2024ལོའི་སྨྱན་སྦྱོར་མཉམ་འདྲེས་འཕེལ་རྒྱས་གླེང་སྟེགས་ཟླ་10ཚེས་25ཉིན་པེ་ཅིང་དུ་འཚོགས་པ་རེད། སྐབས་འདིའི་གླེང་སྟེགས་ཀྱི་བརྗོད་དོན་གཙོ་བོ་ནི“ཀུན་འདུས་སྨྱན་སྦྱོར་གྱི་ཁྱབ་སྤེལ་མ་ལག་འཛུགས་སྐྱོང་ལ་ཤུགས་སྣོན་བརྒྱབ་ནས་གླེང་ཕྱོགས་གཙོ་བོའི་རྣམ་པ་གསར་པ་གཏོད”ཅེས་པ་དེ་ཡིན། ཀྲུང་དབྱང་དང་རྒྱལ་ཁབ་ལས་ཁུངས་ཀྱི་འབྲེལ་ཡོད་པུའུ་ཨུད་ཀྱི་འགན་འཁུར་བློ་མཐུན་དང་། ཞིང་ཆེན་དང་གྲོང་ཁྱེར་ཁག་གཅིག་གི་ཏང་ཨུད་དྲིལ་བསྒྲགས་པུའི་འགན་འཁུར་བློ་མཐུན། ཀྲུང་དབྱང་དང་ས་གནས་སྨྱན་སྦྱོར་གྱི་འགན་འཁུར་བློ་མཐུན། དེ་བཞིན་རིགས་གཅིག་མཁས་ཅན་དང་མཁས་དབང་། ཁེ་ལས་ཀྱི་འཐུས་མི་སོགས་ལྷན་དུ་འཛོམས་ནས་མཉམ་འདྲེས་སྐོར་གྱི་ཉམས་མྱོང་སྤེལ་རེས་དང་། འབྱུང་འགྱུར་གྱི་འཕེལ་ཕྱོགས་ལ་རྒྱང་ལྟ། སྒྱུར་བཅོས་ཀྱི་ཐབས་ལམ་ལ་གྲོས་བསྡུར་བཅས་བྱས་པ་རེད།

ཚོགས་འདུར་ཞུགས་མཁན་ཚོས་ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་སྨྱན་སྦྱོར་མཉམ་འདྲེས་འཕེལ་རྒྱས་ལ་མཐོང་ཧ་ཅང་ཆེན་པོ་གནང་ནས་སྤྱི་ཁྱབ་ཧྲུའུ་ཅི་ཞི་ཅིན་ཕིང་སྐུ་ངོ་མས་ཇུས་འགོད་དང་སྐུལ་འདེད་བཏང་སྟེ་ཁ་ཕྱོགས་གསལ་སྟོན་དང་། ཐབས་ལམ་གསལ་བཟོ། བླང་བྱ་འདོན་པ་བཅས་གནང་སྟེ་གཙོ་རྒྱུན་སྨྱན་སྦྱོར་གྱི་འཕོ་འགྱུར་ཟམ་མི་ཆད་པར་གཏིང་ཟབ་ཡོང་བར་ཁྲིད་སྟོན་གནང་ཡོད། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པས་ཏང་དང་རྒྱལ་ཁབ་ཀྱི་བྱ་གཞག་འཕེལ་རྒྱས་ཀྱི་འཐབ་ཇུས་ཀྱི་སྤྱི་ཡོངས་ནས་འགོ་བཙུགས་ཏེ“ཀུན་འདུས་སྨྱན་སྦྱོར་གྱི་གསར་རྩོམ་དང་ཁྱབ་སྤེལ་ལས་དོན་ལ་འཚམ་པའི་ལམ་སྲོལ་དང་གདེང་འཇོག་མ་ལག་འཛུགས་པ་དང་། གཙོ་རྒྱུན་སྨྱན་སྦྱོར་གྱི་བརྒྱུད་རིམ་རང་བཞིན་གྱི་འཕོ་འགྱུར་ལ་སྐུལ་འདེད་གཏོང་དགོས་པའི”བཀོད་སྒྲིག་གལ་ཆེན་གནང་ནས་རྒྱང་ལམ་གསར་པར་སྨྱན་སྦྱོར་སྒྱུར་བཅོས་གཏིང་ཟབ་བྱེད་པའི་སྐུལ་སློང་བཀའ་རྒྱ་བཏང་བ་རེད། གསར་འགྱུར་འཐབ་ཕྱོགས་ཀྱིས་ཚང་འཛོམས་གྲོས་ཚོགས་ཀྱི་བཀོད་སྒྲིག་བླང་བྱ་ལག་བསྟར་དོན་འཁྱོལ་གཏིང་ཟབ་བྱེད་པ་དང་། དུས་རབས་གསར་པའི་སྨྱན་སྦྱོར་མཉམ་འདྲེས་འཕེལ་རྒྱས་ཀྱི་ཉམས་མྱོང་ཕྱོགས་སྡོམ་དང་དར་སྤེལ་གཏོང་བ། ཡང་བསྐྱར་གྲ་སྒྲིག་བྱས་ནས་སླར་ཡང་རྡོག་ཐོན་བྱེད་པ། རེས་སྐོར་གསར་པའི་སྨྱན་སྦྱོར་སྒྱུར་བཅོས་ལ་སྐུལ་འདེད་ཏན་ཏིག་གཏོང་བ་བཅས་བྱས་ནས་གླེང་ཕྱོགས་གཙོ་བོའི་གཡུལ་ས་སྔར་བས་སྲ་བརྟན་དང་སྟོབས་ཆེར་གཏོང་དགོས་པའི་ངོས་འཛིན་བྱས་པ་རེད།

