ཀྲུང་གོ་དང་པུ་རུ་ནེས་རྒྱུད་འདྲེས་ཆུ་འབྲས་ཞིང་ལས་ཚན་རྩལ་གྱི་མཉམ་ལས་ལ་ཤུགས་སྣོན་བརྒྱབ་པ།
ཉིན་ཤས་གོང་། ཀྲུང་གོ་དང་པུ་རུ་ནེའི་རྒྱུད་འདྲེས་ཆུ་འབྲས་ཀྱི་མཐོ་རིམ་རིགས་གཅིག་མཁས་ཅན་གྱི་བློ་འདྲིའི་རྣམ་གྲངས་ལག་བསྟར་མཛད་སྒོ་པུ་རུ་ནེའི་རྒྱལ་ས་སེ་རི་པེ་ཀ་མཚོ་ཁུག་གྲོང་ཁྱེར་དུ་འཚོགས་པ་རེད། ཀྲུང་གོའི་རིགས་གཅིག་མཁས་ཅན་ཚོགས་པས་ལག་རྩལ་སློབ་ཁྲིད་དང་སྤེལ་རེས་སོགས་རིམ་སྤེལ་བྱེད་སྒོ་བརྒྱུད་པུ་རུ་ནེ་དང་རྒྱུད་འདྲེས་ཆུ་འབྲས་ཞིང་ལས་ཚན་རྩལ་གྱི་མཉམ་ལས་ལ་སྔར་བས་ཤུགས་སྣོན་བརྒྱབ་པ་རེད།
རྣམ་གྲངས་ལག་ལེན་བསྟར་འགོ་ཚུགས་རྗེས་ཡོན་ལུང་ཕིང་ཞིང་ལས་ཚན་རྩལ་མཐོ་བའི་མ་རྐང་ཚད་ཡོད་ཀུང་སི་དང་། ཧུའུ་ནན་རྒྱུད་འདྲེས་ཆུ་འབྲས་ཞིབ་འཇུག་ལྟེ་གནས། ཧུའུ་ནན་ཞིང་ལས་སློབ་ཆེན་སོགས་ཚན་པའི་ཀྲུང་གོའི་རིགས་གཅིག་མཁས་ཅན་ཚོས་རྒྱུད་འདྲེས་ཆུ་འབྲས་བདམས་གསོ་འདེབས་གསོ་དང་། ནད་འབུ་འགོག་བཅོས། ས་རྒྱུ་ལེགས་བཅོས། ཆུ་འབྲས་ལ་ལུད་རྒྱག་པ་བཅས་ལ་དམིགས་ནས་པུ་རུ་ནེ་དང་སློབ་ཁྲིད་གསོ་སྦྱོང་དང་ལག་རྩལ་སྤེལ་རེས་གཏིང་ཟབ་བྱས་པ་རེད།
པུ་རུ་ནེའི་དམའ་རིམ་ཐོན་ཁུངས་དང་ཡུལ་སྐོར་པུའི་ལས་འགན་རྒྱུན་འཛིན་དྲུང་ཡིག་ཐུའུ་ཏི་ཡ་ཏིས། ཀྲུང་གོའི་རིགས་གཅིག་མཁས་ཅན་གྱི་ཤེས་བྱ་དང་ཉམས་མྱོང་དེ་པུ་རུ་ནེས་རྒྱུད་འདྲེས་ཆུ་འབྲས་ཀྱི་འཕེལ་རྒྱས་ཆུ་ཚད་མཐོ་རུ་གཏོང་བའི་ངོས་ནས་བརྗོད་ན་ཧ་ཅང་རྩ་ཆེན་པོ་ཞིག་རེད་ཅེས་བརྗོད། པུ་རུ་ནེའི་སྲིད་གཞུང་ཞིང་ལས་སྡེ་ཚན་གྱི་དཔོན་རིགས་དང་། མཐོ་རིམ་ཞིབ་འཇུག་སྒྲིག་གཞིའི་འཐུས་མི། ལག་ལེན་གྱི་ཉམས་མྱོང་ཕུན་སུམ་ཚོགས་པའི་ཞིང་ལས་མི་སྣ་བཅས་ད་ཐེངས་ཀྱི་གསོ་སྦྱོང་དང་སྤེལ་རེས་ལ་ཞུགས་ཡོད་པ་རེད།