“སྒོ་དབྱེའི་རང་བཞིན་གྱི་བགྲོ་གླེང་དང་དགེ་མཚན་ལྡན་པའི་མཉམ་ལས་ཀྱི་ལས་སྟེགས་ཧུར་ཐག་གཏོད་དགོས”
—— ཨུ་རུ་སུའི་རྒྱལ་ཁབ་ཏུའུ་མའི་ཀྲུའུ་ཞི་གཞོན་པ་དང་པོ་དང་ཨུ་ཀྲུང་མཛའ་གྲོགས་མཐུན་ཚོགས་ཀྱི་ཀྲུའུ་ཞི་མའེ་ལི་ཉི་ཁོའོ་ཧྥུའུ་ལ་བཅར་འདྲི་ཞུས་པ།
འབོ་གསེར་རྒྱལ་ཁབ་ཀྱི་འགོ་ཁྲིད་པའི་ཞལ་འཛོམས་ཐེངས་བཅུ་དྲུག་པ་འཚོག་ཉེར་ཡོད་པའི་སྐབས་སུ་ཨུ་རུ་སུའི་རྒྱལ་ཁབ་ཏུའུ་མའི་ཀྲུའུ་ཞི་གཞོན་པ་དང་པོ་དང་ཨུ་ཀྲུང་མཛའ་གྲོགས་མཐུན་ཚོགས་ཀྱི་ཀྲུའུ་ཞི་མའེ་ལི་ཉི་ཁོའོ་ཧྥུའུ་ཡིས་གསར་འགོད་པའི་ཆེད་དོན་བཅར་འདྲི་དང་ལེན་གནང་སྐབས། དེང་སྐབས་འཛམ་གླིང་གི་དུས་བབ་ལ་འགྱུར་ལྡོག་ཆེན་པོ་འགྲོ་བའི་རྒྱབ་ལྗོངས་འོག་འབོ་གསེར་རྒྱལ་ཁབ་ཀྱིས་འཛམ་གླིང་གི་ཆབ་སྲིད་དང་དཔལ་འབྱོར་ལ་ཤུགས་རྐྱེན་ཐེབས་ཤུགས་རྒྱུན་ཆད་མེད་པར་ཆེ་རུ་འགྲོ་བཞིན་ཡོད་ལ། འབོ་གསེར་མཉམ་ལས་ཀྱི་མདུན་ལམ་ཡང་ཡག་པོ་ཡོད་ཅེས་བརྗོད།
མའེ་ལི་ཉི་ཁོའོ་ཧྥུའུ་ཡིས་འབོ་གསེར་མཉམ་ལས་གཏིང་ཟབ་ཏུ་རྒྱུན་ཆད་མེད་པར་ཕྱིན་པ་དེས་འཛམ་གླིང་སྣ་མང་ཅན་གྱི་འཕེལ་རྒྱས་ལ་སྐུལ་མ་ཐེབས་པ་དང་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་གནས་བབ་མཐོ་རུ་ཕྱིན་ནས་དེ་བས་དྲང་གཞག་དང་ལུགས་མཐུན་གྱི་རྒྱལ་སྤྱིའི་སྒྲིག་ལམ་འཛུགས་པར་སྐུལ་འདེད་གཏོང་རྒྱུར་ཕན་ཐོགས་ཡོད། མིག་སྔར་ང་ཚོས་འབོ་གསེར་མཉམ་ལས་ཀྱི་མི་མངོན་པའི་ནུས་པ་སྔོག་འདོན་གང་ལེགས་བྱས་ནས་སྒོ་དབྱེའི་རང་བཞིན་གྱི་བགྲོ་གླེང་དང་དགེ་མཚན་ལྡན་པའི་མཉམ་ལས་ཀྱི་ལས་སྟེགས་ཧུར་ཐག་གཏོད་དགོས་ཞེས་བརྗོད།
