ལྷ་ས་གྲོང་ཁྱེར་རྔ་ཆེན་གྲོང་ཚོས།
མེ་ཟོན་གྱི་མངོན་མེད་རྐྱེན་ངན་གྲལ་བཤེར་བྱས་ནས་ཁོར་ཡུག་བཅོས་སྒྲིག་ལ་སྐུལ་འདེད་བཏང་བ།
ཉེ་ཆར། ལྷ་ས་གྲོང་ཁྱེར་ཁྲེང་ཀོན་ཆུས་རྔ་ཆེན་ཁྲོམ་གཞུང་རྔ་ཆེན་གྲོང་ཚོས་བྱ་སྤྱོད་ཧུར་ཐག་སྤེལ་ནས་མེ་ཟོན་བདེ་འཇགས་ཀྱི་མངོན་མེད་རྐྱེན་ངན་གྲལ་བཤེར་གྱི་ཆེད་དོན་ལས་དོན་དང་ཁོར་ཡུག་བཅོས་སྒྲིག་ཆེ་མོ་ཟུང་འབྲེལ་དམ་ཟབ་བྱས་ཏེ་ཁོངས་གཏོགས་ཁུལ་གྱི་བདེ་འཇགས་བརྟན་ལྷིང་ལ་གཡས་གཞོགས་གཡོན་འདེགས་བྱས་པ་རེད།
རྔ་ཆེན་གྲོང་ཚོའི་དྲ་མིག་ལས་དོན་པས་སྔ་ཙམ་ཤེས་རྟོགས་ཐུབ་པ་དང་། སྔ་ཙམ་སྙན་སེང་ཞུ་བ། སྔ་ཙམ་དག་ཐེར་བྱེད་པ་བཅས་ཀྱི་འདུ་ཤེས་བཟུང་སྟེ་སྒང་སྟོད་མ་ཡུར་བྱང་མའི་རྫས་འགྱུར་བཟོ་གྲྭ་དང་ཁྱིམ་ཆས་བཟོ་གྲྭ་སོགས་གཙོ་གནད་ཁུལ་དུ་ཁྱོན་ཡོངས་ནས་གྲལ་བཤེར་ཞིབ་ཚགས་བྱས་པ་རེད། ལས་དོན་མི་སྣས་བདེ་འཇགས་ཁ་འགྲེམས་ལམ་བུ་ཤར་གཏོང་ཐུབ་མིན་ལ་ཞིབ་བཤེར་ནན་ཏན་བྱས་ནས་ཛ་དྲག་གནས་ཚུལ་འོག་མི་སྣ་འཕྲལ་མར་ཁ་འགྲེམས་ཐུབ་པའི་འགན་ལེན་བྱས་པ་དང་། མེ་གསོད་ཡོ་བྱད་སོགས་མེ་གསོད་སྒྲིག་ཆས་ཆ་ཚང་པོ་ཡོད་མེད་ལ་ཞིབ་ཕྲ་བལྟས་ནས་མེ་སྐྱོན་ཆུང་ས་ནས་གསོད་ཐུབ་པའི་འགན་ལེན་བྱས་པ། མེ་གསོད་ཡོ་ཆས་བེད་སྤྱོད་ཐུབ་མིན་དང་དེ་བཞིན་འཕྲལ་སྡོམ་ཕྱོགས་སྟོན་གློག་སྒྲོན་རྒྱུན་གཏན་ལྟར་བེད་སྤྱོད་ཐུབ་མིན་ཞིབ་བཤེར་ནན་པོ་བྱས་ནས་མི་རྣམས་ཀྱི་ཚེ་སྲོག་བདེ་འཇགས་ལ་བློས་འགེལ་ཆོག་པའི་འགན་ལེན་བྱས་ཡོད། དྲ་མིག་ལས་དོན་མི་སྣས་ཞིབ་བཤེར་བྱེད་རིང་བདེ་འཇགས་ཀྱི་མངོན་མེད་རྐྱེན་ངན་ཤེས་རྟོགས་བྱུང་བ་རྣམས་ཚོང་དུད་ལ་འཕྲལ་མར་དག་ཐེར་བྱེད་དགོས་པའི་བླང་བྱ་བཏོན་པ་མ་ཟད། འབྲེལ་ཡོད་འགན་ཁུར་བར་བདེ་འཇགས་ཐོན་སྐྱེད་ཀྱི་བྱེད་པོའི་འགན་འཁྲི་དོན་འཁྱོལ་ནན་པོ་བྱས་ནས་བདེ་འཇགས་ཐོན་སྐྱེད་ཀྱི་འདུ་ཤེས་བརྟན་པོ་འཛུགས་དགོས་པའི་མངགས་བཅོལ་ནན་པོ་བྱས་པ་རེད།