ཨུ་རུ་སུའི་རྒྱལ་ཕྲན་མཉམ་འབྲེལ་གྱི་ཙུང་ཐུང་ཕུའུ་ཅིང་གི་གདན་ཞུས་ལྟར་ཀྲུའུ་ཞི་ཞི་ཅིན་ཕིང་ཟླ་10ཚེས་22ནས་24ཉིན་བར་ཨུ་རུ་སུའི་ཁཱ་ཧྲན་དུ་འབོ་གསེར་རྒྱལ་ཁབ་ཀྱི་འགོ་ཁྲིད་པའི་ཞལ་འཛོམས་ཐེངས་བཅུ་དྲུག་པར་ཞུགས་རྒྱུ་རེད། འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱེད་མཁན་རྒྱལ་སྤྱིའི་མི་སྣས་ཀྲུའུ་ཞི་ཞི་ཅིན་ཕིང་འབོ་གསེར་རྒྱལ་ཁབ་ཀྱི་འགོ་ཁྲིད་པའི་ཞལ་འཛོམས་ཐེངས་བཅུ་དྲུག་པར་ཞུགས་ནས“འབོ་གསེར་ཆེན་པོའི་མཉམ་ལས”བརྟན་བགྲོད་རྒྱང་འཁྱོལ་ཡོང་བར་སྐུལ་འདེད་བཏང་སྟེ“གོ་ལ་ཧྲིལ་པོའི་ལྷོ་ཕྱོགས”ཐུན་མོང་འཕེལ་རྒྱས་དང་མཐུན་སྒྲིལ་མཉམ་ལས་ལ་སྒུལ་ཤུགས་གསར་པ་སྦྱིན་རྒྱུ་དང་འཛམ་གླིང་ཞི་བདེ་དང་འཕེལ་རྒྱས་ཡོང་བར་ཀྲུང་གོའི་བློ་གྲོས་སྐྱེས་སུ་འབུལ་རྒྱུ་རེད་ཅེས་བརྗོད་པ་རེད།

འབོ་གསེར་མཉམ་ལས་ལམ་སྲོལ་སྔར་བས་འཐུས་སྒོ་ཚང་དུ་གཏོང་བར་ཁ་ཕྱོགས་གསལ་སྟོན་བྱས་པ།

ད་ལོ་ནི“འབོ་གསེར་ཆེན་པོའི་མཉམ་ལས”ཀྱི་འགོ་ཚུགས་ལོ་ཞིག་ཡིན་ཞིང་། ད་ཐེངས་ཀྱི་ཞལ་འཛོམས་ནི་འབོ་གསེར་གྱི་ཁོངས་མི་མང་དུ་ཕྱིན་རྗེས་འགོ་ཁྲིད་པའི་ཞལ་འཛོམས་ཐོག་མ་དེ་ཡིན་པས་རྒྱལ་སྤྱིའི་སྤྱི་ཚོགས་ཀྱིས་དོ་ཁུར་ཆེན་པོ་བྱེད་ཀྱི་ཡོད། “གོ་ལ་ཧྲིལ་པོའི་ལྷོ་ཕྱོགས”མཉམ་འབྲེལ་རང་སྟོབས་ཀྱི་དུས་རབས་ཀྱི་རླབས་རྒྱུན་ཁྲོད་འབོ་གསེར་མཉམ་ལས་ལམ་སྲོལ་གྱི་མི་སེམས་འགུག་ཤུགས་རྒྱུན་ཆད་མེད་པར་ཆེ་རུ་ཕྱིན་པ་དང་། ཡིད་དབང་འགུག་ཤུགས་རྒྱུན་མཐུད་ངང་ཆེ་རུ་ཕྱིན་པ། སྐད་གྲགས་ཆོད་ཚད་སྔར་བས་ཆེ་རུ་ཕྱིན་པ་བཅས་བྱུང་ཡོད། རྒྱལ་སྤྱིའི་མི་སྣས་ཀྲུའུ་ཞི་ཞི་ཅིན་ཕིང་འབོ་གསེར་རྒྱལ་ཁབ་ཀྱི་འགོ་ཁྲིད་པའི་ཞལ་འཛོམས་ཐེངས་བཅུ་དྲུག་པར་ཞུགས་ནས་འབོ་གསེར་མཉམ་ལས་ལམ་སྲོལ་འཕེལ་རྒྱས་འགྲོ་རྒྱུར་འཆར་གཞི་འགོད་པ་དང་། ཕྱོགས་ཁག་གི་མཐུན་སྒྲིལ་མཉམ་ལས་ལ་ཤུགས་སྣོན་རྒྱག་རྒྱུར་སྐུལ་འདེད་གཏོང་བ། གོ་ལ་ཧྲིལ་པོའི་རང་བཞིན་གྱི་འགྲན་སློང་ལ་ཐུན་མོང་ཐོག་ཁ་གཏད་གཅོག་པ། ཐུན་མོང་ཐོག་འཕེལ་རྒྱས་ཡར་ཐོན་དེ་བས་ལེགས་པ་ཡོང་བ་བཅས་ཀྱི་ངོས་འཛིན་ཡོངས་ཁྱབ་ཏུ་བྱེད་ཀྱི་ཡོད་པ་རེད།

