འདི་ནི་ས་གནས་དེ་གའི་འཁྲབ་སྟོན་ཚོགས་པས་ལྷ་རྩེའི་སྟོད་གཞས་འཁྲབ་བཞིན་པ།

བོད་དུ་ཡུལ་སྐོར་ལ་སྐྱོད་སྐབས་རྒྱལ་ལམ་318ལམ་ཐིག་གི་སྤྱི་ལེ་5000གི་ས་དེར་མི་རྣམས་ཀྱི་ཡིད་དབང་ཟབ་མོ་འཕྲོག་པ་དང་ཕར་འགྲོ་ཚུར་འོང་བྱེད་མཁན་ཡུལ་སྐོར་བས་དེར་དྲན་རྟེན་པར་རྒྱག་པར་དགའ་པོ་བྱེད་ཀྱི་ཡོད། ཉེ་ཆར། “རི་ཀླུང་བརྒལ་ནས་སྐལ་བཟང་མེ་ཏོག་བཞད་སར་སྐྱོད—འགྲུལ་འཁོར་ཆེ་མོར་བསྡད་དེ་ཀྲུང་གོར་བལྟ·བོད་དུ་སྐྱོད་པའི”མཉམ་འདྲེས་སྨྱན་སྦྱོར་གྱི་བྱེད་སྒོ་ཆེ་གྲས་སྤེལ་མཁན་དང་བཅས་པ་དེ་གར་འཁྲབ་སྟོན་པ་དང་མཉམ་དུ་ལྷ་རྩེའི་སྟོད་གཞས་སྦྱངས་ཏེ་མངོན་མིན་རིག་གནས་ཤུལ་བཞག་གི་ལོ་རྒྱུས་ཀྱི་གནའ་བོའི་ཉམས་འགྱུར་དང་དམིགས་བསལ་གྱི་ཡིད་དབང་འཕྲོག་ཤུགས་ཉམས་ལེན་བྱས་པ་རེད།

གཞིས་རྩེ་གྲོང་ཁྱེར་ལྷ་རྩེ་རྫོང་ལ་སྔར་ནས་བཟུང“སྟོད་གཞས་ཀྱི་ཕ་ཡུལ”དང“སྒྱུ་རྩལ་གྱི་ཕ་ཡུལ”ཞེས་པའི་མཚན་སྙན་ལྡན་ཞིང་། ལྷ་རྩེའི་སྟོད་གཞས་ལ་ད་བར་ལོ་700ལྷག་ཙམ་གྱི་ལོ་རྒྱུས་ལྡན་པ་དང་མང་ཚོགས་ཀྱི་རྒྱུན་གཏན་འཚོ་བའི་ཁྲོད་ཀྱི་རོལ་རྩེད་ཀྱི་ནང་དོན་གལ་ཆེན་ཞིག་ཏུ་གྱུར་ཡོད།

བཀྲ་ཤིས་དབང་ལགས་ནི་ལྷ་རྩེའི་སྟོད་གཞས་ཀྱི་མངོན་མིན་རིག་གནས་ཤུལ་བཞག་གི་རྒྱུན་འཛིན་པ་ཞིག་རེད། བཀྲ་ཤིས་དབང་ལགས་ཀྱི་སྐུལ་ཁྲིད་འོག་ལྷ་རྩེའི་སྟོད་གཞས་ཀྲུང་དབྱང་བརྙན་འཕྲིན་ལས་ཁུངས་ཀྱི་དཔྱིད་གསར་དུས་ཆེན་གྱི་མཉམ་སྤྲོའི་མཚན་ཚོགས་དང་། ཨེ་ཤེ་ཡའི་རིག་གནས་དགའ་ནེའུ་དུས་ཆེན། ཀུའེ་ཀྲོའུ་ཡི“གྲོང་ཚོའི་རིམ་འདས་རྐང་རྩེད་སྤོ་ལོའི་འགྲན་བསྡུར”སོགས་བྱེད་སྒོ་ཆེ་གྲས་ལ་ཞུགས་ནས་མི་དེ་བས་མང་བས་ལྷ་རྩེའི་མངོན་མིན་རིག་གནས་ཤུལ་བཞག་གི་ཡིད་དབང་འཕྲོག་ཤུགས་ཚོར་བར་བྱས་ཡོད།

