འདི་ནི་དགྱེས་རུ་ཤང་འཕྲོད་བསྟེན་ཁང་ཡིན་པ། ཀུན་དགའ་ལྷུན་གྲུབ་ཀྱིས་པར་བརྒྱབ།

འདི་ནི་ཟླ་དོན(གཡས)གྱིས་དུད་ཚང་དུ་བསྐྱོད་དེ་མང་ཚོགས་ཀྱི་གཟུགས་པོར་བརྟག་དཔྱད་བྱེད་བཞིན་པ། ཚེ་རིང་རྡོ་རྗེས་པར་བརྒྱབ།

འདི་ནི་ཨོ་རྒྱན་བསོད་ནམས(གཡོན)ཀྱིས་འཕྲོད་བསྟེན་ཁང་དུ་མང་ཚོགས་ཀྱི་ནད་གཞིའི་སྐོར་འདྲི་བཞིན་པ། ཟླ་དོན་གྱིས་པར་བརྒྱབ།

སྦྲུལ་གཟུགས་ལྟ་བུའི་རི་ལམ་ཀྱག་ཀྱོག་དུ་མ་བརྒྱུད་པ་དང་གནམ་གྱི་ཀ་བ་ལྟ་བུའི་རི་བོ་མང་པོ་བསྐོར་རྗེས། གསར་འགོད་པ་གཞི་ནས་བོད་རང་སྐྱོང་ལྗོངས་གཞིས་རྩེ་གྲོང་ཁྱེར་གྲོ་མོ་རྫོང་དགྱེས་རུ་ཤང་དུ་འབྱོར།

“ང་ཚོའི་འདི་གར་ས་བབ་མཐོ་ཚད་སྨི་4600ལྷག་ཙམ་ཟིན་པ་དང་རླངས་འཁོར་བཏང་ནས་ཕྱིན་ན་རྫོང་གྲོང་བར་ཆུ་ཚོད་གཉིས་ཙམ་འགོར་གྱི་ཡོད” གཙང་སྦྲ་དོད་པའི་འཕྲོད་བསྟེན་ཁང་དུ་སྐྱོད་སྐབས་ཡོན་ཀྲང་ཟླ་དོན་གྱིས་གསར་འགོད་པར“ང་ཚོའི་ཡུལ་འདི་ཐག་རིང་ལུང་ཁུག་ཏུ་གནས་པ་དང་མི་འབོར་ཉུང་ཉུང་ཡིན་སྟབས། ཁོངས་གཏོགས་ཁུལ་གྱི་མང་ཚོགས་ཀྱི་བདེ་ཐང་ལ་འགན་ལེན་ཇི་ལྟར་བྱེད་པ་ནི་སྔོན་ཆད་ཀྱི་དཀའ་གནད་ཆེ་ཤོས་ཤིག་རེད། ད་ཆ་གནས་ཚུལ་དེར་རྩ་བའི་ཆ་ནས་འགྱུར་ལྡོག་ཕྱིན་ཡོད”ཅེས་བརྗོད།

ཉིན་དེར། བོད་རིགས་བགྲེས་སོང་བསྟན་འཛིན་འཕྲོད་བསྟེན་ཁང་དུ་གཟུགས་པོར་བརྟག་དཔྱད་བྱེད་པར་ཡོང་ཞིང་། མར་བསྡད་མ་ཐག་ཡོན་ཀྲང་ཟླ་དོན་དེ་གར་ཡོང་ནས“སྤོ་བོ་ལགས། ཁྱེད་རང་ཁྲག་ཤེད་མཐོ་ཙམ་འདུག མི་བདེ་བ་གང་འདུག་གམ”ཞེས་བྱམས་བརྩེའི་ངང་དྲིས། དགྱེས་རུ་ཤང་ལ་མི་གྲངས་1000ཡང་ཟིན་གྱི་མེད་ཅིང་། བགྲེས་སོང་བསྟན་འཛིན་ལྟ་བུའི་ནད་པ་མང་པོ་རྟག་ཏུ་འཕྲོད་བསྟེན་ཁང་དུ་བརྟག་དཔྱད་དང་སྨན་ལེན་པར་ཡོང་གི་ཡོད། ཟླ་དོན་གྱིས་ཁོང་ཚོའི་བདེ་ཐང་གི་གནས་ཚུལ་ལ་རྒྱུས་མངའ་ཆེན་པོ་ཡོད།

