“འབོ་གསེར་མཉམ་ལས་ཀྱིས་འཕེལ་རྒྱས་འགྲོ་བཞིན་པའི་རྒྱལ་ཁབ་ལ་དེ་བས་རོགས་རམ་ཐུབ་རྒྱུ་རེད”
—— ཀྲུང་གོར་བཅའ་སྡོད་ཨུ་རུ་སུའི་གཞུང་ཚབ་ཆེ་མོ་བ་མོར་ ཀུའུ་ལུའོ་ཧྥུའུ་ལ་བཅར་འདྲི་ཞུས་པ།
“འབོ་གསེར་མཉམ་ལས་ཀྱིས་འཕེལ་རྒྱས་འགྲོ་བཞིན་པའི་རྒྱལ་ཁབ་ལ་དེ་བས་རོགས་རམ་བྱས་ནས་དེ་བས་དྲང་གཞག་དང་ལུགས་མཐུན་གྱི་རྒྱལ་སྤྱིའི་སྒྲིག་ལམ་གཏོད་པར་གལ་འགངས་ཤིན་ཏུ་ཆེ་བའི་ནུས་པ་འདོན་རྒྱུ་རེད”ཅེས་འབོ་གསེར་རྒྱལ་ཁབ་ཀྱི་འགོ་ཁྲིད་པའི་ཞལ་འཛོམས་ཐེངས་བཅུ་དྲུག་པ་འཚོག་ཉེར་ཡོད་པའི་སྐབས་སུ་ཀྲུང་གོར་བཅའ་སྡོད་ཨུ་རུ་སུའི་གཞུང་ཚབ་ཆེ་མོ་བ་མོར་ཀུའུ་ལུའོ་ཧྥུའུ་ཡིས་འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་གནང་སྐབས་དེ་ལྟར་བརྗོད།
མོར་ཀུའུ་ལོ་ཧྥུའུ་ཡིས། “འབོ་གསེར་མཉམ་ལས་ནི་ཕྱོགས་མང་རིང་ལུགས་ཀྱི་ལག་ལེན་གལ་ཆེན་ཞིག་ཡིན་ལ། རྒྱལ་ཁབ་དབར་ལྷག་བསམ་ཟོལ་མེད་ངང་འགྲོ་འོང་བྱེད་པའི་དཔེ་མཚོན་ཞིག་ཀྱང་རེད། འབོ་གསེར་མཉམ་ལས་ཀྱི་ལམ་སྲོལ་འོག་ལོ་རྒྱུས་དང་རིག་གནས་ཀྱི་རྒྱབ་ལྗོངས་མི་འདྲ་བ་དང་། ཆབ་སྲིད་ཀྱི་ལམ་ལུགས་མི་འདྲ་བ། རང་ཚུགས་ཀྱི་ཕྱི་འབྲེལ་སྲིད་ཇུས་མི་འདྲ་བ་བཅས་ཡིན་པའི་རྒྱལ་ཁབ་ཀྱིས་ཁྱབ་ཁོངས་མང་པོར་གྲུབ་འབྲས་གཟེངས་སུ་ཐོན་པའི་མཉམ་ལས་བྱས་ཡོད། ཐུན་མོང་ཐོག་འབད་བརྩོན་བྱས་པ་བརྒྱུད། འབོ་གསེར་རྒྱལ་ཁབ་ཀྱིས་བདག་དབང་འདྲ་མཉམ་དང་། རང་བདག་ངང་གདམ་ག་བྱས་པའི་འཕེལ་རྒྱས་ཀྱི་ལམ་བུར་བརྩི་འཇོག ཐུན་མོང་གི་ཁེ་ཕན་ལ་སྲུང་སྐྱོང་བཅས་བྱེད་པའི་རྨང་གཞིའི་ཐོག་གླེང་མོལ་གྱི་ལམ་སྲོལ་ཞིག་ཆགས་པ་དེས་རྙོག་འཛིང་ཆེ་བའི་གནད་དོན་འཕྲད་སྐབས་ང་ཚོས་མཐུན་ཆ་འཚོལ་བར་ཕན་ཐོགས་ཡོད”ཅེས་བརྗོད།
མོར་ཀུའུ་ལོ་ཧྥུའུ་ཡིས“འབོ་གསེར་མཉམ་ལས་ལམ་སྲོལ་གྱིས་རྒྱབ་སྐྱོར་བྱེད་མཁན་དེ་བས་མང་བའི་ཡིད་དབང་འགུག་བཞིན་ཡོད། ན་ནིང་འབོ་གསེར་གྱིས་ཁོངས་མི་མང་དུ་གཏོང་བའི་ལོ་རྒྱུས་རང་བཞིན་གྱི་གོམ་སྟབས་སྤོས་ཡོད། དེའི་ནང་ཞུགས་མཁན་རྒྱལ་ཁབ་ཚང་མར་འབོ་གསེར་མཉམ་ལས་ལམ་སྲོལ་ཁྲོད་ནས་ཕན་པ་ཐོབ་རྒྱུ་ཡིན་པ་ང་ལ་ཡིད་ཆེས་བརྟན་པོ་ཡོད”ཅེས་བརྗོད།
