ཤིན་ཧྭ་གསར་འགྱུར་ཁང་པེ་ཅིང་ནས་ཟླ་10ཚེས་21ཉིན་གློག་འཕྲིན་འབྱོར་གསལ། ཉེ་ཆར། ཀྲུང་གུང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས《ཐོན་ལས་བཟོ་པའི་དཔུང་ཁག་འཛུགས་སྐྱོང་གི་སྒྱུར་བཅོས་ཟབ་ཏུ་གཏོང་བའི་སྐོར་གྱི་བསམ་འཆར》(གཤམ་དུ《བསམ་འཆར》ཞེས་བསྡུ་རྒྱུ)བཀྲམ་པ་རེད། 《བསམ་འཆར》ནང་ནན་བཤད་བྱས་དོན། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱ་རྒྱུ་མཐའ་འཁྱོངས་ཀྱིས་ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གཉིས་པ་དང་གསུམ་པའི་དགོངས་དོན་ཕྱོགས་ཡོངས་ནས་ལག་བསྟར་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བཟོ་པའི་གྲལ་རིམ་དང་བཟོ་ཚོགས་ལས་དོན་སྐོར་གྱི་རྣམ་བཤད་གལ་ཆེན་ལག་བསྟར་གཏིང་ཟབ། ཏང་གི་ཕྱོགས་ཡོངས་ཀྱི་འགོ་ཁྲིད་མཐའ་འཁྱོངས་དང་ཤུགས་སྣོན་རྒྱག་པ། བློ་གཅིག་སེམས་གཅིག་གིས་བཟོ་པའི་གྲལ་རིམ་ལ་བརྟེན་པའི་རྩ་བའི་བྱེད་ཕྱོགས་མཐའ་འཁྱོངས།“གཏན་འཁེལ་གཉིས”ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་གཏིང་ཟབ་ལེན་པ། “འདུ་ཤེས་བཞི”ཟབ་ཏུ་གཏོང་བ། “གདེང་ཚོད་བཞི”བརྟན་དུ་གཏོང་བ། “སྲུང་སྐྱོང་གཉིས”ཐུབ་པ། བརྒྱུད་རིམ་ལྡན་པའི་འདུ་ཤེས་དང་། གནད་དོན་འཛིན་ཕྱོགས། གཞུང་འཁྱོངས་གསར་འབྱེད་བཅས་མཐའ་འཁྱོངས་བྱས་ཁར། ཐོན་ལས་བཟོ་པའི་དཔུང་ཁག་འཛུགས་སྐྱོང་གི་སྒྱུར་བཅོས་ཟབ་ཏུ་བཏང་ནས། ཐོན་ལས་བཟོ་པར་མཐུན་སྒྲིལ་སྣེ་ཁྲིད་ཀྱིས་ཀྲུང་གོའི་ལུགས་ཀྱི་དེང་རབས་ཅན་འཛུགས་སྐྲུན་བྱེད་རིང་གཙོ་ཤུགས་དམག་གི་ནུས་པ་འདོན་དགོས།

《བསམ་འཆར》ནང་བཏོན་པའི་དམིགས་ཚད་གཙོ་བོ་ནི། ཐོན་ལས་བཟོ་པའི་དཔུང་ཁག་འཛུགས་སྐྱོང་གི་སྒྱུར་བཅོས་ཟབ་ཏུ་བཏང་བ་བརྒྱུད་བསམ་བློ་ཆབ་སྲིད་ཀྱི་སྣེ་ཁྲིད་དེ་བས་ཏན་ཏིག་ཡོང་བ་དང་། ཏང་གི་བཀའ་ལ་ཉན་པ་དང་ཏང་གི་རྗེས་སུ་འབྲང་བའི་ཐོན་ལས་བཟོ་པའི་དད་སེམས་དེ་བས་བརྟན་དུ་གཏོང་བ། ལས་སྒྲུབ་ལས་གཏོད་ཀྱི་སྤྲོ་སེམས་དང་སྒུལ་ཤུགས་དེ་བས་ཆེ་རུ་གཏོང་བ། བདག་པོའི་གནས་བབ་དེ་བས་མངོན་གསལ་དོད་དུ་གཏོང་བ། གྲུབ་འབྲས་ཐོབ་སྣང་དང་། ཐོབ་སྣང་། སྐྱིད་སྣང་སྔར་བས་ཆེ་རུ་གཏོང་བ་བཅས་བྱེད་པ་དང་། ངལ་རྩོལ་གཟི་བརྗིད་དང་། རྩལ་ནུས་རྩ་ཆེན། གསར་གཏོད་རླབས་ཆེན་བཅས་ཡིན་པའི་སྤྱི་ཚོགས་ཀྱི་རྣམ་པ་དེ་བས་ཟབ་ཏུ་གཏོང་བ། ཐོན་ལས་བཟོ་པའི་ཕྱོགས་བསྡུས་བྱང་ཚད་མངོན་གསལ་དོད་པོས་མཐོ་རུ་གཏོང་བ་དང་། རྒྱལ་ཁབ་ཆེན་པོའི་བཟོ་བོ་དང་རྩལ་ནུས་ཆེ་བའི་ཤེས་ལྡན་པ་རྒྱུན་ཆད་མེད་པར་ཐོན་པ། ཤེས་བྱའི་རྣམ་པ་དང་། རྩལ་ནུས་རྣམ་པ། གསར་གཏོད་རྣམ་པའི་ཐོན་ལས་བཟོ་པའི་དཔུང་ཁག་རྒྱ་སྟོབས་ཆེ་རུ་རྒྱུན་ཆད་མེད་པར་གཏོང་བ་བཅས་བྱེད་རྒྱུ་དེ་རེད། 