བགྲེས་སོང་བསྟན་འཛིན་གྱིས་སྨན་པ་ཟླ་དོན་ཐུག་རྗེས་སེམས་སྡུག་ཆེན་པོས“ཉིན་ཤས་རིང་། ང་གཟུགས་པོ་བདེ་པོ་གཏན་ནས་མི་འདུག”ཅེས་བརྗོད། ཅི་འཕྲོས་མོལ་འཕྲོས་བརྒྱུད། ཟླ་དོན་གྱིས་སྤོ་བོ་བསྟན་འཛིན་གྱི་རུས་ཚིགས་ཡོངས་ལ་ན་ཟུག་བཏང་ནས་ཟུག་འཇོམས་སྨན་བཏང་ཡང་ཕན་ནུས་ཡག་པོ་ཐོན་མེད་པ་རྟོགས། བསྟན་འཛིན་གྱིས“ང་རྫོང་དུ་སྨན་བཅོས་བྱེད་པར་འགྲོ་དགོས་འདུག་གམ”ཞེས་དྲིས་པར། ཟླ་དོན་གྱིས་བགྲེས་སོང་ལ་སེམས་གསོ་གཏོང་བཞིན་དུ“ཁྱེད་རང་ཕར་རྒྱུག་ཚུར་རྒྱུག་བྱེད་དགོས་མེད། ད་ཆ་འཕྲོད་བསྟེན་ཁང་དང་རྫོང་སྨན་ཁང་དབར་རྒྱང་ཁྲིད་ཡུག་ཁུལ་འགན་ལེན་ལམ་སྲོལ་བཙུགས་ཡོད་པས། ང་ཚོས་རྫོང་སྨན་ཁང་གི་སྨན་པར་ཐད་ཀར་འབྲེལ་བ་བྱས་ན་འགྲིག ཁོང་ནི་ཧྲང་ཧའེ་ནས་ཕེབས་པའི་བོད་སྐྱོར་སྨན་པ་ཡིན་པས། ཁྱེད་རང་ཐུགས་བློ་བདེ་པོ་གནང་ཆོག”ཅེས་བརྗོད།

དེ་རྗེས་ཟླ་དོན་གྱིས་རྫོང་སྨན་ཁང་གི་སྨན་པར་ཁ་པར་བརྒྱབ་ཅིང་། བགྲེས་སོང་གིས་རང་ཉིད་ཀྱི་ནད་གཞིའི་གནས་ཚུལ་བརྗོད་པ་དང་། ཟླ་དོན་གྱིས་བགྲེས་སོང་གི་དེ་སྔའི་ནད་ཐོ་དང་སྨན་སྤྱོད་གནས་ཚུལ་ངོ་སྤྲོད་བྱས་པར། རྫོང་སྨན་ཁང་གི་སྨན་པས་བསྟན་འཛིན་གྱི་ནད་གཞིའི་གནས་ཚུལ་ལ་རྒྱུས་མངའ་དེ་བས་ཆེ་བ་བྱུང་ཡོད།