“དཔལ་འབྱོར་འཕེལ་རྒྱས་ཡོང་བ་དང་། ཞི་བདེ་བརྟན་ལྷིང་མཉམ་དུ་གཏོད་པ། ཤེས་དཔལ་དཔྱད་གཞིར་འཛིན་རེས་ལ་སྐུལ་འདེད་གཏོང་བ་བཅས་ནི་འབོ་གསེར་རྒྱལ་ཁབ་ཀྱི་ཐུན་མོང་གི་དམིགས་ཡུལ་རེད་ལ། འཛམ་གླིང་རྒྱལ་ཁབ་ཁག་གི་ཐུན་མོང་གི་རེ་སྒུག་ཅིག་ཀྱང་རེད”ཅེས་གསར་སྤེལ་དངུལ་ཁང་གསར་པའི་ཧང་ཀྲང་གཞོན་པ་ཟུར་པ་དང་པར་ཙིར་གྱི་དཔལ་འབྱོར་རིག་པ་མཁས་ཅན་པའོ་ལུའོ·པ་ཏི་སི་ཐ་ཡིས་འབོ་གསེར་རྒྱལ་ཁབ་ཀྱིས་ལག་གདང་སྦྲེལ་ནས་འབད་བརྩོན་བྱས་ཏེ་རྒྱ་ཆེའི་གསར་དར་ཁྲོམ་རའི་རྒྱལ་ཁབ་དང་འཕེལ་རྒྱས་འགྲོ་བཞིན་པའི་རྒྱལ་ཁབ་ལ་རྒྱལ་སྤྱིའི་གར་སྟེགས་ཐོག་དེ་བས་གལ་འགངས་ཆེ་བའི་ནུས་པ་འདོན་རྒྱུར་སྣེ་ཁྲིད་བྱ་རྒྱུ་རེད། “ཀྲུང་གོས་འབོ་གསེར་རྒྱལ་ཁབ་ཀྱི་ཁྱབ་ཁོངས་ཁག་གི་མཉམ་ལས་ཟབ་ཏུ་གཏོང་རྒྱུར་སྣེ་ཁྲིད་བྱེད་པར་ལེགས་སྐྱེས་གསར་པ་འབུལ་རྒྱུའི་རེ་སྒུག་བྱེད་ཀྱི་ཡོད”ཅེས་བརྗོད་པ་རེད།

