ཟླ་9ཚེས་27ཉིན། རྒྱལ་ཡོངས་མི་རིགས་མཐུན་སྒྲིལ་ཡར་ཐོན་གཟེངས་བསྟོད་ཚོགས་ཆེན་པེ་ཅིང་དུ་འཚོགས་ཤིང་། ལྷ་ས་འགག་སྒོ་ལས་ཁུངས་ཀྱི་ལོ་རྒྱུས་ཁང་ལ“རྒྱལ་ཡོངས་ཀྱི་མི་རིགས་མཐུན་སྒྲིལ་ཡར་ཐོན་དཔེ་བཟང་མཉམ་སྡེབ”ཀྱི་གཟི་བརྗིད་མཚན་སྙན་ཐོབ་ནས་རྒྱལ་ཡོངས་ཀྱི་འགག་སྒོའི་ཁོངས་གཏོགས་སུ་ད་ཐེངས་མཚན་སྙན་ཐོབ་མཁན་གྱི་ཚན་པ་འབའ་ཞིག་དེར་གྱུར་པ་རེད།

ལྷ་ས་འགག་སྒོ་ལས་ཁུངས་ཀྱི་ལོ་རྒྱུས་ཁང་གི་འགྲེམས་སྟོན་གྱི་ནང་དོན་ནི་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པ་གཙོ་རྐང་དུ་བྱེད་པ་དང་། “འགོ་འཛུགས་ཚོམས་ཆེན”དང་། “འགག་སྒོའི་གནའ་དེང” “འགག་སྒོའི་དབང་ཆ་ཤོར་བ”“དཀའ་སྤྱད་ལས་གཏོད” “སྔ་འཛིན་ཕྱི་གཏོད”“རྒྱལ་ཁབ་སྒོ་མོའི་མཛད་རྗེས་རྡོ་རིང” གཟི་བརྗིད་མཚན་སྙན་ཁང་བཅས་འགྲེམས་ཁུལ་7དང་། པར་རིས་400ལྷག་ཙམ། དངོས་པོ་300ལྷག་ཙམ་བཅས་ལས་དབྱིན་ཇི་བཙན་རྒྱལ་རིང་ལུགས་ཀྱིས་བོད་ལ་དྲག་པོའི་བཙན་འཛུལ་དང་ཆིང་སྲིད་གཞུང་ལ་བཙན་དབང་གིས་གྲོ་མོའི་འགག་སྒོ་ཕྱེ་རུ་བཅུག་པའི་བརྙས་བཅོས་མྱོང་བའི་ལོ་རྒྱུས་དམར་རྗེན་དུ་བཏོན་པ་དང་ཀྲུང་གོ་གུང་ཁྲན་ཏང་གི་འགོ་ཁྲིད་འོག་བོད་མི་དམངས་ཀྱིས་དཀའ་སྤྱད་ལས་གཏོད་དང་སྒྱུར་བཅོས་སྒོ་དབྱེའི་འོད་སྟོང་འཕྲོ་བའི་ལོ་རྒྱུས་ལམ་བུར་བརྩེ་དུང་ཟབ་མོས་བསྟོད་གླུ་ཕུལ་ཡོད། ལོ་རྒྱུས་ཁང་དེ་2008ལོར་སྒོ་ཕྱེ་བ་ནས་བཟུང་རིམ་རྩིས་བྱས་ན་མི་ཐེངས་ཁྲི་13ལ་སྣེ་ལེན་ཞུས་ནས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་ཟབ་ཏུ་གཏོང་ཆེད་ལེགས་སྐྱེས་ཧུར་ཐག་ཕུལ་ཡོད། སྔ་རྗེས་སུ“རྒྱལ་ཡོངས་ཀྱི་མི་རིགས་མཐུན་སྒྲིལ་ཡར་ཐོན་སློབ་གསོའི་རྟེན་གཞི”དང“རང་སྐྱོང་ལྗོངས་ཀྱི་རྒྱལ་གཅེས་རིང་ལུགས་ཀྱི་སློབ་གསོའི་རྟེན་གཞི”སོགས་ཀྱི་མཚན་སྙན་ཐོབ་ཡོད།