བོད་སྐྱོར་སྨན་པས་ཟླ་དོན་ལ་ཁ་པར་ནས“ཁོང་གི་གནས་ཚུལ་དེ་རིགས་ལ་སྨན་གསར་པ་ཁ་ཤས་སྤྱོད་དགོས། སྨན་དེ་དག་འཕྲོད་བསྟེན་ཁང་དུ་ཧ་ལམ་ཡོད་ཀྱི་མ་རེད། རྫོང་གི་གཅིག་གྱུར་ལས་སྟེགས་བརྒྱུད་ནས་ཉོ་རྒྱུའི་རེ་ཞུ་བྱས་ཆོག ཉིན་ཤས་སོང་རྗེས་འཕྲོད་བསྟེན་ཁང་ལ་བཏང་ཡོང་གི་རེད”ཅེས་དང་། “གལ་སྲིད་བློ་བདེ་པོ་མེད་ན། ཉིན་ཤས་སོང་རྗེས་བོད་སྐྱོར་སྨན་བཅོས་རུ་ཁག་ཤང་དུ་སྐོར་སྐྱོད་སྨན་བཅོས་བྱེད་པར་འགྲོ་མཁན་ཡིན་པས། སྐབས་དེ་དུས་བགྲེས་སོང་གི་ནད་གཞིར་བལྟས་ཆོག”ཅེས་བརྗོད།

ཁ་པར་བཞག་རྗེས་ཟླ་དོན་གྱིས་བགྲེས་སོང་བསྟན་འཛིན་ལ་འགྲེལ་བཤད་ཞིབ་ཅིང་ཕྲ་བ་བརྒྱབ་པས། བགྲེས་སོང་གི་སེམས་པ་གཞི་ནས་ལྷོད་ལ་བབས། དགྱེས་རུ་ཤང་དུ་བསྟན་འཛིན་དང་འདྲ་བའི་རྒན་རྒོན་མི་ཉུང་བ་ཞིག་ཡོད། ཁོང་ཚོའི་ངོས་ནས་བརྗོད་ན། རྫོང་གྲོང་དང་བར་ཐག་རིང་པོ་ཆོད་སྟབས། འཕྲོད་བསྟེན་ཁང་ནི་ཁོང་ཚོར་བདེ་ཐང་གི་གནད་དོན་འཕྲད་སྐབས་འཕྲལ་མར་སྨན་བཅོས་བྱེད་པར་སྐྱོད་ཡུལ་ཡག་ཤོས་ཤིག་རེད།

གཞི་རིམ་གྱི་སྨན་བཅོས་སྒྱུར་བཅོས་ཀྱིས་ཐག་རིང་ལུང་ཁུག་གི་མང་ཚོགས་ལ་སྟབས་བདེ་གང་མང་བསྐྲུན་ཞིང་། རྫོང་སྨན་ཁང་གི་སྨན་པ་དང་བོད་སྐྱོར་སྨན་པས་ཤང་གྲོང་དུ་སྐོར་སྐྱོད་སྨན་བཅོས་བྱེད་པར་སྐྱོད་པ་དང་། རྫོང་དེ་ཡོངས་ཀྱི་སྨན་བཅོས་ཡོ་བྱད་མཁོ་སྤྲོད་གཞི་གཅིག་ཅན་གྱི་འགན་ལེན་དང་རྫོང་ཁོངས་ཀྱི་སྨན་བཅོས་གཅིག་མཐུན་ཚོགས་པའི་སྨན་བཅོས་ཡོ་བྱད“གཅིག་སྡུད་ཉོ་སྒྲུབ་དང་སྤྱི་འདོམས་བཀོད་སྒྲིག”སོགས་ཀྱི་བྱ་ཐབས་སྣ་ཚོགས་ནི་གཞི་རིམ་གྱི་སྨན་བཅོས་འཕྲོད་བསྟེན་ཞབས་ཞུའི་ནུས་པ་ཟམ་མི་ཆད་པར་ཆེ་རུ་གཏོང་བའི་འགན་ལེན་ཞིག་རེད།

