ཀྲུང་གོས་ཨ་ཧྥེ་རི་ཁའི་རྒྱལ་ཁབ་ལ་ལྕགས་ལམ་དང་། གཞུང་ལམ། གྲུ་ཁ། སློབ་གྲྭ སྨན་ཁང་། ཤེས་ལྡན་པ་གསོ་སྐྱོང་ལྟེ་གནས་སོགས་སྐྲུན་རོགས་བྱས་ནས་ཨ་ཧྥེ་རི་ཁའི་རྒྱལ་ཁབ་ཀྱིས་དེང་རབས་ཅན་འཛུགས་སྐྲུན་ལ་སྐུལ་འདེད་གཏོང་བར་ལེགས་སྐྱེས་གལ་ཆེན་ཕུལ་ཡོད།

ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་དེ་ཨ་ཧྥེ་རི་ཁ་དང་ཀྲུང་གོས་མཛའ་མཐུན་གྱི་གླེང་མོལ་བྱེད་པ་དང་། དངོས་སྒྲུབ་མཉམ་ལས་ཐད་མཉམ་གྲོས་བྱེད་པ། ཐུན་མོང་འཕེལ་རྒྱས་ལ་སྐུལ་འདེད་གཏོང་བ་བཅས་ཀྱི་སྟེགས་བུ་གལ་ཆེན་ཞིག་ཏུ་གྱུར་ཡོད། ད་ལོའི་ཟླ་9པར་ཨ་ཧྥེ་རི་ཁ་དང་ཀྲུང་གོའི་འགོ་ཁྲིད་མི་སྣ་ལོ་དྲུག་སོང་རྗེས་སླར་ཡང་པེ་ཅིང་དུ་འཛོམས་ནས་2024ལོའི་ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་ཀྱི་པེ་ཅིང་དབུ་ཚོགས་ལ་ཞུགས་པ་རེད། ཨ་ཧྥེ་རི་ཁ་དང་ཀྲུང་གོའི་དབར་གྱི་འབྲེལ་བའི་སྤྱི་ཡོངས་ཀྱི་ངེས་གནས་དེ་དུས་རབས་གསར་པའི་དུས་དང་རྣམ་པ་ཀུན་གྱི་ཨ་ཧྥེ་རི་ཁ་དང་ཀྲུང་གོའི་ལས་དབང་གཅིག་མཐུན་ཚོགས་པའི་བར་མཐོ་རུ་ཕྱིན་ཡོད། ཕྱོགས་གཉིས་པོས་ཨ་ཧྥེ་རི་ཁ་དང་ཀྲུང་གོའི་དབར་ལག་གདང་སྦྲེལ་ནས་དེང་རབས་ཅན་གྱི་རོགས་ཟླའི་བྱ་སྤྱོད་ཆེན་པོ་བཅུར་སྐུལ་འདེད་བཏང་བ་དེས་ཨ་ཧྥེ་རི་ཁ་དང་ཀྲུང་གོའི་མི་དམངས་ཀྱི་བདེ་རྩ་ཆེ་རུ་གཏོང་རྒྱུ་མ་ཟད། འཛམ་གླིང་ཞི་བདེ་དང་། བདེ་འཇགས། དར་རྒྱས། ཡར་ཐོན་བཅས་ཀྱི་ཕྱོགས་སུ་སྐྱོད་པའི་འོད་ཟེར་སྟོང་ལྡན་གྱི་མདུན་ལམ་ལ་སྐུལ་འདེད་གཏོང་རྒྱུར་ཡང་ཕན་ཐོགས་ཡོད།