ལྷ་ས་འགག་སྒོའི་ལོ་རྒྱུས་ཁང་གིས་ཇི་ལྟར་བྱས་ཏེ་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པ་དང་། ཇི་ལྟར་བྱས་ཏེ“ལོ་རྒྱུས་བཞི”དང་དེ་བཞིན་བོད་ས་གནས་དང་མེས་རྒྱལ་དབར་གྱི་འབྲེལ་བའི་ལོ་རྒྱུས་སློབ་གསོ་སོགས་ཀྱི་བརྗོད་གཞིར་དམིགས་ཏེ་ལག་རྩལ་སྤྱད་ནས་ཉར་ཚགས་བྱས་པའི་བརྙན་ཕབ་སྤྱིན་ཤོག་རྙིང་པ་ཉམས་བཟོ་བྱེད་པ་དང་། གཏམ་རྒྱུད་མཉམ་སྤྱོད་དང་། ཡུལ་དུས་ཀྱི་གཏམ་གླེང་། “རྒན་གཞོན”ཆ་སྒྲིག་སོགས་ཀྱི་བྱེད་ཐབས་བརྒྱུད་འགག་སྒོའི་བློ་མཐུན་རྒན་གྲས་ཀྱི་ངག་ཐོག་ལོ་རྒྱུས་མྱུར་སྐྱོབ་རང་བཞིན་གྱི་སྒོ་ནས་སྔོག་འདོན་དང་ལེགས་སྒྲིག་བྱས་ཏེ་སྒྲ་དང་བརྙན་ལམ་ཐོག་ནས་གསོན་ཉམས་དོད་པའི་དྲན་ཤེས་ཉར་ཚགས་བྱས་ཡོད། ཡི་གེ་དང་འདྲ་པར་གྱི་ཐོག་ནས་གསོན་ཉམས་ལྡན་པའི“རྒྱལ་ཁབ་སྒོ་མོའི་གཏམ་རྒྱུད”བཀོད་ནས་མི་རིགས་མཐུན་སྒྲིལ་སློབ་གསོའི་ཀློག་དེབ《བཙན་འགག་སྲ་མོ》དང《འཛམ་གླིང་ཡང་རྩེ་བརྟན་སྲུང》སོགས་རྩོམ་སྒྲིག་བྱས་ཤིང་། དེའི་ནང《འཛམ་གླིང་ཡང་རྩེ་བརྟན་སྲུང》གི་བསླབ་གཞིར་ཏང་གི་ཚོགས་ཆེན་བཅུ་དགུ་པ་འཚོགས་ཚུན་འགག་སྒོའི་ཁོངས་གཏོགས་ཀྱི་ཕུལ་བྱུང་སློབ་ཁྲིད་གྲུབ་འབྲས་ཀྱི་དམིགས་བསལ་བྱ་དགའ་ཐོབ་པ་རེད། གཞུང་དོན་དུ་རང་སྲོག་ཤོར་བའི་འགག་སྒོའི་ལས་བྱེད་པ་ཝང་ཀྲེན་ཁྲེང་གིས་བསྐུར་ཁོམ་མ་བྱུང་བའི་བཟའ་ཚང་ཁ་བྲལ་མོས་མཐུན་གྱི་ཡི་གེ་ཞིག་གར་སྟེགས་ཐོག་བཏོན་ནས་ཏང་གི་ཡུལ་རྣམ་སློབ་ཚན《ཁྱིམ་ལ་བསྐུར་བའི་འཕྲིན་ཡིག་གཅིག》པར་ལེན་བྱས་ཡོད། 《ལི་ཤིང་མེ་ཏོག་སུ་ཡི་ཆེད་དུ་བཞད》ཅེས་པའི་གླུ་གཞས་བརྩམས་ནས་1959ལོར་ཁག་དང་པོར་བོད་དུ་ཡོང་ནས་འགག་སྒོ་འཛུགས་སྐྲུན་བྱེད་མཁན་བློ་མཐུན་31གི་དཀའ་སྤྱད་འབད་འཐབ་ཀྱི་ལོ་རྒྱུས་གསོན་ཉམས་དོད་པོས་མངོན་པར་བྱས་ཡོད། ཉེ་རབས་ཀྱི་བོད་ཀྱི་མི་རིགས་མཐུན་སྒྲིལ་སྲུང་སྐྱོང་མཐའ་གཅིག་ཏུ་བྱེད་མཁན་ཆིང་རྒྱལ་རབས་ཀྱི་གྲོ་མོའི་འགག་སྒོའི་ལས་ཚན་དབང་ཕྱུག་ཚེ་རིང་གི་མི་སེམས་འགུལ་བའི་བྱས་རྗེས་སྔོག་འདོན་བྱས་ཡོད།

