རྒྱལ་ཁབ་གནས་སྤོས་ཡུལ་མིའི་དོ་དམ་ཅུས་ཀྱིས་ཉེ་ཆར་2024ལོའི་དུས་ཚིགས་གསུམ་པའི་གནས་སྤོས་ཡུལ་མིའི་དོ་དམ་ལས་དོན་གྱི་གྲངས་གཞི་གཙོ་བོ་ཁྱབ་བསྒྲགས་བྱས་ཤིང་། དུས་ཚིགས་གསུམ་པར་རྒྱལ་ཡོངས་ཀྱི་གནས་སྤོས་ཡུལ་མིའི་དོ་དམ་ལས་ཁུངས་ཀྱིས་རིམ་རྩིས་བརྒྱབ་ན་རྒྱལ་མཚམས་ནས་འཛུལ་སྒྲོལ་བྱེད་མཁན་མི་ཐེངས་དུང་ཕྱུར་1.6ལ་ཞིབ་བཤེར་བྱས་པ་དེ་དུས་མཚུངས་ལས་30.1%འཕར་བ་དང་། རྒྱལ་ཡོངས་ཀྱི་འགག་སྒོ་ཁག་གི་རྒྱལ་མཚམས་ནས་འཛུལ་བའི་ཕྱི་རྒྱལ་བ་མི་ཐེངས་ཁྲི་818.6ཟིན་པ་དེ་དུས་མཚུངས་ལས་48.8%འཕར་བའི་ནང་རྒྱལ་གྲོལ་ཐོངས་མཆན་མི་དགོས་པར་རྒྱལ་མཚམས་ནས་འཛུལ་མཁན་མི་ཐེངས་ཁྲི་488.5ཟིན་པ་དེ་དུས་མཚུངས་ལས་78.6%འཕར་བ་རེད།

རྒྱལ་མཚམས་ནས་འཛུལ་སྒྲོལ་བྱེད་མཁན་ཞིབ་བཤེར་བྱེད་པའི་ཁྲོད་ནང་སའི་ཡུལ་མི་མི་ཐེངས་ཁྲི་7854.5དང་། ཤང་ཀང་དང་། ཨའོ་མོན། ཐའེ་དབན་བཅས་ཀྱི་ཡུལ་མི་མི་ཐེངས་ཁྲི་6469.4 རྒྱལ་ཁོངས་ཕྱི་རྒྱལ་བ་མི་ཐེངས་ཁྲི་1646.1བཅས་ཟིན་པ་དེ་དུས་མཚུངས་ལས་27.3%དང་། 28.9% 50.5%བཅས་སོ་སོར་འཕར་ཡོད། རྒྱལ་མཚམས་ནས་འཛུལ་སྒྲོལ་བྱེད་མཁན་འགྲིམ་འགྲུལ་སྐྱེལ་འདྲེན་ཡོ་ཆས་ཐེངས་ཁྲི་842.9ལ་ཞིབ་བཤེར་བྱས་པ་དེ་དུས་མཚུངས་ལས་31.1%འཕར་བ་རེད།

