སློབ་མའི་འཚར་ལོངས་དེ་དགེ་རྒན་གྱིས་སློབ་གསོ་སློབ་ཁྲིད་ལ་བློ་རྩེ་གཅིག་ཏུ་གཞོལ་བ་དང་འབྲེལ་བ་ཡོད། “སྤྱི་ཚོགས་ཀྱི་ལས་དོན་སློབ་གྲྭར་སྤེལ་བའི་ཆེད་དོན་བཅོས་སྒྲིག་ལས་དོན་སྤེལ་རྗེས་དགེ་རྒན་ཚོར་སློབ་ཁྲིད་ལ་ཞིབ་འཇུག་བྱེད་པའི་དུས་ཚོད་དང་སེམས་ནུས་སྔར་བས་མང་དུ་ཕྱིན་ཡོད”ཅེས་ཤིའུ་ཧུའུ་སློབ་ཆུང་གི་སློབ་སྤྱི་ཀྲུའུ་ཤང་དབྱང་གིས་དགེ་རྒན་མི་ཉུང་བ་ཞིག་གི་མྱོང་ཚོར་བརྗོད།

དགེ་རྒན་གྱི་ཁུར་པོ་ཡང་དུ་གཏོང་རྒྱུ་དེ་བྱང་ཚད་མཐོ་བའི་དགེ་རྒན་གྱི་དཔུང་ཁག་འཛུགས་སྐྱོང་དང་སྤུས་ཚད་མཐོ་བའི་སློབ་གསོ་འཕེལ་རྒྱས་དང་འབྲེལ་བ་ཡོད། འདི་ལོའི་ཟླ་4པར། ཀྲུང་དབྱང་སློབ་གསོ་ལས་དོན་འགོ་ཁྲིད་ཚོགས་ཆུང་གི་དྲུང་ཡིག་ཚོགས་ཆུང་གིས་བརྡ་ཐོ་བཀྲམ་ནས་སྤྱི་ཚོགས་ཀྱི་ལས་དོན་སློབ་གྲྭར་སྤེལ་རྒྱུ་ཚད་ལྡན་དུ་བཏང་ནས་སློབ་གྲྭ་འབྲིང་ཆུང་གི་དགེ་རྒན་གྱི་ཁུར་པོ་ཡང་དུ་གཏོང་བའི་ཆེད་དོན་བཅོས་སྒྲིག་ལས་དོན་བཀོད་སྒྲིག་བྱས་པ་མ་ཟད། སློབ་གསོ་སློབ་ཁྲིད་དང་འབྲེལ་བ་མེད་པའི་བྱེད་སྒོ་དང་ལས་ཀ་སློབ་གྲྭར་གང་བྱུང་དུ་སྤེལ་བ་དང་དེ་བཞིན་སྤྱི་ཚོགས་ཀྱི་ལས་དོན་སློབ་གྲྭར་སྤེལ་རིང་བྱེད་སྒོ་སྤེལ་བ་ཙམ་ལས་ཕན་འབྲས་ཐོན་མིན་ལ་དོ་སྣང་མི་བྱེད་པའི་ཕྱི་ཚུལ་རིང་ལུགས་གཅིག་སྡུད་བཅོས་སྒྲིག་དང་སྤྱི་ཚོགས་ཀྱི་ལས་དོན་སློབ་གྲྭར་སྤེལ་བར་ཞིབ་མཆན་འགོད་པ་དང་ཐོ་འགོད་པའི་ལམ་ལུགས་དང་ལྟ་འདོམས་ཀྱི་ཕུགས་ཕན་ལམ་སྲོལ་འཛུགས་པ་དང་འཐུས་སྒོ་ཚང་དུ་བཏང་ནས་སློབ་གསོ་སློབ་ཁྲིད་ཀྱི་ཁོར་ཡུག་བཟང་པོ་གཏོད་དགོས་པའི་བླང་བྱ་བཏོན་ཡོད།

