འདི་ནི་ས་གནས་དེ་གའི་དུས་ཚོད་ཟླ་10ཚེས་23ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཁ་ཧྲན་དུ་འབོ་གསེར་རྒྱལ་ཁབ་ཀྱི་འགོ་ཁྲིད་པའི་ཞལ་འཛོམས་ལ་ཞུགས་རིང་རྒྱ་གར་གྱི་ཙུང་ལི་མོ་ཏི་དང་མཇལ་འཛོམས་གནང་བ།

ཤིན་ཧྭ་གསར་འགྱུར་ཁང་ཨུ་རུ་སུའི་གྲོང་ཁྱེར་ཁ་ཧྲན་ནས་ཟླ་10ཚེས་23ཉིན་གློག་འཕྲིན་འབྱོར་གསལ། ས་གནས་དེ་གའི་དུས་ཚོད་ཟླ་10ཚེས་23ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཁ་ཧྲན་དུ་འབོ་གསེར་རྒྱལ་ཁབ་ཀྱི་འགོ་ཁྲིད་པའི་ཞལ་འཛོམས་ལ་ཞུགས་རིང་རྒྱ་གར་གྱི་ཙུང་ལི་མོ་ཏི་དང་མཇལ་འཛོམས་གནང་བ་རེད།

ཞི་ཅིན་ཕིང་གིས་གསུངས་དོན། ཀྲུང་གོ་དང་རྒྱ་གར་གཉིས་ཀ་གནའ་བོའི་ཤེས་རིག་དར་བའི་རྒྱལ་ཁབ་དང་། འཕེལ་རྒྱས་འགྲོ་བཞིན་པའི་རྒྱལ་ཁབ་ཆེན་པོ། གོ་ལ་ཧྲིལ་པོའི་ལྷོ་ཕྱོགས་རྒྱལ་ཁབ་ཀྱི་ཁོངས་མི་གལ་ཆེན་བཅས་ཡིན་ཞིང་། ཚང་མ་རང་སོའི་རྒྱལ་ཁབ་ཀྱི་དེང་རབས་ཅན་འཛུགས་སྐྲུན་གྱི་འགག་རྩའི་དུས་སྐབས་སུ་གནས་ཡོད། ཀྲུང་གོ་དང་རྒྱ་གར་གྱིས་ལོ་རྒྱུས་ཀྱི་རླབས་རྒྱུན་དང་རྒྱལ་ཁབ་གཉིས་པོའི་འབྲེལ་བའི་འཕེལ་རྒྱས་ཀྱི་ཁ་ཕྱོགས་སྟངས་འཛིན་ཡང་དག་བྱེད་པ་ནི་རྒྱལ་ཁབ་གཉིས་པོ་དང་རྒྱལ་ཁབ་གཉིས་པོའི་མི་དམངས་ཀྱི་རྩ་བའི་ཁེ་ཕན་དང་མཐུན་ཡོད། ཕྱོགས་གཉིས་པོས་འབྲེལ་གཏུག་དང་མཉམ་ལས་ལ་ཤུགས་སྣོན་རྒྱག་པ་དང་། འཐབ་ཇུས་ཐད་ཕན་ཚུན་ཡིད་ཆེས་ཟབ་ཏུ་གཏོང་བ། འཕེལ་རྒྱས་ཀྱི་ཕུགས་འདུན་འགྲུབ་པར་ཕན་ཚུན་རོགས་ལས་བཅས་བྱེད་དགོས། ཕྱོགས་གཉིས་པོས་རྒྱལ་སྤྱིའི་འགན་འཁྲི་ཁུར་ཏེ་འཕེལ་རྒྱས་འགྲོ་བཞིན་པའི་རྒྱལ་ཁབ་མཉམ་འབྲེལ་ཐོག་རང་སྟོབས་ཆེ་རུ་གཏོང་བར་མིག་དཔེ་འདོན་པ་དང་། འཛམ་གླིང་སྣེ་མང་ཅན་དང་རྒྱལ་སྤྱིའི་འབྲེལ་བ་དམངས་གཙོ་ཅན་ལ་སྐུལ་འདེད་གཏོང་ཆེད་ལེགས་སྐྱེས་འབུལ་དགོས།

