ཤིན་ཧྭ་གསར་འགྱུར་ཁང་ཝུའུ་ལུའུ་མུའུ་ཆི་ནས་ཟླ་10ཚེས་24ཉིན་གློག་འཕྲིན་འབྱོར་གསལ། ཚེས་21ནས་24ཉིན་བར། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུ་དང་རྒྱལ་ཡོངས་སྲིད་གྲོས་ཀྱི་ཀྲུའུ་ཞི་ཝང་ཧུའུ་ཉིང་གིས་ཤིན་ཅང་ཧོ་ཐེན་དང་ཁཱ་ཧྲིར་བརྟག་ཞིབ་གནང་ཞིང་། ཁོང་གིས། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱ་རྒྱུ་མཐའ་འཁྱོངས་བྱས་ནས། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་ལག་བསྟར་དོན་འཁྱོལ་གཏིང་ཟབ་དང་། དུས་རབས་གསར་པའི་ཏང་གི་ཤིན་སྐྱོང་མཛད་ཇུས་ཆ་ཚང་བ་དང་། གནད་ལ་འཁེལ་བ། ཕྱོགས་ཡོངས་བཅས་ཀྱི་སྒོ་ནས་ལག་བསྟར། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་འཛུགས་པའི་གཙོ་རྐང་མཐའ་འཁྱོངས་བཅས་བྱས་ཏེ། ཀྲུང་གོའི་ལུགས་ཀྱི་དེང་རབས་ཅན་གྱི་འཕེལ་རིམ་ནང་མཛེས་སྡུག་ལྡན་པའི་ཤིན་ཅང་དེ་བས་ཡག་པོ་སྐྲུན་དགོས་ཞེས་གསུངས་པ་རེད།

ཝང་ཧུའུ་ཉིང་ཧོ་ཐེན་ས་ཁུལ་མི་དམངས་སྨན་ཁང་དང་། ཧོ་ཐེན་གྲོང་ཁྱེར་སློབ་ཆུང་བཅུ་གཉིས་པ། ཧྲུའུ་ལེ་རྫོང་ཐཱ་ཙེ་ཧུང་ཤང་ཐའེ་ཐུར་གྲོང་ཚོ་བཅས་སུ་ཕེབས་ནས་མི་རིགས་མཐུན་སྒྲིལ་ལས་དོན་གྱི་གནས་ཚུལ་ལ་བརྟག་ཞིབ་གནང་བ་དང་། ཤིན་སྐྱོར་བྱེད་མཁན་སྨན་བཅོས་རུ་ཁག་དང་སློབ་གྲྭའི་དགེ་སློབ་དང་སྤེལ་རེས་གནང་བ་མ་ཟད། གྲངས་ཉུང་མི་རིགས་མང་ཚོགས་ཀྱི་ཁྱིམ་ཚང་ལ་འཚམས་འདྲི་ཡང་གནང་ཞིང་། ཁོང་གིས། གཞི་རིམ་བཅོས་སྐྱོང་དང་། སློབ་གྲྭའི་སློབ་གསོ། མང་ཚོགས་ཀྱི་རྒྱུན་གཏན་འཚོ་བ་བཅས་ཀྱི་ཁྲོད་མི་རིགས་མཐུན་སྒྲིལ་དོན་འཁྱོལ་བྱས་ནས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་ཆུང་བྱིས་པའི་དུས་ནས་ཕྲུ་གུ་ཚོའི་སེམས་ལ་ཟུག་པར་བྱས་ཏེ། མི་རིགས་ཁག་སེ་འབྲུའི་རྡོག་ལྟར་གོང་བུ་གཅིག་ཏུ་སྒྲིལ་བར་སྐུལ་འདེད་གཏོང་དགོས་ཞེས་གསུངས་པ་རེད། ཧོ་ཐེན་ས་ཁུལ་ཁུན་ཀང་དཔལ་འབྱོར་ལག་རྩལ་གསར་སྤེལ་ཁུལ་དང་འབྲེལ་ཡོད་ཁེ་ལས་སུ་བརྟག་ཞིབ་གནང་སྐབས། ཁོང་གིས། ཤིན་ཅང་ལྷོ་