འདི་ནི་བྲག་ཡིབ་ཆུས་སྦེ་པ་གྲོང་རྡལ་སྦེ་པ་གྲོང་ཚོར་ཡོད་པའི་སྲོང་བཙན་སྦྲ་གུར་གྱི་སྒར་ས་ཡིན་པ།

གྲོང་ཚོ་དབར་འཕེལ་རྒྱས་དོ་སྙོམས་མེད་ལ་ཐོན་ཁུངས་ཀྱི་སྤུས་ཚད་ལའང་ཧེ་བག་ཡོད། “གྲོང་ཚོ་སྟོབས་ཆེན”གྱི་ཐོན་ལས་འཕེལ་རྒྱས་འགྲོ་ཕྱོགས་སྔར་བས་ཤུགས་ཆེ་བ་དང་། “ཉམས་ཞན་གྲོང་ཚོར”འཕེལ་རྒྱས་གཏོང་རྒྱུར་འཚམ་པའི་ཐོན་ལས་མེད་པས་གྲོང་ཚོ་ཚང་མ་ཡག་པོ་ཡོང་ག་ལ་ཐུབ། དེས་ན་ཇི་ལྟར་བྱས་ནས་གྲོང་ཚོ་ཚང་མའི་མང་ཚོགས་ཕྱུག་པོ་ཆགས་པར་བྱེད་དགོས་སམ་ཞེ་ན།

ཉིང་ཁྲི་གྲོང་ཁྱེར་བྲག་ཡིབ་ཆུས་སྦེ་པ་གྲོང་རྡལ་ལ་ཐག་གཅོད་བྱེད་ཐབས་འོས་ཤིང་འཚམ་པ་ཞིག་རྙེད་ཡོད་པ་སྟེ། “གྲོང་སྦྲེལ་མཉམ་སྐྲུན”གྱི་བྱེད་སྟངས་ཕྱོགས་ཡོངས་ནས་ཁྱབ་གདལ་བཏང་སྟེ། “ཚོགས་པ་སྒྲིག་ནས་འཕེལ་རྒྱས་གཏོང་བའི”གྲོང་གསེབ་དར་རྒྱས་ཀྱི་ལམ་བུ་གསར་པར་བསྐྱོད་རྒྱུ་དེ་རེད།

བྱ་ཐབས་མཉམ་གྲོས་དཀའ་གནད་བསལ།

བྲག་ཡིབ་ཆུས་ཀྱི་ཐག་རིང་ལུང་ཁུག་གི་ཤང་གྲོང་ཞིག་ཡིན་པའི་སྦེ་པ་གྲོང་རྡལ་ཁོངས་གཏོགས་སུ་སྲིད་འཛིན་གྲོང་ཚོ་12ཡོད།

ལྷ་ཁ་གྲོང་ཚོ་དང་ཁེ་ནང་གྲོང་ཚོའི་འགྲིམ་འགྲུལ་སྟབས་བདེ་མེད་པ་དང་། བཀྲ་ཏིག་གྲོང་ཚོ་དང་ལན་བད་གྲོང་ཚོར་འཕེལ་རྒྱས་གཏོང་བར་ས་ཆ་ཉུང་བ། དགའ་སྐྱིད་གྲོང་ཚོ་དང་། འཛིན་པ་གྲོང་ཚོ། སྟག་ལྤགས་གྲོང་ཚོ་བཅས་ལ་གནས་སྤོས་མང་ཚོགས་མང་བ་སོགས་ཀྱིས་རྐྱེན་པས། ལོ་ཤས་གོང་གྲོང་ཚོ་ཁག་གི་མཉམ་སྡེབ་དཔལ་འབྱོར་འཕེལ་རྒྱས་གཏོང་བར་དཀའ་ངལ་མང་པོ་འཕྲད་ཡོད་པ་རེད།

བསྡོམས་རྩིས་བརྒྱབ་པར་གཞིགས་ན། 2020ལོར་སྦེ་པ་གྲོང་རྡལ་གྱི་གྲོང་ཚོ་12ཀྱི་མཉམ་སྡེབ་དཔལ་འབྱོར་གྱི་ཡོང་འབབ་བསྡོམས་འབོར་སྒོར་ཁྲི་200ལྷག་ཙམ་ལས་ཟིན་གྱི་མེད་པ་རེད།

