མི་རིགས་ཡོངས་ཀྱི་རིག་གནས་གསར་གཏོད་གསར་སྐྲུན་གྱི་གསོན་ཤུགས་འཕེལ་བར་བྱེད་དགོས།
གསར་གཏོད་གསར་སྐྲུན་ནི་རིག་གནས་ཀྱི་སྐྱེ་སྟོབས་དང་རིག་གནས་དར་རྒྱས་གོང་འཕེལ་ཡོང་བའི་གསོན་ཤུགས་ཀྱི་འབྱུང་ཁུངས་ཡིན་ལ། ཤེས་དཔལ་རྒྱུན་མཐུད་དར་རྒྱས་འགྲོ་བའི་རྫོགས་མཐའ་མེད་པའི་སྒུལ་ཤུགས་ཀྱང་རེད། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་ཐོག་སྤྱི་ཚོགས་རིང་ལུགས་ཀྱི་རིག་གནས་རྒྱལ་ཁབ་སྟོབས་ཆེན་འཛུགས་སྐྲུན་ལ་དམིགས་ཏེ། རིག་གནས་ཀྱི་སྒྲིག་སྲོལ་ལམ་སྲོལ་སྒྱུར་བཅོས་ཟབ་ཏུ་བཏང་ནས་མི་རིགས་ཡོངས་ཀྱི་རིག་གནས་གསར་གཏོད་གསར་སྐྲུན་གྱི་གསོན་ཤུགས་འཕེལ་བར་བྱེད་དགོས་པའི་ལས་འགན་གལ་ཆེན་བཏོན་ཡོད།
རིག་གནས་ཀྱི་སྒྲིག་སྲོལ་ལམ་སྲོལ་སྒྱུར་བཅོས་ཟབ་ཏུ་གཏོང་བར་མི་རིགས་ཡོངས་ཀྱི་གསར་གཏོད་གསར་སྐྲུན་གྱི་གསོན་ཤུགས་འཕེལ་བར་བྱེད་པ་དེ་ལྟེ་བའི་ལྷུ་ཚིགས་ལ་བརྩིས་ནས། རིག་གནས་འཕེལ་རྒྱས་ཀྱི་ཆོས་ཉིད་ལ་བརྩི་སྲུང་དང་གསོན་ཤུགས་འཕེལ་བར་ཕན་པའི་རིག་གནས་དོ་དམ་གྱི་སྒྲིག་སྲོལ་དང་ཐོན་སྐྱེད་གཉེར་སྐྱོང་ལམ་སྲོལ་འཐུས་སྒོ་ཚང་དུ་མགྱོགས་མྱུར་གཏོང་བ་དང་། དགོས་མེད་ཀྱི་སྲིད་འཛིན་ཐེ་གཏོགས་ཉུང་དུ་གཏོང་བ། རིག་གནས་གསར་གཏོད་བྱེད་རིང་ཁྲོམ་རའི་ལམ་སྲོལ་གྱི་ནུས་པ་ཆེ་རུ་གཏོང་བ་བཅས་བྱེད་དགོས། རིག་གནས་དང་ཚན་རྩལ་མཉམ་འདྲེས་འཕེལ་རྒྱས་ཀྱི་འཕེལ་ཕྱོགས་སྟངས་འཛིན་བྱས་ནས་ཚན་རྩལ་གྱི་བྱ་ཐབས་སྤྱད་དེ་རིག་གནས་ཁྱབ་ཁོངས་ཀྱི་མཁོ་སྤྲོད་ཕྱོགས་ཀྱི་གྲུབ་ཆའི་རང་བཞིན་གྱི་སྒྱུར་བཅོས་དང་མཁོ་དགོས་ཕྱོགས་ཀྱི་ཞབས་ཞུའི་རྣམ་པ་གསར་གཏོད་ལ་ཕན་སྐུལ་དང་། དེང་རབས