གསར་འགོད་པས་རང་བྱུང་ཐོན་ཁུངས་པུའུ་ནས་ཤེས་རྟོགས་བྱས་པར་གཞིགས་ན། ཉེ་ཆར། རང་བྱུང་ཐོན་ཁུངས་པུའུ་ཡིས་ཁག་དང་པོའི་ཐོན་སྐྱེད་གཏེར་རིའི་སྐྱེ་ཁམས་སླར་གསོའི་དཔེ་མཚོན་15ཁྱབ་བསྒྲགས་བྱས་པ་རེད། 2022ལོ་ནས་བཟུང་ས་གནས་ཀྱིས་ཡུན་རིང་བེད་མེད་དུ་ལུས་པའི་གཏེར་རི་ཉམས་གསོའི་དཔེ་སྟོན་ལས་གྲྭ་49ལག་བསྟར་བྱེད་པར་རྒྱབ་སྐྱོར་བྱས་ཡོད། “ལོ་ལྔ་ཚན་བཅུ་གསུམ་པའི”རིང་། རང་རྒྱལ་གྱིས་རིམ་རྩིས་བརྒྱབ་ན་ཡུན་རིང་བེད་མེད་དུ་ལུས་པའི་གཏེར་རི་རྒྱ་ཁྱོན་མུའུ་ཁྲི་480བཅོས་སྐྱོང་ལེགས་སྒྲུབ་ཟིན་ཡོད། ངོ་སྤྲོད་བྱས་པར་གཞིགས་ན། ད་ཐེངས་ཡོངས་བསྒྲགས་བྱས་པའི་དཔེ་མཚོན་ནི་གཏེར་རིའི་ཁེ་ལས་ཀྱིས་སྐྱེ་ཁམས་སླར་གསོའི་ལག་ལེན་འཚོལ་ཞིབ་ཧུར་ཐག་དང་གཏིང་ཟབ་སྤེལ་བའི་བསྡུས་རིས་ཤིག་རེད། དཔེ་མཚོན་དེ་དག་གཞུང་ཁོངས་དང་། དམངས་གཉེར། ཀྲུང་ཕྱི་མཉམ་ལས་སོགས་ཀྱི་ཁེ་ལས་མི་འདྲ་བ་དང་། རྡོ་སོལ་དང་། ལྕགས་རིགས་གཏེར་ཁ། འཛུགས་སྐྲུན་རྒྱུ་ཆའི་གཏེར་ཁ་སོགས་གཏེར་ཁའི་སྣ་ཁ་མི་འདྲ་བ། དེ་བཞིན་ས་འོག་སྔོག་འདོན་དང་། ཕྱི་རོལ་སྔོག་འདོན། མཉམ་འབྲེལ་སྔོག་འདོན་སོགས་སྔོག་འདོན་བྱེད་སྟངས་སྣ་ཚོགས་དང་འབྲེལ་བ་ཡོད་པ་དེ་དག་ནུབ་བྱང་སྐྱེ་ཁམས་ཉམས་ཞན་ཁུལ་དང་། རྨ་ཆུ་རྒྱུག་ཁུལ། འབྲི་ཆུ་རྒྱུག་ཁུལ། མཚོ་བོད་ས་མཐོ་སོགས་ས་ཁོངས་མི་འདྲ་བར་ཁྱབ་ཡོད་པ་རེད།

དཔེ་མཚོན་ལས། ཐོན་སྐྱེད་གཏེར་རིས་གཏེར་ཁུལ་གྱི་སྐྱེ་ཁམས་སླར་གསོའི་ལས་དོན་ལ་སྐུལ་འདེད་གཏོང་བའི་ཁྲོད་སྔོན་ལ་སྲུང་སྐྱོང་དང་། འབྱུང་རྩ་ནས་སྔོན་འགོག་ཚོད་འཛིན། སྤྱི་འདོམས་འཆར་འགོད། ཚན་རིག་དང་མཐུན་པའི་ལག་བསྟར། ཚན་རྩལ་སྣེ་ཁྲིད། ལག་རྩལ་གསར་གཏོད་སོགས་ཐད་ཀྱི་སྔོན་ཐོན་བྱ་ཐབས་དང་དེ་བཞིན་གཏེར་ཁུལ་གྱི་སྐྱེ་ཁམས་མ་ལག་གི་ནུས་པ་དང་མིའི་འཚོ་སྡོད་ཁོར་ཡུག་ལེགས་སུ་གཏོང་བ་དང་། རང་བྱུང་ཐོན་ཁུངས་གྲོན་ཆུང་དང་ལེགས་བསྡུས་འཁོར་རྒྱུག་བེད་སྤྱོད་བྱ་རྒྱུར་སྐུལ་འདེད་གཏོང་བ། ཐོན་ལས་འདྲེན་འཇུག་དང་ཕྱོགས་སྒྱུར་འཕེལ་རྒྱས་སོགས་ཐད་ཐོབ་པའི་གྲུབ་འབྲས་མངོན་པ་མ་ཟད། གཏེར་རིའི་ཁེ་ལས་ཀྱིས་སྤྱི་ཚོགས་ཀྱི་འགན་འཁྲི་འཁུར་བ་དང་སྐྱེ་ཁམས་སླར་གསོའི་ཁྲིམས་གཏན་འཁེལ་བའི་འོས་འགན་སྒྲུབ་པའི་དཔེ་མཚོན་ཡང་མངོན་ཡོད་པ་རེད།