2022ལོའི་ཟླ་5པར། ས་གནས་ས་ཐོག་ཏུ་བརྟག་ཞིབ་ཐེངས་ཁ་ཤས་བྱས་པ་བརྒྱུད། སྦེ་པ་གྲོང་རྡལ་གྱིས་ཏང་སྲིད་ཚན་ཁག་གི་ཁོངས་མི་དང་དེ་བཞིན་གྲོང་ཚོ་12ཀྱི་ཏང་ཀྲི་པུའི་ཧྲུའུ་ཅི་མཉམ་དུ་འཛོམས་བྱས་ནས་འཕེལ་རྒྱས་ཀྱི་འཆར་གཞི་ཆེན་པོར་གྲོས་བསྡུར་བྱས་པ་རེད།

“བཀྲ་ཏིག་གྲོང་ཚོ་དང་གསེར་གུང་གྲོང་ཚོའི་ས་མཚམས་ཀྱི་རྩོད་གཞི་ག་དུས་ཐག་གཅོད་ཐུབ་བམ། གྱོད་གཞི་དེའི་དབང་གིས་ཉེ་ཆར་གྲོང་མིའི་དབར་སླར་ཡང་རྩོད་པ་ཤོར་སོང”

“སྟག་ལྤགས་གྲོང་ཚོའི་དུད་ཚང་ཁག་བགོས་ཀྱི་གནད་དོན་ཇི་ལྟར་བྱེད་དགོས་སམ”

མི་རེ་རེས་དྲི་བ་རེ་བཏོན་པས་གནད་དོན་མང་པོ་ཐག་གཅོད་བྱེད་དགོས་ཀྱི་ཡོད་པ་རེད།

དོ་སྙོམས་མེད་པ་དང་ཧེ་བག་ཡོད་པ། རང་ཐག་རང་གཅོད་དང་ཁ་ཐོར་འཕེལ་རྒྱས་——གྲོང་ཚོ་ཚང་མར་གནད་དོན་མང་པོ་ཡོད་པར་སྣང་ཡང་དེ་དག་གི་གནད་འགག་ནི་སྔར་བཞིན“འཕེལ་རྒྱས”ཀྱི་གནད་དོན་ཡིན་པ་རེད།

དཔུང་སྒྲིལ་རོགས་རེས་བྱས་ཏེ་མཉམ་དུ་ཀུང་སི་བཙུགས་ནས་ཐོན་ལས་རྣམ་གྲངས་བཀོད་སྒྲིག་ལུགས་མཐུན་དང་སྤྱི་ཡོངས་འཕེལ་རྒྱས་ཡོང་བར་སྤྱི་འདོམས་ཇུས་འགོད་བྱས་པ་སྟེ། སྦེ་པ་གྲོང་རྡལ་མི་དམངས་སྲིད་གཞུང་གི་ཚོགས་ཁང་ནང“ཉིང་ཁྲི་ས་སྐྱིད་པོ་དངོས་ལས་ཚད་ཡོད་ཀུང་སི”འཛུགས་རྒྱུའི་བསམ་བློ་འཁོར་བ་རེད།

ལོ་གཉིས་རིང་གི་ལག་ལེན་དངོས་ལས་དེ་ནི་སྦེ་པ་གྲོང་རྡལ་གྱི་གྲོང་ཚོ་ཁག་གི་དཀའ་གནད་སེལ་བའི“བྱེད་ཐབས་ཡག་ཤོས”དེ་ཡིན་པ་ར་འཕྲོད་བྱུང་ཡོད།

