ཚེས་30ཉིན། རང་སྐྱོང་ལྗོངས་མི་དམངས་སྲིད་གཞུང་གཞུང་དོན་ཁང་གིས་ཡོངས་བསྒྲགས་ཚོགས་འདུ་འཚོགས་ནས། 2024ལོའི་དུས་ཚིགས་དང་པོ་ནས་གསུམ་པའི་བར་གྱི་ལྗོངས་ཡོངས་ཀྱི་དངུལ་རྩ་འཁོར་རྒྱུག་གནས་ཚུལ་ངོ་སྤྲོད་བྱས་པ་རེད།

དུས་ཚིགས་དང་པོ་ནས་གསུམ་པའི་བར་ལྗོངས་ཡོངས་ཀྱི་དངུལ་རྩའི་ཁོངས་གཏོགས་ཀྱིས་གནད་སྨིན་ནུས་ལྡན་ངང་དངུལ་ལོར་སྲིད་ཇུས་དོན་འཁྱོལ་བྱས་པས། དངུལ་རྩའི་སྤྱི་འབོར་རྒྱུན་མཐུད་དང་མགྱོགས་མྱུར་འཕར་བ་དང་། མ་དངུལ་བསྡུ་སྒྲིལ་གྱི་གྲུབ་ཆ་རྒྱུན་མཐུད་ལེགས་སུ་ཕྱིན་པ། མ་དངུལ་བསྡུ་སྒྲིལ་གྱི་མ་གནས་བརྟན་པོའི་ངང་ཆག་པ། ཚོང་དོན་གྱི་ཕྱི་འབྲེལ་གཏོང་ཡོང་ཤུགས་ཆེར་འཕར་བ་བཅས་བྱུང་ནས། རང་ལྗོངས་ཀྱི་དཔལ་འབྱོར་བརྟན་པོའི་ངང་ལེགས་སུ་འགྲོ་བར་དངུལ་ལོར་དང་དངུལ་རྩའི་ཁོར་ཡུག་བཟང་པོ་ཞིག་བཏོད་ཡོད།

དུས་ཚིགས་དང་པོ་ནས་གསུམ་པའི་བར། ལྗོངས་ཡོངས་ཀྱི་སྤྱི་ཚོགས་ཀྱི་མ་རྩ་བསྡུ་སྒྲིལ་གཞི་ཁྱོན་གསོག་འབོར་སྒོར་དུང་ཕྱུར་9429.41ཟིན་ནས་དུས་མཚུངས་ལས་20.78%འཕར་བ་དེ་རྒྱལ་ཡོངས་ཀྱི་ཆ་སྙོམས་ཆུ་ཚད་ལས་བརྒྱ་ཆའི་གྲངས་12.78ཀྱིས་མཐོ་བ་ཡོད། ཟླ་དང་པོ་ནས་དགུ་པའི་བར། སྤྱི་ཚོགས་ཀྱི་མ་དངུལ་བསྡུ་སྒྲིལ་གྱི་གཞི་ཁྱོན་འཕར་ཚད་སྒོར་དུང་ཕྱུར་1486.41ཟིན་པ་དེ་དུས་མཚུངས་ལས་སྒོར་དུང་ཕྱུར་788.44འཕར་ཡོད། ལྗོངས་ཡོངས་ཀྱི་རང་དངུལ་དང་ཕྱི་དངུལ་གྱི་དངུལ་བུན་ཁག་གི་ལྷག་འབོར་སྒོར་དུང་ཕྱུར་6781.45ཟིན་པ་དེ་དུས་མཚུངས་ལས་13.83%འཕར་བ་དང་། ཟླ་14བསྟུད་མར་གྲངས་གནས་གཉིས་ཀྱི་འཕར་ཚད་རྒྱུན་འཁྱོངས་ཐུབ་པ་དེ་ལྗོངས་ཡོངས་ཀྱི་དུས་ཚིགས་དང་པོ་ནས་གསུམ་པའི་བར་གྱི་ＧＤＰའཕར་ཚད་ལས་བརྒྱ་ཆའི་གྲངས་7.63གྱིས་མཐོ་བ་བྱུང་ནས། བོད་ཀྱི་དཔལ་འབྱོར་འཕར་བར་དེ་བས་ནུས་ལྡན་གྱི་དངུལ་རྩའི་འདེགས་སྐྱོར་བྱས་ཡོད་པ་རེད།