“ཀྲུང་གོས་བློ་བརྟན་འགྱུར་མེད་ངང་ལྷོ་ལྷོ་དང་ཕྱོགས་གསུམ་མཉམ་ལས་ལ་རྒྱབ་སྐྱོར་བྱས་ནས་གོ་ལ་ཧྲིལ་པོའི་ཞིང་ལས་དང་གྲོང་གསེབ་འཕེལ་རྒྱས་ལ་སྐུལ་འདེད་གཏོང་བའི་ཁྲོད་ནུས་པ་གལ་ཆེན་བཏོན་ཏེ་གོ་ལ་ཧྲིལ་པོའི་ལྷོ་ཕྱོགས་རྒྱལ་ཁབ་ཀྱིས་མཉམ་འབྲེལ་རྒྱལ་ཚོགས་ཀྱི་2030ལོའི་རྒྱུན་མཐུད་ཆོག་པའི་འཕེལ་རྒྱས་ཀྱི་གྲོས་རིམ་དོན་འཁྱོལ་བྱ་ཆེད་སྟོབས་ཤུགས་སྐྱེས་སུ་ཕུལ་ཡོད”ཅེས་མཉམ་འབྲེལ་རྒྱལ་ཚོགས་རྒྱལ་སྤྱིའི་ཞིང་ལས་འཕེལ་རྒྱས་ཐེབས་རྩའི(ཞིང་ལས་འཕེལ་རྒྱས་ཐེབས་རྩའི)ལས་རོགས་ཙུང་ཚའེ་གཞོན་པ་ཏུའོ་ནར·པུའུ་ལང་གིས་ཉེ་ཆར་འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱེད་སྐབས་བརྗོད།

པུའུ་ལང་གིས་ཞིང་ལས་འཕེལ་རྒྱས་ཐེབས་རྩ་དང་ཀྲུང་གོ་གཉིས་ཀྱིས་ཐོག་མཐའ་བར་གསུམ་དུ་རོགས་ཟླའི་འབྲེལ་བ་དམ་ཟབ་རྒྱུན་འཁྱོངས་བྱས་ནས་གྲོང་གསེབ་ཀྱི་དབུལ་པོ་ཉུང་གཏོང་དང་། ཞིང་ལས་འཕེལ་རྒྱས། གོ་ལ་ཧྲིལ་པོའི་འབྲུ་རིགས་བདེ་འཇགས་སོགས་ཁྱབ་ཁོངས་སུ་མཉམ་ལས་རྒྱ་ཁྱབ་བྱས་པར་གྲུབ་འབྲས་མངོན་གསལ་དོད་པོ་ཐོབ་ཡོད། ཉེ་བའི་ལོ་ཤས་རིང་། ཞིང་ལས་འཕེལ་རྒྱས་ཐེབས་རྩ་དང་ཀྲུང་གོས་ལྷོ་ལྷོ་དང་ཕྱོགས་གསུམ་མཉམ་ལས་ལ་རྒྱུན་ཆད་མེད་པར་ཤུགས་སྣོན་བརྒྱབ་ཡོད།

