མི་འབོར་དུང་ཕྱུར་14ལྷག་ཙམ་དང་མི་འབོར་དུང་ཕྱུར་6ལྷག་ཙམ་གྱི་ཁྲོམ་ར་ཆེན་པོ་གཉིས་ཡིན་པའི་ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་གྱི་རང་མོས་ཚོང་དོན་ཁུལ་རིམ་སྤོར་གྱི་མཉམ་ལས་དེས་ཕྱོགས་གཉིས་པོར་དེ་བས་ཤུགས་ཆེ་ལ་ཡུན་རིང་གི་འཕེལ་རྒྱས་ཀྱི་སྒུལ་ཤུགས་སྦྱིན་རྒྱུ་རེད།

ཉིན་ཤས་གོང་ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་གྱི་རང་མོས་ཚོང་དོན་ཁུལ་གྱི་3.0པར་གཞིའི་རིམ་སྤོར་གྲོས་མོལ་ངོ་བོའི་རང་བཞིན་གྱི་སྒོ་ནས་མཇུག་འགྲིལ་ཡོད། དེ་ཐོག་ནས་ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་གྱི་དཔལ་འབྱོར་ཚོང་དོན་མཉམ་ལས་སྔར་བས་གཏིང་ཟབ་ཏུ་ཕྱིན་པ་མཚོན་གྱི་ཡོད་ལ། ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་གྱིས་ཨེ་ཤེ་ཡ་ཤར་མའི་དཔལ་འབྱོར་གཞི་གཅིག་ཅན་ལ་ཐུན་མོང་ཐོག་སྣེ་ཁྲིད་བྱེད་པའི་བྱ་ཐབས་གལ་ཆེན་ཞིག་ཀྱང་ཡིན་པས། ཕྱོགས་གཉིས་པོས་རང་མོས་ཚོང་དོན་སྒྲིག་སྲོལ་ལ་ཐུན་མོང་ཐོག་སྲུང་སྐྱོང་བྱེད་པའི་དགེ་མཚན་ལྡན་པའི་བརྡ་རྟགས་ཀྱང་བསྟན་ཡོད། ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་གྱིས་དཔལ་འབྱོར་ཚོང་དོན་མཉམ་ལས་སྔར་བས་གཏིང་ཟབ་ཏུ་བཏང་སྟེ་དེ་བས་གཏིང་ཟབ་པའི་ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་གྱི་ལས་དབང་གཅིག་མཐུན་ཚོགས་པ་འཛུགས་ཆེད་སྒུལ་ནུས་གསར་པ་སྦྱིན་རྒྱུ་རེད།

