འདི་ནི་སློབ་སྐྱོར་རུ་མིས་ཕྲུ་གུ་ཚོར་སྦྱོང་བརྡར་བྱེད་བཞིན་པ།

འདི་ནི་སློབ་སྐྱོར་རུ་མིས་ཕྲུ་གུ་ཚོ་དང་མཉམ་དུ་རོལ་རྩེད་རྩེ་བཞིན་པ།

2023ལོའི་ཟླ་3པར་ཝུའུ་ཧན་ལུས་རྩལ་སློབ་གླིང་གིས་ཧུའུ་པེ་ཞིང་ཆེན་གྱི་བོད་སྐྱོར་ལས་དོན་རུ་ཁག་དང་ལྷོ་ཁ་གྲོང་ཁྱེར་སློབ་གསོ་ཅུས(ལུས་རྩལ་ཅུས)དང་མཉམ་དུ“ལུས་རྩལ་གྱི་ཕུགས་འདུན”དང་བླངས་ཞབས་ཞུའི་རྣམ་གྲངས་སྤེལ་ཞིང་། “ལུས་རྩལ་གྱི་ཕུགས་འདུན”བོད་སྐྱོར་སློབ་སྐྱོར་དང་བླངས་ཞབས་ཞུའི་རུ་ཁག་བཙུགས་ཏེ། ལྷོ་ཁ་གྲོང་ཁྱེར་སློབ་ཆུང་གཉིས་པ་དང་ལྷོ་ཁ་གྲོང་ཁྱེར་ལས་ཞོར་ལུས་རྩལ་སློབ་གྲྭ་གཉིས་གཙོ་གནད་རོགས་སྐྱོར་བྱ་ཡུལ་དུ་བདམས་པ་རེད།

ལོ་གཅིག་ལྷག་ཙམ་རིང་ཁག་བཞི་ཡི་ལུས་རྩལ་དང་འབྲེལ་བ་ཡོད་པའི་ཆེད་ལས་ཀྱི་སློབ་གྲྭར་འགྲོ་མུས་ཀྱི་ཕུལ་བྱུང་སློབ་གྲྭ་ཆེ་མོ་བ་20བདམས་ནས་བོད་སྐྱོར་སློབ་སྐྱོར་གྱི་ལས་དོན་སྤེལ་བ་དང་། ཆུ་ཚོད་ཁྲི་3ལྷག་ཙམ་གྱི་དང་བླངས་ཞབས་ཞུ་སྤེལ་བར་རོགས་སྐྱོར་བྱ་ཡུལ་སློབ་གྲྭའི་གཞོན་ནུ་ལོ་ཆུང་གི་གཟུཌ་གཞི་བདེ་ཐང་ཡོང་བར་ཕན་འབྲས་མངོན་གསལ་དོད་པོ་ཐོན་ཡོད།

ལུས་རྩལ་སྔོན་ལ་བཞག་ནས་ལང་ཚོའི་ཕུགས་འདུན་དོན་གཉེར་བྱས་པ།

རྒྱུན་གཏན་གྱི་སྦྱོང་བརྡར་རིང་། དང་བླངས་ཞབས་ཞུའི་རུ་ཁག་གིས་དོ་དམ་ནན་པོ་དང་ཚན་རིག་དང་མཐུན་པར་སློབ་ཁྲིད་བྱེད་ཀྱི་ཡོད། སློབ་མ་ཚོའི་སློབ་སྦྱོང་དང་འཚོ་བའི་གོམས་གཤིས་བཟང་པོ་གསོ་སྐྱོང་དང་། རྣམ་འགྱུར་དང་སྤྱོད་ཚུལ་སྲོང་བ། སྦྱོང་བརྡར་གྱི་སྤྲོ་སྣང་འཕེལ་བ་བཅས་བྱས་ཏེ་སློབ་མའི་ཚོགས་སྤྱིའི་མཉམ་ལས་ནུས་པ་དང་ལུས་རྩལ་གྱི་རྩལ་ནུས་རྒྱུན་ཆད་མེད་པར་ཆེ་རུ་བཏང་ཞིང་། ལུས་རྩལ་སློབ་གྲྭའི་སློབ་མའི་སྒྲིག་ལམ་འཐུས་སྒོ་ཚང་དུ་གཏོང་བ་དང་། ལམ་ལུགས་དང་ཚད་གཞི་འཛུགས་པ་དང་འཐུས་སྒོ་ཚང་དུ་གཏོང་བ། ལུས་རྩལ་སློབ་གྲྭའི་སློབ་མའི་སློབ་སྦྱོང་དང་ངལ་གསོའི་ལམ་ལུགས་ལག་བསྟར་ནན་པོ་བཅས་བྱས་ཡོད། སློབ་མའི་སྤྱི་ཡོངས་ཀྱི་ཆུ་ཚད་ལ་གཞིགས་ཏེ་གཟུགས་གཞི་བདེ་ཐང་བརྟག་དཔྱད་བྱས་ནས་ཚད་གཞི་བཟོ་བ་དང་། སློབ་མའི་དུས་མཚམས་ཀྱི་ཆུ་ཚད་ཁོང་དུ་ཆུད་པར་བྱེད་པ། ཁྱད་ཆོས་ལྡན་པའི་སྦྱོང་བརྡར་འཆར་གཞི་བཟོ་བ་བཅས་བྱས་ནས་ཚན་རིག་དང་མཐུན་པའི་ལུས་སྦྱོང་དང་། ཚན་རིག་དང་མཐུན་པའི་སྦྱོང་བརྡར། ཚན་རིག་དང་མཐུན་པའི་གོང་འཕེལ་བཅས་ཡོང་ཐབས་བྱས་ཡོད། གཞན་ཡང་ས་གནས་དེ་གའི་ལུས་རྩལ་སྡེ་ཚན་དང་སློབ་གསོའི་སྡེ་ཚན་ལ་དུས་ཐོག་ཏུ་སློབ་མའི་གཟུགས་གཞི་བདེ་ཐང་གི་གནས་ཚུལ་བརྡ་ལན་བསྐྱལ་ཏེ་གོམ་སྟབས་རྗེས་མའི་སྔོན་འགོག་དང་། ཐེ་ཇུས། སྨན་བཅོས་བཅས་ལ་ཐབས་ཇུས་ཀྱི་གཞི་འཛིན་ས་ནུས་ལྡན་མཁོ་འདོན་བྱས་ཡོད།