རྒྱུད་ཀྱི་ཁྱད་ལྡན་ལེགས་ཆའི་དེང་རབས་ཅན་གྱི་ཐོན་ལས་མ་ལག་བསྐྲུན་ནས་ཐོན་ལས་འཁོར་འབྲེལ་རིང་བ་དང་སྐུལ་ཁྲིད་ནུས་པ་ཆེ་བའི་ཁེ་ལས་ཁག་གཅིག་སྐྱེད་སྲིང་བྱས་ཏེ། དམངས་འཚོ་ལེགས་གཏོང་ལ་སྐུལ་འདེད་གཏོང་བ་དང་འཕེལ་རྒྱས་ཀྱི་གསོན་ཤུགས་འཕེལ་བར་བྱེད་དགོས་ཞེས་གསུངས་པ་རེད། ཀྲུང་གོ(ཤིན་ཅང)རང་མོས་ཚོང་དོན་ཚོད་ལྟ་ཁུལ་ཁཱ་ཧྲི་ཡུག་ཁུལ་ཚོང་དོན་ཞབས་ཞུ་ལྟེ་གནས་དང་ཨེ་ཤེ་ཡ་དབུས་རྒྱུད་དང་ནུབ་རྒྱུད་ཀྱི་རྒྱལ་སྤྱིའི་ཚོང་དོན་ཁྲོམ་རར་བརྟག་ཞིབ་གནང་སྐབས། ཁོང་གིས། ཤིན་ཅང་གིས་ཁྱད་ཆོས་ལྡན་པའི་སྒོ་དབྱེའི་ལམ་བུ་གསར་པ་ཞིག་བཏོད་དེ་རང་རྒྱལ་གྱིས་ནུབ་རྒྱུད་ལ་སྒོ་མོ་འབྱེད་པའི་ཟམ་སྣའི་བཙན་རྫོང་སྐྲུན་དགོས་ཞེས་གསུངས་པ་རེད། ཤིན་ཅང་ཧོ་ཐེན་སློབ་གླིང་དང་། ཤིན་ཅང་བཟོ་ལས་སློབ་གླིང(གྲ་སྒྲིག) ཁཱ་ཧྲི་སློབ་ཆེན་ཤིན་ཆོན་སློབ་ཁུལ་བཅས་སུ་བརྟག་ཞིབ་གནང་སྐབས། ཁོང་གིས། ཤིན་ཅང་དང་ལྷག་པར་དུ་ཤིན་ཅང་ལྷོ་རྒྱུད་ཀྱི་མཐོ་རིམ་སློབ་གསོ་ཡག་པོ་གཉེར་ནས་བྱང་ཚད་མཐོ་བའི་ཤེས་ལྡན་པ་དེ་བས་མང་བ་གསོ་སྐྱོང་བྱེད་དགོས་ཞེས་གསུངས་པ་རེད། ཝང་ཧུའུ་ཉིང་ད་དུང་ལུའོ་ཕུ་རྫོང་གི་རཱ་ཝ་ཁེ་དགོན་པའི་རྗེས་ཤུལ་དང་ཁཱ་ཧྲི་གྲོང་ཁྱེར་འཆར་འགོད་ཁང་དུ་ཕེབས་ནས། ལོ་རྒྱུས་རིག་དངོས་རྗེས་ཤུལ་དང་རིག་དངོས་སྲུང་སྐྱོང་བེད་སྤྱོད་དང་གྲོང་ཁྱེར་རིག་གནས་ལུས་རྩལ་ཁང་གི་སྒྲིག་བཀོད་འཆར་འགོད་འཛུགས་སྐྲུན་སོགས་ཀྱི་གནས་ཚུལ་མཁྱེན་རྟོགས་གནང་བ་རེད།

བརྟག་ཞིབ་གནང་རིང་། ཝང་ཧུའུ་ཉིང་གིས་གསུངས་དོན། ཤིན་ཅང་ཡུ་གུར་རང་སྐྱོང་ལྗོངས་ཏང་ཨུད་ཀྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཤིན་ཅང་གི་ལས་དོན་སྐོར་གྱི་གསུང་བཤད་གལ་ཆེན་གྱི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱས་ནས་ཤིན་ཅང་གི་སྤྱི་ཚོགས་སྤྱི་ཡོངས་བརྟན་ལྷིང་དང་མི་དམངས་བདེ་སྡོད་ལས་བརྩོན་གྱི་རྣམ་པ་བཟང་པོ་སྔར་བས་སྲ་བརྟན་དུ་གཏོང་དགོས། ཤིན་ཅང་གི་ལས་དོན་ཡག་པོ་སྒྲུབ་པར་སྤྱི་ཚོགས་བརྟན་ལྷིང་སྲུང་སྐྱོང་བྱེད་པ་དེ་ཐོག་མཐའ་བར་གསུམ་དུ་ཨང་དང་པོར་བཞག་ནས་ཤིན་ཅང་གི་སྤྱི་ཚོགས་སྤྱི་ཡོངས་རྒྱུན་མཐུད་བརྟན་ལྷིང་རྒྱུན་འཁྱོངས་ཡོང་བར་བྱེད་དགོས། མི་རིགས་དང་ཆོས་ལུགས་ལས་དོན་ཏན་ཏིག་དང་ཡག་པོ་སྒྲུབ་པ་དང་། རིག་གནས་ལ་བརྟེན་ནས་ཤིན་ཅང་བཅོས་སྐྱོང་གཏིང་ཟབ་བྱས་ཏེ་མི་རིགས་ཁག་གི་མང་ཚོགས་ལ་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པ་དང“མོས་སེམས་ལྔ”ཟབ་ཏུ་གཏོང་བར་ཁྲིད་སྟོན་བྱེད་དགོས། ཤིན་ཅང་སྤུས་ཚད་མཐོ་བའི་འཕེལ་རྒྱས་ཀྱི་ལམ་བུར་སྐྱོད་པར་སྐུལ་འདེད་བཏང་ནས་ཤིན་ཅང་གི་སྤྱི་ཚོགས་བརྟན་ལྷིང་དང་ཡུན་རིང་བདེ་འཁོད་ཀྱི་དངོས་པོའི་རྨང་གཞི་བརྟན་དུ་གཏོང་དགོས། པིང་ཐོན་གྱི་སྙིང་སྟོབས་དར་སྤེལ་གྱིས་དམག་དཔུང་དང་ས་གནས་མཉམ་འདྲེས་འཕེལ་རྒྱས་གཏིང་ཟབ་ཏུ་བཏང་སྟེ། དུས་རབས་གསར་པའི་བརྟན་ལྷིང་དང་མཐའ་མཚམས་སྲུང་སྐྱོང་བྱེད་པའི་པིང་ཐོན་གྱི་ལེགས་ཆ་གསར་པ་ཆགས་པར་བྱེད་དགོས།

ཝང་ཧུའུ་ཉིང་གིས་ད་དུང་རང་སྐྱོང་ལྗོངས་སྲིད་གྲོས་ཧོ་ཐེན་ས་ཁུལ་ལས་དོན་ཨུ་ལྷན་དང་། ཁཱ་ཧྲི་ས་ཁུལ་ལས་དོན་ཨུ་ལྷན། མོ་ཡུས་རྫོང་སྲིད་གྲོས་བཅས་སུ་སྲིད་གྲོས་ཨུ་ཡོན་དང་ལས་ཁུངས་ཀྱི་ལས་བྱེད་པར་གཟིགས་པ་དང་། ཁོང་གིས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་གོ་མི་དམངས་ཆབ་སྲིད་གྲོས་མོལ་ཚོགས་འདུ་བཙུགས་ནས་ལོ་75འཁོར་བར་རྟེན་འབྲེལ་ཞུ་བའི་ཚོགས་ཆེན་ཐོག་གནང་བའི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་ལག་བསྟར་གཏིང་ཟབ་བྱས་ནས་དུས་རབས་གསར་པའི་ཏང་གི་ཤིན་སྐྱོང་མཛད་ཇུས་ཆ་ཚང་བ་དང་། གནད་ལ་འཁེལ་བ། ཕྱོགས་ཡོངས་བཅས་ཀྱི་སྒོ་ནས་ལག་བསྟར་བྱེད་པར་དམིགས་པ་དང་། ཆབ་སྲིད་གྲོས་མོལ་དང་། དམངས་གཙོའི་ལྟ་སྐུལ། སྲིང་ཞུགས་སྲིད་གླེང་བཅས་བྱེད་ནུས་ཆེ་རུ་བཏང་སྟེ་ཤིན་ཅང་ལས་དོན་གྱི་སྤྱིའི་དམིགས་ཚད་མངོན་འགྱུར་བྱེད་པར་ཐུན་མོང་གི་ངོས་འཛིན་དང་སྟོབས་ཤུགས་གཅིག་ཏུ་སྒྲིལ་དགོས་ཞེས་གསུངས་པ་རེད།