ཉེ་ཆར་གསར་འགོད་པ་རླངས་འཁོར་བསྡད་དེ་ཆབ་མདོ་གྲོང་ཁུལ་དང་བར་ཐག་སྤྱི་ལེ་44ཆོད་པའི་རོབ་པ་ཤང་དུ་བསྐྱོད་པ་ཡིན། ལ་མང་པོ་བརྒྱབ་རྗེས་ང་ཚོ་ཁ་རུབ་ཆུས་རོབ་པ་ཤང་གི་གྲོང་གསེབ་གཞུང་ལམ་བཟོ་སྐྲུན་གྱི་ཨར་ལས་བྱ་ཡུལ་དུ་འབྱོར་ཞིང་། རི་གཤམ་ནི་དབྱང་ཧྲུན་ཁོའོ་ཆུས་འཁྱེར་ས་དེ་རེད་འདུག

ལོ་61ལ་སླེབས་པའི་དབྱང་ཧྲུན་ཁོའོ་མ་གྲོངས་གོང་ཆབ་མདོ་གྲོང་ཁྱེར་ཁ་རུབ་ཆུས་རོབ་པ་ཤང་གི་གྲོང་གསེབ་ཀྱི་གཞུང་ལམ་བཟོ་སྐྲུན་རྣམ་གྲངས་ཀྱི་ཨར་པོ་བ་ཞིག་ཡིན་པ་དང་2024ལོའི་ཟླ་6ཚེས་28ཉིན་ཆུར་ལྷུངས་བའི་གྲོང་མི་ཞིག་སྐྱོབ་སྐབས་སྟབས་མི་ལེགས་པར་རང་སྲོག་ཤོར།

2024ལོའི་ཟླ་6ཚེས་28ཉིན་གྱི་ཆུ་ཚོད་17ཙམ་ལ་རོབ་པ་ཤང་དུ་དྲག་ཆར་བབས་ནས་ཆུ་བོ་མང་པོ་ཞིག་གི་ཆུ་ཁ་རྒྱས་ཏེ་ཆུ་ལམ་ཧྲིལ་པོར་ཆུ་ལོག་གི་གནོད་འཚེ་ཚབས་ཆེན་ཐོན་ཡོད། ཆུ་ཚོད་17དང་སྐར་མ་50ཙམ་ལ་ལོ་61ལ་སླེབས་པའི་དབྱང་ཧྲུན་ཁོའོ་སྔར་རྒྱུན་བཞིན་གཙང་འགྲམ་དུ་ཟམ་པ་ཞིག་ཏུ་སྐོར་གཡེང་བྱེད་སྐབས། གྲོང་མི་ཞིག་གིས་སེམས་འཚབ་ཆེན་པོས་ཟམ་པའི་འོག་ཏུ་ལྟ་བཞིན་ཕར་རྒྱུག་ཚུར་རྒྱུག་བྱེད་པ་དང་གཙང་པོའི་འགྲམ་དུ་ད་དུང་སྦག་སྦག་ཅིག་བཞག་ཡོད་པ་མཐོང་། གནས་ཚུལ་དེ་མཐོང་རྗེས་དབྱང་ཧྲུན་ཁོའོ་འཕྲལ་མར་དེ་གར་སྐྱོད་པས་གྲོང་མི་ཞིག་དྲག་ཏུ་རྒྱུག་པའི་གཙང་པོའི་ནང་ལྷུངས་ནས་སྲོག་སྐྱོབ་རྒྱུའི་རེ་འབོད་བྱེད་བཞིན་ཡོད་པ་མཐོང་།

གནས་ཚུལ་དེ་མཐོང་རྗེས་དབྱང་ཧྲུན་ཁོའོ་ཡིས་ཐེ་ཚོམ་སྤུ་ཙམ་མེད་པར་གྲང་ཟུག་ཆེ་བའི་གཙང་པོར་མཆོངས་ཏེ་ཆུར་ལྷུངས་པའི་གྲོང་མི་དེའི་ཕྱོགས་སུ་མགྱོགས་མྱུར་བསྐྱོད། དྲག་ཏུ་རྒྱུག་པའི་གཙང་པོས་དབྱང་ཧྲུན་ཁོའོ་ཆུས་ཐེངས་མང་འཁྱེར་ཡང་ཁོང་གིས་ཆུར་ལྷུངས་པའི་རྒྱུས་མེད་གྲོང་མི་དེ་སྐྱོབ་ཆེད་ཕྱིར་བཤོལ་གཏན་ནས་བྱས་མེད། མཐར་ཁོང་གིས་ནུས་ཤུགས་ཡོད་རྒུས་ཆུར་ལྷུངས་བའི་གྲོང་མི་དེ་ཆུ་ངོས་སུ་འཐེན་པ་དང་ཆུ་ངོགས་སུ་འབུད་རྒྱག་བརྒྱབ།