“ཀྲུང་གོས‘འབོ་གསེར་གྱི་སྟོབས་ཤུགས’གཅིག་ཏུ་སྒྲིལ་བར་ནུས་པ་གལ་ཆེན་བཏོན་ཡོད། ལོ་10ལྷག་ཙམ་རིང་ཀྲུའུ་ཞི་ཞི་ཅིན་ཕིང་གིས་འབོ་གསེར་རྒྱལ་ཁབ་ཀྱི་འགོ་ཁྲིད་པའི་ཞལ་འཛོམས་རིམ་བྱུང་གཙོ་སྐྱོང་གནང་བའམ་ཡང་ན་དེའི་ནང་ཞུགས་པ་དེ་ཐོག་ནས་ཀྲུང་གོས་འབོ་གསེར་རྒྱལ་ཁབ་ཀྱི་མཐུན་སྒྲིལ་མཉམ་ལས་ལ་ཤུགས་སྣོན་རྒྱག་རྒྱུར་ཚད་མཐོའི་མཐོང་ཆེན་བྱེད་ལུགས་མངོན་ཡོད”ཨ་རབ་མཉམ་འབྲེལ་ཚོ་དཔོན་རྒྱལ་ཁབ་ཀྱི་ཨ་ཀྲུང་འབྲེལ་བ་དང་ལས་དོན་གྱི་རིགས་གཅིག་མཁས་ཅན་མའེ་ལེ་ཡེ་མུའུ·པུའུ་ལ་ཤིས་སྨི་ཡིས་ཀྲུའུ་ཞི་ཞི་ཅིན་ཕིང་གིས་འཛམ་གླིང་ཞི་བདེ་འཕེལ་རྒྱས་ལ་སྐུལ་འདེད་གཏོང་བ་དང་ཐུན་མོང་ཐོག་དར་རྒྱས་ཡོང་བར་ཀྲུང་གོའི་འདོད་ཚུལ་རྒྱས་བཤད་གནང་བ་དེས་དེ་བས་དྲང་གཞག་ལུགས་མཐུན་གྱི་རྒྱལ་སྤྱིའི་སྒྲིག་ལམ་གཏོད་པར་ཀྲུང་གོའི་བློ་གྲོས་སྐྱེས་སུ་འབུལ་རྒྱུའི་རེ་སྒུག་བྱེད་ཀྱི་ཡོད་ཅེས་བརྗོད་པ་རེད།

འབོ་གསེར་གྱི་དངོས་སྒྲུབ་མཉམ་ལས་རྒྱུན་ཆད་མེད་པར་གཏིང་ཟབ་དང་ཏན་ཏིག་ངང་སྤེལ་རྒྱུར་སྐུལ་འདེད་བཏང་བ།

“ཀྲུང་གོ་དང་འབོ་གསེར་རྒྱལ་ཁབ་ཀྱི་དུས་རབས་གསར་པའི་ཚན་རྩལ་གསར་གཏོད་སྐྱོང་གསོ་གླིང”འཛུཌ་རྒྱུའི་ཁྱབ་བསྒྲགས་བྱས་པ་དང་། “འབོ་གསེར་རྒྱལ་ཁབ་ཀྱི་གོ་ལ་ཧྲིལ་པོའི་རྒྱང་ཚོར་སྲུང་སྐར་གྲངས་གཞི་དང་ཉེར་སྤྱོད་མཉམ་ལས་ལས་སྟེགས”འཚོལ་ཞིབ་བྱས་ནས་བཙུགས་པ། “འབོ་གསེར་རྒྱལ་ཁབ་ཀྱི་རྒྱུན་མཐུད་ཆོག་པའི་ཐོན་ལས་སྤེལ་རེས་མཉམ་ལས་ཀྱི་ལམ་སྲོལ”མཉམ་དུ་བཏོད་པ། མི་ཐབས་རིག་ནུས་ཀྱི་མཉམ་ལས་སྔར་བས་རྒྱ་ཆེར་གཏོང་རྒྱུའི་གྲོས་འགོ་བཏོན་པ་སོགས་ཀྲུང་གོས་བཏོན་པའི་གྲོས་འགོ་དང་བྱ་ཐབས་རབ་དང་རིམ་པ་དུས་རབས་ཀྱི་རླབས་རྒྱུན་དང་འཚམ་ནས་འབོ་གསེར་གྱི་དངོས་སྒྲུབ་མཉམ་ལས་རྒྱུན་ཆད་མེད་པར་གཏིང་ཟབ་དང་ཏན་ཏིག་ངང་སྤེལ་རྒྱུར་སྐུལ་འདེད་བཏང་བ་རེད།

