ཁག་བཅུ་པའི་ཅ་ཤིན་བོད་སྐྱོར་ལས་དོན་ཚོགས་ཆུང་གིས“ཅ་ཤིན་གྱི་དྲོ་སྐྱིད། གཅེས་སེམས་ཀྱི་ཁུག་མ”ཞེས་པའི་ཞལ་འདེབས་རྒྱག་པའི་བྱེད་སྒོ་སྤེལ་བ།
ཉིན་ཤས་གོང་ནག་ཆུ་གྲོང་ཁྱེར་གསེར་རྙེད་ཆུས་མཐུན་སྒྲིལ་ཁྲོམ་གཞུང་གི་ཁྲུང་ཤིན་སྡེ་ཁུལ་དུ“བོད་སྐྱོར་ལོ་སུམ་ཅུ། ཅ་ཤིན་གྱི་དྲོ་སྐྱིད་དང་གཅེས་སེམས་ཀྱི་ཁུག་མ”ཞེས་པའི་ཞལ་འདེབས་རྒྱག་པའི་མཛད་སྒོ་འཚོགས་ཤིང་། ཁུག་མའི་ནང་དུ་དངུལ་སྒོར་ཁྲི་60ལྷག་ཙམ་བཏང་ནས་ཉོས་པའི་སྦ་ལན་དང་། དཔེ་དེབ། བཀྲ་ཤིས་སྨོན་འདུན་གཱ་བཅས་བཞག་ཡོད་པ་རེད།
གསེར་རྙེད་ཆུས་ཨུད་ཀྱི་རྒྱུན་ཨུ་དང་རྒྱུན་ལས་ཆུས་ཀྲང་གཞོན་པ་ཝུའུ་ཝེ་ཅེས་ངོ་སྤྲོད་བྱས་པར། དངོས་པོ་དེ་གསུམ་ལ་དོན་སྙིང་ཟབ་མོ་ལྡན་པ་སྟེ། རྒྱལ་ཡོངས་ཀྱི་སྦ་ལན་ཐོན་སྐྱེད་རྟེན་གཞི་ཆེ་ཤོས་ཡིན་པའི་ཀྲེ་ཅང་ཞིང་ཆེན་ཐུང་ཤང་གྲོང་ཁྱེར་གྱིས་ཐེངས་འདིར་ཀྲེ་ཅང་སྦ་ལན་མཐུན་ཚོགས་དང་མཉམ་དུ“གཅེས་སེམས་ཁུག་མར”སྦ་ལན་བཞག་པ་ལས“ཀྲེ་བོད་ཁྱིམ་ཚང་གཅིག་ལྟར་བརྩེ་བའི”མཛའ་གྲོགས་ཟབ་མོ་མཚོན་ཞིང་། གསེར་རྙེད་ཆུས་ལྷོ་རྒྱུད་ཁུལ་གསར་དུ་ཅ་ཤིན་བོད་སྐྱོར་ལས་དོན་ཚོགས་ཆུང་གིས་བསྐྲུན་པའི་དཔེ་དེབ་ཁང་ཞིག་ཡོད་པ་དེས“ཤེས་བྱ་བརྒྱུད་སྤྲོད་དང་བློ་སྒོ་འབྱེད་པའི”ལས་འགན་འཁུར་བ་མཚོན་པ་དང་། བཀྲ་ཤིས་སྨོན་འདུན་གཱ་ཡིས་ཅ་ཤིན་མི་དམངས་ཀྱི་སྨོན་འདུན་བཟང་པོ་མཚོན་ཡོད།
ཤེས་རྟོགས་བྱུང་བར་གཞིགས་ན། ཁག་བཅུ་པའི་ཅ་ཤིན་བོད་སྐྱོར་ལས་དོན་ཚོགས་ཆུང་བོད་དུ་བསྐྱོད་པ་ནས་བཟུང“ཅ་ཤིན་གྱི་དྲོ་སྐྱིད”ཅེས་པའི་སྤྱི་ཕན་སྤུས་རྟགས་བཏོད་ཅིང་། མིག་སྔར“གཅེས་སེམས་མཚོན་པའི་དགུན་ཆས”དང་། “གཅེས་སེམས་མཚོན་པའི་ཁྱིམ་ཆས”“གཅེས་སེམས་མཚོན་པའི་དཔེ་དེབ”སོགས་སྤྱི་ཕན་བྱེད་སྒོ་རབ་དང་རིམ་པ་སྤེལ་བ་དང་། ཁྱོན་དངུལ་སྒོར་ཁྲི་1100ཙམ་རི་བའི་དངོས་པོ་ཞལ་འདེབས་བརྒྱབ་ཡོད། “ཅ་ཤིན་གྱི་དྲོ་སྐྱིད”ཅེས་པའི་སྤྱི་ཕན་སྤུས་རྟགས་བཏོད་པའི་དམིགས་ཡུལ་ནི་གསེར་རྙེད་ཆུས་ཀྱི་དགོས་མཁོ་དངོས་ལ་དམིགས་ནས་གཅེས་སེམས་ཀྱི་འབྲེལ་ཟམ་བསྐྲུན་ཆེད་དུ་ཡིན་པ་རེད།