ལྷོ་ཁ་གྲོང་ཁྱེར་གྱིས་བྱེད་ཐབས་སྣ་མང་སྤྱད་ནས་གད་སྙིགས་རིགས་དབྱེའི“དར་སྲོལ་གསར་པར”སྣེ་ཁྲིད་བྱས་པ།
འདི་ལོ་ནས་བཟུང“ལྗང་མདོག་དང་། ཁོར་ཡུག་སྲུང་སྐྱོང་། ཤེས་དཔལ”བཅས་བརྗོད་དོན་གཙོ་བོར་བྱས་པའི་གད་སྙིགས་རིགས་དབྱེའི་གསར་བརྗེ་ལྷོ་ཁ་གྲོང་ཁྱེར་དུ་ཚ་ཚ་འུར་འུར་ངང་སྤེལ་བཞིན་ཡོད། ལྷོ་ཁ་གྲོང་ཁྱེར་གྱིས་གད་སྙིགས་རིགས་དབྱེའི་ལས་དོན་ལ་ཚད་མཐོའི་མཐོང་ཆེན་བྱས་ནས་གད་སྙིགས་རིགས་དབྱེ“འགོ་གཙོ་དང་པོའི”འདུ་འགོད་ནང་བཅུག་པ་དང་ལས་དོན་ལ་བདེ་བླག་ངང་སྐུལ་འདེད་གཏོང་ཆེད་ལས་དོན་འགོ་ཁྲིད་ཚོགས་ཆུང་ཆེད་མངགས་བཙུགས་པ་དང་འབྲེལ་གསར་གཏོད་རང་བཞིན་གྱིས“གྲོང་ཁྱེར་དང་། ཆུས། ཁྲོམ་གཞུང་། སྡེ་ཁུལ”བཅས་རིམ་བཞིའི་ཏང་རྩ་འཛུགས་ཀྱི་མཉམ་འགུལ་ལམ་སྲོལ་བཙུགས་པ་རེད།
ལྷོ་ཁ་གྲོང་ཁྱེར་གྱི་ཁྲོམ་གཞུང་དང་སྲང་ལམ་ཆེ་ཆུང་གང་སར་སྐྱོད་སྐབས་གསར་འགོད་པས་གད་སྙིགས་རིགས་དབྱེ་བསྡུ་རུབ་ཁང་མང་པོ་མཐོང་། དེ་སྔོན་གད་སྙིགས་གཅིག་སྡུད་ཐོག་སྤུངས་པ་དང་ད་ཆ་ཁ་དོག་མི་འདྲ་བའི་གད་སྙིགས་བླུག་སྣོད་ནང་གྲལ་འགྲིག་པོས་རིགས་དབྱེ་ནས་བླུགས་ཡོད། སྒྲིག་བཀོད་དེ་དག་གྲོང་ཁྱེར་གྱི་རྣམ་པ་གསར་པར་གྱུར་པ་མ་ཟད། གྲོང་མི་གད་སྙིགས་རིགས་དབྱེའི་ནང་ཞུགས་པའི་སྟབས་བདེའི་ས་ཚིགས་ཤིག་ཏུའང་གྱུར་ཡོད།
དེ་དང་ཆབས་ཅིག ཚུར་བསྡུའི་དངོས་པོ་གནས་སྐབས་ཉར་ཚགས་བྱ་ཡུལ་དང་ཚུར་བསྡུའི་རླངས་འཁོར་སོགས་སྒྲིག་བཀོད་འཛུགས་སྐྲུན་བྱས་པ་དེས་ལྷོ་ཁ་གྲོང་ཁྱེར་གྱི་གད་སྙིགས་རིགས་དབྱེའི་མཁྲེགས་ཆས་ཀྱི་རྨང་གཞི་བརྟན་དུ་ཕྱིན་ཡོད། གད་སྙིགས་རིགས་དབྱེའི་ལས་དོན་སྔར་བས་ཚད་ལྡན་དུ་གཏོང་བ་དང་མཛུབ་ཁྲིད་བྱ་ཆེད། ལྷོ་ཁ་གྲོང་ཁྱེར་གྱིས《ལྷོ་ཁ་གྲོང་ཁྱེར་གྱི་གྲོང་ཁྱེར་གྱི་འཚོ་བའི་གད་སྙིགས་རིགས་དབྱེའི་དོ་དམ་བྱ་ཐབས》དང《གྲོང་ཁྱེར་གྱི་འཚོ་བའི་གད་སྙིགས་རིགས་དབྱེའི་མཛུབ་ཁྲིད་དཀར་ཆག》སོགས་བཟོས་ནས་གད་སྙིགས་རིགས་དབྱེའི་ལས་དོན་ལ་བསྲུང་བྱའི་སྒྲིག་ལམ་ཡོད་པ་དང་བསྲུང་བྱའི་ཁྲིམས་ཡོད་པར་བྱས་པ་རེད།
