“བགྲོད་ལམ་གཉིས”ཀྱི་དམིགས་བཙུགས་སྨན་རྫས་སིལ་ཚོང་ཁང་གིས་སང་ལོ་ནས་བཟུང་སྨན་ཤོག་ཁས་ལེན་བྱ་རྒྱུ་མིན་པ།
ཉིན་ཤས་གོང་། རྒྱལ་ཁབ་སྨན་བཅོས་འགན་སྲུང་ཅུས་ཀྱིས《སྨན་བཅོས་འགན་བཅོལ་སྨན་རྫས་ཀྱི་སྨན་ཤོག་དོ་དམ་ཚད་ལྡན་དུ་གཏོང་རྒྱུའི་སྐོར་གྱི་བརྡ་ཐོ》བཀྲམ་ནས། སྨན་ཤོག་གི་བརྒྱུད་རིམ་ཧྲིལ་པོའི་ལྟ་སྐུལ་དོ་དམ་ལ་ཕྱོགས་ཡོངས་ནས་ཤུགས་སྣོན་བརྒྱབ་སྟེ། སྨན་ཤོག་རྫུན་མ་བྲིས་ནས་སྨན་བཅོས་འགན་བཅོལ་དངུལ་ཁ་བསླུས་རྒྱག་པའི་བྱེད་སྤྱོད་ལ་རྡུང་རྡེག་ཚ་ནན་གཏོང་དགོས་པའི་བླང་བྱ་བཏོན་ཡོད།
བརྡ་ཐོའི་ནང་། ས་གནས་ཁག་གི་སྨན་བཅོས་འགན་བཅོལ་སྡེ་ཚན་གྱིས་དམིགས་བཙུགས་སྨན་བཅོས་སྒྲིག་གཞི་ཁག་གིས་འབྲེལ་ཡོད་བླང་བྱ་དང་སྨན་བཅོས་འགན་བཅོལ་གྱི་གྲོས་མཐུན་གྱི་ཁ་ཆད་ལྟར་སྨན་བཅོས་ལ་མཁོ་བའི་སྨན་རྫས་སྤྲོད་རྒྱུར་མཛུབ་ཁྲིད་བྱེད་དགོས་པ་དང་། གནས་སྐབས་སྨན་རྫས་སྤྲོད་ཐབས་བྲལ་ཡང་སྤྱོད་དགོས་ངེས་ཡིན་ཚེ། འགན་བཅོལ་ནང་ཞུགས་མཁན་ལ་དགོས་ངེས་ཀྱི་སྨན་ཤོག་ཕུད་པའི་ཞབས་ཞུ་མཁོ་འདོན་བྱེད་པ་དང་སྦྲགས། དོ་དམ་ལ་ཤུགས་སྣོན་རྒྱག་དགོས་པ་དང་། དྲ་ཐོག་གི་སྨན་བཅོས་འགན་བཅོལ་གློག་རྡུལ་སྨན་ཤོག་ལྟེ་གནས་སྤྱི་འདོམས་ས་ཁུལ་གྱི་དམིགས་བཙུགས་སྨན་བཅོས་སྒྲིག་གཞིས་གློག་རྡུལ་སྨན་ཤོག་གི་ལྟེ་གནས་བརྒྱུད་སྨན་ཐོའི་ཞབས་ཞུ་མཁོ་འདོན་བྱེད་དགོས་པ། དྲ་ཐོག་ཏུ་མེད་པའི་སྨན་བཅོས་འགན་བཅོལ་གློག་རྡུལ་སྨན་ཤོག་ལྟེ་གནས་སྤྱི་འདོམས་ས་ཁུལ་གྱི་དམིགས་བཙུགས་སྨན་བཅོས་སྒྲིག་གཞིས་བྲིས་ཟིན་པའི་སྨན་ཤོག་ཐོག་ངེས་པར་དུ་སྨན་ཁང་དེའི་སྨན་བཅོས་འགན་བཅོལ་གྱི་སྨན་པ་དཀའ་བཅུ་པའི་མིང་འབྲི་བ་དང་ཆབས་ཅིག ཆེད་སྤྱོད་ཐམ་ག་བརྒྱབ་ནས་གོ་ཆོད་པར་བྱེད་པ། དམིགས་བཙུགས་སྨན་བཅོས་སྒྲིག་གཞིས་འགན་བཅོལ་ནང་ཞུགས་མཁན་དང་འབྲེལ་བ་ཡོད་པའི་སྨན་ཐོ(སྨན་ཤོག་བསྐྱར་དཔར)ཚང་མ་ཉར་ཚགས་བྱས་ནས་ཞིབ་བཤེར་བྱེད་བདེ་པོ་ཡོང་བ་བྱེད་དགོས་པ་དང་ཉར་ཚགས་དུས་ཡུན་ལོ་གཉིས་ལས་ཐུང་མི་རུང་བ་བཅས་ཀྱི་བླང་བྱ་བཏོན་ཡོད།
བརྡ་ཐོའི་ནང་། དམིགས་བཙུགས་སྨན་རྫས་སིལ་ཚོང་ཁང་གིས་རྩ་དོན་ཐོག་སྤྱི་འདོམས་ས་ཁུལ་གྱི་དམིགས་བཙུགས་སྨན་བཅོས་སྒྲིག་གཞིས་བཙོངས་པའི་སྨན་རྫས་གཏན་འབེབས་དང་མཐུན་རིགས་སྨན་བཅོས་འགན་བཅོལ་གྱི་སྤྱི་འདོམས་ཐེབས་རྩའི་གཏོང་སྤྲོད་ཁྱབ་ཁོངས་ནང་བཞག་ཆོག་པ་ལས། སྤྱི་འདོམས་ས་ཁུལ་ཕུད་པའི་སྨན་བཅོས་སྒྲིག་གཞིའི་སྨན་ཐོའི་རིགས་གནས་སྐབས་ཁས་ལེན་མི་བྱེད་པ་ཁ་གསལ་བཏོན་ཡོད།
བརྡ་ཐོའི་ནང་། གློག་རྡུལ་སྨན་ཤོག་གི་ལྟེ་གནས་གང་མགྱོགས་སྐྲུན་པར་སྐུལ་འདེད་བཏང་ནས། 2025ལོའི་ཟླ་1ཚེས་1ཉིན་ནས་བཟུང་།“བགྲོད་ལམ་གཉིས”ཀྱི་སྨན་རྫས་ཀྱི་དམིགས་བཙུགས་སྨན་རྫས་སིལ་ཚོང་ཁང་ཚང་མས་གློག་རྡུལ་སྨན་ཐོའི་ལྟེ་གནས་བརྒྱུད“བགྲོད་ལམ་གཉིས”ཀྱི་སྨན་རྫས་ཀྱི་སྨན་ཐོ་བརྒྱུད་སྤྲོད་བྱེད་པ་ལས་སྨན་ཤོག་ཁས་ལེན་བྱ་རྒྱུ་མིན་པ་དང་། དམིགས་བསལ་གནས་ཚུལ་གྱིས་རྐྱེན་པས་སྨན་ཤོག་སྤྱོད་ཡུན་རིང་དུ་གཏོང་དགོས་ཚེ། ཐོ་འགོད་སྙན་སེང་ལ་ཆོག་མཆན་ཐོབ་རྗེས་དུས་ཡུན་ཟླ་བ་གསུམ་ལས་མི་བརྒལ་བ་བྱེད་དགོས་པའི་བླང་བྱ་བཏོན་ཡོད།