འདི་ལོའི་ཟླ་6པར་ཀྲུང་གོ་ཕྱོགས་ཀྱིས་ཞིང་ལས་འཕེལ་རྒྱས་ཐེབས་རྩར་ལྷོ་ལྷོ་དང་ཕྱོགས་གསུམ་མཉམ་ལས་ཀྱི་ཆེད་དོན་ཐེབས་རྩ་མུ་མཐུད་བཙུགས་ནས“གོ་ལ་ཧྲིལ་པོའི་ལྷོ་ཕྱོགས”ཀྱི་ཞིང་ལས་འཕེལ་རྒྱས་ལ་རྒྱབ་སྐྱོར་བྱ་རྒྱུའི་ཁྱབ་བསྒྲགས་བྱས་པ་རེད། “དེ་ཐོག་ནས་གོ་ལ་ཧྲིལ་པོའི་ཞིང་ལས་ཀྱི་རྒྱུན་མཐུད་ཆོག་པའི་འཕེལ་རྒྱས་ལ་སྐུལ་འདེད་གཏོང་བའི་ཐད་ཀྲུང་གོས་རྒྱབ་སྐྱོར་བརྟན་པོ་བྱེད་པ་མཚོན་ཐུབ”པུའུ་ལང་གིས་ཀྲུང་གོས་ཞིང་ལས་འཕེལ་རྒྱས་ཐེབས་རྩ་སོགས་ལས་སྟེགས་བརྒྱུད་དབུལ་པོ་ཉུང་གཏོང་གི་བྱེད་ཐབས་དང་། དྲ་ཐོག་ཚོང་དོན་འཕེལ་རྒྱས། ཞིང་ལས་ལག་རྩལ་ཁྱབ་གདལ་སོགས་ཚུད་པའི་ཀྲུང་གོའི་གྲུབ་འབྲས་ཐོབ་པའི་འཕེལ་རྒྱས་ཀྱི་ཉམས་མྱོང་མཉམ་སྤྱོད་བྱས་པའི་ངོས་འཛིན་བྱེད་ཀྱི་ཡོད་པ་རེད། “ཀྲུང་གོས་གོ་ལ་ཧྲིལ་པོའི་ལྷོ་ཕྱོཌ་རྒྱལ་ཁབ་གཞན་དག་དང་མཉམ་དུ་འཕེལ་རྒྱས་ཀྱི་བརྒྱུད་རིམ་ཁྲོད་འཕྲད་པའི་རྙོག་འཛིང་ཆེ་བའི་འགྲན་སློང་ལ་ཁ་གཏད་ཧུར་ཐག་བཅག་ནས་རྒྱུན་མཐུད་ཆོག་པའི་འཕེལ་རྒྱས་ཡོང་བར་བློ་གྲོས་དང་སྟོབས་ཤུགས་སྐྱེས་སུ་འབུལ་བཞིན་ཡོད”

ཀྲུང་གོས་གྲོང་གསེབ་ཕྱོགས་ཡོངས་ནས་དར་རྒྱས་ཡོང་བར་སྐུལ་འདེད་གཏོང་བཞིན་ཡོད། པུའུ་ལང་གིས་ཀྲུང་གོའི་རྒྱ་ཆེའི་གྲོང་གསེབ་ས་ཁུལ་ལ་འཕེལ་རྒྱས་ཀྱི་འཕོ་འགྱུར་མངོན་འགྱུར་བྱུང་ནས་འཕེལ་རྒྱས་འགྲོ་བཞིན་པའི་རྒྱལ་ཁབ་གཞན་དག་ལ་དཔྱད་གཞིར་འཛིན་ཆོག་པ་དང་ཁྱབ་གདལ་གཏོང་ཆོག་པའི་ཐག་གཅོད་ཇུས་གཞི་མཁོ་འདོན་བྱས་ཡོད་ཅེས་བརྗོད། ཁོང་གིས་མི་རིང་བའི་གོང་ཞིང་ལས་འཕེལ་རྒྱས་ཐེབས་རྩ་དང་ཀྲུང་གོ་མཉམ་ལས་བྱས་ནས“ཀྲུང་གོ-རྒྱལ་སྤྱིའི་ཞིང་ལས་འཕེལ་རྒྱས་ཐེབས་རྩའི་ལྷོ་ལྷོ་དང་ཕྱོགས་གསུམ་མཉམ་ལས་ཐེབས་རྩའི”ལོ་འཁོར་གྱི་བགྲོ་གླེང་ཚོགས་འདུ་འཚོགས་པ་དང་ཚོགས་འདུའི་ཐོག་ཀྲུང་གོ་ཕྱོགས་ཀྱི་འཐུས་མིས་སྐྱེ་ཁམས་ཞིང་ལས་དང་ཞིང་ལས་ཡུལ་སྐོར་གྱི་དཔེ་མཚོན་མཉམ་སྤྱོད་བྱས་ཡོད། “རྩ་ཆེའི་ཉམས་མྱོང་དེ་དག་གིས་ཞིང་ལས་དང་གྲོང་གསེབ་ཀྱི་རྒྱུན་མཐུད་ཆོག་པའི་འཕེལ་རྒྱས་མངོན་འགྱུར་ཡོང་བར་འཚོལ་ཞིབ་བྱེད་པའི་རྒྱལ་ཁབ་ལ་དོན་སྙིང་གལ་ཆེན་ལྡན་ཡོད”