ཉིན་ཤས་གོང་རང་སྐྱོང་ལྗོངས་ཚོང་དོན་ཐིང་གིས《འཛད་སྤྱོད་དངོས་ཟོག་གསར་རྙིང་བརྗེ་བར་ཤུགས་སྣོན་རྒྱག་པར་རྒྱབ་སྐྱོར་བྱ་རྒྱུའི་སྐོར་གྱི་བོད་རང་སྐྱོང་ལྗོངས་ཚོང་དོན་ཐིང་སོགས་སྡེ་ཚན་བདུན་གྱི་ཁ་གསབ་བརྡ་ཐོ》བཀྲམ་པའི་ནང་རླངས་འཁོར་གསར་རྙིང་བརྗེ་བར་ཡུལ་བསྟུན་ཇུས་བསྟར་དང་ཁྱབ་རྒྱ་ཆེ་རུ་བཏང་བས་ཕན་འབྲས་མངོན་གསལ་དོད་པོ་ཐོན་ཡོད་པ་རེད། དུས་ཚིགས་དང་པོ་ནས་གསུམ་པའི་བར་ལྗོངས་ཡོངས་སུ་གསར་དུ་ཐོ་འགོད་བྱས་པའི་འཕྲུལ་སྒུལ་འཁོར་རིགས་ཁྲི་10.9ལས་བརྒལ་བ་དེ་དུས་མཚུངས་ལས་10.4%འཕར་ནས་ཟླ་དང་པོ་ནས་དྲུག་པའི་བར་ལས་བརྒྱ་ཆའི་གྲངས་5.8མགྱོགས་སུ་ཕྱིན་པའི་ནང་གསར་དུ་ཐོ་འགོད་བྱས་པའི་ནུས་རྒྱུ་གསར་པའི་རླངས་འཁོར་6760ལས་བརྒལ་བ་དེ་དུས་མཚུངས་ལས་182.96%འཕར་ཡོད་པ་རེད།

གསར་རྙིང་བརྗེ་བ་ལས་རླངས་འཁོར་གྱི་འཛད་སྤྱོད་མགྱོགས་མྱུར་འཕར་བ་དང་དུས་མཚུངས་བེད་མེད་འཕྲུལ་སྒུལ་འཁོར་རིགས་ཚུར་བསྡུ་དང་བཤིག་ཚད་མགྱོགས་མྱུར་འཕར་བར་སྐུལ་ཁྲིད་ཐུབ་ཡོད། ལྗོངས་ཡོངས་སུ་བེད་མེད་འཕྲུལ་སྒུལ་འཁོར་རིགས་5570ཚུར་བསྡུ་དང་བཤིག་པ་དེ་དུས་མཚུངས་ལས་21%འཕར་ནས་དུས་ཚིགས་གཉིས་པ་ལས་བརྒྱ་ཆའི་གྲངས་9.5ཡིས་མགྱོགས་པ་ཡོད་པ་རེད།

ངོ་སྤྲོད་བྱས་པར་གཞིགས་ན། གསར་རྙིང་བརྗེ་བའི་སྲིད་ཇུས་ལག་བསྟར་བྱས་ཚུན། རང་སྐྱོང་ལྗོངས་ཚོང་དོན་ཐིང་གིས་རྒྱལ་ཁབ་ཀྱི་བེད་མེད་རླངས་འཁོར་གསར་བརྗེ་དང་རླངས་འཁོར་རྙིང་པ་གསར་བརྗེའི་རྨང་གཞིའི་ཐོག་རང་ལྗོངས་ཀྱི་དོན་དངོས་དང་ཟུང་འབྲེལ་བྱས་ཏེ་རླངས་འཁོར་གསར་པ་ཉོ་བའི་ནང་དོན་ཁ་སྣོན་བརྒྱབ་པ་དང་འབྲེལ། ཞིང་འབྲོག་མང་ཚོགས་ཀྱིས་རླངས་འཁོར་ཉོ་བ་དང་ནུས་རྒྱུ་གསར་པའི་རླངས་འཁོར་འཛད་སྤྱོད་ཀྱི་ཁ་གསབ་ཚད་གཞི་ཡང་མཐོ་རུ་བཏང་བ་རེད། དེའི་ནང་ཞིང་འབྲོག་མང་ཚོགས་ཀྱིས་རླངས་འཁོར་གསར་དུ་བརྗེ་བའམ་ཡང་ན་རླངས་འཁོར་གསར་པ་ཉོ་སྐབས་རླངས་འཁོར་རེར་ཁ་གསབ་སྒོར་2000མང་དུ་བཏང་བ་དང་། འཛད་སྤྱོད་པས་རླངས་འཁོར་གསར་པ་བརྗེ་བའམ་ཡང་ན་རླངས་འཁོར་གསར་པ་ཉོ་སྐབས་ནུས་རྒྱུ་གསར་པའི་རླངས་འཁོར་ཡིན་ན་རླངས་འཁོར་རེར་ཁ་གསབ་སྒོར་1000མང་དུ་བཏང་བ་རེད།