ད་ཐེངས་ཀྱི་ཞལ་འཛོམས་ནི་འབོ་གསེར་རྒྱལ་ཁབ་ཀྱི་ཁོངས་མི་ལོ་རྒྱུས་རང་བཞིན་གྱི་མང་དུ་བཏང་རྗེས་འཚོགས་པའི་འགོ་ཁྲིད་པའི་ཞལ་འཛོམས་ཐོག་མ་དེ་ཡིན་པ་དང་། མའེ་ལི་ཉི་ཁོའོ་ཧྥུའུ་ཡིས“འབོ་གསེར་ཆེན་པོའི་མཉམ་ལས”སྤུས་ཚད་མཐོ་བའི་འཕེལ་རྒྱས་བྱུང་བ་དེས་འབོ་གསེར་རྒྱལ་ཁབ་ཀྱི་དཔལ་འབྱོར་ཚོང་དོན་མཉམ་ལས་ལ་སྔར་བས་ཤུགས་སྣོན་རྒྱག་པ་དང་གོ་ལ་ཧྲིལ་པོའི་བཅོས་སྐྱོང་འཐུས་སྒོ་ཚང་དུ་གཏོང་བར་སྐུལ་འདེད་གཏོང་རྒྱུར་གོ་སྐབས་གསར་པ་ཐོབ་ཡོད། “འབོ་གསེར་རྒྱལ་ཁབ་ཀྱིས་རྒྱལ་སྤྱིའི་གར་སྟེགས་ཐོག་བཏོན་པའི་ནུས་པ་སྔར་བས་མངོན་གསལ་དོད་དུ་འགྲོ་རྒྱུ་རེད”ཅེས་བརྗོད།
མའེ་ལི་ཉི་ཁོའོ་ཧྥུའུ་ཡིས། གསར་དར་ཁྲོམ་རའི་རྒྱལ་ཁབ་དང་འཕེལ་རྒྱས་འགྲོ་བཞིན་པའི་རྒྱལ་ཁབ་ཁག་ཚོགས་སྤྱིའི་རང་བཞིན་གྱི་སྒོ་ནས་འབུར་དུ་ཐོན་པའི་འཕེལ་རིམ་ལས་འཛམ་གླིང་ཐོག་གཅིག་གྱུར་དང་འགྱུར་བ་མེད་པའི་དེང་རབས་ཅན་གྱི་འཕེལ་རྒྱས་ལམ་བུ་ཞིག་མེད་པ་དང་རྒྱལ་ཁབ་ཁག་གི་འཕེལ་རྒྱས་ལམ་བུ་ཚང་མ་དེའི་གཞི་རྩའི་རྒྱལ་ཁབ་ཀྱི་གནས་ཚུལ་དང་མཐུན་དགོས་པ་གསལ་བཤད་བྱས་ཡོད། འབོ་གསེར་རྒྱལ་ཁབ་ཀྱིས་འཕེལ་རྒྱས་ཀྱི་འགྲོ་ལམ་གདམ་ག་བྱེད་པར་དོན་སྙིང་གལ་ཆེན་ལྡན་ཡོད་ཅེས་བརྗོད།
མའེ་ལི་ཉི་ཁོའོ་ཧྥུའུ་ཡིས། ཀྲུང་གོས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་ཧུར་ཐག་གཏོང་བ་དང་། ཐོན་སྐྱེད་ནུས་ཤུགས་གསར་མ་འཕེལ་རྒྱས་མགྱོགས་མྱུར་གཏོང་བ། མི་ཐབས་རིག་ནུས་དང་། སྐྱེ་དངོས་ལག་རྩལ། ལྗང་མདོག་ནུས་རྒྱུ་སོགས་ཀྱི་ལག་རྩལ་ཞིབ་སྤེལ་ལ་ཤུགས་སྣོན་རྒྱག་པ་བཅས་ཀྱི་ཐོག་ནས་ཀྲུང་གོས་འཕེལ་རྒྱས་ཀྱི་སྤུས་ཚད་དང་གསར་