2035ལོར་སླེབས་སྐབས་རྒྱལ་ཁབ་ཆེན་པོའི་བཟོ་བོ་2000ལྷག་ཙམ་དང་། ཞིང་ཆེན་རིམ་པའི་བཟོ་བོ་10000ལྷག་ཙམ། གྲོང་ཁྱེར་རིམ་པའི་བཟོ་བོ་50000ལྷག་ཙམ་བཅས་གསོ་སྐྱོང་དང་། རྒྱལ་ཁབ་ཆེན་པོའི་བཟོ་བོ་དང་རིམ་ཁག་བཟོ་བོའི་ཤེས་ལྡན་པ་དེ་བས་མང་པོ་གསོ་སྐྱོང་བྱ་རྒྱུ་སྣེ་ཁྲིད་དུ་བྱེད་པ། ཐོན་ལས་ལག་རྩལ་བཟོ་པའི་དཔུང་ཁག་རྩེ་གྲ་འཛུགས་སྐྱོང་ལ་སྐུལ་ཁྲིད་བཅས་ཐུབ་པའི་བརྩོན་ལེན་བྱས་ཏེ། ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་གྱི་བྱ་གཞག་རླབས་པོ་ཆེར་ཕྱོགས་ཡོངས་ནས་སྐུལ་འདེད་གཏོང་བར་ཤེས་ལྡན་པའི་འགན་ལེན་དང་རྩལ་ནུས་ཀྱི་འདེགས་སྐྱོར་ནུས་ལྡན་བྱེད་དགོས།

《བསམ་འཆར》ནང་ཕྱོགས་བརྒྱད་ཀྱི་ཐད་ནས་བཀོད་སྒྲིག་བྱས་ཡོད་དེ། གཅིག་ནས་བསམ་བློ་ཆབ་སྲིད་ཀྱི་སྣེ་ཁྲིད་བྱེད་ཤུགས་ཆེ་རུ་བཏང་ནས་ཐོན་ལས་བཟོ་པར་མཐུན་སྒྲིལ་སྣེ་ཁྲིད་བྱས་ཏེ་བློ་བརྟན་འགྱུར་མེད་ངང་ཏང་གི་བཀའ་ལ་ཉན་པ་དང་ཏང་གི་རྗེས་སུ་འབྲང་དགོས་པ་དང་། གཉིས་ནས་བརྒྱུད་རིམ་ཧྲིལ་པོའི་མི་དམངས་དམངས་གཙོ་འཕེལ་རྒྱས་བཏང་ནས་ཐོན་ལས་བཟོ་པའི་བདག་པོའི་གནས་བབ་ལ་འགན་ལེན་བྱེད་དགོས་པ། གསུམ་ནས་བཟོ་ལས་ཅན་གསར་པའི་འཕེལ་རྒྱས་ཀྱི་དགོས་མཁོ་དང་འཚམ་པར་བྱས་ཏེ་ཐོན་ལས་བཟོ་པའི་རྩལ་ནུས་གྲུབ་པའི་མ་ལག་འཐུས་སྒོ་ཚང་དུ་གཏོང་དགོས་པ། བཞི་ནས་ལས་རིགས་འཕེལ་རྒྱས་མ་ལག་འཐུས་སྒོ་ཚང་དུ་བཏང་ནས་ཐོན་ལས་བཟོ་པ་འཚར་ལོངས་དང་འཇོན་ཐང་ཅན་ལ་འགྱུར་བར་སྐུལ་འདེད་གཏོང་དགོས་པ། ལྔ་ནས་ངལ་རྩོལ་དཔལ་འབྱོར་གྱི་ཁེ་དབང་སྲུང་སྐྱོང་བྱས་ནས་ཐོན་ལས་བཟོ་པའི་གྲུབ་འབྲས་ཐོབ་སྣང་དང་། ཐོབ་སྣང་། སྐྱིད་སྣང་བཅས་ཆེ་རུ་གཏོང་དགོས་པ། དྲུག་ནས་བྱས་རྗེས་འཇོག་པའི་ལས་སྟེགས་བསྐྲུན་ནས་ཐོན་ལས་བཟོ་པའི་གཙོ་ཤུགས་དམག་གི་ནུས་པ་འདོན་དགོས་པ། བདུན་ནས་ཐོན་ལས་བཟོ་པའི་དཔུང་ཁག་སྟོབས་ཆེར་བཏང་ནས་ཏང་གིས་ཡུན་རིང་སྲིད་སྐྱོང་བའི་གྲལ་རིམ་གྱི་རྨང་གཞི་དང་མང་ཚོགས་ཀྱི་རྨང་གཞི་རྒྱུན་ཆད་མེད་པར་བརྟན་དུ་གཏོང་དགོས་པ། བརྒྱད་ནས་རྩ་འཛུགས་ཀྱི་འགོ་ཁྲིད་ལ་ཤུགས་སྣོན་བརྒྱབ་ནས་ཐོན་ལས་བཟོ་པའི་དཔུང་ཁག་འཛུགས་སྐྱོང་གི་སྒྱུར་བཅོས་ལ་མཉམ་དུ་སྐུལ་འདེད་གཏོང་དགོས་པ་བཅས་རེད།