སྒྱུར་བཅོས་སྒོ་དབྱེ་བྱས་ཚུན་ཀྲུང་གོའི་མི་འབོར་དུང་ཕྱུར་ཁ་ཤས་དབུལ་སྒྲོལ་ཐུབ་ནས་གོ་ལ་ཧྲིལ་པོའི་དབུལ་པོ་ཉུང་གཏོང་ཐད་ལེགས་སྐྱེས་འབུལ་ཚད་70%ལས་བརྒལ་ཡོད། ཀྲུང་གོས་མཉམ་འབྲེལ་རྒྱལ་ཚོགས་ཀྱི་2030ལོའི་རྒྱུན་མཐུད་ཆོག་པའི་འཕེལ་རྒྱས་གྲོས་རིམ་གྱི་དབུལ་པོ་ཉུང་གཏོང་གི་དམིགས་ཚད་ལོ་10སྔ་སྣུར་དུ་མངོན་འགྱུར་བྱས་ཡོད། ཀྲུང་གོས“རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་འགོ་དང་གོ་ལ་ཧྲིལ་པོའི་འཕེལ་རྒྱས་ཀྱི་གྲོས་འགོ་སོགས་ལག་བསྟར་ཧུར་ཐག་བྱས་པ་བརྒྱུད་རྒྱལ་ཁབ་ཁག་དང་འཕེལ་རྒྱས་ཀྱི་གོ་སྐབས་མཉམ་སྤྱོད་བྱས་ཡོད། ཨ་ཧྥེ་རི་ཁའི་རྒྱལ་ཁབ་ཀྱིས་སྤུས་ཚད་མཐོན་པོས“རྒྱུད་གཅིག་ལམ་གཅིག”མཉམ་སྐྲུན་ནང་ཧུར་ཐག་ཞུགས་ནས་རྨང་གཞིའི་སྒྲིག་བཀོད་འཛུགས་སྐྲུན་དང་། ཚོང་དོན། དངུལ་རྩ། རིག་གནས་སྤེལ་རེས་སོགས་ཀྱི་ཐད་ཀྲུང་གོ་དང་མཉམ་ལས་བྱས་ཡོད། ཀྲུང་གོའི་མཉམ་ལས་ཀྱི་འདུ་ཤེས་དང་མཉམ་ལས་ཇུས་གཞིས་ཨ་ཧྥེ་རི་ཁའི་རྒྱལ་ཁབ་ལ་འཕེལ་རྒྱས་ཀྱི་སྒུལ་ཤུགས་གསར་པ་སྦྱིན་ནས་ཀྲུང་གོའི་འཕེལ་རྒྱས་ཀྱི་ཉམས་མྱོང་ཁྲོད་ནས་ཨ་ཧྥེ་རི་ཁའི་རྒྱལ་ཁབ་ཀྱི་བློ་སྒོ་འབྱེད་བཞིན་ཡོད།

ཀྲུང་གོས་ཨ་ཧྥེ་རི་ཁའི་རྒྱལ་ཁབ་ལ་ལྕགས་ལམ་དང་། གཞུང་ལམ། གྲུ་ཁ། སློབ་གྲྭ སྨན་ཁང་། ཤེས་ལྡན་པ་གསོ་སྐྱོང་ལྟེ་གནས་སོགས་སྐྲུན་རོགས་བྱས་ནས་ཨ་ཧྥེ་རི་ཁའི་རྒྱལ་ཁབ་ཀྱིས་དེང་རབས་ཅན་འཛུགས་སྐྲུན་ལ་སྐུལ་འདེད་གཏོང་བར་ལེགས་སྐྱེས་གལ་ཆེན་ཕུལ་ཡོད། 2023ལོའི་ལོ་མཇུག་བར་ཀྲུང་གོས་ཨ་ཧྥེ་རི་ཁར་ཐད་ཀར་མ་འཇོག་གསོག་འབོར་ཨ་སྒོར་དུང་ཕྱུར་400ལྷག་ཙམ་བྱས་པས་ཨ་ཧྥེ་རི་ཁའི་ཕྱི་དངུལ་ཡོང་ཁུངས་ཀྱི་རྒྱལ་ཁབ་གཙོ་བོའི་གྲས་ཤིག་ཡིན་པ་རེད།