གཏོད་འཕོ་འགྱུར་དོན་གཉེར་བྱེད་པ་མཚོན་གྱི་ཡོད། ཀྲུང་གོ་སྲིད་གཞུང་གིས་ད་དུང་དམངས་འཚོ་འགན་ལེན་དང་ལེགས་སུ་གཏོང་བ་དང་སྤྱི་ཚོགས་ཀྱི་དྲང་བཞག་བདེན་སྐྱོང་ལ་སྐུལ་འདེད་གཏོང་རྒྱུ་དེ་འཕེལ་རྒྱས་ཀྱི་དམིགས་ཚད་གལ་ཆེན་དུ་བརྩི་ཡི་ཡོད། “ཀྲུང་གོས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་སྟེ་དར་རྒྱས་དེ་བས་ཆེན་པོ་ཡོང་ངེས་རེད”ཅེས་བརྗོད།
ད་ལོ་ནི་ཀྲུང་གོ་དང་ཨུ་རུ་སུའི་དབར་ཕྱི་འབྲེལ་བཙུགས་ནས་ལོ་75འཁོར་བའི་ལོ་ཞིག་ཡིན་པ་དང་། རྒྱལ་ཁབ་གཉིས་ཀྱི་འབྲེལ་བ་ཆུ་ཚད་མཐོ་བའི་འཕེལ་རྒྱས་རྒྱུན་འཁྱོངས་ཐུབ་ནས་རྒྱལ་ཁབ་ཆེན་པོའི་འབྲེལ་བ་གསར་པའི་དཔེ་མཚོན་བཏོད་ཡོད། མའེ་ལི་ཉི་ཁོའོ་ཧྥུའུ་ཡིས། ཨུ་རུ་སུ་དང་ཀྲུང་གོ་རྒྱལ་ཁབ་གཉིས་ཀྱིས་མཉམ་འབྲེལ་རྒྱལ་ཚོགས་དང་། འབོ་གསེར་རྒྱལ་ཁབ། ཧྲང་ཧའེ་མཉམ་ལས་རྩ་འཛུགས་སོགས་སྒྲོམ་གཞིའི་ནང་འབྲེལ་གཏུག་མཐུན་སྦྱོར་ལ་ཤུགས་སྣོན་རྒྱག་པ་དང་ནུས་རྒྱུ་དང་། འགྲིམ་འགྲུལ། ཞིང་ལས། ཚན་རྩལ་འདུས་ཚད་མཐོ་བ་སོགས་ཀྱི་ཁྱབ་ཁོངས་སུ་མཉམ་ལས་གཏིང་ཟབ་བྱས་ནས་ཡོ་རོབ་དང་ཨེ་ཤེ་ཡའི་དཔལ་འབྱོར་མནའ་འབྲེལ་དང“རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་འགོ་འབྲེལ་མཐུད་བྱ་རྒྱུར་ཤུགས་སྣོན་བརྒྱབ་ཡོད། དངོས་སྒྲུབ་མཉམ་ལས་རབ་དང་རིམ་པ་བྱས་པ་དེས་རྒྱལ་ཁབ་གཉིས་པོའི་མི་དམངས་ཀྱི་བདེ་རྩ་ཆེ་རུ་འགྲོ་རྒྱུར་ཕན་ཐོགས་ཡོད་པ་མ་ཟད། ད་དུང་འདྲ་མཉམ་དང་གོ་རིམ་ལྡན་པའི་འཛམ་གླིང་སྣ་མང་ཅན་དང་ཀུན་ཕན་ཁོང་ཡངས་ཀྱི་དཔལ་འབྱོར་གོ་ལ་ཅན་ལ་སྐུལ་འདེད་གཏོང་བར་ལེགས་སྐྱེས་ཕུལ་ཡོད་ཅེས་བརྗོད།