གད་སྙིགས་རིགས་དབྱེ་ཁྱབ་གདལ་གཏོང་རིང་། ལྷོ་ཁ་གྲོང་ཁྱེར་གྱིས“ཏང་འཛུགས་སྐྱོང+གད་སྙིགས་རིགས་དབྱེའི”དམར་པོས་ལྗང་མདོག་ལ་སྣེ་ཁྲིད་བྱེད་སྟངས་གསར་གཏོད་དང་འཚོལ་ཞིབ་བྱས་པ་དང་སྣེ་གདོང་ཆུས་ཀྱི་དུས་རབས་གསར་པའི་ཤེས་དཔལ་ལག་ལེན་ལྟེ་གནས་ཀྱི་དང་བླངས་པ་རྣམས་དེའི་ནང་ཞུགས་མཁན་དང་སྐུལ་འདེད་གཏོང་མཁན་ཡིན། ཉིན་ལྟར་ཞོགས་པ་ཁོང་ཚོ་གད་སྙིགས་རིགས་དབྱེ་བསྡུ་རུབ་ཁང་དུ་ཡོང་སྟེ་གྲོང་མིར་གད་སྙིགས་རིགས་དབྱེ་ནས་བླུག་དགོས་པའི་མཛུབ་ཁྲིད་བྱེད་ཀྱི་ཡོད། “འབྲས་དང་ཚལ་ལྷག་མ་བླུག་སྣོད་ལྗང་གུ་དེའི་ནང་བླུགས་དགོས་པ་དང་། གློག་སྨན་དང་སྨན་རྫས་བླུག་སྣོད་དམར་པོ་དེའི་བླུག་དགོས་པས་ཚང་མས་མ་ནོར་བ་བྱེད་རོགས”ཞེས་དང་བླངས་པས་ངང་རྒྱུད་རིང་པོས་མཛུབ་ཁྲིད་བྱས་པ་དེས་གྲོང་མི་ཚང་མའི་གད་སྙིགས་རིགས་དབྱེའི་འདུ་ཤེས་ཟབ་ཏུ་ཕྱིན་པ་མ་ཟད། གྲོང་མི་དེ་བས་མང་བ་ཞིག་ལ་རང་རྟོགས་ངང་རིགས་དབྱེའི་གོམས་གཤིས་ཡག་པོ་ཞིག་འཇགས་ཡོད་པ་རེད།
ལྷོ་ཁ་གྲོང་ཁྱེར་གྱིས་ད་དུང་གད་སྙིགས་རིགས་དབྱེའི་ལས་དོན་དེ་གཞི་རིམ་བཅོས་སྐྱོང་དང་མིའི་འཚོ་སྡོད་ཁོར་ཡུག་བཅོས་སྐྱོང་གི་ལས་དོན་ནང་མཉམ་འདྲེས་ཐུབ་པར་བྱས་ཤིང་། “ཏང་འཛུགས་སྐྱོང་དང་། དྲ་མིག གྲངས་འཛིན་བཅོས་སྐྱོང”བཅས་ཟུང་དུ་འབྲེལ་བའི་མ་ལག་ལ་བརྟེན་ནས། ཆུས་ཨུད་དང་། ཁྲོམ་གཞུང་། སྡེ་ཁུལ་བཅས་ཀྱི་ཏང་རྩ་འཛུགས་ཀྱིས་རིམ་པ་རེ་རེ་བཞིན་འགན་འཁྲི་དོན་འཁྱོལ་བྱས་ཏེ་གད་སྙིགས་རིགས་དབྱེ་དོ་དམ་གྱི་དྲ་རྒྱ་དམ་ཟབ་ཞིག་ཆགས་པར་བྱས་པ་རེད།
སྣེ་གདོང་ཆུས་སྐར་མ་ཆེ་སྡེ་ཁུལ་གྱི་ལས་དོན་པ་པ་སངས་ཀྱིས“དེ་སྔ་གྲོང་མི་ཚོས་གད་སྙིགས་རིགས་དབྱེར་མཐོང་ཆེན་དེ་ཙམ་བྱེད་ཀྱི་མེད། ད་ཆ་ང་ཚོས་ཁྱིམ་ཚང་རེ་རེ་བཞིན་དྲིལ་བསྒྲགས་བྱས་པ་དང་དྲ་མིག་དོ་དམ་གྱི་ལྟ་སྐུལ་གནད་ལ་འཁེལ་བར་བརྟེན་ད་ཆ་ཚང་མའི་ཁོར་ཡུག་སྲུང་སྐྱོང་གི་འདུ་ཤེས་ཟབ་ཏུ་ཕྱིན་པ་དང་སྡེ་ཁུལ་གྱི་ཁོར་ཡུག་ཀྱང་སྔར་བས་མཛེས་སུ་ཕྱིན་ཡོད”ཅེས་མྱོང་ཚོར་ཟབ་མོའི་སྒོ་ནས་བཤད།