“ཀྲུང་གོས་སྒོ་དབྱེའི་རྣམ་འགྱུར་ཐོག་ནས་འབོ་གསེར་རྒྱལ་ཁབ་གཞན་དག་དང་ལག་རྩལ་སྤེལ་རེས་དང་ཉམས་མྱོང་མཉམ་སྤྱོད་བྱས་ཏེ‘གོ་ལ་ཧྲིལ་པོའི་ལྷོ་ཕྱོགས’ལ་ཡངས་ཤིང་རྒྱ་ཆེ་བའི་མཉམ་ལས་ཀྱི་གོ་སྐབས་མཁོ་འདོན་བྱས་ཡོད”ཨེ་ཅིབ་ཀྱི་ཨེ་ཀྲུང་ཚོང་ཚོགས་ཀྱི་དྲུང་ཆེ་ཏི་ཡ·ཧོར་སྨི་ཡིས་རེས་སྐོར་གསར་པའི་ཚན་རྩལ་གསར་བརྗེ་དང་ཐོན་ལས་འཕོ་འགྱུར་ལ་གོང་འཕེལ་ཉམས་མེད་བྱུང་བ་དང་གསར་དར་ཁྲོམ་རའི་རྒྱལ་ཁབ་དང་འཕེལ་རྒྱས་འགྲོ་བཞིན་པའི་རྒྱལ་ཁབ་ལ་སྔར་བྱུང་མྱོང་མེད་པའི་འཕེལ་རྒྱས་ཀྱི་གོ་སྐབས་འཕྲད་ཡོད། མི་ཐབས་རིག་ནུས་ཀྱིས་མཚོན་པའི་ལག་རྩལ་གསར་པ་དེ་གྲངས་འཛིན་དཔལ་འབྱོར་གསར་གཏོད་འཕེལ་རྒྱས་ལ་སྐུལ་འདེད་གཏོང་བ་དང་སྲོལ་རྒྱུན་དཔལ་འབྱོར་གྱི་ནུས་པ་འདོན་རྒྱུར་སྐུལ་འདེད་གཏོང་བའི་སྒུལ་ཤུགས་གལ་ཆེན་ཞིག་ཏུ་གྱུར་ཡོད། “ཀྲུང་གོས་རང་ངོས་ཀྱི་མཐོ་གསར་ལག་རྩལ་འཕེལ་རྒྱས་མགྱོགས་སུ་གཏོང་བ་དང་དུས་མཚུངས་གོ་ལ་ཧྲིལ་པོའི་ལྷོ་ཕྱོགས་རྒྱལ་ཁབ་གཞན་དག་དང་ཉམས་མྱོང་མཉམ་སྤྱོད་ཟམ་མི་ཆད་པར་བྱེད་ཀྱི་ཡོད”ཅེས་བརྗོད་པ་རེད།