་ཀྱི་རིག་གནས་ཐོན་ལས་མ་ལག་དང་ཁྲོམ་རའི་མ་ལག་འཐུས་སྒོ་ཚང་དུ་གཏོང་བ། རིག་གནས་ཁྲོམ་རའི་བྱེད་པོ་སྣ་ཚོགས་འཕེལ་རྒྱས་དང་རྒྱ་སྟོབས་ཆེ་རུ་འགྲོ་བར་སྐུལ་འདེད་གཏོང་བ། རིག་གནས་ལས་རྣམ་དང་རིག་གནས་འཛད་སྤྱོད་བྱེད་སྟངས་གསར་པ་སྐྱེད་སྲིང་བཅས་བྱས་ཏེ་རྒྱ་ཆེའི་མི་དམངས་མང་ཚོགས་ཀྱི་བསམ་པའི་རིག་གནས་ཀྱི་དགོས་མཁོ་དེ་བས་ཡག་པོ་སྐོང་དགོས།
རིག་གནས་གསར་གཏོད་གསར་སྐྲུན་ལ་སྲོལ་རྒྱུན་རིག་གནས་སྔོག་འདོན་དང་། ལེགས་སྒྲིག རྒྱུན་འཛིན་བཅས་བྱེད་རྒྱུ་ཚུད་ཡོད་ལ། རིག་གནས་ཀྱི་རྣམ་པ་གསར་པ་འཚོལ་ཞིབ་དང་། གསར་སྐྲུན། ལག་ལེན་བཅས་བྱེད་རྒྱུའང་ཚུད་ཡོད་པས། མེ་ཏོག་མཉམ་བཞད་དང་མཁས་བརྒྱ་འགྲན་གླེང་གི་བྱེད་ཕྱོགས་མཐའ་འཁྱོངས་བྱས་ནས་རིག་གཞུང་དམངས་གཙོ་དང་སྒྱུ་རྩལ་དམངས་གཙོ་དར་སྤེལ་གང་ལེགས་གཏོང་བ་དང་། བསམ་བློར་བཅིངས་འགྲོལ་དང་བློ་ཁོག་ཆེན་པོས་འཚོལ་ཞིབ་བྱེད་པར་བསྔགས་སྐུལ། དགེ་མཚན་ལྡན་ལ་སྐྱོན་བྲལ་དང་གུ་ཡངས་ཞི་མཐུན་གྱི་རྣམ་པ་གཏོད་པ་བཅས་བྱས་ཏེ། རིག་གནས་གསར་གཏོད་ཀྱི་འབྱུང་ཁུངས་ཡོད་ཚད་འདོན་སྤེལ་གང་ལེགས་དང་རིག་གནས་གསར་སྐྲུན་གྱི་གསོན་ཤུགས་ཡོད་ཚད་རྒྱུན་མཐུད་འཕེལ་བར་བྱེད་དགོས། གསར་སྐྲུན་རང་བཞིན་གྱི་གཞན་སྒྱུར་དང་གསར་གཏོད་རང་བཞིན་གྱི་འཕེལ་རྒྱས་བརྒྱུད་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་དེ་སྤྱི་ཚོགས་རིང་ལུགས་ཀྱི་སྤྱི་ཚོགས་དང་འཚམ་མཐུན་ཡོང་བར་སྐུལ་འདེད་དང་། རྩ་བ་མི་བརྗེད་པ་དང་། ཕྱི་ཡོང་བསྡུ་ལེན། འབྱུང་འགྱུར་ལ་ཕྱོགས་པ་བཅས་མཐའ་འཁྱོངས་དང་། རྒྱུན་འཛིན་བྱེད་རིང་གཞན་སྒྱུར་དང་སློབ་སྦྱོང་བྱེད་རིང་ཚད་བརྒལ་ཡོང་བ་བཅས་བྱས་ཏེ་རིག་གནས་གསར་གཏོད་གསར་སྐྲུན་ལ་རྒྱུན་ཆད་མེད་པར་སྐུལ་འདེད་གཏོང་དགོས།
