ཉེ་ཆར། ཀྲུང་གོ་དང་ལ་ཏིང་མེ་གླིང་གི་དམངས་ཁྲོད་མཛའ་གྲོགས་གླེང་སྟེགས་སྐབས་དྲུག་པ་ཧྲའན་ཤིས་ཞིང་ཆེན་ཤིས་ཨན་གྲོང་ཁྱེར་དུ་གཉེར་ཞིང་། སྐབས་འདིའི་གླེང་སྟེགས་ལ“སྤེལ་རེས་དང་དཔྱད་གཞིར་འཛིན་རེས་ལ་སྐུལ་འདེད་བཏང་ནས་མི་དམངས་ཀྱི་མཛའ་གཅུགས་ཟབ་ཏུ་གཏོང་དགོས”ཞེས་པ་བརྗོད་དོན་གཙོ་བོར་བྱས་ཏེ་ལ་ཏིང་མེ་གླིང་དང་ཅ་ལེ་པིའི་རྒྱལ་ཁབ་དང་ས་ཁུལ་གྱི་ཀྲུང་གོའི་མཛའ་གྲོགས་རྩ་འཛུགས་ཀྱི་འགན་འཁུར་བ་དང་ལ་ཏིང་མེ་གླིང་གི་ཕྱི་འབྲེལ་དཔོན་སོགས་མི་100ལྷག་ཙམ་ཞུགས་ཡོད་པ་རེད། “སྲོལ་རྒྱུན་གྱི་མཛའ་གཅུགས་ཟབ་ཏུ་བཏང་ནས་ཀྲུང་གོ་དང་ལ་ཏིང་མེ་གླིང་གི་ལས་དབང་གཅིག་མཐུན་ཚོགས་པ་ཧུར་ཐག་འཛུགས་དགོས་པ”དང་།“དངོས་སྒྲུབ་མཉམ་ལས་ལ་སྐུལ་འདེད་བཏང་ནས་གཉིས་ཁེ་དམངས་ཕན་གྱི་ཀྲུང་གོ་དང་ལ་ཏིང་མེ་གླིང་གི་འབྲེལ་བ་ཟབ་ཏུ་འགྲོ་བར་རམ་འདེགས་བྱེད་དགོས་པ” “གོ་ལ་ཧྲིལ་པོའི་ཤེས་དཔལ་གྲོས་འགོ་ལག་ལེན་བསྟར་ནས་ཀྲུང་གོ་དང་ལ་ཏིང་མེ་གླིང་གི་ཤེས་དཔལ་སྤེལ་རེས་དང་དཔྱད་གཞིར་འཛིན་རེས་ལ་སྐུལ་འདེད་གཏོང་དགོས་པ”སོགས་ཀྱི་གྲོས་གཞིར་དམིགས་ནས། སྐུ་མགྲོན་ཚོས་དུས་རབས་གསར་པའི་འདྲ་མཉམ་དང་། གཉིས་ཕན། གསར་གཏོད། སྒོ་དབྱེ། དམངས་ཕན་བཅས་ཀྱི་ཀྲུང་གོ་དང་ལ་ཏིང་མེ་གླིང་གི་འབྲེལ་བ་ཟབ་ཏུ་བཏང་ནས་ཀྲུང་གོ་དང་ལ་ཏིང་མེ་གླིང་གི་ལས་དབང་གཅིག་མཐུན་ཚོགས་པ་འཛུགས་པར་སྐུལ་འདེད་གཏོང་ཆེད་དམངས་ཁྲོད་ཀྱི་སྟོབས་ཤུགས་སྐྱེས་སུ་འབུལ་གྱི་ཡིན་ཞེས་གང་བསམ་ལྷུག་གླེང་བྱས་པ་རེད།