མི་འབོར་དུང་ཕྱུར་14ལྷག་ཙམ་དང་མི་འབོར་དུང་ཕྱུར་6ལྷག་ཙམ་གྱི་ཁྲོམ་ར་ཆེན་པོ་གཉིས་ཡིན་པའི་ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་གྱི་རང་མོས་ཚོང་དོན་ཁུལ་རིམ་སྤོར་གྱི་མཉམ་ལས་དེས་ཕྱོགས་གཉིས་པོར་དེ་བས་ཤུགས་ཆེ་ལ་ཡུན་རིང་གི་འཕེལ་རྒྱས་ཀྱི་སྒུལ་ཤུགས་སྦྱིན་རྒྱུ་རེད། ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་གྱི་རང་མོས་ཚོང་དོན་ཁུལ་ལས་ཕན་པ་ཐོབ་པའི་ཀྲུང་གོས་ལོ་15བསྟུད་མར་ཨེ་ཤེ་ཡ་ཤར་ལྷོའི་མནའ་འབྲེལ་གྱི་ཚོང་དོན་རོགས་ཟླ་ཆེ་གྲས་ཨང་དང་པོའི་གནས་བབ་རྒྱུན་འཁྱོངས་བྱས་པ་དང་ཨེ་ཤེ་ཡ་ཤར་ལྷོའི་མནའ་འབྲེལ་ལོ་4བསྟུད་མར་ཀྲུང་གོའི་ཚོང་དོན་རོགས་ཟླ་ཆེ་གྲས་དང་པོར་གྱུར་ཡོད། མིག་སྔར། གོ་ལ་ཧྲིལ་པོའི་སྤྱི་ཡོངས་ཀྱི་དགོས་མཁོ་སྐོང་མི་ཐུབ་པའི་གནད་དོན་སྔར་བས་མངོན་གསལ་དོད་དུ་ཕྱིན་ཡོད་ལ། ཁྲོམ་ར་དེ་དཔལ་འབྱོར་འཕེལ་རྒྱས་ཁྲོད་ཀྱི་ཁ་ཐང་བའི་ཐོན་ཁུངས་སུའང་གྱུར་ཡོད། ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་གྱི་སྤྱིའི་མི་འབོར་གྱི་གཞི་ཁྱོན་གྱིས་འཛམ་གླིང་ཡོངས་ཀྱི་བཞི་ཆ་གཅིག་བཟུང་བ་དང་གཞི་ཁྱོན་ཧ་ཅང་ཆེ་བའི་ཁྲོམ་ར་དེ་ཕྱོགས་གཉིས་པོས་དཔལ་འབྱོར་དར་རྒྱས་ལ་སྐུལ་འདེད་གཏོང་བའི་རྒྱབ་རྟེན་ཆེ་ཤོས་ཤིག་རེད། རིམ་སྤོར་བྱས་པའི་རང་མོས་ཚོང་དོན་ཁུལ་གྱིས་ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་གྱི་ཁྲོམ་ར་ཆེན་པོ་གཉིས་སྔར་བས་དམ་ཟབ་དང་ནུས་ལྡན་ངང་མཉམ་འདྲེས་སྦྲེལ་མཐུད་བྱེད་པར་སྐུལ་འདེད་ཐེབས་ནས་དེ་བས་མངོན་གསལ་དོད་པའི་གཞི་ཁྱོན་དཔལ་འབྱོར་གྱི་ནུས་འབྲས་དང་། ཐོན་ལས་གཅིག་སྡུད་ཀྱི་ནུས་འབྲས། ཕྱིར་འཐོར་ནུས་འབྲས་འཕེལ་རྒྱས་བཅས་ཆགས་ཐུབ་ངེས་རེད། ཨེ་ཤེ་ཡ་ཤར་ལྷོའི་མནའ་འབྲེལ་གྱི་དྲུང་ཆེ་ཀའོ་ཅིན་ཧུང་གིས་རང་མོས་ཚོང་དོན་ཁུལ་རིམ་སྤོར་བྱས་པ་བརྒྱུད་ཕྱོགས་གཉིས་པོའི་ཚོང་དོན་དང་། མ་འཇོག ཡུལ་སྐོར་བཅས་སྔར་བས་འཕར་ནས་ཨེ་ཤེ་ཡ་ཤར་ལྷོའི་མནའ་འབྲེལ་དང་ཀྲུང་གོའི་དཔལ་འབྱོར་མཉམ་ལས་ལ་དགེ་མཚན་ལྡན་པ་དང་གལ་ཆེ་བའི་འཕེལ་རྒྱས་དང་ཕྱོགས་སྒྱུར་ཐུབ་རྒྱུའི་རེ་སྒུག་བྱེད་ཀྱི་ཡོད་ཅེས་བརྗོད།

ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་གྱི་རང་མོས་ཚོང་དོན་ཁུལ་གྱི་3.0པར་གཞིའི་རིམ་སྤོར་གྲོས་མོལ་ལེགས་གྲུབ་བྱུང་བ་དེ་ཐོག་ནས་ཕྱོགས་གཉིས་པོས་ཕྱོགས་མང་རིང་ལུགས་དང་རང་མོས་ཚོང་དོན་ལ་རྒྱབ་སྐྱོར་མཐའ་གཅིག་ཏུ་བྱེད་པའི་རྣམ་འགྱུར་གང་ལེགས་མཚོན་ཡོད། མཉམ་འབྲེལ་རྒྱལ་ཚོགས་ཀྱི་དྲུང་ཆེ་ཀུའུ་ཐེ་ལེ་སིས་ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་གྱི་རང་མོས་ཚོང་དོན་ཁུལ་གྱི་3.0པར་གཞིར་བསྔགས་བརྗོད་བྱས་པ་ལས་ད་རེས་རིམ་སྤོར་བྱས་པ་དེས་གོ་ལ་ཧྲིལ་པོའི་རང་མོས་ཚོང་དོན་དང་དཔལ་འབྱོར་འཕར་རྒྱུར་སྐུལ་འདེད་ཐེབས་རྒྱུ་རེད་ཅེས་བརྗོད།

སྒོ་དབྱེ་མཉམ་ལས་ནི་ལོ་རྒྱུས་ཀྱི་འཕེལ་ཕྱོགས་ཤིག་ཡིན་པ་དང་། གཉིས་ཁེ་གཉིས་ཕན་ནི་མི་སེམས་ཕྱོགས་ས་ཤིག་ཡིན། ཀྲུང་གོས་ཨེ་ཤེ་ཡ་ཤར་ལྷོའི་མནའ་འབྲེལ་དང་མཉམ་དུ་འབད་བརྩོན་བྱས་ནས་ཁྱབ་ཁོངས་ཁག་གི་དངོས་སྒྲུབ་མཉམ་ལས་ལ་རྒྱུན་མཐུད་སྐུལ་འདེད་བཏང་སྟེ་ས་ཁུལ་དང་འཛམ་གླིང་གི་ཐུན་མོང་དར་རྒྱས་ཆེད་དེ་བས་སྲ་ཞིང་བརྟན་པའི་འདེགས་སྐྱོར་བྱེད་འདོད་ཡོད།