ཞི་ཅིན་ཕིང་གིས་ནན་བཤད་གནང་དོན། ཀྲུང་གོ་དང་རྒྱ་གར་དབར་གྱི་འབྲེལ་བའི་ངོ་བོ་ནི་མི་འབོར་དུང་ཕྱུར་14ལྷག་ཙམ་ཡོད་པའི་ཁྱིམ་མཚེས་ཀྱི་འཕེལ་རྒྱས་འགྲོ་བཞིན་པའི་རྒྱལ་ཁབ་ཆེན་པོ་གཉིས་ཇི་ལྟར་མཉམ་གནས་བྱེད་པའི་གནད་དོན་རེད། འཕེལ་རྒྱས་ནི་ཀྲུང་གོ་དང་རྒྱ་གར་རྒྱལ་ཁབ་གཉིས་ཀྱི་མིག་སྔའི“མཐུན་ཆ”ཆེ་ཤོས་དེ་རེད། ཕྱོགས་གཉིས་པོས་ཀྲུང་གོ་དང་རྒྱ་གར་དབར་གྱི“ཕྱོགས་གཉིས་ཀ་ཕན་ཚུན་འཕེལ་རྒྱས་ཀྱི་གོ་སྐབས་སུ་འཛིན་པ་དང་། ཕན་ཚུན་འཇིགས་སྐུལ་དུ་མི་འཛིན་པ”དང“མཉམ་ལས་ཀྱི་རོགས་ཟླ་ཡིན་པ་ལས་འགྲན་ཡ་མིན་པ”སོགས་ཐུན་མོང་གི་ངོས་འཛིན་གལ་ཆེན་མུ་མཐུད་མཐའ་འཁྱོངས་དང་འཐབ་ཇུས་ཀྱི་ངོས་འཛིན་ཡང་དག་མཐའ་འཁྱོངས་བྱས་ཏེ། ཁྱིམ་མཚེས་རྒྱལ་ཁབ་ཆེན་པོ་འཆམ་མཐུན་མཉམ་གནས་དང་ཐུན་མོང་འཕེལ་རྒྱས་ཀྱི་འོད་ཟེར་ལྡན་པའི་ལམ་བུ་ཞིག་ཐུན་མོང་ཐོག་དོན་གཉེར་བྱེད་དགོས།

མོ་ཏིས་གསུངས་དོན། རྒྱ་གར་དང་ཀྲུང་གོའི་འབྲེལ་བ་བརྟན་པོའི་ངང་འཕེལ་རྒྱས་འགྲོ་བ་རྒྱལ་ཁབ་གཉིས་པོ་དང་རྒྱལ་ཁབ་གཉིས་པོའི་མི་དམངས་ཀྱི་ངོས་ནས་བརྗོད་ན་གལ་འགངས་ཤིན་ཏུ་ཆེ་ཞིང་། མི་དམངས་དུང་ཕྱུར་28ཀྱི་བདེ་རྩ་དང་འབྱུང་འགྱུར་དང་འབྲེལ་བ་ཡོད་ལ། ས་ཁུལ་དང་ཐ་ན་འཛམ་གླིང་ཞི་བདེ་དང་བརྟན་ལྷིང་གི་ངོས་ནས་བརྗོད་ནའང་གལ་འགངས་ཤིན་ཏུ་ཆེ་བ་ཞིག་རེད། མིག་སྔའི་རྙོག་འཛིང་ཆེ་བའི་རྒྱལ་སྤྱིའི་དུས་བབ་འོག་གནའ་བོའི་ཤེས་རིག་ཆེན་པོ་གཉིས་དང་དཔལ་འབྱོར་གྱི་སྒུལ་ཤུགས་ཆེན་པོ་གཉིས་ཡིན་པའི་རྒྱ་གར་དང་ཀྲུང་གོའི་མཉམ་ལས་ལས་དཔལ་འབྱོར་སླར་གསོ་དང་འཛམ་གླིང་སྣེ་མང་ཅན་ལ་སྐུལ་འདེད་གཏོང་རྒྱུར་ཕན་པ་ཡོད། རྒྱ་གར་ཕྱོགས་ཀྱིས་ཀྲུང་གོ་ཕྱོགས་དང་འཐབ་ཇུས་འབྲེལ་གཏུག་ལ་ཤུགས་སྣོན་བརྒྱབ་སྟེ་འཐབ་ཇུས་ཐད་ཕན་ཚུན་ཡིད་ཆེས་ཟབ་ཏུ་གཏོང་བ་དང་གཉིས་ཕན་མཉམ་ལས་རྒྱ་ཆེར་གཏོང་འདོད་ཡོད། ཀྲུང་གོ་ཕྱོགས་ཀྱིས་ཧྲང་ཧའེ་མཉམ་ལས་རྩ་འཛུགས་ཀྱི་རེས་སྐོར་ཀྲུའུ་ཞིའི་རྒྱལ་ཁབ་ཀྱི་འགན་འཁུར་རྒྱུར་རྒྱ་གར་ཕྱོགས་ཀྱིས་ནུས་ཤུགས་ཡོད་རྒུས་རྒྱབ་སྐྱོར་བྱེད་པ་དང་འབྲེལ་འབོ་གསེར་སོགས་ཕྱོགས་མང་སྒྲོམ་གཞིའི་ནང་གི་འབྲེལ་གཏུག་དང་མཉམ་ལས་ལ་ཤུགས་སྣོན་རྒྱག་འདོད་ཀྱང་ཡོད།