ཧྲང་ཧའེ་ཡི་བོད་སྐྱོར་ལས་བྱེད་པ་དང་གྲོ་མོ་རྫོང་འཕྲོད་བསྟེན་བདེ་ཐང་ཨུ་ལྷན་གྱི་ཀྲུའུ་རེན་གཞོན་པ་ཁྲུའུ་ཅེ་ནི་སྨན་བཅོས་སྒྱུར་བཅོས་ཀྱི་དཔང་པོ་དང་དེའི་ནང་ཞུགས་མཁན་ཞིག་རེད། 2022ལོར་ཁོང་དགྱེས་རུ་ཤང་འཕྲོད་བསྟེན་ཁང་དུ་ཐོག་མར་འབྱོར་སྐབས། རྨང་གཞིའི་སྒྲིག་བཀོད་ལྟོས་བཅས་ཀྱིས་རྗེས་ལུས་ཡིན་པ་དང་ཞབས་ཞུའི་ནུས་པའང་མི་རྣམས་ཀྱི་བློ་ངོར་བབ་པ་ཞིག་མེད། ལོ་གཉིས་ལྷག་ཙམ་སོང་རྗེས་ཁྲུའུ་ཅེས་སླར་ཡང་ཧྲང་ཧའེ་ཡི་བོད་སྐྱོར་སྨན་པ་ཁྲིད་དེ་དགྱེས་རུ་ཤང་དུ་སྐོར་སྐྱོད་འོས་འགན་སྨན་བཅོས་བྱེད་པར་ཡོང་སྐབས་དེ་གར་འགྱུར་ལྡོག་ཆེན་པོ་ཕྱིན་ཡོད་པ་སྟེ། ཁང་པ་གསར་པ་མང་པོ་བརྒྱབ་ཡོད་པ་དང་། སྒྲིག་ཆས་མང་དུ་ཕྱིན་པ། སྨན་རྫས་ཕུན་སུམ་ཚོགས་སུ་ཕྱིན་པ་བཅས་མིང་དོན་མཚུངས་པའི་གཞི་རིམ་གྱི་བདེ་ཐང་ས་ཚིགས་ཤིག་ཏུ་གྱུར་ཡོད་པ་རེད།

ཟླ་དོན་གྱིས“དེ་སྔོན་དང་བསྡུར་ཚེ། ད་ཆ་ང་ཚོའི་འཕྲོད་བསྟེན་ཁང་གི་སྟོབས་ཤུགས་ཧ་ཅང་ཧྲག་ཏུ་ཕྱིན་པའི་ཁར། གསར་དུ་ལས་བགོས་བརྒྱབ་མ་ཐག་པའི་སྨན་དོན་པ་3བསྣན་ཚེ། འཕྲོད་བསྟེན་ཁང་དུ་སྨན་དོན་པ་9ཡོད”ཅེས་བརྗོད།

ཨོ་རྒྱན་བསོད་ནམས་ནི་དགྱེས་རུ་ཤང་འཕྲོད་བསྟེན་ཁང་གི་སྨན་པ་ཞིག་ཡིན་ཞིང་། མི་རིང་བའི་གོང་། ཁོང་རྫོང་སྨན་ཁང་དུ་ལས་ཐོག་སློབ་སྦྱོང་བྱེད་པར་བསྐྱོད་པ་དང་། བོད་སྐྱོར་སྨན་པའི་མཛུབ་ཁྲིད་འོག ཁོང་གིས་རྒྱུན་སྤྱོད་ཀྱི་མྱུར་སྐྱོབ་རྩལ་ནུས་མང་པོ་ཤེས་ནས་ཐོལ་བྱུང་གི་གནས་ཚུལ་མང་པོར་རང་རྐྱ་འཕེར་བའི་ངང་ཁ་གཏད་གཅོག་ཐུབ་ཀྱི་ཡོད།