གསར་གཏོད་གསར་སྐྲུན་གྱི་མཐའ་མའི་དམིགས་ཡུལ་ནི་མི་དམངས་ལ་ཞབས་འདེགས་ཞུ་རྒྱུ་དང་སྤྱི་ཚོགས་རིང་ལུགས་ལ་ཞབས་འདེགས་ཞུ་རྒྱུ་དེ་ཡིན་པས། རིག་གནས་ཀྱི་ཞབས་ཞུ་དང་རིག་གནས་ཐོན་རྫས་མཁོ་སྤྲོད་ལམ་སྲོལ་ལེགས་སུ་བཏང་ནས་མི་དམངས་ལྟེ་བར་འཛིན་པའི་གསར་རྩོམ་གྱི་སྟོན་ཕྱོགས་མཐའ་འཁྱོངས་དང་། གྲུབ་འབྲས་ཐོབ་པ་དང་ཤེས་ལྡན་པ་ཐོན་པ་ཟུང་འབྲེལ་དང་བརྩམས་ཆོས་ལ་དམ་འཛིན་དང་ཁོར་ཡུག་ལ་དམ་འཛིན་འབྲེལ་མཐུད་མཐའ་འཁྱོངས། རིག་གནས་བྱ་གཞག་དང་རིག་གནས་ཐོན་ལས་ཕྱོགས་ཡོངས་ནས་དར་རྒྱས་གོང་འཕེལ་གཏོང་བ། སྤྱི་པའི་རིག་གནས་ཞབས་ཞུའི་ཆུ་ཚད་མཐོ་རུ་ཧུར་ཐག་གཏོང་བ་བཅས་བྱས་ཏེ། སྤུས་ཚད་མཐོ་བའི་རིག་གནས་མཁོ་སྤྲོད་ལ་བརྟེན་ནས་མི་དམངས་ཀྱི་རིག་གནས་ཐོབ་སྣང་དང་བདེ་སྐྱིད་ཚོར་སེམས་ཆེ་རུ་གཏོང་དགོས། གྲོང་ཁྱེར་དང་གྲོང་གསེབ་ཀྱི་སྤྱི་པའི་རིག་གནས་ཞབས་ཞུ་ཚད་གཞི་ཅན་དང་དོ་སྙོམས་ཅན་ལ་རྒྱུན་མཐུད་སྐུལ་འདེད་བཏང་ནས་གྲོང་ཁྱེར་དང་གྲོང་གསེབ་ཀྱི་རིག་གནས་ཐོན་ཁུངས་བཀོད་སྒྲིག་ལེགས་སུ་གཏོང་བ་དང་། སྤྱི་པའི་རིག་གནས་ཞབས་ཞུའི་མ་ལག་འཐུས་སྒོ་ཚང་དུ་གཏོང་བ། གཞི་རྩའི་སྤྱི་པའི་རིག་གནས་ཞབས་ཞུའི་ཁེབས་རྒྱ་དང་འཕྲོད་ཤུགས་ཆེ་རུ་གཏོང་བ། གྲོང་ཁྱེར་དང་གྲོང་གསེབ་ཀྱི་སྤྱི་པའི་རིག་གནས་ཞབས་ཞུའི་ཧེ་བག་ཆུང་དུ་གཏོང་བ་བཅས་བྱས་ཏེ་མི་དམངས་ལ་དེ་བས་འཐུས་སྒོ་ཚང་བ་དང་། དེ་བས་ཕུན་སུམ་ཚོགས་པ། དེ་བས་སྤུས་ཚད་མཐོ་བ་བཅས་ཀྱི་བསམ་པའི་རིག་གནས་ཀྱི་འཚོ་བ་ལོངས་སྤྱོད་ཐུབ་པར་བྱེད་དགོས།