ལམ་ལུགས་སྔོན་འགྲོར་བྱས་ཏེ་སློབ་གྲྭར་གཞི་འཛིན་ས་ཡོད་པར་བྱས་པ།

བླང་བྱ་གཞིར་བཟུང་། ས་གནས་ཁག་གིས་ཉེ་བའི་ལོ་ཤས་རིང་གི་སྤྱི་ཚོགས་ཀྱི་ལས་དོན་སློབ་གྲྭར་སྤེལ་ཚུལ་ཕྱོགས་ཡོངས་ནས་མཐིལ་རྟོགས་གྲལ་བཤེར་དང་། སྤྱི་ཚོགས་ཀྱི་ལས་དོན་སློབ་གྲྭར་སྤེལ་བའི“འགག་སྒོ་སྲུང་དཀའ་བ”སོགས་སྲིད་ཇུས་ཀྱི་འགག་གནད་སེལ་རྒྱུར་དམིགས་པ། ཆོག་འཐུས་ཚད་གཞི་བཟོ་བ། གནད་དོན་དག་ཐེར་ལ་ཤུགས་སྣོན་རྒྱག་པ་བཅས་བྱས་པ་མ་ཟད། སྤྱི་ཚོགས་ཀྱི་ལས་དོན་སློབ་གྲྭར་སྤེལ་བའི་ཞིབ་མཆན་འགོད་པའི་ཐོ་འགོད་ལམ་ལུགས་བཟོས་ནས་ཞིང་ཆེན་དང་། གྲོང་ཁྱེར། རྫོང་བཅས་རིམ་གསུམ་གྱི་སྤྱི་ཚོགས་ཀྱི་ལས་དོན་སློབ་གྲྭར་སྤེལ་བའི་སྤྱི་འབོར་ཚོད་འཛིན་ནན་པོ་བྱས་ཡོད་ལ། མིང་ཐོ་དཀར་པོ་བཟོས་ནས་སྤྱི་ཚོགས་ལ་ཁྱབ་བསྒྲགས་ཀྱང་བྱས་པ་རེད།

འདི་ལོའི་ཟླ་7པར། ཀྲེ་ཅང་ཞིང་ཆེན་གྱིས་2024ལོའི་སློབ་གྲྭ་འབྲིང་ཆུང་གི་སྤྱི་ཚོགས་ཀྱི་ལས་དོན་སློབ་གྲྭར་སྤེལ་ཆོག་པའི་མིང་ཐོ་དཀར་པོ་ཁྱབ་བསྒྲགས་བྱས་པ་དང་མིང་ཐོ་དཀར་པོའི་ནང་ཚུད་མེད་རིགས་ཚང་མ་སློབ་གྲྭར་སྤེལ་མི་ཆོག་པ་དང་དགོས་ངེས་དབང་གིས་གནས་སྐབས་མང་དུ་གཏོང་དགོས་རིགས་ལ་ཞིབ་མཆན་འགོད་པ་དང་ཐོ་འགོད་གྲ་སྒྲིག་གི་གོ་རིམ་ལག་བསྟར་ནན་པོ་བྱས་ནས་སློབ་གྲྭ་ཚང་མས་ལོ་འཁོར་རེར་སྤྱི་ཚོགས་ཀྱི་ལས་དོན་ཁག་6ལས་སྤེལ་མི་ཆོག་པའི་གཏན་འབེབས་བྱས་ཡོད།

ཀྲུའུ་ཤང་དབྱང་གིས་ཞིབ་མཆན་འགོད་པའི་ཐོ་འགོད་ལམ་ལུགས་ནན་པོ་ལག་བསྟར་བྱས་པར་བརྟེན་སྤྱི་ཚོགས་ཀྱི་ལས་དོན་དང་འབྲེལ་བ་མེད་པའི་བྱ་བ་སློབ་གྲྭའི་ཕྱི་རོལ་དུ་སྤེལ་དགོས། རྒྱུ་མཚན་དང་གཞི་འཛིན་ས་ཡོད་པས་སློབ་གྲྭས་ཁྱིམ་བདག་ལ་བརྡ་ཐོ་གང་བྱུང་དུ་མི་གཏོང་བ་དེས་ཁྱིམ་བདག་གི་ཁུར་པོ་དེ་བས་ཡང་དུ་ཕྱིན་ཡོད་ཅེས་བརྗོད།

