ཉེ་ཆར། “ཀྲུང་གོའི་ཕུགས་འདུན། ངལ་རྩོལ་གྱི་མཛེས་པ——བློ་སྒྲིལ་སེམས་སྐྱེད་ཀྱིས་ཏང་གི་རྗེས་སུ་འབྲང་། མཐུན་སྒྲིལ་འབད་འཐབ་ཀྱིས་རྒྱང་ལམ་གསར་པར་སྐྱོད”ཅེས་པའི་2024ལོའི་ངལ་རྩོལ་དཔེ་བཟང་བའི་བཟོ་བོའི་སྙིང་སྟོབས་ཀྱི་སྐོར་སྐྱོད་སྒྲོག་འགྲེལ་བྱེད་སྒོ་ཐུགས་གྲ་ལེགས་འགྲིག་བྱུང་བ་རེད།

ཤེས་རྟོགས་བྱུང་བར་གཞིགས་ན། ཟླ་9ཚེས་24ཉིན་བྱེད་སྒོ་སྤེལ་འགོ་ཚུགས་པ་ནས་བཟུང་། རང་སྐྱོང་ལྗོངས་སྤྱི་ཁྱབ་བཟོ་ཚོགས་ཀྱིས་ལས་རིགས་ཁག་གི་ངལ་རྩོལ་དཔེ་བཟང་བ་དང་འཐབ་ཕྱོགས་དང་པོའི་ལས་བཟོ་12ལས་གྲུབ་པའི་སྒྲོག་འགྲེལ་ཚོགས་པ་བཙུགས་ཏེ། སྔ་རྗེས་སུ་ལྷ་ས་དང་། ནག་ཆུ། གཞིས་རྩེ་སོགས་སུ་བསྐྱོད་ནས་སྒྲོག་འགྲེལ་བྱས་པར། གྲོང་ཁྱེར་དང་། རྫོང(ཆུས) ཤང་གྲོང་བཅས་ཀྱི་ཚན་པ་ཁག་251དང་ལས་བྱེད་ལས་བཟོ་དང་སློབ་མའི་འཐུས་མི་2000ལྷག་ཙམ་ས་ཡུལ་དངོས་སུ་སྒྲོག་འགྲེལ་ཉན་པར་ཡོང་ཡོད།

སྒྲོག་འགྲེལ་བྱེད་རིང་། སྒྲོག་འགྲེལ་པས་ངལ་རྩོལ་དང་རྩལ་ནུས་ཇི་ལྟར་སྦྱངས་ཚུལ་དང་། གསར་བརྗེའི་གཏམ་རྒྱུད། འགྲིམ་འགྲུལ་དང་གློག་ཤུགས་འཛུགས་སྐྲུན་གྱི་བརྒྱུད་རིམ་སོགས་ནས་རང་ཉིད་ཀྱི་སློབ་སྦྱོང་གི་མྱོང་ཚོར་དང་། ལས་ཀའི་ཉམས་མྱོང་། མཐོང་ཐོས་བཅས་མཉམ་སྤྱོད་བྱས་ཏེ། ཐོག་མའི་བསམ་འདུན་ཤོད་པ་དང་། མྱོང་ཚོར་གླེང་བ། བརྩེ་བ་མཚོན་པ་བཅས་བྱས་པ་རེད། རྒྱལ་ཁབ་ཆེན་པོའི་བཟོ་བོ་དང་ཀྲུང་གོ་ལྕགས་ལམ་ཕུག་ལམ་ཅུས་ཚོགས་པའི་ས་མཐོའི་ལྕགས་ལམ་རྣམ་གྲངས་ཀྱི་འབིགས་འཕྲུལ་གྱི་ཁ་ལོ་བ་མུའུ་ཡུང་ཆིས་རང་ཉིད་དགེ་ཕྲུག་ཆུང་ཆུང་ཞིག་ནས་གོམ་པ་རིམ་བགྲོད་ཀྱིས་རྒྱལ་ཁབ་ཆེན་པོའི་བཟོ་བོར་ཇི་ལྟར་གྱུར་ཚུལ་སྐོར་བརྗོད་པར་ཚུར་སྣང་ལན་ཆ་ཆེན་པོ་བྱུང་བ་རེད།