“གོ་ལ་ཧྲིལ་པོའི་ལྷོ་ཕྱོགས”མཉམ་འབྲེལ་རང་སྟོབས་ཀྱི་དུས་རབས་གསར་པ་འགོ་ཚུགས་པ།

འབོ་གསེར་མཉམ་ལས་ཀྱི་ལམ་སྲོལ་ནི་གསར་དར་ཁྲོམ་རའི་རྒྱལ་ཁབ་དང་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱིས་མཐུན་སྒྲིལ་མཉམ་ལས་ལ་ཤུགས་སྣོན་རྒྱག་པ་དང་ཐུན་མོང་གི་ཁེ་ཕན་ལ་སྲུང་སྐྱོང་བྱེད་པའི་ལས་སྟེགས་གལ་ཆེན་ཞིག་རེད། འཕེལ་རྒྱས་འགྲོ་བཞིན་པའི་རྒྱལ་ཁབ་དང“གོ་ལ་ཧྲིལ་པོའི་ལྷོ་ཕྱོགས”ཀྱི་ཁོངས་མི་ཞིག་ཡིན་པའི་ཀྲུང་གོས་ཐོག་མཐའ་བར་གསུམ་དུ་འཕེལ་རྒྱས་འགྲོ་བཞིན་པའི་རྒྱལ་ཁབ་གཞན་དག་དང་དབུགས་ལམ་གཅིག་གྱུར་དང་བདེ་སྡུག་མཉམ་མྱོང་བྱེད་པ་དང་། བློ་བརྟན་འགྱུར་མེད་ངང་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་ཐུན་མོང་ཁེ་ཕན་ལ་སྲུང་སྐྱོང་བྱེད་པ། གོ་ལ་ཧྲིལ་པོའི་ལས་དོན་ཁྲོད་ཀྱི་གསར་དར་ཁྲོམ་རའི་རྒྱལ་ཁབ་དང་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་འཐུས་ཚབ་རང་བཞིན་དང་སྐད་ཆ་ཤོད་དབང་ཆེ་རུ་གཏོང་རྒྱུར་སྐུལ་འདེད་གཏོང་བ་བཅས་བྱས་ཡོད། ཕྱོགས་ཁག་གིས་ཀྲུང་གོ་ཕྱོགས་དང་མཉམ་དུ“འབོ་གསེར་ཆེན་པོའི་མཉམ་ལས”ལ་རྣམ་པ་གསར་པ་གཏོད་རྒྱུར་སྐུལ་འདེད་བཏང་ནས“གོ་ལ་ཧྲིལ་པོའི་ལྷོ་ཕྱོགས”མཉམ་འབྲེལ་རང་སྟོབས་ཀྱི་དུས་རབས་གསར་པ་གཏོད་རྒྱུའི་རེ་སྒུག་བྱེད་ཀྱི་ཡོད།

“ཀྲུང་གོ་ཕྱོགས་ཀྱིས་གསར་གཏོད་རང་བཞིན་གྱི་སྒོ་ནས‘འབོ་གསེར+’གྱི་མཉམ་ལས་རྣམ་པ་བཏོན་ནས་གསར་དར་ཁྲོམ་རའི་རྒྱལ་ཁབ་དང་འཕེལ་རྒྱས་འགྲོ་བཞིན་པའི་རྒྱལ་ཁབ་དེ་བས་མང་བ་མཐུན་སྒྲིལ་མཉམ་ལས་དང་གཉིས་ཁེ་གཉིས་ཕན་གྱི་བྱ་གཞག་ཁྲོད་ཞུགས་སུ་བཅུག་སྟེ། རྒྱལ་ཁབ་ཁག་གིས་ལག་གདང་སྦྲེལ་ནས་འཕེལ་རྒྱས་གཏོང་རྒྱུར་གོ་སྐབས་དེ་བས་མང་བ་མཁོ་འདོན་བྱས་ཡོད” དབྱི་རན་ཐེ་ཧེ་རན་སློབ་ཆེན་གྱི་དགེ་རྒན་ཆེ་མོ་བ་ཧ་སྨི་ཏེ·ཝ་ཧྥ་ཨའེ་ཡིས་འབོ་གསེར་རྒྱལ་ཁབ་ཀྱི་འགོ་ཁྲིད་པའི་ཞལ་འཛོམས་ཐེངས་བཅུ་དྲུག་པའི་ཐོག་ཀྲུང་གོ་ཕྱོགས་ཀྱིས“འབོ་གསེར་ཆེན་པོའི་མཉམ་ལས”མུ་མཐུད་ཁྱབ་གདལ་བཏང་སྟེ་ཕྱོགས་ཁག་གིས་ལག་གདང་སྦྲེལ་ནས་གོ་ལ་ཧྲིལ་པོའི་རང་བཞིན་གྱི་འགྲན་སློང་ལ་ཁ་གཏད་གཅོག་པ་དང་རྒྱལ་སྤྱིའི་དྲང་གཞག་དྲང་བདེན་ལ་སྲུང་སྐྱོང་བྱེད་པར་ནུས་པ་དེ་བས་ཆེ་བ་འདོན་རྒྱུའི་རེ་སྒུག་བྱེད་ཀྱི་ཡོད་ཅེས་བརྗོད་པ་རེད།