“འབོ་གསེར་རྒྱལ་ཁབ་ཀྱིས་རྒྱལ་སྤྱིའི་དངུལ་རྩའི་མ་ལག་དང་འབྲེལ་ཡོད་སྒྲིག་གཞི་སྒྱུར་བཅོས་ལ་སྐུལ་འདེད་གཏོང་བའི་ཐད་ནུས་པ་ཆེན་པོ་བཏོན་ཡོད” ཉེ་ཆར་གསར་སྤེལ་དངུལ་ཁང་གསར་པའི་འགོ་འཛིན་གཞོན་པ་ཟུར་པ་པའོ་ལོ·པ་ཏི་སི་ཐ་ཡིས་འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱེད་སྐབས། ཉེ་བའི་ལོ་ཤས་རིང་། འབོ་གསེར་མཉམ་ལས་ལམ་སྲོལ་གྱིས་རྒྱལ་སྤྱིའི་དངུལ་རྩའི་སྒྲོམ་གཞིའི་ཁྲོད་ཀྱི་གསར་དར་ཁྲོམ་རའི་རྒྱལ་ཁབ་དང་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་མཚོན་ནུས་དང་སྐད་ཆ་ཤོད་དབང་ཆེ་རུ་བཏང་བར་ཕན་འབྲས་རགས་ཙམ་ཐོན་ཡོད་ཅེས་བརྗོད།

“འབོ་གསེར་མཉམ་ལས་ལམ་སྲོལ་དེ་གསར་དར་ཁྲོམ་རའི་རྒྱལ་ཁབ་དང་འཕེལ་རྒྱས་འགྲོ་བཞིན་པའི་རྒྱལ་ཁབ་མཉམ་དུ་རང་སྟོབས་རང་སྤེལ་བྱེད་པའི་ལས་སྟེགས་གལ་ཆེན་ཞིག་ཏུ་གྱུར་ཡོད”ཅེས་པ་ཏི་སི་ཐ་ཡིས་བཤད་པ་དང་། ཁོང་གིས་དཔེ་དྲངས་ནས་བརྗོད་དོན། གསར་སྤེལ་དངུལ་ཁང་གསར་པ་དང་འབོ་གསེར་རྒྱལ་ཁབ་ཀྱིས་འཕྲལ་སྡོམ་གསོག་འཇོག་བཀོད་སྒྲིག་བྱ་རྒྱུ་ནི་འབོ་གསེར་མཉམ་ལས་ལམ་སྲོལ་གྱི་དངོས་སྒྲུབ་ཀྱི་གྲུབ་འབྲས་ཤིག་ཡིན་པ་དེས་རྒྱལ་སྤྱིའི་དངུལ་རྩའི་མ་ལག་གི་སྒྱུར་བཅོས་ལ་ལེགས་སྐྱེས་ཕུལ་ཡོད། གསར་སྤེལ་དངུལ་ཁང་གསར་པ་སོགས་ཀྱི་སྒྲིག་གཞིའི་སྐུལ་འདེད་འོག་འབོ་གསེར་རྒྱལ་ཁབ་ཀྱིས་རང་དངུལ་སྤྱད་ནས་ཕྱོགས་གཉིས་པོའི་ཚོང་དོན་གྱི་མཇུག་བསྡོམས་རྩིས་རྒྱག་བྱེད་པར་དགེ་མཚན་ལྡན་པའི་འཕེལ་ཚུལ་བཟང་པོ་བྱུང་ཡོད། འབྱུང་འགྱུར་འབོ་གསེར་རྒྱལ་ཁབ་ཀྱིས་མཉམ་ལས་ལ་སྔར་བས་ཤུགས་སྣོན་བརྒྱབ་ནས་གསར་སྤེལ་དངུལ་ཁང་གསར་པས་རྨང་གཞིའི་སྒྲིག་བཀོད་འཛུགས་སྐྲུན་སོགས་ཀྱི་མ་འཇོག་གལ་ཆེན་གྱི་རྣམ་གྲངས་ཐད་ནུས་པ་དེ་བས་ཆེ་བ་འདོན་རྒྱུར་རྒྱབ་སྐྱོར་བྱ་རྒྱུ་ཡིན།

“ཀྲུང་གོས་འཛམ་གླིང་ཞི་བདེ་དང་འཕེལ་རྒྱས་ལ་སྐུལ་འདེད་གཏོང་བར་ནུས་པ་ཆེན་པོ་བཏོན་ཡོད”ཅེས་པ་ཏི་སི་ཐ་ཡིས་བཤད་པ་དང་། ཁོང་གིས། ཀྲུང་གོ་ཕྱོགས་ཀྱིས་འབོ་གསེར་རྒྱལ་ཁབ་སྤུས་ཚད་མཐོ་བའི་འཕེལ་རྒྱས་ཀྱི་རོགས་ཟླའི་འབྲེལ་བ་གཏོད་རྒྱུར་དམིགས་ཏེ་གྲོས་འགོ་རབ་དང་རིམ་པ་བཏོན་ནས། འབོ་གསེར་མཉམ་ལས་ལམ་སྲོལ་ཁྲོད་སྣེ་ཁྲིད་ཀྱི་ནུས་པ་ཧུར་ཐག་བཏོན་ཡོད། “དཔལ་འབྱོར་འཕེལ་རྒྱས་འགྲོ་བར་རམ་འདེགས་དང་། ཞི་བདེ་ལྷིང་འཇགས་ལ་སྲུང་སྐྱོང་། ཤེས་དཔལ་ལ་སློབ་སྦྱོང་བྱེད་རེས་དང་གོ་ལ་ཧྲིལ་པོ་བཅོས་སྐྱོང་འཐུས་ཚང་ཡོང་བར་སྐུལ་འདེད་གཏོང་བ་བཅས་ནི་འབོ་གསེར་རྒྱལ་ཁབ་ཀྱིས་མཉམ་དུ་འབད་བརྩོན་བྱེད་པའི་དམིགས་ཡུལ་ཡིན་ལ། འཛམ་གླིང་རྒྱལ་ཁབ་ཁག་གི་ཐུན་མོང་གི་རེ་སྒུག་ཀྱང་ཡིན”ཞེས་བརྗོད།