རྒྱལ་ཡོངས་ཀྱི་གནས་སྤོས་ཡུལ་མིའི་དོ་དམ་ལས་ཁུངས་ཀྱིས་ས་ཁོངས་རང་བཞིན་གྱི་རྒྱལ་མཚམས་ནས་འཛུལ་བའི་ཐོངས་མཆན་མི་དགོས་པ་དང་། རྒྱལ་མཚམས་སྒྲོལ་བའི་ཐོངས་མཆན་མི་དགོས་པའི་སྲིད་ཇུས་ཟམ་མི་ཆད་པར་བཟང་སྒྲིག་བྱས་ཏེ། དུས་ཚིགས་གསུམ་པར་ཤང་ཀང་དང་ཨའོ་མོན་ས་ཁུལ་གྱི་ཕྱི་རྒྱལ་གྱི་ཡུལ་སྐོར་ཚོགས་པ་ཧའེ་ནན་དུ་ཆུ་ཚོད་144ཡི་རིང་ཐོངས་མཆན་མི་དགོས་པའི་སྲིད་ཇུས་བཏོན་པ་དང་། ཧོ་ནན་དང་ཡུན་ནན་དུ་ཆུ་ཚོད་144རིང་གི་རྒྱལ་གྲོལ་ཐོངས་མཆན་མི་དགོས་པའི་སྲིད་ཇུས་རྒྱ་ཆེར་བཏང་བ། ཤང་ཀང་དང་ཨའོ་མོན་གྱི་གཏན་གནས་རང་བཞིན་གྱི་ཡུལ་མིའི་ཁྲོད་ཀྱི་རྒྱལ་ཁོངས་ཀྲུང་གོ་མིན་པར་ནང་སར་འགྲོ་འོང་བྱེད་པའི་ལམ་ཡིག་སྤྲད་པ་བཅས་བྱས་ཏེ་རྒྱལ་མཚམས་ནས་འཛུལ་སྒྲོལ་གྱི་ལག་ཁྱེར“རྒྱལ་ཡོངས་ཀུན་སྒྲུབ”དང“བརྒྱུད་རིམ་ཧྲིལ་པོ་དྲ་སྒྲུབ”བྱ་རྒྱུར་སྐུལ་འདེད་བཏང་བ་རེད། ཁྱོན་ལམ་ཡིག་དཀྱུས་མ་ཁྲི་598.7སྤྲད་པ་དང་ནང་སའི(སྐམ་ས་ཆེ་མོའི)ཡུལ་མི་ཤང་ཀང་དང་ཨའོ་མོན་དུ་འགྲོ་འོང་བྱེད་པའི་རྒྱལ་གྲོལ་ཐོངས་མཆན་ལག་ཁྱེར་ཐེངས་ཁྲི་2664.9སྤྲད་པ་དེ་དུས་མཚུངས་ལས་28.5%དང་4.7%སོ་སོར་འཕར་བ་དང་། རིམ་རྩིས་བརྒྱབ་ན་ཕྱི་རྒྱལ་བ་མི་ཐེངས་ཁྲི་80.7ལ་རྒྱལ་གྲོལ་ཐོངས་མཆན་སྤྲད་པ་དེ་དུས་མཚུངས་ལས་32.7%འཕར་བ་རེད།

དུས་ཚིགས་གསུམ་པར་རྒྱལ་ཡོངས་ཀྱི་གནས་སྤོས་ཡུལ་མིའི་དོ་དམ་ལས་ཁུངས་ཀྱིས་རྒྱལ(མཐའ)མཚམས་དོ་དམ་ལ་གནོད་འཚེ་གཏོང་བའི་ཉེས་གསོག་ལ་རྡུང་རྡེག་ཚ་ནན་གཏོང་བའི“རྔོན་རྒྱག”བྱ་སྤྱོད—2024ལ་སྤྱི་འདོམས་སྐུལ་འདེད་བཏང་ནས་དབྱར་དུས་ཀྱི་བདེ་འཇགས་བཅོས་སྐྱོང་གི་རྡུང་རྡེག་དང་བཅོས་སྒྲིག་བྱ་སྤྱོད་གཏིང་ཟབ་སྤེལ་བ་རེད། རྒྱལ(མཐའ)མཚམས་དོ་དམ་ལ་གནོད་འཚེ་གཏོང་བའི་ཉེས་གསོག་གྱོད་གཞི་ཁག་ཁྱོན་9800ལྷག་ཙམ་མྱུལ་ཞིབ་བྱས་པ་དང་། དུག་རྫས་ཀྱི་གྱོད་གཞི་ཁག་68དང་འབྲེལ་ཡོད་མི་91ལག་ཏུ་ཐེབས་པ། མཐའ་མཚམས་ས་ཁུལ་གྱི་ལྐོག་འདྲེན་ཁྲིམས་འགལ་སོགས་ཀྱི་ཉེས་གསོག་བཅོས་སྒྲིག་བྱས་ནས་མེ་མདའ་སྣ་ཚོགས་409དང་མདེའུ་ཁྲི་1.3ལྷག་ཙམ་རྩད་ཆོད་པ། སྒོར་དུང་ཕྱུར་1.01རི་བའི་ལྐོག་འདྲེན་དངོས་རྫས་ལག་ཏུ་ཐེབས་པ་བཅས་རེད།