སྐབས་འདིའི་གླེང་སྟེགས་ནི《ཀྲུང་གོ་དང་ལ་ཏིང་མེ་གླིང་གཅིག་མཐུན་ཚོགས་པའི་ཁོངས་མིའི་རྒྱལ་ཁབ་ཀྱི་གཙོ་གནད་ཁྱབ་ཁོངས་ཀྱི་མཉམ་ལས་ཀྱི་ཐུན་མོང་བྱ་སྤྱོད་འཆར་གཞི(2022-2024)》རྣམ་གྲངས་གསལ་ཐོའི་བྱེད་སྒོ་གལ་ཆེན་གྱི་གྲས་ཤིག་ཡིན་པ་དང་། ཀྲུང་གོ་མི་དམངས་ཕྱི་ཕྱོགས་མཛའ་གྲོགས་མཐུན་ཚོགས་དང་། ཀྲུང་གོ་དང་ལ་ཏིང་མེ་གླིང་དང་ཅ་ལེ་པིའི་མཛའ་གྲོགས་མཐུན་ཚོགས། ལ་ཏིང་མེ་གླིང་དང་། ཅ་ལེ་པི། ཀྲུང་གོའི་མཛའ་གྲོགས་མཉམ་འབྲེལ་ལྷན་ཚོགས་བཅས་ཀྱིས་གཙོ་གཉེར་བྱས་པ་དང་ཧྲའན་ཤིས་ཞིང་ཆེན་མི་དམངས་ཕྱི་ཕྱོགས་མཛའ་གྲོགས་མཐུན་ཚོགས་ཀྱིས་གཉེར་འགན་ཁུར་བ་ཞིག་རེད།

ད་ལོ་ནི་ཀྲུའུ་ཞི་ཞི་ཅིན་ཕིང་གིས་ཀྲུང་གོ་དང་ལ་ཏིང་མེ་གླིང་གི་ལས་དབང་གཅིག་མཐུན་ཚོགས་པ་འཛུགས་རྒྱུའི་གྲོས་འགོ་ཐོག་མར་བཏོན་ནས་ལོ་10འཁོར་བའི་ལོ་རེད། “ཀྲུང་གོ་དང་ལ་ཏིང་མེ་གླིང་གི་དམངས་ཁྲོད་མཛའ་གྲོགས་གླེང་སྟེགས་ཀྱིས་འཛམ་གླིང་ཤེས་དཔལ་གྱི་སྣ་མང་རང་བཞིན་ལ་བརྩི་འཇོག་དང་། མིའི་རིགས་ཡོངས་ཀྱི་ཐུན་མོང་རིན་ཐང་དར་སྤེལ་གཏོང་བ། ཤེས་དཔལ་རྒྱུན་འཛིན་དང་གསར་གཏོད་ལ་མཐོང་ཆེན། རྒྱལ་སྤྱིའི་མི་ཆོས་རིག་གནས་སྤེལ་རེས་མཉམ་ལས་ལ་ཤུགས་སྣོན་རྒྱག་པ་བཅས་ཀྱི་ལས་འགན་ལྕི་པོ་འཁུར་ཡོད”ཀྲུང་གོ་སྲིད་གཞུང་ལ་ཏིང་མེ་གླིང་ལས་དོན་ཁང་གི་དམིགས་བསལ་འཐུས་མི་ཆིའུ་ཞའོ་ཆི་ཡིས། སྐབས་འདིའི་གླེང་སྟེགས་གཉེར་བར་དོན་སྙིང་གལ་ཆེན་ལྡན་ཡོད་ལ། གོ་ལ་ཧྲིལ་པོའི་ཤེས་དཔལ་གྱི་གྲོས་འགོ་ལ་ཏིང་མེ་གླིང་དང་ཅ་ལེ་པིའི་ས་ཁུལ་དུ་རྩ་བ་ཚུགས་ནས་ཀྲུང་གོ་དང་ལ་ཏིང་མེ་གླིང་གི་མཛའ་གྲོགས་ཀྱི་དམངས་འདོད་རྨང་གཞི་སྔར་བས་བརྟན་དུ་གཏོང་བར་ཕན་ཐོགས་ཡོད་ཅེས་བརྗོད་པ་རེད།