ཉེ་དུས། ས་གནས་ཁག་གིས་སྤྱི་ཚོགས་ཀྱི་ལས་དོན་སློབ་གྲྭར་སྤེལ་བའི་མིང་ཐོ་དཀར་པོ་གཅིག་རྗེས་གཉིས་མཐུད་ངང་སྤྱི་ཚོགས་ལ་ཁྱབ་བསྒྲགས་བྱས་ཤིང་། ཧྲའན་ཤིས་ཞིང་ཆེན་གྱིས་ཁྱབ་བསྒྲགས་བྱས་པའི་མིང་ཐོ་དཀར་པོའི་ནང་སྣེ་ཁྲིད་སྡེ་ཚན་དང་། ལག་བསྟར་གྱི་གཞི་འཛིན་ས། སྤེལ་ཐེངས་སོགས་ཚང་མ་ཁ་གསལ་ཡོད་པ་དང་། ཧྲན་ཏུང་ཞིང་ཆེན་གྱི་མིང་ཐོ་དཀར་པོ་དེ་སློབ་གྲྭར་སྤེལ་བའི་བྱེད་ཐབས་ཚད་གཞིར་བྱས་ནས་ཆེད་དོན་སློབ་གྲྭར་སྤེལ་བ་དང་། ཐོན་ཁུངས་མཁོ་འདོན་བྱ་རྒྱུ་དེ་སློབ་གྲྭས་རང་བརྟེན་ངང་སྤེལ་བ། སློབ་གྲྭའི་རྒྱུན་གཏན་གྱི་སློབ་གསོ་སློབ་ཁྲིད་དང་འབྲེལ་འདྲིས་བཅས་ཁག་གསུམ་ལ་ཕྱེ་ཡོད་པ་རེད། སློབ་གསོ་པུའི་དགེ་རྒན་གྱི་ལས་དོན་སིའི་འགན་འཁུར་བས་ས་གནས་ཁག་གིས་སྲིད་ཇུས་དང་བྱ་ཐབས་སྔར་བས་ཞིབ་ཚགས་སུ་བཏང་ནས་ཞིབ་མཆན་ཐོ་འགོད་དང་མིང་ཐོ་དཀར་པོའི་ལམ་ལུགས་ཀྱི་རྩ་གནད་རང་བཞིན་དང་བཀོལ་སྤྱོད་རང་བཞིན་ཁ་གསལ་ཡོང་བ་བྱེད་དགོས་ཞེས་བརྗོད།

ཆོས་ཉིད་དང་བསྟུན་ནས་བྱེད་སྒོའི་སྤུས་ཚད་མཐོ་རུ་བཏང་བ།

ཤེས་རྟོགས་བྱུང་བར་གཞིགས་ན། ད་ཐེངས་སྤྱི་ཚོགས་ཀྱི་ལས་དོན་སློབ་གྲྭར་སྤེལ་རྒྱུ་ཚད་ལྡན་དུ་གཏོང་བའི་ཆེད་དོན་བཅོས་སྒྲིག་ཁྱབ་ཁོངས་ནང་སྤྱི་ཚོགས་ཀྱི་ལས་དོན་སློབ་གྲྭར་གང་བྱུང་སྤེལ་བའི་གནད་དོན་ཚུད་ཡོད་ལ། སློབ་གྲྭར་སྤེལ་རིང་ཐོན་སླ་བའི་ཕྱི་ཚུལ་རིང་ལུགས་ཀྱི་གནད་དོན་དཔེར་ན། ཉེར་སྤྱོད་མ་ལག་གང་བྱུང་དུ་སྤྱོད་པ་དང་ལས་ཀའི་ཚོགས་པ་དང་། གཱ་ཐོ་འགོད་པ། འབྲེལ་མཐུད་བྱེད་པ། འདྲི་གཞི་བཟོ་བ། པར་རྒྱག་པ་སོགས་ཚུད་ཡོད་པ་རེད། དེར་བརྟེན་ས་གནས་མང་པོ་ཞིག་གིས་སློབ་གྲྭར་སྤེལ་བའི་བྱེད་སྒོ་དེ་རིག་ཚན་སློབ་ཁྲིད་དང་། འཛིན་གྲྭ་དང་ཚོགས་པའི་ཚོགས་འདུ། སློབ་གྲྭའི་རིག་གནས་འཛུགས་སྐྱོང་སོགས་སློབ་གྲྭའི་སློབ་གསོ་དང་དོ་དམ་ལས་དོན་དང་ཟུང་འབྲེལ་དམ་ཟབ་བྱས་ནས་བྱེད་སྒོའི་ཁྱབ་ཁོངས་དང་དུས་ཡུན་ལ་ཚོད་འཛིན་ནན་པོ་བྱས་ཏེ་བྱེད་སྒོའི་སྤུས་ཚད་མཐོ་རུ་གཏོང་དགོས་པ་བཏོན་ཡོད།

