ཤིན་ཧྭ་གསར་འགྱུར་ཁང་པེ་ཅིང་ནས་ཟླ་10ཚེས་29ཉིན་གློག་འཕྲིན་འབྱོར་གསལ། ཟླ་10ཚེས་29ཉིན་རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཁམ་ཕུ་ཁྲེའི་རྒྱལ་པོ་ཤིས་ཧ་མུའུ་ཉིར་གློག་འཕྲིན་བཏང་སྟེ་ཁོང་ཁྲི་ལ་འཁོད་ནས་ལོ་20འཁོར་བར་རྟེན་འབྲེལ་ཞུས་པ་རེད།

ཞི་ཅིན་ཕིང་གིས་གསུངས་དོན། རྒྱལ་པོ་ཤིས་ཧ་མུའུ་ཉི་ཁྲི་ལ་འཁོད་ཚུན། ཁམ་ཕུ་ཁྲེའི་ཞི་བདེ་བརྟན་ལྷིང་དང་། འཕེལ་རྒྱས་དར་རྒྱས། རྒྱལ་སྤྱིའི་འགྲོ་འོང་བཅས་ཀྱི་ཐད་ལེགས་སྐྱེས་གལ་ཆེན་ཕུལ་ནས་དུས་ཡུན་རིང་པོའི་ནང་ཀྲུང་ཁམ་གྱི་སྲོལ་རྒྱུན་མཛའ་གྲོགས་དར་སྤེལ་གཏོང་བར་གཞོལ་ཡོད། ང་ཚོ་ཐུན་མོང་གི་སྣེ་ཁྲིད་འོག་ཀྲུང་གོ་དང་ཁམ་ཕུ་ཁྲེའི་ལས་དབང་གཅིག་མཐུན་ཚོགས་པ་དེ་སྤུས་ཚད་མཐོ་བ་དང་། ཆུ་ཚད་མཐོ་བ། ཚད་གཞི་མཐོ་བ་བཅས་ཀྱི་དུས་རབས་གསར་པར་སླེབས་ནས“རྡོ་རྗེ་ཕ་ལམ་གྱི་ཟུར་དྲུག”གི་མཉམ་ལས་སྒྲོམ་གཞི་ཟམ་མི་ཆད་པར་གཏིང་ཟབ་དང་ཏན་ཏིག་ངང་འཕེལ་རྒྱས་བྱུང་བ་དང་། “བཟོ་ལས་འཕེལ་རྒྱས་བར་ཁྱམས”དང“ཉ་དང་འབྲས་ཀྱི་བར་ཁྱམས”འཛུགས་སྐྲུན་ལ་འཕེལ་རྒྱས་ཆེན་པོ་བྱུང་བ། “ཀྲུང་གོ་དང་ཁམ་ཕུ་ཁྲེའི་མི་ཆོས་རིག་གནས་སྤེལ་རེས་ལོའི”ལས་དོན་ཡག་པོ་སྤེལ་བ་བཅས་ལས་རྒྱལ་ཁབ་གཉིས་པོའི་མི་དམངས་ལ་དངོས་དངོས་རྗེན་རྗེན་གྱི་ཕན་པ་ཐོབ་ཡོད།

ཞི་ཅིན་ཕིང་གིས་ནན་བཤད་གནང་དོན། ཀྲུང་ཁམ་རྒྱལ་ཁབ་གཉིས་པོ་ནི་སྐྱིད་སྡུག་མཉམ་མྱོང་དང་ཕན་ཚུན་ལྟ་སྐྱོང་གི་གྲོགས་པོ་བློས་ཐུབ་ཅིག་ཡིན། ངས་ཀྲུང་གོ་དང་ཁམ་ཕུ་ཁྲེའི་དབར་གྱི་འབྲེལ་བ་འཕེལ་རྒྱས་ལ་ཚད་མཐོའི་མཐོང་ཆེན་དང་ཁམ་ཕུ་ཁྲེའི་རྒྱལ་པོ་ཚང་དབར་གྱི་སྲོལ་རྒྱུན་མཛའ་གྲོགས་འབྲེལ་བར་མཐོང་ཧ་ཅང་ཆེན་པོ་བྱེད་ཀྱི་ཡོད། རྒྱལ་པོ་ཤིས་ཧ་མུའུ་ཉི་དང་མཉམ་དུ་འབད་བརྩོན་བྱས་ནས་རྒྱལ་ཁབ་གཉིས་པོའི་འབྲེལ་བའི་འཐབ་ཇུས་སྣེ་ཁྲིད་ལ་ཤུགས་སྣོན་བརྒྱབ་སྟེ་ཀྲུང་གོ་དང་ཁམ་ཕུ་ཁྲེའི་ལས་དབང་གཅིག་མཐུན་ཚོགས་པ་འཛུགས་པར་སྐུལ་འདེད་བཏང་ནས་གཡུར་ཟའི་གྲུབ་འབྲས་དེ་བས་མང་བ་ཐོབ་པར་བྱེད་འདོད་ཡོད།