ལྷ་ས་འགག་སྒོ་ལས་ཁུངས་ཀྱིས་བསྡོམས་རྩིས་བྱས་པར་གཞིགས་ན། འདི་ལོའི་དུས་ཚིགས་དང་པོ་ནས་གསུམ་པའི་བར། བོད་ཀྱི་ཕྱི་ཕྱོགས་ཚོང་དོན་གྱི་ཕྱིར་གཏོང་ནང་འདྲེན་གྱི་རིན་ཐང་བསྡོམས་འབོར་སྒོར་དུང་ཕྱུར་84.36ཟིན་པ་དེ་དུས་མཚུངས་ལས་10.2%འཕར་ཡོད། དེའི་ནང་ཕྱིར་གཏོང་བྱེད་ཚད་སྒོར་དུང་ཕྱུར་74.55ཟིན་ནས་དུས་མཚུངས་ལས་4.2%འཕར་བ་དང་། ནང་འདྲེན་བྱེད་ཚད་སྒོར་དུང་ཕྱུར་9.81ཟིན་ནས་དུས་མཚུངས་ལས་96.3%འཕར་ཡོད་པ་རེད།

རང་ལྗོངས་ཀྱི་ཚོང་དོན་རོགས་ཟླ་གཙོ་བོ་སྔར་བས་བརྟན་དུ་སོང་ཞིང་། དུས་ཚིགས་དང་པོ་ནས་གསུམ་པའི་བར། ནེ་པ་ལས་སྔར་བཞིན་བོད་ཀྱི་ཚོང་དོན་རོགས་ཟླ་ཆེ་ཤོས་དང་པོ་དང་ཕྱིར་གཏོང་ཁྲོམ་ར་ཆེ་ཤོས་ཀྱི་གནས་བབ་རྒྱུན་འཁྱོངས་ཐུབ་ནས་ཕྱོགས་གཉིས་པོའི་ཚོང་དོན་རིན་ཐང་སྒོར་དུང་ཕྱུར་29.35ཟིན་པ་དེ་དུས་མཚུངས་ལས་60.9%འཕར་བ་དང་། དུས་མཚུངས་བོད་ཀྱིས“རྒྱུད་གཅིག་ལམ་གཅིག”མཉམ་སྐྲུན་རྒྱལ་ཁབ་ལ་ཕྱིར་གཏོང་ནང་འདྲེན་བྱེད་ཚད་སྒོར་དུང་ཕྱུར་46.88ཟིན་པ་དང་ＲＣＥＰཡི་ཁོངས་མིའི་རྒྱལ་ཁབ་གཞན་དག་ལ་ཕྱིར་གཏོང་ནང་འདྲེན་བྱེད་ཚད་སྒོར་དུང་ཕྱུར་17.59ཟིན་གྱི་ཡོད་པ་རེད།

དམངས་གཉེར་ཁེ་ལས་ཀྱིས་གཉེར་སྐྱོང་བྱེད་པོའི་གནས་བབ་བཟུང་ཞིང་། དུས་ཚིགས་དང་པོ་ནས་གསུམ་པའི་བར། རང་ལྗོངས་ཀྱི་དམངས་གཉེར་ཁེ་ལས་ཀྱི་ཕྱིར་གཏོང་ནང་འདྲེན་བྱེད་ཚད་སྒོར་དུང་ཕྱུར་83.14ཟིན་པ་དེ་དུས་མཚུངས་ལས་11.4%འཕར་ཡོད་པ་དེས་ཕྱི་ཕྱོགས་ཚོང་དོན་གྱི་རིན་ཐང་བསྡོམས་འབོར་གྱི་98.6%བཟུང་ཡོད། དུས་མཚུངས་གཞུང་ཁོངས་ཁེ་ལས་ཀྱི་ཕྱིར་གཏོང་ནང་འདྲེན་བྱེད་ཚད་སྒོར་དུང་ཕྱུར་0.81ཟིན་པ་དང་ཕྱི་རྒྱལ་ཚོང་པའི་མ་འཇོག་ཁེ་ལས་ཀྱི་ཕྱིར་གཏོང་ནང་འདྲེན་བྱེད་ཚད་སྒོར་དུང་ཕྱུར་0.07ཟིན་གྱི་ཡོད་པ་རེད།