མི་ལ་བརྩོན་འགྲུས་ལྡན་གྱུར་ན། མི་འགྲུབ་བྱ་བ་གང་ཡང་མེད་ཅེས་པ་ལྟར། བོད་རང་སྐྱོང་ལྗོངས་ལས་ཞོར་ལུས་རྩལ་སློབ་གྲྭའི་འགྲན་བསྡུར་ནང་ལྷོ་ཁ་གྲོང་ཁྱེར་ལས་ཞོར་ལུས་རྩལ་སློབ་གྲྭའི་ལུས་རྩལ་པས་སྔོན་ཐོན་བརྩོན་ལེན་ཧུར་ཐག་བྱས་པས་གསེར་གྱི་རྟགས་མ་གསུམ་དང་། དངུལ་གྱི་རྟགས་མ་གཅིག ཟངས་ཀྱི་རྟགས་མ་གཉིས་བཅས་ཐོབ་ནས་མཐར་ཚོགས་པའི་སྤྱིའི་སྐར་གྲངས་ཨང་གཉིས་པའི་གྲུབ་འབྲས་བཟང་པོ་ཐོབ་ལ། དང་བླངས་ཞབས་ཞུའི་རུ་ཁག་རང་གིས་སྒྲིག་བཟོ་བྱས་པའི་རྩལ་སྦྱོང《ང་ཚོ་ཚང་མ་ཕུགས་འདུན་དོན་གཉེར་བ་ཡིན》ཞེས་པ་དགེ་སློབ་ཚོའི་རེ་སྒུག་ཁྲོད་འཁྲབ་ཏེ་དགའ་བསུ་ཆེན་པོ་ཐོབ་པ་རེད།

རིག་སྟོབས་སློབ་གསོ་གཙོར་བཟུང་སྟེ་ཕྱོགས་ཀུན་གོང་འཕེལ་ཡོང་བར་བྱས་པ།

དང་བླངས་ཞབས་ཞུའི་རུ་ཁག་གིས་གཟའ་མཇུག་གི་མཚན་སྦྱོང་དུས་ཚོད་སྤྱད་དེ་ལྷོ་ཁ་གྲོང་ཁྱེར་གྱི་སློབ་ཆུང་གཉིས་པའི་ལོ་རིམ་ལྔ་པ་དང་དྲུག་པའི་སློབ་མར་སློབ་ཕྱིའི་ཟུར་ཁྲིད་བྱས་ཤིང་། རིག་ཚན་གྱི་ཁྱད་ཆོས་ལ་གཞི་ཚུགས་ཏེ་ས་གནས་དེ་གའི་ཕྲུ་གུའི་ཤེས་བྱ་ཁོང་དུ་ཆུད་ཚུལ་ལ་གཞིགས་ནས་ཟུར་ཁྲིད་ཀྱི་ཇུས་གཞི་དང་ནང་དོན་མི་འདྲ་བ་བཟོས་ཡོད།