2022ལོའི་ཟླ་ལྔ་པར། སྦེ་པ་གྲོང་རྡལ་གྱི་སྲིད་འཛིན་གྲོང་ཚོ་12ཀྱིས་མཉམ་འབྲེལ་ཐོག“ཉིང་ཁྲི་ས་སྐྱིད་པོ་དངོས་ལས་ཚད་ཡོད་ཀུང་སི”དངོས་སུ་བཙུགས་པ་རེད། གྲོང་ཚོ་12ཀྱི་ཏང་ཀྲི་པུའི་ཧྲུའུ་ཅི་རྣམས་ཀུང་སི་དེའི་ལས་འཛིན་པ་ཡིན་པའི་ཆ་ནས་མཉམ་དུ་གཉེར་སྐྱོང་དང་གཅིག་གྱུར་འཆར་འགོད་དང་བཀོད་སྒྲིག་ལུགས་མཐུན་བྱས་པས་གྲོང་ཚོ་ཁག་གིས་ཁེར་རྐྱང་ལས་སྒྲུབ་ཀྱི་རྣམ་པར་འགྱུར་ལྡོག་ནུས་ལྡན་བྱུང་ཡོད། 2023ལོའི་ལོ་མཇུག་ཏུ་ཀུང་སི་དེར་ཡོང་འབབ་ཁེ་གཙང་སྒོར་ཁྲི་400བྱུང་ཡོད་པ་རེད།

ལག་གདང་འབྲེལ་ནས་དོགས་གཞི་བསལ།

ཀྲང་པ་གྲོང་ཚོ་ཨུ་ལྷན་གྱི་ཀྲུའུ་རེན་མིག་དམར་གྱིས“སོ་སོའི་ལས་ཀ་སོ་སོས་བྱེད། གྲོང་ཚོའི་བོད་ཕག་གསོ་ཚགས་ཀྱི་ཡོང་འབབ་ང་རང་ཚོ་སོ་སོས་བགོ་བཤའ་བརྒྱབ་ན་དེ་བས་མང་པོ་མ་རེད་དམ། ཐོན་ལས་ཀུང་སིའི་ཁོངས་སུ་བཅུག་ནས་གྲོང་ཚོ་11དང་ཁེ་སྤོགས་བགོ་བཤའ་བརྒྱབ་ཚེ་ང་ཚོ་རང་ཉིད་ཀྱི་ཡོང་འབབ་ཉུང་དུ་ཕྱིན་པ་མ་རེད་དམ”ཞེས་བསམ་འཆར་མང་པོ་བཏོན།

2022ལོའི་ཟླ་ལྔ་པར། སྲིད་འཛིན་གྲོང་ཚོ་12ཀྱིས་ཉིང་ཁྲི་ས་སྐྱིད་པོ་དངོས་ལས་ཚད་ཡོད་ཀུང་སི་མཉམ་དུ་བཙུགས་མོད། ཡིན་ན་ཡང་གྲོང་ཚོའི་མཉམ་སྡེབ་དཔལ་འབྱོར་དེ་ཀུང་སིའི་གཅིག་གྱུར་འཆར་འགོད་ནང་འཇུག་རྒྱུའི་བསམ་ཚུལ་ལ་གྲོང་ཚོ་ཁ་ཤས་ཀྱི་ལས་བྱེད་པ་དང་མང་ཚོགས་སྔར་བཞིན་དོགས་པ་ཟ་བཞིན་ཡོད་པ་རེད།

“ས་སྐྱིད་པོ་ཀུང་སིའི་ལོ་འཁོར་གྱི་ཕྱོགས་བསྡུས་ཡོང་འབབ་ལྟར་ན། རྣམ་གྲངས་དོན་འཁྱོལ་བྱ་ཡུལ་གྱི་གྲོང་ཚོར་ཁེ་སྤོགས་བགོ་བཤའ་10%དང་། གྲོང་ཚོ་ཁག་ལ་ཆ་སྙོམས་གྲོང་ཚོ་རེར་24% ཀུང་སིའི་འཁོར་རྒྱུག་མ་དངུལ་30% སྐུལ་ལྕག་བྱེད་པར་36%བཅས་བཟུང་འདུག” “ང་ཚོས་མཉམ་དུ་ཀུང་སིའི་ལོ་འཁོར་གྱི་ཕྱོགས་བསྡུས་ཡོང་འབབ་མང་དུ་བཏང་ན། གྲོང་ཚོ་ཚང་མར་ཁེ་སྤོགས་མང་པོ་ཐོབ་ངེས་རེད”ཅེས་སྐབས་དེ་དུས་ཀྱི་ཀྲང་པ་གྲོང་ཚོའི་གྲོང་གསེབ་དར་རྒྱས་ཀྱི་ཆེད་ལས་འགན་འཁུར་བ་རྡོ་རྗེས་ངང་རྒྱུད་རིང་པོས་ཚང་མར་འགྲེལ་བཤད་བརྒྱབ།

