“བཅུ་གཅིག་ཟུང”གི་དྲ་ཐོག་ཚོང་དོན་གྱི་འཛད་སྤྱོད་སྐུལ་སྤེལ་ཆེན་པོ་འཆར་ལ་ཉེ་བས། རང་རྒྱལ་གྱི་མྱུར་སྐྱེལ་ལས་སྒོ་བྲེལ་བརྩོན་ཆེ་བའི་དུས་སུ་སླེབས་ཡོད། རྒྱལ་ཁབ་སྦྲག་སྲིད་ཅུས་ཀྱི་ལྟ་ཞིབ་ཚད་ལེན་གྲངས་གཞི་ལས་མངོན་པར། ཟླ་10ཚེས་21ནས་23ཉིན་བར། རྒྱལ་ཡོངས་ཀྱི་སྦྲག་སྲིད་མྱུར་སྐྱེལ་ལས་རིགས་ཀྱིས་མྱུར་སྐྱེལ་ཐུམ་སྒྲིལ་དུང་ཕྱུར་19.20ལྷག་ཙམ་རྩིས་བླངས་པ་དེ་དུས་མཚུངས་ལས་48.7%འཕར་བ་དང་། མྱུར་སྐྱེལ་ཐུམ་སྒྲིལ་དུང་ཕྱུར་16.55ཙམ་བསྐུར་བ་དེ་དུས་མཚུངས་ལས་29.5%འཕར་ཡོད། དེའི་ནང་ཟླ་10ཚེས་22ཉིན་མྱུར་སྐྱེལ་ཐུམ་སྒྲིལ་དུང་ཕྱུར་7.29རྩིས་བླངས་པ་དེ་དུས་མཚུངས་ལས་74.0%འཕར་ནས་ཉིན་རེའི་ལས་སྒོའི་གྲངས་འབོར་གྱི་ཟིན་ཐོ་གསར་པ་བཏོད་ཡོད།

འདས་ཟིན་པའི་ལོ་བཅུའི་རིང་། རང་རྒྱལ་གྱི་ཉིན་རེའི་མྱུར་སྐྱེལ་དངོས་ཟོག་མང་ཤོས་ཐག་གཅོད་བྱེད་ཚད་མགྱོགས་མྱུར་འཕར་ནས་2014ལོའི་དུང་ཕྱུར་1.03ཙམ་དང་2017ལོའི་དུང་ཕྱུར་3.31ནས་2021ལོའི་དུང་ཕྱུར་6.96དང་འདི་ལོའི་དུང་ཕྱུར་7.29བར་མང་དུ་འགྲོ་བཞིན་པ་དེ་ཐོག་ནས་རང་རྒྱལ་གྱི་མྱུར་སྐྱེལ་ལས་རིགས་འཕེལ་རྒྱས་ཀྱི་རྣམ་པ་མངོན་ནས་མི་དམངས་མང་ཚོགས་ཀྱི་རང་གཤིས་ཅན་དང་། སྣ་མང་ཅན། སྤུས་ཚད་ཅན་བཅས་ཀྱི་ཞབས་ཞུའི་འཛད་སྤྱོད་ཀྱི་དགོས་མཁོ་ཟམ་མི་ཆད་པར་བསྐངས་ཡོད་པ་མ་ཟད། རང་རྒྱལ་གྱི་གཞི་ཁྱོན་ཆེ་བའི་ཁྲོམ་རའི་ལེགས་ཆ་ཡང་མངོན་ཡོད།

རྒྱལ་ཁབ་སྦྲག་སྲིད་ཅུས་ཀྱི་འབྲེལ་ཡོད་འགན་འཁུར་བས་འདི་ལོའི་ཚུན་འཕེལ་རྒྱས་དང་སྒྱུར་བཅོས་ཀྱི་བྱེད་ཐབས་རབ་དང་རིམ་པ་བཏོན་པ་དང་བསྟུན་ནས་ནང་མཁོ་རྒྱ་སྐྱེད་དང་འཛད་སྤྱོད་ལ་སྐུལ་འདེད་གཏོང་བའི་སྲིད་ཇུས་དོན་འཁྱོལ་ཏན་ཏིག་དང་ཞིབ་ཕྲ་བྱེད་པ་དང་། འཛད་སྤྱོད་ཁྲོམ་རའི་མངོན་མེད་སྟོབས་ཤུགས་ཟམ་མི་ཆད་པར་ཆེ་རུ་གཏོང་བ། མྱུར་སྐྱེལ་ཁྲོམ་རའི་གཞི་ཁྱོན་རྒྱུན་མཐུད་ངང་ཆེ་རུ་འགྲོ་བར་སྔར་བས་སྐུལ་འདེད་གཏོང་བ་བཅས་བྱས་པས། དཔལ་འབྱོར་གྱི་སྤུས་ཚད་མཐོ་བའི་འཕེལ་རྒྱས་ལ་འདེགས་སྐྱོར་ནུས་ལྡན་ཐུབ་ཡོད་ཅེས་བརྗོད་པ་རེད།