འགོ་ཁྲིད་གཉིས་པོས་ཉེ་དུས་ཕྱོགས་གཉིས་པོའི་དབར་འབྲེལ་གཏུག་དམ་ཟབ་བྱས་པ་བརྒྱུད་མཐའ་མཚམས་ས་ཁུལ་གྱི་འབྲེལ་ཡོད་གནད་དོན་ཐག་གཅོད་ཐད་འཕེལ་རིམ་གལ་ཆེན་བྱུང་བར་གདེང་འཇོག་གང་ལེགས་གནང་བ་རེད། མོ་ཏིས་རྒྱལ་ཁབ་གཉིས་ཀྱི་འབྲེལ་བ་ལེགས་སུ་དང་འཕེལ་རྒྱས་གཏོང་རྒྱུའི་སྐོར་གྱི་བསམ་ཚོད་དང་གྲོས་འགོ་བཏོན་པར། ཞི་ཅིན་ཕིང་གིས་དེའི་ཐད་རྩ་དོན་ཐོག་མོས་མཐུན་ཡོད་ཅེས་གསུངས་པ་རེད།

ཕྱོགས་གཉིས་པོས་རྒྱལ་ཁབ་གཉིས་པོའི་མཐའ་མཚམས་གནད་དོན་གྱི་དམིགས་བསལ་འཐུས་མིའི་ཐུག་འཕྲད་ལམ་སྲོལ་གྱི་ནུས་པ་ཡག་པོ་བཏོན་ཏེ་ཐུན་མོང་ཐོག་མཐའ་མཚམས་ས་ཁུལ་གྱི་ཞི་བདེ་ལྷིང་འཇགས་སྲུང་སྐྱོང་བྱེད་པ་དང་། དྲང་གཞག་ལུགས་མཐུན་གྱི་ཐག་གཅོད་ཇུས་གཞི་འཚོལ་ཞིབ་བྱ་རྒྱུའི་མོས་མཐུན་གནང་བ་རེད།

ཕྱོགས་གཉིས་པོས་རྒྱལ་ཁབ་གཉིས་པོའི་ཕྱི་འབྲེལ་པུའུ་ཀྲང་དང་རིམ་པ་ཁག་གི་དཔོན་རིགས་དབར་སྐད་ཆ་ཤོད་རེས་བྱས་ནས་རྒྱལ་ཁབ་གཉིས་པོའི་འབྲེལ་བ་སྔ་ཙམ་བརྟན་ལྷིང་དང་འཕེལ་རྒྱས་ཀྱི་འགྲོ་ལམ་ཐོག་བསྐྱར་དུ་ལོག་པར་སྐུལ་འདེད་གཏོང་རྒྱུའི་མོས་མཐུན་གནང་བ་རེད།

ཕྱོགས་གཉིས་པོས་ཕྱོགས་མང་ས་ཁོངས་སུ་འབྲེལ་གཏུག་དང་མཉམ་ལས་བྱེད་ཤུགས་ཆེ་རུ་བཏང་སྟེ་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་ཐུན་མོང་ཁེ་ཕན་སྲུང་རྒྱུའི་མོས་མཐུན་གནང་བ་རེད།

ཕྱོགས་གཉིས་པོས་ད་ཐེངས་ཀྱི་མཇལ་འཛོམས་ལ་དགེ་མཚན་ལྡན་པའི་རང་བཞིན་དང་དོན་སྙིང་གལ་ཆེན་ལྡན་པའི་ངོས་འཛིན་གནང་བ་མ་ཟད། འཐབ་ཇུས་ཀྱི་མཐོ་ཚད་དང་ཕུགས་ཀྱི་ཟུར་ཚད་ནས་ཀྲུང་གོ་དང་རྒྱ་གར་གྱི་འབྲེལ་བར་ལྟ་སྟངས་འཛིན་པ་དང་ཐག་གཅོད་བྱས་ཏེ་བྱེ་བྲག་གི་མི་མཐུན་པའི་ཆ་ཡིས་རྒྱལ་ཁབ་གཉིས་པོའི་འབྲེལ་བའི་སྤྱི་ཡོངས་ལ་ཤུགས་རྐྱེན་མ་ཐེབས་པར་བྱས་ནས། ས་ཁུལ་དང་འཛམ་གླིང་གི་ཞི་བདེ་དང་དར་རྒྱས་དང་དེ་བཞིན་འཛམ་གླིང་སྣེ་མང་ཅན་ལ་སྐུལ་འདེད་གཏོང་ཆེད་ལེགས་སྐྱེས་ཧུར་ཐག་འབུལ་རྒྱུའི་མོས་མཐུན་ཡང་གནང་བ་རེད།