2022ལོ་སྟེ་ས་སྐྱིད་པོ་ཀུང་སི་བཙུགས་པའི་ལོ་དེར་གྲོང་ཚོ་རེ་རེར་བགོ་བཤའ་བརྒྱབ་པའི་ཁེ་སྤོགས་སྒོར་ཁྲི་5ལས་བརྒལ་ཏེ་དེ་སྔོན་ཀྲང་པ་གྲོང་ཚོས“རྐྱང་རྒྱུག་རྐྱང་འཐབ”བྱེད་སྐབས་ལས་མང་བ་ཐོབ་པས། སྔོན་ཆད་དོགས་པ་ཟ་མཁན་དག་ཀྱང་བློ་བདེ་པོ་བྱུང་བ་དང་ལྷག་པར་དུ་མིག་དམར་གྱིས་ཡོང་འབབ་མཐོང་རྗེས་བློ་བདེ་པོ་བྱུང་བ་མ་ཟད། རང་ཉིད་གྲོང་ཚོའི་མཉམ་སྡེབ་ཐོན་ལས་དེ་ཀུང་སིའི་གཅིག་གྱུར་འཆར་འགོད་ནང་འཇུག་རྒྱུར་སྐུལ་འདེད་གཏོང་མཁན་ཧུར་བརྩོན་ཆེ་ཤོས་སུ་གྱུར་པ་རེད།

“མཉམ་འབྲེལ”ཞེས་པ་ནི“གྲོང་ཚོ་སྟོབས་ཆེན”གྱིས“གྲོང་ཚོ་ཉམ་ཞན”ལ་ཁ་གསབ་བྱས་ནས་མཉམ་དུ“སྤྱི་ཐབ་སྤྱོད་པ”ཞིག་མིན། ས་སྐྱིད་པོ་ཀུང་སིའི་ལོ་འཁོར་གྱི་ཕྱོགས་བསྡུས་ཡོང་འབབ་ཁྲོད་ཀྱི་སྐུལ་ལྕག་མ་དངུལ་36%དེ་ནི་ཚང་མ“མཉམ་འབྲེལ”བྱས་ནས་ངར་ཤུགས་ཆེན་པོས་ཡོང་འབབ་དེ་བས་མང་པོ་འཚོལ་དུ་འཇུག་ཆེད་ཡིན་པ་རེད།

གྲོང་སྦྲེལ་མཉམ་སྐྲུན་ལས་ཕྱོད་ཆེ།

2024ལོའི་ཟླ་བཞི་པར། སྦེ་པ་གྲོང་རྡལ་གྱི་གྲོང་སྦྲེལ་མཉམ་སྐྲུན་ལས་དོན“གདང་སྒྱུར་རིམ་སྤོར”བྱས་པ་སྟེ། སྦེ་པ་གྲོང་རྡལ་གྱི་ཚོགས་སྒྲིག་འཕེལ་རྒྱས་གྲོང་སྦྲེལ་ཏང་ཨུད་སྒོ་བྱང་བཀལ་ནས་བཙུགས་ཏེ“གྲོང་སྦྲེལ་མཉམ་སྐྲུན”ལས་དོན“1.0”ནས“2.0”བར་འཕར་རྒྱུར་སྐུལ་འདེད་བཏང་བ་རེད།

སྦེ་པ་གྲོང་རྡལ་གྱི་ཚོགས་སྒྲིག་འཕེལ་རྒྱས་གྲོང་སྦྲེལ་ཏང་ཨུད་ཀྱི་ཁོངས་གཏོགས་སུ་ཞིང་འབྲོག་ཐོན་ལས་དང་། རིག་གནས་ཡུལ་སྐོར་ཐོན་ལས། ནགས་ཁྲོད་ཐོན་ལས་བཅས་ཀྱི་བྱེད་ནུས་རྣམ་པའི་ཏང་ཀྲི་པུའུ་གསུམ་བཙུགས་པ་དེ་དག་གིས་གཙོ་བོར་ཉིང་ཁྲི་ས་སྐྱིད་པོ་དངོས་ལས་ཚད་ཡོད་ཀུང་སི་དང་ཐོན་ལས་རྣམ་གྲངས་40ལྷག་ཙམ་གཉེར་སྐྱོང་དང་གྲོང་རྡལ་ཡོངས་ཀྱི་ཞིང་འབྲོག་མང་ཚོགས་4375དེའི་ནང་ཞུགས་རྒྱུར་སྐུལ་ཁྲིད་བྱས་ཡོད་པ་རེད།

ཏང་རྩ་འཛུགས་དེ་ཐོན་ལས་འཁོར་འབྲེལ་ཐོག་བཙུགས་ཚེ“ཀླད་པའི་དབང་རྩ”ཡོད་པ་ལྟར་ཕྱོགས་ཁག་གི་ཐོན་ཁུངས་དུས་ཐོག་ཏུ་བཀོད་སྒྲིག་དང་སྤྱི་འདོམས་བྱས་ཏེ་ཐོན་ལས་འཕེལ་རྒྱས་ཀྱི་དཀའ་གནད་དེ་བས་ལེགས་པའི་སྒོ་ནས་ཐག་གཅོད་བྱེད་ཐུབ། གྲོང་སྦྲེལ་ཏང་རྩ་འཛུགས་ཡོད་ན་ད་དུང“སྣེ་ཁྲིད་པ”ལེགས་འདེམས་གསོ་སྐྱོང་བྱེད་དགོས། སྦེ་པ་གྲོང་རྡལ་གྱིས་འབྲེལ་ཡོད་ཁེ་ལས་ཀྱི་འགན་འཁུར་བ་གསུམ་གདན་ཞུ་བྱས་ནས“མཚན་འཛིན་གྲོང་དཔོན”གྱི་འགན་འཁུར་དུ་བཅུག་པ་དང་ཆབས་ཅིག གྲོང་སྦྲེལ་ཏང་ཨུད་ཀྱི་ཐོན་ལས་བློ་འདྲི་བའི་འགན་ཁུར་ནས་ཐོན་ལས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བར་ཐབས་འདོན་ཇུས་འགོད་ཀྱང་བྱས་པ་རེད།

“གྲོང་ཚོ་མཉམ་སྐྲུན”གྱི་བྱེད་སྟངས་འདིས“གྲོང་ཚོ་སྟོབས་ཆེན”ཁོ་ན་ཡར་རྒྱས་གོང་འཕེལ་འགྲོ་བ་དང“གྲོང་ཚོ་ཉམས་ཞན”གྱིས་རྐང་པ་འཐེན་པའི་གནད་དོན་ཐག་གཅོད་ཏན་ཏིག་ཐུབ་ཡོད། གྲོང་ཚོ་དང་གྲོང་ཚོ་མཉམ་སྦྲེལ་བྱེད་པ་དང་གྲོང་རྡལ་དང་གྲོང་ཚོ་མཉམ་སྦྲེལ་བྱེད་པར་ཤུགས་སྣོན་བརྒྱབ་ནས་གྲོང་གསེབ་ཚོགས་སྒྲིག་འཕེལ་རྒྱས་དང་ཡུག་སྦྲེལ་དར་རྒྱས་ལ་སྐུལ་འདེད་ཐུབ་ཀྱང་སྦེ་པ་གྲོང་རྡལ་ད་དུང་བློ་ཡིད་ཚིམ་མེད། “གོམ་སྟབས་རྗེས་མར། ང་ཚོས‘ས་གྲོལ་དཔལ་འབྱོར’གྱི་བྱེད་སྟངས་འཚོལ་ཞིབ་ཧུར་ཐག་དང་ས་ཁོངས་མཐུན་སྦྱོར་འཕེལ་རྒྱས་ལ་སྐུལ་འདེད་གཏོང་བའི་ཐབས་ལམ་གསར་པ་འཚོལ་ཞིབ་བྱས་ནས། གྲོང་གསེབ་ཕྱོགས་ཡོངས་ནས་དར་རྒྱས་འགྲོ་རྒྱུར་སྐུལ་འདེད་གཏོང་ཆེད་གསོན་ཤུགས་གསར་པ་སྣོན་རྒྱུ་ཡིན”ཞེས་སྦེ་པ་གྲོང་རྡལ་ཏང་ཨུད་ཀྱི་ཧྲུའུ་ཅི་བསོད་ནམས་བཀྲ་ཤིས་ཀྱིས་བརྗོད།