“འབོ་གསེར་ཆེན་པོ”འཕེལ་རྒྱས་ཆེན་པོ་ཡོང་བ་དང་བྱས་རྗེས་ཆེན་པོ་མངོན་པར་སྐུལ་འདེད་གཏོང་བ།
འབོ་གསེར་རྒྱལ་ཁབ་ཀྱི་འགོ་ཁྲིད་པའི་ཞལ་འཛོམས་ཐེངས་བཅུ་དྲུག་པ་རིང་མིན་དུ་ཨུ་རུ་སུའི་ཁ་ཧྲན་དུ་འཚོག་རྒྱུ་རེད། དེ་ནི་འབོ་གསེར་གྱི་ཁོངས་མི་མང་དུ་བཏང་རྗེས་ཀྱི་ལོ་རྒྱུས་རང་བཞིན་གྱི་འགོ་ཁྲིད་པའི་ཞལ་འཛོམས་ཐེངས་དང་པོ་ཡིན་པ་དང་དེར་རྒྱལ་སྤྱིའི་སྤྱི་ཚོགས་ཀྱིས་དོ་ཁུར་ཆེན་པོ་བྱེད་ཀྱི་ཡོད། ཀྲུའུ་ཞི་ཞི་ཅིན་ཕིང་གིས་ཁ་ཧྲན་དུ་ད་ཐེངས་ཀྱི་ཞལ་འཛོམས་ལ་ཞུགས་ནས་རྒྱལ་ཁབ་ཁག་གི་འགོ་ཁྲིད་པ་དང་མཉམ་དུ“འབོ་གསེར་ཆེན་པོའི་མཉམ་ལས”བརྟན་བགྲོད་རྒྱང་འཁྱོལ་ཡོང་བ་དང་དེ་བས་སྐས་རིམ་གསར་པ་ཞིག་ཏུ་སླེབས་པར་སྐུལ་འདེད་གཏོང་གནང་རྒྱུ་རེད།
དེ་བཙུགས་པ་ནས་བཟུང་ཀྲུང་གོ་དང་འབོ་གསེར་གྱི་རོགས་ཟླའི་ཐུན་མོང་འབད་བརྩོན་དང་ཡུན་རིང་འབད་འཐབ་བྱས་པ་བརྒྱུད། འབོ་གསེར་མཉམ་ལས་ཀྱི་ལམ་སྲོལ་དེ་གོ་ལ་ཧྲིལ་པོའི་ལྷོ་ཕྱོགས་རྒྱལ་ཁབ་ཀྱིས་ཐུན་མོང་ཐོག་མཉམ་ལས་དང་། ཐུན་མོང་ཐོག་འཕེལ་རྒྱས་དོན་གཉེར། ཐུན་མོང་ཐོག་འགྲན་སློང་ལ་ཁ་གཏད་གཅོག་པ་བཅས་ཀྱི་ལས་སྟེགས་གལ་ཆེན་ཞིག་ཏུ་གྱུར་ཡོད།
འབོ་གསེར་མཉམ་ལས་ལམ་སྲོལ་གྱི་རྩ་བ་བརྟན་ཞིང་ཡལ་ག་རྒྱས་པས་ཤུགས་རྐྱེན་ཐེབས་ཤུགས་ཧ་ཅང་ཆེ་རུ་ཕྱིན་ཡོད། འབོ་གསེར་གྱི་ཁོངས་མིའི་གྲས་སུ་མཉམ་འབྲེལ་རྒྱལ་ཚོགས་བདེ་འཇགས་ལས་འཛིན་ལྷན་ཚོགས་ཀྱི་ལས་འགན་རྒྱུན་འཛིན་རྒྱལ་ཁབ་དང་། གསར་དར་ཁྲོམ་རའི་རྒྱལ་ཁབ་གཙོ་བོ། འཕེལ་རྒྱས་འགྲོ་བཞིན་པའི་རྒྱལ་ཁབ་བཅས་ཚུད་ཡོད་པ་དང་། གོ་ལ་ཧྲིལ་པོའི་ཐོན་ལས་འཁོར་འབྲེལ་དང་། མཁོ་སྤྲོད་འཁོར་འབྲེལ། ཟོག་འགྲེམས་འཁོར་འབྲེལ་བཅས་ཀྱི་ཁྲོད་གནས་བབ་གལ་ཆེན་བཟུང་ཡོད་པས་རྒྱལ་སྤྱིའི་ཆབ་སྲིད་དང་དཔལ་འབྱོར་ལ་ཤུགས་རྐྱེན་གལ་ཆེན་ལྡན་ཡོད། ཁོངས་མིའི་རྒྱལ་ཁབ་མང་དུ་བཏང་རྗེས་ཀྱི་འབོ་གསེར་ཁྱིམ་ཚང་ཆེན་པོས་གོ་ལ་ཧྲིལ་པོའི་མི་འབོར་གྱི་ཕྱེད་ཀ་ཙམ་དང་གོ་ལ་ཧྲིལ་པོའི་ཚོང་དོན་གྱི་ལྔ་ཆ་གཅིག་ཙམ་བཟུང་བ་མ་ཟད། སྐད་གྲགས་ཆོད་ཚད་ཀྱང་སྔར་བས་ཆེ་རུ་ཕྱིན་ཡོད། རྒྱལ་ཁབ་སྔར་བས་མང་པོ་ཞིག་འབོ་གསེར་མཉམ་ལས་ཀྱི་ལམ་སྲོལ་ནང་ཞུགས་རྒྱུའི་རེ་བ་བྱེད་ཀྱི་ཡོད་པས་འབོ་གསེར་གྱིས་དེ་བས་རྒྱ་ཁྱབ་དང་། དེ་བས་གཏིང་ཟབ། དེ་བས་ཤུགས་ཆེ་བ་བཅས་ཀྱི་ཡར་ཐོན་སྟོབས་ཤུགས་གཅིག་ཏུ་སྒྲིལ་ངེས་རེད།
འབོ་གསེར་མཉམ་ལས་ཀྱི་ལམ་སྲོལ་དགེ་མཚན་ལྡན་ལ་ནུས་པ་ལྡན་པ་དང་གསར་གཏོད་ནུས་པ་རྒྱུན་མཐུད་ཆེ་རུ་འགྲོ་བཞིན་ཡོད། འབོ་གསེར་རྒྱལ་ཁབ་ཀྱིས་གཙོ་བདག་ཞལ་འཛོམས་བྱ་རྒྱུ་སྣེ་ཁྲིད་དུ་བྱས་པའི་རིམ་པ་མང་བ་དང་། ཁྱབ་ཁོངས་ཆེ་བ། ཕྱོགས་ཡོངས་བཅས་ཀྱི་མཉམ་ལས་ལམ་སྲོལ་བཙུགས་ནས“འབོ་གསེར+”མཉམ་ལས་བྱེད་སྟངས་བརྒྱུད་མཉམ་ལས་བྱེད་རྒྱ་ཆེ་རུ་ཧུར་ཐག་བཏང་སྟེ། གོ་ལ་ཧྲིལ་པོའི་ལྷོ་ཕྱོགས་རྒྱལ་ཁབ་ཁག་ཕན་ཚུན་གྲུབ་འབྲས་གཏོད་པ་དང་ཐུན་མོང་དར་རྒྱས་ཡོང་བའི་འཕེལ་རྒྱས་ཀྱི་དམིགས་ཚད་མངོན་འགྱུར་ཡོང་བར་རམ་འདེགས་བྱེད་རྒྱུ་རེད། འབོ་གསེར་རྒྱལ་ཁབ་ཀྱིས་རྒྱལ་སྤྱིའི་ལས་དོན་ཐད་མཐུན་སྦྱོར་དམ་ཟབ་བྱ་རྒྱུ་རྒྱུན་འཁྱོངས་བྱས་ཏེ་དྲང་གཞག་དྲང་བདེན་སྲུང་སྐྱོང་དང་འཛམ་གླིང་སྣེ་མང་ཅན་ལ་སྐུལ་འདེད་གཏོང་རྒྱུ་རེད།
འབོ་གསེར་གྱི་མཉམ་ལས་ལམ་སྲོལ་སྒོ་དབྱེ་བསྟུན་མཁས་ཡིན་པས་བློ་སེམས་འགུག་ཤུགས་མངོན་གསལ་དོད་པོས་ཆེ་རུ་ཕྱིན་ཡོད། འབོ་གསེར་གྱི་ཁོངས་མི་ནི་གླིང་ཆེན་བཞིར་གནས་པ་དང་འབོ་གསེར་གྱི་མཉམ་ལས་རི་མཚོ་བརྒལ་ནས་ས་ཁུལ་དང་ཤེས་དཔལ་མི་འདྲ་བའི་དབར་ཞི་བདེ་དང་མཛའ་གྲོགས་ཀྱི་སྦྲེལ་ཟམ་བཙུགས་ཡོད། འབོ་གསེར་མཉམ་ལས་ཀྱིས་སྤེལ་རེས་ལ་བརྟེན་ནས་འགལ་ཟླ་སེལ་བ་དང་མིག་དཔེར་འཛིན་རེས་བྱས་ནས་གདོང་ཐུག་སེལ་བའི་ཤེས་དཔལ་མཉམ་འགུལ་གྱི་དཔེ་སྟོན་རྣམ་པ་ལག་ལེན་ཧུར་ཐག་བསྟར་བ་དེ་ཐོག་ནས་རྒྱལ་སྤྱིའི་སྤྱི་ཚོགས་ཀྱི་མཐུན་སྒྲིལ་དོན་གཉེར་དང་སྐད་ཆ་ཤོད་རེས་ཀྱི་དྲང་ནུས་མཚོན་གྱི་ཡོད།