“ལྷ་རྩེའི་སྟོད་གཞས་ནི་གླུ་གར་དང་། གཞས་མ་གཏམ། དཀྲོལ་གཏོང་བཅས་གཞི་གཅིག་ཏུ་འདུས་པའི་དམངས་ཁྲོད་ཀྱི་གླུ་གར་སྒྱུ་རྩལ་ཞིག་ཡིན། འཁྲབ་སྟོན་བྱེད་སྐབས་འཁྲབ་སྟོན་པས་སྒྲ་སྙན་དཀྲོལ་གྱིན་གཞས་གཏོང་བ་དང་ཞབས་བྲོ་འཁྲབ་པ་དང་། མི་གཅིག་གིས་འཁྲབ་ན་འགྲིག་ལ་མི་གཉིས་སམ་ཡང་ན་མི་མང་པོས་མཉམ་དུ་འཁྲབ་ནའང་འགྲིག”ཅེས་བཀྲ་ཤིས་དབང་ལགས་ཀྱིས་ངོ་སྤྲོད་བྱས།

ཉེ་བའི་ལོ་ཤས་རིང་། ལྷ་རྩེ་རྫོང་གིས“མངོན་མིན་རིག་གནས་ཤུལ་བཞག་སློབ་གྲྭར་ཁྱབ་གདལ་གཏོང་བའི”བྱེད་སྒོ་ཤུགས་ཆེན་སྤེལ་ནས། རྫོང་ཡོངས་ཀྱི་སློབ་གྲྭ་འབྲིང་ཆུང་དུ་ལྷ་རྩེ་རྫོང་གི་སྟོད་གཞས་སློབ་ཚན་བཀོད་སྒྲིག་བྱས་པ་དང་འབྲེལ། སློབ་གསེང་ལུས་སྦྱོང་ཁྲོད་གཟའ་འཁོར་རེར་ལྷ་རྩེའི་སྟོད་གཞས་ཐེངས་གཉིས་ཡན་བཀོད་སྒྲིག་བྱས་ཡོད། མིག་སྔའི་བར“མངོན་མིན་རིག་གནས་ཤུལ་བཞག་སློབ་གྲྭར་ཁྱབ་གདལ་གཏོང་བའི”བྱེད་སྒོ་ཐེངས་80ལྷག་ཙམ་སྤེལ་བ་རེད།

ས་སྲོད་འཆར་རིམ་བཞིན་ཚེ་རིང་རྡོ་རྗེ་དང་ཁོང་གི་འཁྲབ་རོགས་ཚོས་བོད་ཆས་གྱོན་པ་དང་སྒྲ་སྙན་ཁྱེར་ཏེ་གློག་སྒུལ་སྦག་སྦག་བཞོན་ནས་གཞིས་རྩེ་གྲོང་ཁྱེར་གྱི་ཁྲོམ་གཞུང་ཆེ་ཆུང་གང་སར་བསྐྱོད་དེ་གསོལ་ཚིགས་ཁང་ཁག་ཏུ་འཁྲབ་སྟོན་བྱེད་པར་འགྲོ་གི་ཡོད། “ཕ་མེས་ཚོའི་ཤུགས་རྐྱེན་འོག་ངས་ཆུང་དུས་ནས་ལྷ་རྩེའི་སྟོད་གཞས་འཁྲབ་ཤེས་ཀྱི་ཡོད། ད་ཆ་ལྷ་རྩེའི་སྟོད་གཞས་ལ་བརྟེན་ནས་གྲོང་ཁུལ་དུ་ལས་ཀ་ཡག་པོ་རག་སྟེ་ཟླ་རེར་ཡོང་འབབ་སྒོར་ཆིག་ཁྲི་ཡན་ཡོང་གི་འདུག ལྷ་རྩེ་བ་ཞིག་གི་ངོས་ནས་ངས་ལྷ་རྩེའི་སྟོད་གཞས་ཀྱི་སྒྱུ་རྩལ་དེ་རྒྱུན་འཛིན་ཡག་པོ་དང་འཕེལ་རྒྱས་ཡག་པོ་གཏོང་གི་ཡིན”ཞེས་ཚེ་རིང་རྡོ་རྗེས་བཤད།