སློབ་དུས་གོང་མར་ཧུའུ་ནན་ཁྲང་ཧྲ་གྲོང་ཁྱེར་གྱི་ཁྲང་ཅུན་པིན་ཅང་སློབ་འབྲིང་གིས་སྤེལ་བའི་ཚན་རྩལ་ཁང་གི་ཚན་རྩལ་ཁྱབ་གདལ་སློབ་གྲྭར་སྤེལ་བའི་བྱེད་སྒོར་སློབ་མ་ཚོའི་དགའ་བསུ་ཆེན་པོ་ཐོབ་ཡོད། ཧུའུ་ནན་ཞིང་ཆེན་ཚན་རྩལ་ཁང་གི་ལས་དོན་མི་སྣས་འགྲེམས་སྟོན་བྱས་པའི་ཡ་མཚན་ཅན་གྱི་ཚན་རིག་ཁྱབ་གདལ་གྱི་ཚོད་ལྟ་ཆུང་ཆུང་ལ་ཕྲུ་གུ་ཚོ་ཧང་སངས་ཡོད།

ཁྲང་ཅུན་པིན་ཅང་སློབ་འབྲིང་གི་སློབ་སྤྱི་ཧྲི་ཏུང་ཉི་ཡིས་ངོ་སྤྲོད་བྱས་པར་གཞིགས་ན། སློབ་གྲྭས་ལོ་ལྟར་ཚན་རྩལ་དུས་ཆེན་གཉེར་གྱི་ཡོད། ཚན་རྩལ་ཁང་གི་ཚན་རིག་ཁྱབ་གདལ་སློབ་གྲྭར་སྤེལ་བའི་བྱེད་སྒོ་དེ་སློབ་གྲྭའི་ལས་ཀའི་འཆར་གཞི་དང་མཉམ་འདྲེས་ཐུབ་པ་བྱེད་ཀྱི་ཡོད། ང་ཚོ་དང་ཧུའུ་ནན་ཞིང་ཆེན་ཚན་རྩལ་ཁང་གིས་སྔ་སྣུར་དུ་བྱེད་སྒོའི་ནང་དོན་བཀོད་སྒྲིག་དང་ཇུས་གཞི་བཟོས་ནས་སློབ་མའི་ཁྱད་ཆོས་ལ་གཞིགས་ཏེ་ཚན་རིག་སློབ་གསོ་སྤེལ་ནས་སློབ་མ་ཚོར་གྲུབ་འབྲས་དེ་བས་མང་བ་ཐོབ་པ་བྱེད་ཀྱི་ཡོད།

ལམ་སྲོལ་འཐུས་སྒོ་ཚང་དུ་བཏང་ནས་ཡུན་རིང་ཁུར་པོ་ཡང་དུ་བཏང་བ།

ཕུགས་ཕན་ལམ་སྲོལ་འཐུས་སྒོ་ཚང་དུ་གཏོང་རྒྱུར་དམིགས་ཏེ་ས་གནས་ཁག་གིས་ལྟ་ཞིབ་ཚད་ལེན་དང་། ཞིབ་དཔྱད། བརྡ་ཁྱབ་གཏོང་བ་སོགས་ཀྱི་བྱེད་ཐབས་བརྒྱུད་རྒྱུན་རྣམ་ཅན་གྱི་སྤྱི་ཚོགས་ལས་དོན་སློབ་གྲྭར་སྤེལ་བའི་ལས་དོན་ཚད་ལྡན་དུ་བཏང་ཡོད།

ཤེས་རྟོགས་བྱུང་བར་གཞིགས་ན། ལྟ་སྐུལ་དོ་དམ་ལམ་སྲོལ་འཐུས་སྒོ་ཚང་དུ་གཏོང་བའི་ཐད་ཀན་སུའུ་ཞིང་ཆེན་སློབ་གསོ་ཐིང་གིས་དགེ་རྒན་གྱི་ཁུར་པོ་ཡང་དུ་གཏོང་བའི“ཐོ་འགོད་གཅིག”གི་ལམ་སྲོལ་བཙུགས་ཏེ་སྤྱི་ཚོགས་ལ་ཕྱོགས་ནས་གནད་དོན་གྱི་ཁུངས་སྣེ་བསྡུ་རུབ་རྒྱ་ཁྱབ་བྱས་པ་དང་། ཡུན་ནན་ཞིང་ཆེན་གྱིས་དགེ་རྒན་གྱི་ཁུར་པོ་ཡང་དུ་གཏོང་བའི་འབྲེལ་ཡོད་གནས་ཚུལ་དེ་སྲིད་གཞུང་གིས་སྒྲུབ་པའི་སློབ་གསོའི་འགན་འཁྲི་ལྟ་སྐུལ་མཛུབ་ཁྲིད་ཀྱི་ཚོད་སྐོར་ནང་བཞག་པ། ཅང་སུའུ་ཞིང་ཆེན་གྱིས“ཟླ་རེར་ལྟ་ཞིབ་ཚད་ལེན་རེ་དང་དུས་ཚིགས་རེར་བརྡ་ཁྱབ་རེ་གཏོང་བའི”ལས་ཀའི་ལམ་སྲོལ་ལག་བསྟར་བྱས་ནས་སློབ་གྲྭ་ཁག་ཏུ་ལྟ་ཞིབ་ཚད་ལེན་ས་ཚིགས་བཙུགས་ཏེ་ས་ཁོངས་ཡོངས་ལ་ཁྱབ་པ་དང་སློབ་མཚམས་ཡོངས་ལ་ཁྱབ་པ་བྱས་ཡོད།