སློབ་མ་ཚོས་སློབ་སྐྱོར་རུ་མི་དང་སྤེལ་རེས་མང་ཙམ་བྱ་རྒྱུར་སྐུལ་མ་གཏོང་ཆེད་སློབ་སྐྱོར་རུ་མིས་སློབ་མ་ཚང་མར་ཉིན་ཐོ་འབྲི་རུ་བཅུག་ཡོད། དང་ཐོག་སློབ་མ་མང་ཆེ་བས་རང་ཉིད་ཀྱིས་ལུས་རྩལ་སྦྱོང་དོན་རྩ་བ་ནས་ཤེས་ཀྱི་མེད་པ་དང་། ཉིན་ཐོའི་ནང་དུའང་ཡིག་ནོར་དང་བརྗོད་པ་མི་བདེ་བ་མང་པོ་ཡོང་གི་ཡོད། སློབ་སྐྱོར་རུ་མིས་སློབ་མ་མི་རེ་ངོ་རེར་དཔྱད་བརྗོད་ཞིབ་ཚགས་བྲིས་པ་མ་ཟད། སློབ་མ་ཚོར་བསམ་གཞིག་དང་ཕྱོགས་སྡོམ་བྱ་རྒྱུར་ངང་རྒྱུད་རིང་པོས་ཁྲིད་སྟོན་བྱས་པ་དང་། སློབ་ཞོར་གྱི་དུས་ཚོད་སྤྱད་དེ་སློབ་མ་ཚོར་རྒྱལ་ཁབ་ཀྱི་སྤྱི་སྐད་དང་། ཨང་རྩིས། དབྱིན་ཡིག་བཅས་ཟུར་ཁྲིད་བྱས་པ་མ་ཟད། ལུས་རྩལ་ཤེས་བྱ་དང་འཚོ་བའི་རྒྱུན་ཤེས་ཁྱབ་གདལ་དང་། སློབ་མ་ཚོར་ཆུ་ཁོལ་ལེན་རོགས་དང་སྐྱེས་སྐར་གཏོང་བ། སློབ་མ་ཚོའི་འཚོ་བའི་གནས་ཚུལ་པར་ལེན་པ་སོགས་བྱས་པ་རེད།

རོགས་སྐྱོར་བྱ་ཐབས་རབ་དང་རིམ་པ་སྤྱད་པ་བརྒྱུད་ལྷོ་ཁ་གྲོང་ཁྱེར་སློབ་ཆུང་གཉིས་པའི་ལོ་རིམ་ལྔ་པ་དང་དྲུག་པའི་སློབ་མའི་སློབ་སྦྱོང་གི་ཧུར་བརྩོན་རང་བཞིན་དང་རང་འགུལ་རང་བཞིན་མངོན་གསལ་དོད་པོས་ལེགས་སུ་ཕྱིན་པ་དང་། སློབ་སྦྱོང་གི་དམིགས་ཡུལ་སྔར་བས་ཁ་གསལ་དུ་ཕྱིན་པ། དེ་བས་སྣ་མང་ཅན་གྱི་སློབ་སྦྱོང་བྱ་ཐབས་འཚོལ་ཐུབ་པ། སློབ་སྦྱོང་གི་ཕན་འབྲས་རྒྱུན་ཆད་མེད་པར་ཆེ་རུ་ཕྱིན་པ། སློབ་ཁྲིད་ཀྱི་སྦྱངས་འབྲས་དང་སྤུས་ཚད་ལ་སློབ་གྲྭའི་དགེ་རྒན་དང་ཁྱིམ་བདག་གི་ཁས་ལེན་བཅས་བྱུང་ཡོད།

ཀུན་སྤྱོད་རྩ་བར་བཟུང་ནས་མི་རིགས་མཐུན་སྒྲིལ་ཟབ་ཏུ་བཏང་བ།

དང་བླངས་ཞབས་ཞུའི་རུ་ཁག་གིས་སློབ་གྲྭ་དང་ས་གནས་མཉམ་སྐྲུན་དང་མི་རིགས་མཐུན་སྒྲིལ་ཡར་ཐོན་ལ་སྐུལ་འདེད་གཏོང་བའི་ཕུགས་ཕན་ལམ་སྲོལ་འཚོལ་ཞིབ་ཧུར་ཐག་བྱས་ནས་བཙུགས་ཡོད།