ཟླ་དོན་གྱིས“ཐོལ་བྱུང་གི་ནད་གཞིར་ཁ་གཏད་གཅོག་སྐབས། འཕྲོད་བསྟེན་ཁང་གིས་མྱུར་སྐྱོབ་བྱས་ནས་ནད་པའི་ཚེ་སྲོག་སྐྱོབ་ཆེད་དུས་ཚོད་བརྩོན་ལེན་བྱེད་ཀྱི་ཡོད”ཅེས་བརྗོད་པ་དང་། ཁོང་གིས“འཕྲོད་བསྟེན་ཁང་གི་ཁ་ཚ་དགོས་གཏུག་གི་སྨན་བཅོས་རྩལ་ནུས་ལ་དམིགས་ཏེ། ང་ཚོས་སྨན་པ་གོང་རིམ་སྨན་ཁང་དུ་རེས་སྐོར་གསོ་སྦྱོང་ལ་མངགས་ཏེ་དམིགས་སའི་རང་བཞིན་ལྡན་པའི་སྒོ་ནས་སྨན་བཅོས་འགན་སྲུང་ནུས་པ་ཆེ་རུ་གཏོང་བཞིན་ཡོད”ཅེས་བརྗོད།

ཁྲུའུ་ཅེས“དགྱེས་རུ་ཤང་གི་འགྱུར་ལྡོག་ནི་གྲོ་མོ་རྫོང་གི་གཞི་རིམ་སྨན་བཅོས་ལ་ཡར་རྒྱས་ཆེན་པོ་ཕྱིན་པའི་མཚོན་ཚུལ་ཞིག་ཡིན། ལོ་འདི་དག་རིང་། གྲོ་མོ་རྫོང་གིས་དམ་ཟབ་རྣམ་པའི་རྫོང་ཁོངས་སྨན་བཅོས་གཅིག་མཐུན་ཚོགས་པ་འཛུགས་པར་སྐུལ་འདེད་ཏན་ཏིག་བཏང་སྟེ། ཤར་ཕྱོགས་ས་ཁུལ་གྱི་ཉམས་མྱོང་བསྡུ་ལེན་ཧུར་ཐག་བྱེད་པ་དང་། ཧྲང་ཧའེ་སོགས་ས་ཁུལ་གྱི་སྨན་བཅོས་ཐོན་ཁུངས་སྤུས་ལེགས་ནང་འདྲེན་ཤུགས་ཆེན་བྱེད་པ། ས་གནས་དེ་གའི་གནས་ཚུལ་དངོས་དང་ཟུང་འབྲེལ་བཅས་བྱས་ནས། སྨན་བཅོས་སྒྱུར་བཅོས་ལ་སྐུལ་འདེད་རྒྱུན་མཐུད་གཏོང་བཞིན་ཡོད”ཅེས་བརྗོད།

མིག་སྔར། གཞི་རིམ་གྱི་སྨན་དོན་པ་དེ་བས་མང་བ་རྫོང་སྨན་ཁང་དུ་སློབ་སྦྱོང་དང་གསོ་སྦྱོང་བྱེད་པར་ཡོང་སྟེ། རང་ཉིད་ཀྱིས་སྦྱངས་པའི་རྩལ་ནུས་ལ་བརྟེན་ནས་མང་ཚོགས་ལ་བདེ་སྐྱིད་སྐྲུན་བཞིན་ཡོད།

ཁྲུའུ་ཅེས“རྫོང་ཡོངས་སུ་ནད་པར་སྨན་བཅོས་བྱེད་ཚད་2021ལོའི་མི་ཐེངས་29385ནས་2023ལོའི་མི་ཐེངས་34146བར་མང་དུ་ཕྱིན་ཡོད། མང་ཚོགས་ཀྱི་སྨན་བཅོས་ཀྱི་བློ་ཡིད་ཚིམ་ཤུགས་ཟམ་མི་ཆད་པར་ཆེ་རུ་ཕྱིན་ནས། ཐག་ཉེ་སར་སྨན་པ་བསྟེན་པའི་དམིགས་ཚད་གཞི་རྩའི་ཆ་ནས་མངོན་འགྱུར་བྱུང་ཡོད། ད་ཆ། གཞི་རིམ་གྱི་འཕྲོད་བསྟེན་ཁང་7གྱིས་ནུས་པ་གང་ཡོད་བཏོན་ནས་མང་ཚོགས་ལ་སྨན་བཅོས་ཞབས་འདེགས་ཡག་པོ་ཞུ་བཞིན་ཡོད”ཅེས་བརྗོད།