ཚོགས་འདུར་ཞུགས་མཁན་གྱིས་གཙོ་རྒྱུན་སྨྱན་སྦྱོར་གྱིས་ཀྲུང་གོའི་ལུགས་ཀྱི་དེང་རབས་ཅན་གྱི་རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་གྱི་བྱ་གཞག་རླབས་པོ་ཆེར་ཕྱོགས་ཡོངས་ནས་སྐུལ་འདེད་གཏོང་བའི་ལྟེ་བའི་ལས་འགན་ཁོང་དུ་བརྟན་པོར་ཆུད་པ་བྱས་ཏེ། སྒྱུར་བཅོས་གསར་གཏོད་མཐའ་འཁྱོངས་དང་། མཉམ་འདྲེས་རིམ་སྤོར་ལ་སྐུལ་འདེད། ཁྱབ་སྤེལ་གྱི་ཕན་ནུས་ཆེར་གཏོང་བཅས་བྱས་ནས་སྨྱན་སྦྱོར་མཉམ་འདྲེས་འཕེལ་རྒྱས་ཀྱི་རྣམ་པ་གསར་པ་ཧུར་ཐག་བཏོད་དེ། ཁྱབ་སྤེལ་བྱེད་ནུས་དང་། སྣེ་ཁྲིད་བྱེད་ནུས། ཤུགས་རྐྱེན་ཐེབས་ནུས། སྤྱི་མོས་ཐོབ་ནུས་བཅས་ཟམ་མི་ཆད་པར་ཆེ་རུ་གཏོང་དགོས་པ་དང་། ངོས་འཛིན་ཟབ་ཏུ་བཏང་ནས་སྒྱུར་བཅོས་ཀྱི་འགན་འཁྲི་འཁུར་སེམས་དང་ལས་འགན་སྒྲུབ་སེམས་ཆེ་རུ་ཏན་ཏིག་གཏོང་དགོས་པ། སྒྱུར་བཅོས་བྱེད་ཕོད་པ་བྱས་ནས་གསར་གཏོད་དང་གསར་སྐྲུན་གྱི་གསོན་ཤུགས་ནུས་ལྡན་འཕེལ་བར་བྱེད་དགོས་པ། འཇོན་ཐང་ཆེ་རུ་བཏང་ནས་གླེང་ཕྱོགས་ཀྱིས་ཁྲིད་སྟོན་བྱེད་པའི་རང་འགུལ་དབང་ཆ་སྟངས་འཛིན་ནན་པོ་བྱེད་དགོས་པ། སློབ་སྦྱོང་བྱེད་མཁས་པོ་བྱས་ནས་སྒྱུར་བཅོས་གསར་གཏོད་ཀྱི་འཇོན་ཐང་རྒྱུན་ཆད་མེད་པར་ཆེ་རུ་གཏོང་དགོས་ལུགས་བརྗོད་ཡོད།

སྐབས་འདིའི་གླེང་སྟེགས་ནི་མི་དམངས་ཉིན་རེའི་ཚགས་པར་ཁང་གིས་གཙོ་གཉེར་བྱས་པ་ཞིག་ཡིན་པ་དང་། གླེང་སྟེཌ་གཙོ་བོ་ཕུད་ད་དུང“ཁྱབ་ཁོངས་གསར་པ་དང་། མཉམ་འདྲེས་གཏིང་ཟབ་ཀྱི་རྣམ་པ་གཏོད་པ”དང“གྲངས་གཞིས་སྐུལ་སྤེལ་དང་རིག་ནུས་སྨྱན་སྦྱོར་གསར་གཏོད་ལས་རྣམ”གྱི་མཉམ་གཤིབ་ཡན་ལག་གླེང་སྟེགས་བཀོད་སྒྲིག་བྱས་པ་མ་ཟད། “ＡＩཡི་མཚན་མོ—མདུན་དུ་སྐྱོད་ཅིག ＡＩཡི་ཀྲུང་གོ”སོགས་ཀྱི་བརྗོད་དོན་གཙོ་བོའི་བྱེད་སྒོའང་སྤེལ་བ་རེད།