ཁོངས་མི་མང་དུ་བཏང་རྗེས“འབོ་གསེར་ཆེན་པོ”སྔ་རྗེས་རྒྱུན་མཐུད་དང་སྔ་འཛིན་ཕྱི་གཏོད་ཀྱི་འཕེལ་རྒྱས་ཀྱི་དུས་མཚམས་གསར་པ་ཞིག་ཏུ་སླེབས་ནས་ལྷོ་ལྷོ་མཉམ་ལས་ལ་སྐུལ་འདེད་གཏོང་བ་དང་གོ་ལ་ཧྲིལ་པོའི་བཅོས་སྐྱོང་ལ་སྣེ་ཁྲིད་བྱེད་པའི་རྒྱལ་སྤྱིའི་འགན་འཁྲི་དེ་བས་ཆེ་བ་འཁུར་རྒྱུ་རེད། ཨུ་རུ་སུ་འབོ་གསེར་རྒྱལ་ཁབ་ཀྱི་རེས་འཁོར་ཀྲུའུ་ཞིའི་རྒྱལ་ཁབ་ཡིན་པའི་ངོས་ནས་འབོ་གསེར་མཉམ་ལས་ཀྱི་ལམ་སྲོལ་འཕེལ་རྒྱས་ལ་སེམས་ནུས་འབོར་ཆེན་བཏོན་ཡོད། ཀྲུང་གོ་དང་འབོ་གསེར་རྒྱལ་ཁབ་ཀྱི་རོགས་ཟླ་གཞན་དག་གི་གཞོགས་འདེགས་འོག་བྱེད་སྒོ་ཁག་200ལྷག་ཙམ་སྤེལ་ནས་ཁོངས་མི་གསར་པ་འབོ་གསེར་ཁྱིམ་ཚང་ཆེན་པོའི་ནང་གང་མགྱོགས་ཞུགས་པར་རོགས་རམ་བྱས་ཡོད། ཀྲུང་ཨུ་རྒྱལ་ཁབ་གཉིས་པོས་འབོ་གསེར་མཉམ་ལས་ཀྱི་ལམ་སྲོལ་ནང་འཐབ་ཇུས་མཉམ་ལས་དམ་ཟབ་རྒྱུན་འཁྱོངས་བྱས་ཡོད། ཨུ་རུ་སུ་ཕྱོགས་ཀྱིས་རེས་འཁོར་ཀྲུའུ་ཞིའི་རྒྱལ་ཁབ་ཀྱི་ལས་དོན་ཡག་པོ་བསྒྲུབ་པར་ཀྲུང་གོ་ཕྱོགས་ཀྱིས་རྒྱབ་སྐྱོར་ཧུར་ཐག་བྱས་ཏེ། ཁ་ཧྲན་ཞལ་འཛོམས་ཐོག་ཐུན་མོང་གི་ངོས་འཛིན་གཅིག་སྒྲིལ་དང་སྟོབས་ཤུགས་གཅིག་ཏུ་བསྒྲིལ་བ་དང་། “འབོ་གསེར་ཆེན་པོར”འཕེལ་རྒྱས་ཆེན་པོ་དང་བྱས་རྗེས་ཆེན་པོ་འཇོག་པར་སྐུལ་འདེད་གཏོང་བ། འདྲ་མཉམ་དང་གོ་རིམ་ལྡན་པའི་འཛམ་གླིང་སྣེ་མང་ཅན་དང་ཀུན་ཕན་བསྟུན་མཁས་ཀྱི་དཔལ་འབྱོར་གོ་ལ་ཅན་ལ་མཉམ་དུ་སྐུལ་འདེད་གཏོང་བ་བཅས་བྱས་ཏེ་མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་པར་སྐུལ་འདེད་གཏོང་རྒྱུ་རེད།
(རྩོམ་པ་པོ་ནི་ཨུ་རུ་སུར་བཅའ་སྡོད་ཀྲུང་གོའི་གཞུང་ཚབ་ཆེ་མོ་བ་ཡིན་པ)