མཐའ་མཚམས་ཚོང་དོན་གྱི་ཕྱིར་གཏོང་ནང་འདྲེན་གྲངས་གནས་གཉིས་འཕར་རྒྱུ་རྒྱུན་འཁྱོངས་ཐུབ་ཅིང་། དུས་ཚིགས་དང་པོ་ནས་གསུམ་པའི་བར། རང་ལྗོངས་ཀྱི་སྤྱིར་བཏང་ཚོང་དོན་གྱི་ཕྱིར་གཏོང་ནང་འདྲེན་བྱེད་ཚད་སྒོར་དུང་ཕྱུར་55.26ཟིན་ཞིང་། དེས་ཕྱི་ཕྱོགས་ཚོང་དོན་གྱི་རིན་ཐང་བསྡོམས་འབོར་གྱི་65.5%བཟུང་ཡོད། མཐའ་མཚམས་ཀྱི་འབོར་ཉུང་ཚོང་དོན་གྱི་ཕྱིར་གཏོང་ནང་འདྲེན་བྱེད་ཚད་སྒོར་དུང་ཕྱུར་26.15ཟིན་ཞིང་། དུས་མཚུངས་ལས་48.1%འཕར་བ་དང་། མཐའ་ཁུལ་ཡུལ་མིའི་ཚོང་དོན་བྱེད་སྒོའི་ཕྱིར་གཏོང་ནང་འདྲེན་བྱེད་ཚད་སྒོར་དུང་ཕྱུར་0.34ཟིན་ཞིང་། དུས་མཚུངས་ལས་32.3%འཕར་ཡོད།

ཕྱིར་གཏོང་འཕར་བའི་རྨང་གཞི་བརྟན་དུ་ཕྱིན་པ་དང་ནང་འདྲེན་བརྟན་ཐོག་ཡར་འཕེལ་བྱུང་ཞིང་། དུས་ཚིགས་དང་པོ་ནས་གསུམ་པའི་བར། ངལ་རྩོལ་མང་འདུས་ཅན་གྱི་ཐོན་རྫས་ཕྱིར་གཏོང་བྱེད་ཚད་སྒོར་དུང་ཕྱུར་35.13ཟིན་ཞིང་། དུས་མཚུངས་ལས་6.1%འཕར་བ་དང་། དེས་ཕྱིར་གཏོང་གི་རིན་ཐང་བསྡོམས་འབོར་གྱི་47.1%བཟུང་ཡོད། དེའི་ནང་འཁལ་འཐག་གྱོན་ཆས་དང་། རྩེད་ཆས། འགྱིག་རྫས་སོགས་ཚོང་ཟོག་ཚང་མ་འཕར་བའི་རྣམ་པ་མངོན་ཡོད། ནུས་རྒྱུ་དང་། ཟངས་གཏེར་བྱེ་གཟུགས། ཏི་ཚ་བྱེ་གཟུགས་སོགས་ཚོང་ཟོག་འབོར་ཆེན་ནང་འདྲེན་གྱི་གཞི་ཁྱོན་ཆེ་རུ་བརྟན་པོ་ཕྱིན་ནས་ནང་འདྲེན་བྱེད་ཚད་བསྡོམས་སྒོར་དུང་ཕྱུར་6.44ཟིན་པ་དེ་དུས་མཚུངས་ལས་358%འཕར་བ་དང་། དེས་ནང་འདྲེན་གྱི་རིན་ཐང་བསྡོམས་འབོར་གྱི་65.6%བཟུང་ཡོད་པ་རེད།