སྐབས་དེ་དུས་ཆུ་ངོགས་སུ་ཡོང་བའི་གྲོང་མི་དང་ལས་རོགས་ཚོས་རོགས་པ་བྱེད་རྩིས་བྱས་ཀྱང་ཉིན་ཤས་བསྟུད་མར་ཆར་པ་བབས་པ་དང་གློ་བུར་དུ་དྲག་ཆར་བབས་པ་དེས་མ་གཞི་ནས་ཞེང་ཚད་དེ་ཙམ་ཆེན་པོ་མེད་པའི་ཆུ་བོ་རྦ་རླབས་དྲག་ཏུ་འཕྱུར་ཏེ་དབྱང་ཧྲུན་ཁོའོ་སླར་ཡང་ཆུས་འཁྱེར་ཏེ་ཡར་དོན་ཐུབ་མེད།

སྐབས་དེ་དུས་ཀྱི་གནས་ཚུལ་ལ་ཕྱིར་དྲན་བྱེད་སྐབས་དབྱང་ཧྲུན་ཁོའི་ལས་རོགས་ཁྲེན་ཀོང་ལེ་སེམས་སྡུག་ཆེན་པོ་བྱེད་ཀྱི་ཡོད། “གནས་ཚུལ་དེ་གློ་བུར་དུ་ཐོན་པས་ཁོང་གིས་གྲོང་མི་ཆུར་ལྷུངས་པ་མཐོང་མ་ཐག་ཕྱིར་བཤོལ་གཏན་ནས་མ་བྱས་པར་ཆུར་མཆོངས་པ་རེད། ང་ཚོ་དེ་གར་སླེབས་སྐབས་གཙང་ཆུས་ཁོང་སྨི་བཅུ་ཕྲག་ཁ་ཤས་འཁྱེར་ཚར་འདུག”ཅེས་བཤད། གནས་ཚུལ་ཐོན་རྗེས་ས་གནས་དེ་གའི་ཤང་སྲིད་གཞུང་གིས་རོགས་སྐྱོབ་མི་སྣ་སྒྲིག་འཛུགས་བྱས་ཏེ་ཆུ་ལམ་བརྒྱུད་འཚོལ་སྐྱོབ་ལས་དོན་སྤེལ་བ་དང་ཉེ་འགྲམ་གྱི་ཨར་ལས་བྱ་ཡུལ་དུའང་རྐོ་འདྲུའི་འཕྲུལ་འཁོར་བཏང་ནས་ཉེ་འཁོར་གྱི་ཆུ་བོའི་དུམ་བུ་དེར་རྩད་འཚོལ་བྱས་ཀྱང་དབྱང་ཧྲུན་ཁོའོ་རྙེད་མེད། དེ་རྗེས་ས་གནས་དེ་གའི་མངགས་གཏོང་ཁང་ནས་དབྱང་ཧྲུན་ཁོའོ་ཡི་སྐུ་ཕུང་རྙེད་པའི་ཡིད་སྐྱོ་བའི་གནས་ཚུལ་དེ་ཐོས།

“དབྱང་ཧྲུན་ཁོའོ་ཆུས་འཁྱེར་བའི་གནས་ཚུལ་དེ་ཡིད་ལ་དྲན་སྐབས་ང་རང་སེམས་ཧ་ཅང་སྡུག་གི་འདུག ཁོང་གིས་བྱ་སྤྱོད་དངོས་ལ་བརྟེན་ནས་གང་ཞིག་ལ་དཔའ་ངར་ཞུམ་མེད་ཟེར་བ་གསལ་བཤད་བྱས་ཡོད”ཅེས་གནས་ཚུལ་ཐོན་པའི་རྣམ་པར་ཕྱིར་དྲན་བྱེད་བཞིན་ཁྲེན་ཀོང་ལེའི་མིག་ཟུང་སླར་ཡང་དམར་པོར་གྱུར།

དབྱང་ཧྲུན་ཁོའོ་ཡིས་རང་གི་ཚེ་སྲོག་བློས་བཏང་ནས་གྲོང་མི་བསྐྱབས་པ་མ་ཟད། སྤྱི་ཚོགས་ཐོག་དྲང་ནུས་བརྒྱུད་སྤྲོད་དེ་བས་བྱས་ཡོད། 2024ལོའི་ཟླ་10ཚེས་9ཉིན། དབྱང་ཧྲུན་ཁོའོ་ཀྲུང་དབྱང་སྲིད་ཁྲིམས་ཨུ་ལྷན་གྱི་2024ལོའི་དུས་ཚིགས་གསུམ་པའི་བདེན་པའི་རྒྱབ་ལངས་ཀྱི་དཔའ་བོའི་མིང་ཐོར་བདམས་པ་དང་། ཆབ་མདོ་གྲོང་ཁྱེར་ཁ་རུབ་ཆུས་ཀྱིས་ཀྱང་དབྱང་ཧྲུན་ཁོའོ་ཡི་བདེན་པའི་རྒྱབ་ལངས་ལ་གཟེངས་བསྟོད་བྱེད་པའི་ཚོགས་ཆེན་འཚོགས་པ་རེད། དབྱང་ཧྲུན་ཁོའོ་ང་ཚོ་དང་ཁ་བྲལ་ཡང་ཁོང་གི་དཔའ་ངར་ཆེ་བའི་མཛད་རྗེས་ནམ་ཡང་མི་རྣམས་ཀྱི་སེམས་སུ་བརྟན་པོར་གནས་ངེས་རེད།