ཤིན་ཧྭ་གསར་འགྱུར་ཁང་ཐེན་ཅིན་ནས་ཟླ་10ཚེས་18ཉིན་གློག་འཕྲིན་འབྱོར་གསལ། ཉེ་ཆར། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་བཅས་ཡིན་པའི་ཞི་ཅིན་ཕིང་གིས་ཀྲུང་གོ་ཐོན་ཁུངས་འཁོར་རྒྱུག་ཚོགས་པ་ཚད་ཡོད་ཀུང་སི་འཛུགས་རྒྱུའི་ཐད་མཛུབ་སྟོན་གལ་ཆེན་གནང་ནས། ཀྲུང་གོ་ཐོན་ཁུངས་འཁོར་རྒྱུག་ཚོགས་པ་ཚད་ཡོད་ཀུང་སི་འཛུགས་རྒྱུ་དེ་ནི་ཏང་ཀྲུང་དབྱང་གིས་ལྗང་མདོག་ཐཱན་ཉུང་འཁོར་རྒྱུག་འཕེལ་རྒྱས་ཀྱི་དཔལ་འབྱོར་མ་ལག་འཐུས་སྒོ་ཚང་དུ་གཏོང་བ་དང་མཛེས་སྡུག་ལྡན་པའི་ཀྲུང་གོ་འཛུགས་སྐྲུན་ལ་ཕྱོགས་ཡོངས་ནས་སྐུལ་འདེད་གཏོང་ཆེད་དམིགས་པའི་ཐབས་ཇུས་བཀོད་སྒྲིག་གལ་ཆེན་ཞིག་རེད། ཀྲུང་གོ་ཐོན་ཁུངས་འཁོར་རྒྱུག་ཚོགས་པ་ཚད་ཡོད་ཀུང་སིས་འཕེལ་རྒྱས་ཀྱི་འདུ་ཤེས་གསར་པ་ཆ་ཚང་བ་དང་། གནད་ལ་འཁེལ་བ། ཕྱོགས་ཡོངས་བཅས་ཀྱི་སྒོ་ནས་ལག་ལེན་བསྟར་བ་དང་། གྲོན་ཆུང་གི་འཐབ་ཇུས་ཕྱོགས་ཡོངས་ནས་དོན་འཁྱོལ་གཏིང་ཟབ་བྱེད་པ། འཁོར་རྒྱུག་བེད་སྤྱོད་དང་སྙིགས་རོ་ནོར་བུར་བསྒྱུར་རྒྱུ་མཐའ་འཁྱོངས། གསར་གཏོད་སྐུལ་སྤེལ་དང་སྒོ་དབྱེ་མཉམ་ལས་མཐའ་འཁྱོངས། ཐོན་ཁུངས་འཁོར་རྒྱུག་བེད་སྤྱོད་ཀྱི་འབྲེལ་ཐག་ཤར་གཏོང་ཐུབ་པར་བྱེད་པ། རྒྱལ་ཡོངས་རང་བཞིན་དང་ནུས་པའི་རང་བཞིན་གྱི་ཐོན་ཁུངས་ཚུར་བསྡུ་དང་བསྐྱར་སྤྱོད་ཀྱི་ལས་སྟེགས་གཏོད་པ། རྒྱལ་དམངས་དཔལ་འབྱོར་འཁོར་རྒྱུག་གི་སྤུས་ཚད་དང་ཆུ་ཚད་མཐོ་རུ་རྒྱུན་མཐུད་འགྲོ་བར་སྐུལ་འདེད་གཏོང་བ་བཅས་བྱས་ཏེ། ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་གྱི་བྱ་གཞག་རླབས་པོ་ཆེར་ཕྱོགས་ཡོངས་ནས་སྐུལ་འདེད་གཏོང་ཆེད་ལེགས་སྐྱེས་ཧུར་ཐག་འབུལ་དགོས་པའི་ནན་བཤད་གནང་བ་རེད།

ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུ་དང་རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་གིས་མཆན་བཀོད་མཛུབ་སྟོན་གནང་ནས། ཏང་ཀྲུང་དབྱང་གི་ཐབས་ཇུས་བཀོད་སྒྲིག་དང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་ལག་བསྟར་གཏིང་ཟབ་བྱེད་པ་དང་། འགན་འཁྲི་བློ་ལ་བརྟན་པོར་འཆང་བ། རྒྱལ་ཁབ་ཀྱི་འཐབ་ཇུས་ལ་དམ་པོར་དམིགས་པ། རིམ་པ་མང་བ་དང་། ཕྱོགས་བསྡུས་ཅན། ལས་ཕྱོད་ཆེ་བ་བཅས་ཀྱི་ཐོན་ཁུངས་ཚུར་བསྡུ་དང་བསྐྱར་སྤྱོད་ཀྱི་མ་ལག་སྐྲུན་པ། རེས་སྐོར་གསར་པའི་གཞི་ཁྱོན་ཆེ་བའི་སྒྲིག་ཆས་གསར་བརྗེས་དང་འཛད་རྫས་གསར་རྙིང་བརྗེ་བའི་བྱ་སྤྱོད་དོན་འཁྱོལ་བྱེད་པ། འཛམ་གླིང་གི་ཐོན་ཁུངས་འཁོར་རྒྱུག་བསྐྱར་སྤྱོད་ཀྱི་ཐོན་ལས་ཚོགས་པ་རྩེ་གྲ་འཛུགས་པ་བཅས་བྱས་ནས། རྒྱལ་ཁབ་ཀྱི་ཐོན་ཁུངས་བདེ་འཇགས་ལ་འགན་ལེན་དང་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་ཆེད་ལེགས་སྐྱེས་འབུལ་དགོས་ཞེས་གསུངས་པ་རེད།

ཚེས་18ཉིན་གྱི་སྔ་དྲོར། ཀྲུང་གོ་ཐོན་ཁུངས་འཁོར་རྒྱུག་ཚོགས་པ་ཚད་ཡོད་ཀུང་སི་འཛུགས་པའི་ཚོགས་ཆེན་ཐེན་ཅིན་དུ་འཚོགས་པ་རེད། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་དང་རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ཀྲང་གོ་ཆིང་གིས་ཚོགས་འདུའི་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་ཙུང་ལི་ལི་ཆང་གི་མཆན་འགོད་མཛུབ་སྟོན་བརྒྱུད་བསྒྲགས་དང་གསུང་བཤད་གནང་ཞིང་། ཁོང་གིས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་ཕྱོགས་ཡོངས་ནས་ལག་བསྟར་དང་། ཙུང་ལི་ལི་ཆང་གི་མཆན་བཀོད་མཛུབ་སྟོན་གྱི་བླང་བྱ་དོན་འཁྱོལ་བྱས་ཏེ། གཙོ་འགན་གཙོ་ལས་ལ་དམིགས་རྒྱུ་མཐའ་འཁྱོངས་དང་། ནུས་པའི་ངེས་གནས་སྟངས་འཛིན་ནན་པོ་བྱེད་པ། ལག་རྩལ་གསར་གཏོད་དང་། དོ་དམ་གསར་གཏོད། ཚོང་ལས་ཀྱི་རྣམ་པ་གསར་གཏོད་བཅས་ལ་ཤུགས་སྣོན་རྒྱག་པ། ཐོན་ཁུངས་འཁོར་རྒྱུག་བེད་སྤྱོད་ཀྱི་འབྲེལ་ཐག་ནུས་ཤུགས་ཡོད་རྒུས་ཤར་གཏོང་བྱེད་པ། ཐོན་ཁུངས་འཁོར་རྒྱུག་བེད་སྤྱོད་ཀྱི་ཆུ་ཚད་མཐོ་རུ་གཏོང་བ། “རྒྱལ་ཁབ་རུ་ཁག”གི་སྣེ་ཁྲིད་ནུས་པ་གང་ལེགས་འདོན་པ་བཅས་བྱས་ཏེ། རང་རྒྱལ་གྱི་ཐོན་ཁུངས་འཁོར་རྒྱུག་བེད་སྤྱོད་ཀྱི་ཐོན་ལས་སྤུས་ཚད་མཐོ་བའི་འཕེལ་རྒྱས་ལ་སྣེ་ཁྲིད་བྱེད་དགོས་ཞེས་གསུངས་པ་རེད།

ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་དང་ཐེན་ཅིན་གྲོང་ཨུད་ཀྱི་ཧྲུའུ་ཅི་ཁྲེན་མེན་ཨེར་ཀྲུང་གོ་ཐོན་ཁུངས་འཁོར་རྒྱུག་ཚོགས་པ་ཚད་ཡོད་ཀུང་སི་འཛུགས་པའི་ཚོགས་ཆེན་ལ་ཕེབས་ཡོད་པ་རེད། ཀྲུང་དབྱང་དང་རྒྱལ་ཁབ་ལས་ཁུངས་ཀྱི་འབྲེལ་ཡོད་སྡེ་ཚན་དང་། ཐེན་ཅིན་གྲོང་ཁྱེར། འབྲེལ་ཡོད་དངུལ་རྩའི་སྒྲིག་གཞི་དང་། ཁེ་ལས། ལས་རིགས་མཐུན་ཚོགས་བཅས་ཀྱི་འགན་འཁུར་བློ་མཐུན་སོགས་ཚོགས་ཆེན་ལ་ཞུགས་ཡོད་པ་རེད།