གཞན་ཡང་། ལྷ་ས་འགག་སྒོའི་འགག་སྒོའི་ལོ་རྒྱུས་ཁང་དེ་དངོས་གཞིའི་ཁང་དང་སྐོར་སྐྱོད་འགྲེམས་སྟོན་ཁང་རིགས་གཉིས་སུ་ཕྱེ་ཡོད། དངོས་གཞིའི་ཁང་གི“བོད་དམག་གི་གོ་ཁྲབ”དང“དབྱིན་འགོག་འཇིམ་བརྐོས”སོགས་འགྲེམས་དངོས་ཀྱི་ཐོག་ནས་བོད་ཀྱི་མི་རིགས་ཁག་གི་མི་དམངས་ཀྱིས་ལག་གདང་སྦྲེལ་ནས་དཔའ་ངར་ཆེན་པོས་ཕྱི་དགྲའི་བཙན་འཛུལ་ལ་འགོག་རྒོལ་བྱེད་པའི་སྤྱིར་བཏང་མིན་པའི་ལོ་ཟླ་མཚོན་པར་བྱས་ཡོད།

རྩད་ཆོད་པའི་སྟག་ལྤགས་དང་། ཙན་དན་དམར་པོ། གཙོད་ཀྱི་ཁུ་ལུ་སོགས་འགྲེམས་དངོས་ཀྱི་ཐོག་ནས་འགག་སྒོས་ཁྲིམས་འཛིན་ནན་པོ་བྱེད་པ་དང་ལྐོག་འདྲེན་ཉེས་གསོག་ལ་རྡུང་རྡེག་གཏོང་བ་སོགས་ཐད་ཐོབ་པའི་གྲུབ་འབྲས་མངོན་པར་བྱས་ཡོད། དངོས་གཞིའི་ཁང་དེ་རང་སྐྱོང་ལྗོངས་ཀྱི་ཚན་པ་ཁག་གིས་རྒྱལ་གཅེས་རིང་ལུགས་ཀྱི་སློབ་གསོ་དང་། མི་རིགས་མཐུན་སྒྲིལ་ཡར་ཐོན་གྱི་སློབ་གསོ། ཏང་གཤིས་སློབ་གསོ་བཅས་སྤེལ་བའི་འཐབ་ས་གལ་ཆེན་ཞིག་ཏུ་གྱུར་ཡོད།

“སྤོ་བོ་ལགས་ཀྱིས་ལོ་70ཡི་གོང་བོད་དུ་བསྐྱོད་པའི་ལམ་བུ་ནི་དཀའ་ཚེགས་ཆེན་པོ་དེ་འདྲ་ཡོད་པ་བསམ་ཡུལ་ལས་འདས་སོང”ཞེས་ལྟ་སྐོར་དུ་ཡོང་བའི“བོད་སྐྱོད་པ་རྒན་གྲས”ཀྱི་མི་རབས་རྗེས་མ་ཀྲང་ཡན་གྱིས་གྱང་སྟེང་གི་པར་ཞིག་ལ་མཛུབ་མོ་བཙུགས་ནས་མྱོང་ཚོར་ཟབ་མོའི་ངང་བརྗོད་ཅིང་། པར་དེ་ནི་བོད་དུ་སྐྱོད་ནས་འགག་སྒོའི་ལས་དོན་ལ་བརྟག་ཞིབ་དང་འགག་སྒོའི་ལས་དོན་བཀོད་སྒྲིག་བྱེད་མཁན་ཐེན་ཅིན་འགག་སྒོའི་ལས་བྱེད་པ་ཀྲང་ཙེ་ཅུན་ཡིན་པ་རེད།

“ངས་ངེས་པར་དུ་སློབ་སྦྱོང་ཡག་པོ་བྱས་ནས་ཆེན་པོ་ཆགས་རྗེས་མེས་རྒྱལ་འཛུགས་སྐྲུན་ལ་ཕན་ཐོགས་པའི་མི་ཞིག་ཏུ་འགྱུར་བ་བྱེད་ཀྱི་ཡིན”ཞེས་ལྷ་ས་འགག་སྒོའི་ལོ་རྒྱུས་ཁང་ལ་ལྟ་སྐོར་བྱས་རྗེས་བོད་དམག་ཁུལ་ཁང་ལྷ་ས་བརྒྱད་གཅིག་སློབ་གྲྭའི་ལོ་རིམ་ལྔ་པའི་སློབ་མ་ཀུའོ་ཧྲུའུ་ཡིས་མྱོང་ཚོར་ཟབ་མོས་བཤད།