ལྷ་རྩེའི་སྟོད་གཞས་ཀྱི་སྒྱུ་རྩལ་དེ་རྒྱུན་འཛིན་ཡག་པོ་དང་འཕེལ་རྒྱས་ཡག་པོ་གཏོང་བར་ཆེད་ལས་མི་སྣས་སྣེ་ཁྲིད་བྱེད་དགོས་ལ། མི་ཚང་མ་དེའི་ནང་ཞུགས་དགོས་ཀྱི་ཡོད། དེར་བརྟེན་ལྷ་རྩེ་རྫོང་གིས་ས་གནས་དེ་གའི་གཞོན་ནུ་ལྷ་རྩེའི་སྟོད་གཞས་འཁྲབ་སྟོན་ཚོགས་པར་ཞུགས་པར་སྐུལ་ལྕག་ཧུར་ཐག་བཏང་ནས། ཞིང་དལ་གྱི་དུས་སུ་སྟོད་གཞས་ལེ་ཚན་སློབ་སྦྱོང་དང་རྩོམ་སྒྲིག་བྱས་པ་དང་འབྲེལ་སྲིད་འཛིན་གྲོང་ཚོའི་སྒྱུ་རྩལ་རུ་ཁག་ལ་ལྷ་རྩེའི་སྟོད་གཞས་རྒྱུན་འཛིན་བྱེད་སྒོ་སྤེལ་དུ་བཅུག་པ་དང་གསོ་སྦྱོང་ཡང་བྱས་པ་རེད། མིག་སྔར་ལྷ་རྩེར་འཁྲབ་སྟོན་ཚོགས་པ་111དང་མི་2000ལྷག་ཙམ་ཡོད།

སྒྲ་སྙན་ནི་བོད་དུ་ཡོངས་ཁྱབ་ཏུ་དར་བའི་བོད་རིགས་ཀྱི་སྲོལ་རྒྱུན་རོལ་ཆའི་གྲས་ཤིག་རེད། འཚོ་བའི་ཆ་རྐྱེན་ཉིན་བཞིན་ལེགས་སུ་ཕྱིན་པ་དང་བསྟུན་ནས་སྒྲ་སྙན་ལ་དགའ་པོ་བྱེད་མཁན་མང་པོ་ཡོད་པ་དང་སྒྲ་སྙན་བྲིན་ཁ་རྒྱུག་པོ་ཡོད།

ལྷ་རྩེ་རྫོང་རེ་ས་ཤང་དབྱངས་རྟ་སྒྲ་སྙན་མི་རིགས་སྲོལ་རྒྱུན་ལག་ཤེས་ཞིང་པའི་ཆེད་ལས་མཉམ་ལས་ཁང་ནི་སྒྲ་སྙན་བཟོ་བའི་མཉམ་ལས་ཁང་ཞིག་རེད། དེ་གར་ཚང་མས་མཉམ་ལས་ཁང་གི་འགན་འཁུར་བ་དོན་རྒྱལ་གྱི་ས་ནས་སྒྲ་སྙན་བཟོ་བའི་བརྒྱུད་རིམ་ཤེས་རྟོགས་དང་། སྒྲ་སྙན་དཀྲོལ་གཏོང་སློབ་སྦྱོང་དང་ཉམས་ལེན་བྱེད་ཀྱི་ཡོད།

“སྒྲ་སྙན་ལས་བདེ་སྐྱིད་བརྒྱུད་སྤྲོད་བྱེད། ཏང་དང་རྒྱལ་ཁབ་ཀྱི་སྲིད་ཇུས་བཟང་པོ་ཡོད་པས་ང་ཚོས་མེས་པོས་བཞག་པའི་སྒྲ་སྙན་བཟོ་རྩལ་ལ་བརྟེན་ནས་འབབ་འཕར་ཕྱུག་འགྱུར་ཡོང་བར་བྱེད་པ་དང་། རྒྱུན་འཛིན་དང་གསར་གཏོད་ཁྲོད་སྒྲ་སྙན་ལ་གསོན་ཤུགས་གསར་པ་འཕེལ་བར་བྱས་ཡོད”ཅེས་དོན་རྒྱལ་གྱིས་བཤད།