ཕྱི་འབྲེལ་པུའི་མགྲིན་ཚབ་པས།
ཨ་རིས་ཀྲུང་གོའི་ཐའེ་དབན་ས་ཁུལ་ལ་ཨ་སྒོར་དུང་ཕྱུར་19.88རི་བའི་གོ་མཚོན་འཚོང་རྒྱུའི་ཆོག་མཆན་སྤྲད་པའི་སྐོར་གྱི་གསར་འགོད་པའི་འདྲི་བར་ལན་བཏབ་པ།
ཉེ་ཆར་ཕྱི་འབྲེལ་པུའི་མགྲིན་ཚབ་པས་ཨ་རིས་ཀྲུང་གོའི་ཐའེ་དབན་ས་ཁུལ་ལ་ཨ་སྒོར་དུང་ཕྱུར་19.88རི་བའི་གོ་མཚོན་འཚོང་རྒྱུའི་ཆོག་མཆན་སྤྲད་པའི་སྐོར་གྱི་གསར་འགོད་པའི་འདྲི་བར་ལན་བཏབ་པ་རེད།
གསར་འགོད་པ་ཞིག་གིས། ཉིན་ཤས་གོང་ཨ་རིའི་རྒྱལ་སྲུང་པུས་ཆ་འཕྲིན་ཁྱབ་བསྒྲགས་བྱས་ནས་ཨ་རིའི་རྒྱལ་དོན་ཁང་གིས་ཐའེ་དབན་ལ་བསྡོམས་ཨ་སྒོར་དུང་ཕྱུར་19.88རི་བའི་དམག་སྤྱོད་གོ་མཚོན་འཚོང་རྒྱུའི་ཆོག་མཆན་སྤྲད་པའི་ནང“རྒྱལ་ཁབ་ཀྱི་སྔོན་ཐོན་མཁའ་ཟོན་གྱི་འཕུར་མདེལ་མ་ལག”དང་ལེ་ཏ་མ་ལག་ཚུད་ཡོད། ཀྲུང་གོ་ཕྱོགས་ཀྱིས་དེའི་ཐད་དཔྱད་གཏམ་གང་ཞིག་སྤེལ་རྩིས་ཡོད་དམ་ཞེས་དྲིས།
མགྲིན་ཚབ་པས་བརྗོད་དོན། ཨ་རིས་ཀྲུང་གོའི་ཐའེ་དབན་ས་ཁུལ་ལ་གོ་མཚོན་ཕྱིར་ཚོང་བྱེད་པ་ནི་ཀྲུང་གོ་གཅིག་གི་རྩ་དོན་དང་ཀྲུང་ཨའི་མཉམ་འབྲེལ་སྤྱི་བསྒྲགས་གསུམ་དང་། ལྷག་པར་དུ“8·17”སྤྱི་བསྒྲགས་ཀྱི་གཏན་འབེབས་ལས་ཚབས་ཆེན་འགལ་བ་དང་། ཀྲུང་གོའི་བདག་དབང་དང་བདེ་འཇགས་ཀྱི་ཁེ་ཕན་ལ་བཙན་གནོད་ཚབས་ཆེན་བྱས་པ། ཀྲུང་ཨའི་འབྲེལ་བར་གཏོར་བཤིག་ཚབས་ཆེན་བཏང་བ། ཐའེ་དབན་མཚོ་འགག་གི་ཞི་བདེ་བརྟན་ལྷིང་ལ་གནོད་འཚེ་བཏང་བ། “ཐའེ་དབན་རང་བཙན”གྱི་ཁ་ཕྲལ་ཕྱོགས་གཏོགས་ལ་ནོར་འཁྲུལ་གྱི་བརྡ་རྟགས་ཚབས་ཆེན་བཏང་བ་ཞིག་བཅས་རེད། ཀྲུང་གོ་ཕྱོགས་ཀྱིས་རྒོལ་གཏམ་དྲག་པོ་གཏོང་བ་དང་ངོ་རྒོལ་མཐའ་གཅིག་ཏུ་བྱས་ནས་ཨ་རི་ཕྱོགས་ལ་དྲང་ནན་གྱི་འབྲེལ་གཏུག་བྱས་པ་ཡིན།
མགྲིན་ཚབ་པས་བརྗོད་དོན། ཨ་རིས“ཐའེ་དབན་ལ་བརྟེན་ནས་ཀྲུང་གོར་ཚོད་འཛིན”དང“གོ་མཚོན་གྱི་ཐོག་ནས་རང་བཙན་ལ་ངན་སྐུལ་བྱེད་པ”དེ་ཨ་རི་ཕྱོགས་ཀྱི་འགོ་ཁྲིད་པའི“ཐའེ་དབན་རང་བཙན་ལ་རྒྱབ་སྐྱོར་མི་བྱེད་པའི”རྣམ་འགྱུར་དང་རྦད་དེ་རྒྱབ་འགལ་རེད་ལ། ཕྱོགས་གཉིས་པོས་ཀྲུང་ཨའི་འབྲེལ་བ་བརྟན་པོ་ཡོང་བར་འབད་བརྩོན་བྱེད་པ་དང་རྦད་དེ་རྒྱབ་འགལ་ཡང་རེད། ཀྲུང་གོ་ཕྱོགས་ཀྱིས་ཨ་རི་ཕྱོགས་ཀྱིས་ཐའེ་དབན་ལ་དྲག་ཆས་སྤྲོས་རྒྱུ་འཕྲལ་མར་མཚམས་འཇོག་དང་ཐའེ་དབན་མཚོ་འགག་གི་ཞི་བདེ་དང་བརྟན་ལྷིང་ལ་གཏོར་བཤིག་གཏོང་བའི་ཉེན་ཁ་ཆེ་བའི་བྱེད་སྤྱོད་སྤེལ་མཚམས་འཕྲལ་མར་འཇོག་དགོས་པའི་སྐུལ་འདེབས་བྱེད་རྒྱུ་ཡིན། ཀྲུང་གོ་ཕྱོགས་ཀྱིས་ཟློག་ལན་མཐའ་གཅིག་ཏུ་སློག་རྒྱུ་དང་འབྲེལ་དགོས་ངེས་ཀྱི་བྱེད་ཐབས་མཐའ་དག་སྤྱད་དེ་རྒྱལ་ཁབ་ཀྱི་བདག་དབང་དང་། བདེ་འཇགས། མངའ་ཁོངས་ཆ་ཚང་བཅས་ལ་སྲུང་སྐྱོབ་མཐའ་གཅིག་ཏུ་བྱ་རྒྱུ་ཡིན།