི་ཡིན།

(རྩོམ་པ་པོ་ནི་དབྱིན་ཇིའི་ཚོགས་པ་48པའི་སྤྲོ་སྐྱིད་ཁང་གི་ཀྲུའུ་ཞི་དང་ལོན་ཏོན་ཕྱིར་གཏོང་ཀུང་སིའི་དབུ་བཞུགས་ལག་བསྟར་དཔོན་ཡིན)