“2024ལོའི་འབོ་གསེར་རྒྱལ་ཁབ་ཀྱི་རེས་སྐོར་ཀྲུའུ་ཞིའི་རྒྱལ་ཁབ་ཡིན་པའི་ཨུ་རུ་སུས་སྲོལ་རྒྱུན་རྒྱུན་འཛིན་དང་། ལོ་མང་རིང་གི་འབོ་གསེར་མཉམ་ལས་ཀྱི་ཉམས་མྱོང་དཔྱད་གཞིར་འཛིན་པ། བྱ་ཐབས་སྣ་ཚོགས་སྤྱད་དེ་ཁོངས་མི་གསར་པ་འབོ་གསེར་མཉམ་ལས་ནང་བདེ་བླག་ངང་ཞུགས་པར་སྐུལ་འདེད་གཏོང་རྒྱུ་ཡིན”མོར་ཀུའུ་ལུའོ་ཧྥུའུ་ཡིས། ཨུ་རུ་སུས་ད་ཐེངས་ཀྱི་ཞལ་འཛོམས་ལ་གྲ་སྒྲིག་ཞིབ་ཚགས་བྱས་ནས་པུའུ་ཀྲང་རིམ་པའི་ཚོགས་འདུ་དང་། ལས་དོན་ཚོགས་ཆུང་ཁག་དང་རིགས་གཅིག་མཁས་ཅན་གྱི་ཚོགས་འདུ་དང་དེ་བཞིན་མི་ཆོས་རིག་གནས་སྤེལ་རེས་ཀྱི་བྱེད་སྒོ་ཐེངས་མང་སྤེལ་ཡོད། ད་ཐེངས་ཀྱི་ཞལ་འཛོམས་བརྒྱུད་འབོ་གསེར་རྒྱལ་ཁབ་ཀྱི་འདས་ཟིན་པའི་དུས་མཚམས་ཤིག་རིང་གི་མཉམ་ལས་གྲུབ་འབྲས་ལ་ཕྱོགས་སྡོམ་དང་འབྱུང་འགྱུར་མཉམ་ལས་ཀྱི་མདུན་ལམ་ལ་རྒྱང་ལྟ་བྱ་རྒྱུ་མ་ཟད། “འབོ་གསེར་+”ལམ་སྲོལ་གྱི་ཚོགས་འདུ་དང་དེ་བཞིན་འབྲེལ་ཡོད་གླེང་མོལ་བྱེད་སྒོ་སྤེལ་རྒྱུ་དང་། རྒྱལ་ཁབ་དང་རྒྱལ་སྤྱིའི་རྩ་འཛུགས་30ལྷག་ཙམ་གྲོས་བསྡུར་ནང་ཞུགས་རྒྱུ་རེད། ཕྱོགས་ཁག་གིས་མིག་སྔའི་ཁ་ཚ་དགོས་གཏུགས་ཀྱི་གནད་དོན་ལ་དམིགས་ནས། འབོ་གསེར་རྒྱལ་ཁབ་དང་གོ་ལ་ཧྲིལ་པོའི་ལྷོ་ཕྱོགས་རྒྱལ་ཁབ་དབར་གྱི་མཉམ་ལས་དང་མཉམ་འགུལ་ལ་སྔར་བས་ཤུགས་སྣོན་ཇི་ལྟར་རྒྱག་རྒྱུའི་ཐད་གྲོས་བསྡུར་བྱ་རྒྱུ་རེད་ཅེས་བརྗོད་པ་རེད།
མོར་ཀུའུ་ལུའོ་ཧྥུའུ་ཡིས། མིག་སྔར་འབོ་གསེར་རྒྱལ་ཁབ་གོ་ལ་ཧྲིལ་པོའི་དཔལ་འབྱོར་འཕར་བའི་སྒུལ་ཤུགས་གལ་ཆེན་ཞིག་ཏུ་གྱུར་ཡོད། འབོ་གསེར་རྒྱལ་ཁབ་དབར་གྱི་ཚོང་དོན་དང་། དངུལ་རྩ། མ་འཇོག་བཅས་ཀྱི་འབྲེལ་བར་སྐུལ་འདེད་བཏང་བ་དེས་གོ་ལ་ཧྲིལ་པོའི་དཔལ་འབྱོར་མཉམ་ལས་སྲ་བརྟན་དུ་གཏོང་རྒྱུར་ཕན་པ་ཡོད། ད་ཐེངས་ཀྱི་ཞལ་འཛོམས་ནང་ཁོངས་མིའི་རྒྱལ་ཁབ་དབར་གྱི་དཔལ་འབྱོར་ཚོང་དོན་དང་ནོར་སྲིད་དང་དངུལ་རྩའི་མཉམ་ལས་ཟབ་ཏུ་གཏོང་བར་གྲོས་བསྡུར་བྱ་རྒྱུ་དང་འབྲེལ། རིག་གནས་དང་། ལུས་རྩལ། སློབ་གསོ། གཞོན་ནུ་སོགས་ཁྱབ་ཁོངས་ཀྱི་སྤེལ་རེས་མཉམ་ལས་རྒྱ་ཆེར་གཏོང་རྒྱུའི་ཐད་ལའང་གྲོས་བསྡུར་བྱ་རྒྱུ་རེད་ཅེས་བརྗོད་པ་རེད།