“དགེ་རྒན་གྱི་ཁུར་པོ་ཡང་དུ་གཏོང་རྒྱུ་དེ་དགེ་རྒན་གྱི་དཔུང་ཁག་དོ་དམ་སྒྱུར་བཅོས་ལ་ཤུགས་སྣོན་རྒྱག་པ་དང་དགེ་རྒན་དཔུང་ཁག་གི་ཁྱོན་ཡོངས་ཀྱི་བྱང་ཚད་མཐོ་རུ་གཏོང་རྒྱུ་སོགས‘སྣོན་ཐབས’རབ་དང་རིམ་པ་དང་སྤྱི་འདོམས་འཆར་འགོད་བྱེད་དགོས” ཀྲུང་གོ་སློབ་གསོ་ཚན་རིག་ཞིབ་འཇུག་ཁང་གི་ཞིབ་འཇུག་པ་ལི་ཤིན་ཚུའེ་ཡིས། དགེ་རྒན་གྱི་ཁུར་པོ་ཡང་དུ་གཏོང་རྒྱུ་དེ་ནི་བརྒྱུད་རིམ་ལྡན་པའི་འདུ་འགོད་ཅིག་ཡིན་པས་དགེ་རྒན་གྱི་ཐོན་ཁུངས་བཀོད་སྒྲིག་ལེགས་སུ་གཏོང་བ་དང་། དགེ་རྒན་གྱི་དོ་དམ་ལམ་ལུགས་འཐུས་སྒོ་ཚང་དུ་གཏོང་བ། སློབ་གསོའི་གདེང་འཇོག་སྒྱུར་བཅོས་གཏིང་ཟབ་ཏུ་གཏོང་བ་སོགས་ལ་སྡེབས་གཅིག་ཏུ་སྐུལ་འདེད་གཏོང་དགོས་པའི་ངོས་འཛིན་བྱས་པ་རེད།

སློབ་གསོ་པུའི་དགེ་རྒན་གྱི་ལས་དོན་སིའི་འགན་འཁུར་བས། ས་གནས་ཁག་གིས་ལས་ཀའི་ལམ་སྲོལ་སྔར་བས་འཐུས་སྒོ་ཚང་དུ་གཏོང་བ་དང་སྤྱི་འདོམས་མཐུན་སྦྱོར་ལ་ཤུགས་སྣོན་བརྒྱབ་ནས་དགེ་རྒན་གྱི་ཁུར་པོ་ཡང་དུ་གཏོང་ཆེད་ལམ་ལུགས་ཀྱི་འགན་ལེན་ནུས་ལྡན་བྱེད་པ་དང་འབྲེལ་ལྟ་སྐུལ་བྱེད་ཤུགས་སྔར་བས་ཆེ་རུ་གཏོང་བ་དང་འབྱུང་རྩ་ནས་དམ་འཛིན་དང་། བརྒྱུད་རིམ་ལ་ལྟ་སྐུལ་དོ་དམ། འགན་འཁྲི་བདའ་འདེད་བཅས་ལ་ཤུགས་སྣོན་བརྒྱབ་སྟེ་སྤྱི་ཚོགས་ཀྱི་ལས་དོན་སློབ་གྲྭར་སྤེལ་བའི་ཚད་ལྡན་དོ་དམ་གྱི་ཕུགས་ཕན་ལམ་སྲོལ་ཆགས་པར་བྱས་ནས་སློབ་གྲྭ་འབྲིང་ཆུང་དགེ་རྒན་གྱི་སློབ་གསོ་སློབ་ཁྲིད་མིན་པའི་ཁུར་པོ་ཡང་དུ་ཏན་ཏིག་གཏོང་དགོས་ཞེས་བརྗོད།