ཉེ་བའི་ལོ་ཤས་རིང་། ཁེན་ནི་ཡ་དང་ཀྲུང་གོའི་དབར་གྱི་འབྲེལ་བ་འཕེལ་རྒྱས་མགྱོགས་མྱུར་ཕྱིན་པ་དང་ཁྱབ་ཁོངས་ཁག་གི་མཉམ་ལས་རྒྱུན་ཆད་མེད་པར་གཏིང་ཟབ་ཏུ་ཕྱིན་ཡོད། 2017ལོར་ཁེན་ནི་ཡ་དང་ཀྲུང་གོའི་འབྲེལ་བ་དེ་ཕྱོགས་ཡོངས་ཀྱི་འཐབ་ཇུས་མཉམ་ལས་རོགས་ཟླའི་འབྲེལ་བར་མཐོར་འདེགས་བྱུང་ཡོད། ཕྱོགས་གཉིས་པོའི་རྨང་གཞིའི་སྒྲིག་བཀོད་འཛུགས་སྐྲུན་དང་། ཚོང་དོན། མ་འཇོག་སོགས་ཁྱབ་ཁོངས་ཀྱི་མཉམ་ལས་རྒྱུན་ཆད་མེད་པར་གཏིང་ཟབ་ཏུ་འགྲོ་བཞིན་ཡོད། རྨང་གཞིའི་སྒྲིག་བཀོད་འཛུགས་སྐྲུན་ཁྱབ་ཁོངས་ཐད་ཁེན་ནི་ཡ་དང་ཀྲུང་གོས་མཉམ་ལས་བྱས་ནས་མོང་ནེ་ལྕགས་ལམ་དང་། ནེ་རོ་པིའི་མྱུར་བགྲོད་གཞུང་ལམ། ཤིས་ཁ་མྱུར་བགྲོད་གཞུང་ལམ་སོགས་གཙོ་གནད་རྣམ་གྲངས་བསྐྲུན་ཡོད། ཚོང་དོན་ཁྱབ་ཁོངས་ཐད་ཁེན་ནི་ཡས་ཀྲུང་གོར་ཕྱིར་གཏོང་བྱེད་ཚད་རྒྱུན་ཆད་མེད་པར་མང་དུ་ཕྱིན་པ་དང་། ལྷག་པར་དུ། ཁེན་ནི་ཡའི་ཁྱད་ལྡན་ཐོན་རྫས་དེ་བས་མང་བར་ཀྲུང་གོའི་འཛད་སྤྱོད་པས་ཧ་ཅང་དགའ་པོ་བྱེད་ཀྱི་ཡོད། 2023ལོར་ཁེན་ནི་ཡས་ཀྲུང་གོར་ཕྱིར་གཏོང་བྱས་པའི་ཤིང་འབྲས་ཨ་བུ་ཁ་ལྡོའི་ཚོང་དོན་དངུལ་འབོར་དུས་མཚུངས་ལས་624%འཕར་བ་རེད། དེ་ལས་ཁེན་ནི་ཡའི་ཞིང་པར་ཕན་པ་དངོས་ཐོབ་ནས་ཁེན་ནི་ཡས་དབུལ་པོ་ཉུང་གཏོང་གི་བྱ་གཞག་ལ་སྐུལ་འདེད་གཏོང་རྒྱུར་ཕན་ཐོགས་ཡོད། མི་ཆོས་རིག་གནས་སློབ་གསོའི་ཁྱབ་ཁོངས་ཐད་ཁེན་ནི་ཡ་དང་ཀྲུང་གོའི་དབར་གྱི་སྤེལ་རེས་མཉམ་ལས་ཀྱང་སྔར་བས་མང་དུ་ཕྱིན་ནས་ཁེན་ནི་ཡའི་གཞོན་ནུ་དེ་བས་མང་བ་ཞིག་གིས་ཀྲུང་གོར་མཐོ་རིམ་སློབ་གསོ་དང་ལེན་བྱེད་པར་ཡོང་རྒྱུའི་གདམ་ག་བྱེད་ཀྱི་ཡོད།

འབྱུང་འགྱུར་ལ་རྒྱང་ལྟ་བྱེད་སྐབས་ཁེན་ནི་ཡས་བཟོ་སྐྲུན་ལས་རིགས་དང་། ཞིང་ལས། སྨན་བཅོས། གྲངས་འཛིན་བཅས་ཀྱི་མཉམ་འབྲེལ་མཉམ་མཐུད་དང་། ནུས་རྒྱུ་གཞན་སྒྱུར་སོགས་ཀྱི་ཁྱབ་ཁོངས་སུ་ཀྲུང་གོ་དང་མཉམ་ལས་བྱ་རྒྱུར་སྔར་བས་ཤུགས་སྣོན་རྒྱག་རྒྱུའི་རེ་བ་བྱེད་ཀྱི་ཡོད། དབུལ་པོ་ཉུང་གཏོང་དང་ལྗང་མདོག་ཐཱན་ཉུང་འཕེལ་རྒྱས་སོགས་ཐད་ཁེན་ནི་ཡས་ཀྲུང་གོའི་གྲུབ་འབྲས་ཐོབ་པའི་ཉམས་མྱོང་ལ་སློབ་སྦྱོང་བྱ་རྒྱུའི་རེ་བ་བྱེད་ཀྱི་ཡོད། 2024ལོའི་ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་པེ་ཅིང་དབུ་ཚོགས་ཀྱིས་ཁེན་ནི་ཡ་དང་ཀྲུང་གོའི་མཉམ་ལས་དང་ཨ་ཧྥེ་རི་ཁ་དང་ཀྲུང་གོའི་མཉམ་ལས་ལ་སྔར་བས་ཡངས་ཤིང་རྒྱ་ཆེ་བའི་མདུན་ལམ་བཏོད་ནས་ཨ་ཧྥེ་རི་ཁ་དང་ཀྲུང་གོ་ཐུན་མོང་འཕེལ་རྒྱས་དང་དར་རྒྱས་ཡོང་བར་སྒུལ་ཤུགས་གསར་པ་བསྣན་ཡོད།

(རྩོམ་པ་པོ་ཁེན་ནི་ཡའི་རྒྱལ་སྤྱིའི་འབྲེལ་བའི་མཁས་དབང་ཡིན)