ཡིད་ལ་གནམ་འོག་འཆང་རྒྱུ་རྒྱུན་འཁྱོངས་བྱས་ནས་མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་རྒྱུར་སྐུལ་འདེད་བཏང་བ།
ཀྲུང་གོ་གུང་ཁྲན་ཏང་ནི་ཀྲུང་གོ་མི་དམངས་ལ་བདེ་སྐྱིད་དོན་གཉེར་བྱེད་མཁན་དང་ཀྲུང་ཧྭ་མི་རིགས་ལ་བསྐྱར་དར་དོན་གཉེར་བྱེད་མཁན་གྱི་ཏང་ཞིག་རེད་ལ། མིའི་རིགས་ལ་ཡར་ཐོན་དོན་གཉེར་བྱེད་མཁན་དང་འཛམ་གླིང་ལ་སྤྱི་སྙོམས་ཆེན་པོ་དོན་གཉེར་བྱེད་མཁན་གྱི་ཏང་ཞིག་ཀྱང་རེད། དུས་རབས་གསར་པ་ཤར་ཚུན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མིའི་རིགས་ཀྱི་སྤྱི་ཚོགས་ཀྱི་ལོ་རྒྱུས་ཉམས་མྱོང་དང་འཕེལ་རྒྱས་ཀྱི་ཆོས་ཉིད་ཁོང་དུ་གཏིང་ཟབ་ཆུད་པ་དང་། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ཀྱི་བསམ་བློ་དང་བློ་གྲོས་བསྡུ་ལེན། ཀྲུང་ཧྭ་མི་རིགས་བསྐྱར་དར་རླབས་པོ་ཆེའི་འཐབ་ཇུས་སྤྱི་ཡོངས་དང་འཛམ་གླིང་ལ་ལོ་བརྒྱའི་རིང་འཕྲད་མ་མྱོང་བའི་འགྱུར་ལྡོག་ཆེན་པོར་སྤྱི་འདོམས་བཅས་གནང་སྟེ། ཀྲུང་ཧྭ་མི་རིགས་ཀྱི་མདུན་ལམ་དང་ལས་དབང་དེ་མིའི་རིགས་ཀྱི་སྤྱི་ཚོགས་ཀྱི་འབྱུང་འགྱུར་འཕེལ་རྒྱས་དང་གཅིག་གྱུར་བྱས་ནས་མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་པའི་འདུ་ཤེས་གལ་ཆེན་གསར་གཏོད་རང་བཞིན་གྱི་སྒོ་ནས་བཏོན་གནང་ཡོད།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ནན་བཤད་གནང་དོན། “མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་རྒྱུར་སྐུལ་འདེད་གཏོང་བ་དེ་ལམ་ལུགས་གཅིག་གིས་ལམ་ལུགས་གཞན་ཞིག་གི་ཚབ་བྱེད་པ་ཞིག་མིན་ལ། ཤེས་དཔལ་གཅིག་གིས་ཤེས་དཔལ་གཞན་ཞིག་གི་ཚབ་བྱེད་པའང་མིན་པར་སྤྱི་ཚོགས་ཀྱི་ལམ་ལུགས་མི་འདྲ་བ་དང་། འདུ་ཤེས་འཛིན་སྟངས་མི་འདྲ་བ། ལོ་རྒྱུས་དང་རིག་གནས་མི་འདྲ་བ། འཕེལ་རྒྱས་ཀྱི་ཆུ་ཚད་མི་འདྲ་བ་བཅས་ཀྱི་རྒྱལ་ཁབ་ཀྱིས་རྒྱལ་སྤྱིའི་ལས་དོན་ཁྲོད་ཁེ་ཕན་མཉམ་གནས་དང་། ཁེ་དབང་མཉམ་སྤྱོད། འགན་འཁྲི་མཉམ་འཁུར་བཅས་བྱས་ཏེ། མཛེས་སྡུག་ལྡན་པའི་འཛམ་གླིང་མཉམ་དུ་བསྐྲུན་པའི་སྤྱིའི་བགོད་གྲངས་ཆེ་ཤོས་གྲུབ་པར་བྱས་ཡོད” མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་པར་ཡུན་རིང་ཞི་བདེ་དང་། ཡོངས་ཁྱབ་བདེ་འཇགས། ཐུན་མོང་དར་རྒྱས། སྒོ་དབྱེ་བསྟུན་མཁས། དྭངས་གཙང་མཛེས་སྡུག་བཅས་ཀྱི་འཛམ་གླིང་ཞིག་བསྐྲུན་རྒྱུ་དེ་འབད་འཐབ་ཀྱི་དམིགས་ཚད་དུ་འཛིན་པ་དང་། མཉམ་གྲོས་དང་། མཉམ་སྐྲུན། མཉམ་སྤྱོད་བཅས་ཀྱི་གོ་ལ་ཧྲིལ་པོའི་བཅོས་སྐྱོང་ལ་སྐུལ་འདེད་གཏོང་རྒྱུ་དེ་མངོན་འགྱུར་གྱི་ཐབས་ལམ་དུ་འཛིན་པ། ཞི་བདེ་དང་། འཕེལ་རྒྱས། དྲང་གཞག དྲང་བདེན། དམངས་གཙོ། རང་དབང་བཅས་མིའི་རིགས་ཡོངས་ཀྱི་ཐུན་མོང་གི་རིན་ཐང་ལག་ལེན་བསྟར་རྒྱུ་དེ་ཡོངས་ཁྱབ་ཀྱི་གཞི་འཛིན་སར་བྱེད་པ། རྒྱལ་སྤྱིའི་འབྲེལ་བ་གསར་པ་འཛུགས་རྒྱུར་སྐུལ་འདེད་གཏོང་རྒྱུ་དེ་གཞི་རྩའི་འདེགས་སྐྱོར་དུ་བྱེད་པ། གོ་ལ་ཧྲིལ་པོའི་འཕེལ་རྒྱས་ཀྱི་གྲོས་འགོ་དང་། གོ་ལ་ཧྲིལ་པོའི་བདེ་འཇགས་ཀྱི་གྲོས་འགོ གོ་ལ་ཧྲིལ་པོའི་ཤེས་དཔལ་གྱི་གྲོས་འགོ་བཅས་དོན་འཁྱོལ་བྱ་རྒྱུ་དེ་འཐབ་ཇུས་ཀྱི་ཁྲིད་སྟོན་དུ་འཛིན་པ། སྤུས་ཚད་མཐོ་བའི“རྒྱུད་གཅིག་ལམ་གཅིག”མཉམ་སྐྲུན་བྱ་རྒྱུ་དེ་ལག་ལེན་གྱི་ལས་སྟེགས་སུ་བརྩི་བ་བཅས་བྱེད་དགོས། ཚན་རིག་དང་མཐུན་ལ་ཆ་ཚང་བ་དང་ནང་དོན་ཕུན་སུམ་ཚོགས་པའི་བསམ་བློའི་མ་ལག་ཅིག་ཡིན་པའི་མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་རྒྱུ་དེས་མར་ཁེ་སི་རིང་ལུགས་ཀྱི་འཛམ་གླིང་ལོ་རྒྱུས་ཀྱི་རིགས་པའི་གཞུང་ལུགས་དང་གཅིག་མཐུན་ཚོགས་པའི་བསམ་བློ་ཕུན་སུམ་ཚོགས་སུ་དང་འཕེལ་རྒྱས་བཏང་བ་དང་། ལོ་རྒྱུས་འཕེལ་རྒྱས་ཀྱི་དུས་བབ་ཆེན་པོ་གསལ་རྟོགས་དང་མིའི་རིགས་ཀྱི་སྤྱི་ཚོགས་འཕེལ་རྒྱས་ཀྱི་ཆོས་ཉིད་ལ་ངོས་འཛིན་གཏིང་ཟབ་བྱུང་བ་མངོན་ཡོད། དེའི་ནང་འདུས་པའི་ཞི་བདེ་ལས་དམག་འཁྲུག་མི་དགོས་པ་དང་། འཕེལ་རྒྱས་ལས་དབུལ་ཕོངས་མི་དགོས་པ། སྒོ་དབྱེ་ལས་སྒོ་རྒྱག་མི་དགོས་པ། མཉམ་ལས་ལས་ཁ་གཏད་དུ་མི་ལངས་པ། མཐུན་སྒྲིལ་ལས་ཁ་ཕྲལ་མི་དགོས་པ། འདྲ་མཉམ་ལས་བཙན་པོ་ཧམ་ཤེད་མི་དགོས་པ་བཅས་ཀྱི་རིན་ཐང་གི་གདམ་ག་མི་སེམས་སུ་སྔར་བས་གཏིང་ཟབ་ཟུག་ཡོད། གླེང་མོལ་མཉམ་ལས་ཀྱི་རྣམ་པ་གསར་པ་འཚོལ་ཞིབ་དང་ཞི་བདེ་འཕེལ་རྒྱས་ཀྱི་འབྱུང་འགྱུར་གསར་པ་མཉམ་དུ་དོན་གཉེར་བྱེད་པར། མཛེས་སྡུག་ལྡན་པའི་འཆར་གཞི་བཀོད་པ་དང་འཛམ་གླིང་གང་འདྲ་ཞིག་བསྐྲུན་རྒྱུ་དང་འཛམ་གླིང་འདི་ཇི་ལྟར་བསྐྲུན་རྒྱུའི་ཐད་ཀྲུང་གོའི་ཇུས་གཞི་བཏོན་ཡོད།
མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་པའི་འདུ་ཤེས་ཀྱི་ཁྲིད་སྟོན་འོག་བོད་ཀྱིས་རྒྱལ་ཁབ་ཀྱི་སྒོ་དབྱེའི་སྤྱིའི་འཐབ་ཇུས་དང་འབྲེལ་མཐུད་ཧུར་ཐག་བྱས་ཏེ་སྤུས་ཚད་མཐོ་བའི“རྒྱུད་གཅིག་ལམ་གཅིག”མཉམ་སྐྲུན་བྱ་རྒྱུ་དེ་གཙོ་རྐང་དུ་འཛིན་ནས། ཀྲུང་ནེའི་མཐའ་མཚམས་ཉོ་ཚོང་དང་མཉམ་ལས་ལས་དོན་སོགས་མཐུན་སྦྱོར་ལམ་སྲོལ་གྱི་ནུས་པ་འདོན་སྤེལ་གང་ལེགས་བྱེད་པ་དང་། ཨེ་ཤེ་ཡ་ལྷོ་མར་ཕྱོགས་པའི་སྒོ་དབྱེའི་བགྲོད་ལམ་གལ་ཆེན་ནུས་ཤུགས་ཡོད་རྒུས་བསྐྲུན་པ། ཧི་མ་ལ་ཡ་བརྒལ་བའི་ཕན་ཚུན་འབྲེལ་མཐུད་ཀྱི་ལངས་གཟུགས་དྲ་རྒྱ་བསྐྲུན་པ། མཉམ་ལས་ཀྱི་ཁྱབ་ཁོངས་རྒྱུན་ཆད་མེད་པར་རྒྱ་ཆེར་གཏོང་བ། དམངས་སེམས་གཅིག་མཐུན་ལ་སྐུལ་འདེད་ཤུགས་ཆེན་གཏོང་བ་བཅས་བྱས་ནས། “རྒྱུད་གཅིག་ལམ་གཅིག”གི་མཉམ་ལས་ལ་དགེ་མཚན་ལྡན་པའི་གྲུབ་འབྲས་རྒྱུན་ཆད་མེད་པར་ཐོབ་རྒྱུར་སྐུལ་འདེད་བཏང་ཡོད། དུས་རབས་གསར་པའི་བོད་ཀྱིས་འཛམ་གླིང་གི་ཕྱོགས་སུ་སྐྱོད་པའི་སྒོ་མོ་ཕྱེ་བ་དང་འཛམ་གླིང་དང་འབྲེལ་མཐུད་བྱེད་པའི་སྦྲེལ་ཟམ་བཙུགས་ཡོད། སླད་ཕྱིན་བློ་བརྟན་འགྱུར་མེད་ངང་སྒོ་དབྱེ་རྒྱ་ཆེར་གཏོང་བ་དང་རྒྱལ་སྤྱིའི་མཉམ་ལས་བར་མཐོངས་རྒྱ་ཆེར་ཧུར་ཐག་བཏང་ནས་མཐའ་འཁོར་རྒྱལ་ཁབ་དང་ས་ཁུལ་དང་ལྷག་བསམ་ཟོལ་མེད་ངང་ཕན་ཚུན་འབྲེལ་བ་བྱེད་པ་དང་། འཕེལ་རྒྱས་ཀྱི་གོ་སྐབས་མཉམ་སྤྱོད་དང་མཛེས་སྡུག་ལྡན་པའི་འབྱུང་འགྱུར་མཉམ་དུ་གཏོད་པ། གཉིས་ཁེ་མཉམ་ལས་ཀྱི་རོགས་ཟླའི་དྲ་བ་རྒྱུན་ཆད་མེད་པར་དམ་ཚགས་སུ་གཏོང་བ་བཅས་བྱས་ཏེ་མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་པར་ལེགས་སྐྱེས་ཧུར་ཐག་འབུལ་རྒྱུ་རེད།