རྒྱུན་གཏན་གྱི་སྦྱོང་བརྡར་ཕུད། དང་བླངས་ཞབས་ཞུའི་རུ་ཁག་གིས་ད་དུང་ལྷོ་ཁ་གྲོང་ཁྱེར་གྱི་སློབ་གྲྭ་འབྲིང་ཆུང་དུ་སྣ་མང་ཕུན་སུམ་ཚོགས་པའི་ལུས་རྩལ་སློབ་ཚན་ཁྲིད་དེ་སློབ་གྲོགས་ཚོར་ལུས་རྩལ་བདེ་ཐང་དང་། ལུས་རྩལ་རྨས་སྐྱོན་སྔོན་འགོག ལང་ཚོའི་དུས་ཀྱི་སེམས་ཁམས་བདེ་ཐང་བཅས་ཀྱི་ཤེས་བྱ་ཁྱབ་གདལ་བཏང་བ་རེད། རྒྱུན་གཏན་གྱི་སློབ་སྦྱོང་དང་འཚོ་བའི་ཁྲོད་སློབ་སྐྱོར་རུ་མི་ནི་སློབ་མ་ཚོའི་གཅེན་པོ་གཅེན་མོ་དང་འདྲ་བར་སློབ་མ་ཚོ་དང་མཉམ་དུ་དགའ་སྤྲོའི་ངང་རོལ་རྩེད་རྩེ་བའམ་ཡང་ན་མཉམ་དུ་བསྡད་ནས་ངང་རྒྱུད་རིང་པོས་གླེང་མོལ་བྱས་ཏེ། སློབ་མ་ཚོའི་སློབ་སྦྱོང་དང་འཚོ་བའི་དཀའ་ངལ་ཐག་གཅོད་བྱེད་རོགས་བྱས་ནས་ཚང་མར་ཕུགས་བསམ་བརྟན་པོ་དང་དཔའ་ངར་ཆེན་པོས་མདུན་སྐྱོད་བྱེད་དགོས་པའི་སྐུལ་ལྕག་བྱེད་ཀྱི་ཡོད།

དང་བླངས་ཞབས་ཞུའི་རུ་ཁག་གིས་ལྷོ་ཁ་གྲོང་ཁྱེར་གྱི་ལས་ཞོར་ལུས་རྩལ་སློབ་གྲྭར་དུས་ཡུན་ཉིན་14ཡི“ཕུཌ་འདུན་སྒྲུབ་པའི་འདུ་འགོད”ཀྱི་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་རྒྱུན་འཛིན་བྱེད་པའི་བྱེད་སྒོ་རབ་དང་རིམ་པ་སྤེལ་བ་དང་། ལྷོ་ཁ་གྲོང་ཁྱེར་ལས་ཞོར་ལུས་རྩལ་སློབ་གྲྭའི་སློབ་མ་ཡོངས་ཐེངས་དེའི་བྱེད་སྒོར་ཞུགས་ཡོད་པ་རེད། བྱེད་སྒོ་སྤེལ་རིང་། སློབ་མ་ཚོས་ཀྲུང་ཧྭའི་རིག་གནས་ཀྱི་ཐུན་མོང་མ་ཡིན་པའི་ཡིད་དབང་འཕྲོག་ཤུགས་དང་ཕུན་སུམ་ཚོགས་པའི་ནང་དོན་ཉམས་ལེན་ཟབ་མོ་ཐུབ་ནས། ཁོང་ཚོའི་ཀྲུང་ཧྭའི་ཕུལ་བྱུང་གི་སྲོལ་རྒྱུན་རིག་གནས་ལ་མོས་སེམས་དང་མི་རིགས་ཀྱི་སྤོབས་སེམས་ཆེ་རུ་ཕྱིན་ཡོད་པ་རེད།

དང་བླངས་ཞབས་ཞུའི་རུ་ཁག་གིས་སྤྱི་ཚོགས་ཅན་གྱི་ལས་དོན་སྒྲུབ་སྟངས་རྒྱ་ཁྱབ་ངང་སྤྱད་དེ་སྒྲིག་འཛུཌ་མཐུན་སྦྱོར་དང་། དྲིལ་བསྒྲགས་སྐུལ་སློང་། སྲིད་ཇུས་བརྩོན་ལེན་བཅས་ཀྱི་ནུས་པ་ཆེ་རུ་བཏང་ནས་སྤྱི་ཚོགས་ལས་རིགས་ཁག་གི་སྟོབས་ཤུགས་སྐུལ་སློང་བྱས་ཏེ་ཐུན་མོང་ཐོག་ལྷོ་ཁའི་ལུས་རྩལ་བྱ་གཞག་འཕེལ་རྒྱས་ལ་སྐུལ་འདེད་བཏང་ཞིང་། སློབ་སྐྱོར་བྱ་ཡུལ་དུ་ལུས་རྩལ་ཚོགས་པ་3བཙུགས་པ་དང་སྒོར་ཁྲི་2རི་བའི་ལུས་རྩལ་ཡོ་བྱད་བརྩོན་ལེན་བྱས་ཏེ། ལྷོ་ཁ་གྲོང་ཁྱེར་གྱི་ལས་ཞོར་ལུས་རྩལ་སློབ་གྲྭར་ཞལ་འདེབས་བརྒྱབ་པ་རེད།