འདི་ནི་ཧྲན་ཏུང་རི་ཀྲོའུ་ལས་རིགས་ལག་རྩལ་སློབ་གླིང་རིག་ནུས་བཟོ་སྐྲུན་ལྟེ་གནས་སུ་བཟོ་སྐྲུན་ལས་གྲྭ་ཚན་ཁག་གི་དགེ་རྒན(གཡོན་གྱི་གསུམ་པ)གྱིས་ལད་མོའི་བྱེ་གཞོང་མདུན་དུ་སློབ་མར་སློབ་ཚན་ཁྲིད་བཞིན་པ།

འདི་ནི་ཀ་པོན་གྱི་རྒྱལ་ས་ལེབ་ཝེར་གྱི་ཨེན་ཁའོ་ཁེ་དཔལ་འབྱོར་དམིགས་བསལ་ཁུལ་དུ་ཀྲུང་གོ་མཁའ་འགྲུལ་རྒྱལ་སྤྱིའི་མཉམ་འབྲེལ་ཁྲེང་ཏུའུ་མཁའ་འགྲུལ་ལས་རིགས་ལག་རྩལ་སློབ་གླིང་སོགས་ཀྱིས་མཉམ་དུ་བསྐྲུན་པའི་ཨེན་ཁའོ་ཁེ་ལས་རིགས་སློབ་གསོ་ལྟེ་གནས་སུ་སློབ་མ་ཞིག་གིས་རླངས་འཁོར་གྱི་གཞོག་ཆས་སྤྱོད་སྟངས་སྦྱོང་བཞིན་པ།

འདི་ནི་ཐེན་ཅིན་ལས་རིགས་ལག་རྩལ་དགེ་འོས་སློབ་ཆེན་ཨེ་ཙེ་ཨོ་ཕི་ཡའི་འབུམ་རམས་ཕྱི་སྦྱོང་སློབ་མ་ཐུའུ་ཙེ་ཀང་གིས(གཡོན་གྱི་གཉིས་པ)དགེ་རྒན་གྱི་མཛུབ་ཁྲིད་འོག་དཔྱད་ཆས་སྙོམས་སྒྲིག་ཚོད་ལྟ་བྱེད་བཞིན་པ།

འདི་ནི་ཨ་ཧྥེ་རི་ཁའི་ལས་རིགས་རྩལ་ནུས་འགྲན་སློང་འགྲན་བསྡུར་སྐབས་དགུ་པའི་ＰＬＣའགྲན་ཁུལ་དུ་ཤན་འབྱེད་པ་གཉིས་ཀྱིས་འགྲན་བསྡུར་གྱི་གྲུབ་འབྲས་ལ་སྐར་མ་རྒྱག་བཞིན་པ།

འདི་ནི་ཨ་ཧྥེ་རི་ཁའི་ལས་རིགས་རྩལ་ནུས་འགྲན་སློང་འགྲན་བསྡུར་སྐབས་དགུ་པའི་ＰＬＣའགྲན་ཁུལ་དུ་བདམས་ཐོན་པ་ཚོས་བློ་རྩེ་གཅིག་སྒྲིམ་གྱིས་འགྲན་བསྡུར་བྱེད་བཞིན་པ།

འདི་ནི་ཨ་ཧྥེ་རི་ཁའི་ལས་རིགས་རྩལ་ནུས་འགྲན་སློང་འགྲན་བསྡུར་སྐབས་དགུ་པའི་ＣＡＤའགྲན་ཁུལ་ཡིན་པ།

ཉིན་ཤས་གོང་། ཀྲུང་གོ་སློབ་གསོ་རྒྱལ་སྤྱིའི་སྤེལ་རེས་མཐུན་ཚོགས་དང་ཀྲུང་གོ་མཁའ་འགྲུལ་ལག་རྩལ་རྒྱལ་སྤྱིའི་མ་རྐང་ཚོད་འཛིན་ཚད་ཡོད་ཀུང་སིས(གཤམ་དུ“ཀྲུང་གོ་མཁའ་འགྲུལ་རྒྱལ་སྤྱི”ཞེས་བསྡུ་རྒྱུ)མཉམ་དུ་གཙོ་གཉེར་བྱས་པའི་ཨ་ཧྥེ་རི་ཁའི་ལས་རིགས་རྩལ་ནུས་འགྲན་སློང་འགྲན་བསྡུར་སྐབས་དགུ་པ་པེ་ཅིང་དུ་གཉེར་ཞིང་། ཁོ་མོ་རོ་དང་། ཁོ་ཐེ་ཏི་ཝོར། ཀག་ན་སོགས་ཨ་ཧྥེ་རི་ཁའི་རྒྱལ་ཁབ་7གྱི་བདམས་ཐོན་པ་73འགྲན་བསྡུར་ནང་ཞུགས་ཡོད་པ་རེད།

ཨ་ཧྥེ་རི་ཁའི་ལས་རིགས་རྩལ་ནུས་འགྲན་སློང་འགྲན་བསྡུར་བཙུགས་ནས་ལོ་10སོང་རིང་། ཨ་ཧྥེ་རི་ཁའི་རྒྱལ་ཁབ་སློབ་གསོ་པུའུ་དང་། ལས་རིགས་ལག་རྩལ་སློབ་གླིང་། འགྲན་བསྡུར་ནང་ཞུགས་མཁན་སློབ་མ་བཅས་ཀྱི་གདེང་འཇོག་དང་ཁས་ལེན་ཡག་པོ་ཐོབ་ཡོད། ཨ་ཧྥེ་རི་ཁའི་གཞོན་ནུ་ཁག་དང་ཁག་ལ་འགྲན་བསྡུར་དེ་བརྒྱུད་གྲུབ་འབྲས་ཐོབ་པ་དང་འཚར་ལོངས་བྱུང་བ་དང་། ཀྲུང་གོར་སློབ་སྦྱོང་བྱེད་པར་སྐྱོད་པའམ་ཡང་ན་ས་གནས་དེ་གའི་ཀྲུང་གོའི་ཁེ་ལས་སུ་དངོས་སྦྱོང་བྱེད་པའི་གོ་སྐབས་ཀྱང་ཐོབ་པ་མ་ཟད། ད་དུང་སྐབས་གོང་མའི་བདམས་ཐོན་པ་དག་རང་སོ་སོའི་རྒྱལ་ཁབ་ཀྱི་འགྲན་ཞུགས་རུ་ཁག་གི་སྣེ་ཁྲིད་དགེ་རྒན་དུ་གྱུར་ཡོད་པ་རེད།

“འགྲན་སློང་ནི་སྤྲོ་སྣང་དང་འཚར་ལོངས་ཀྱི་གོ་སྐབས་ཤིག་རེད”

རུ་ཝང་ཏའི་བདམས་ཐོན་པ་མུའུ་པོ་སྨི་མཱ་ནཱ་ཧྥེ་ལི་མིང་གིས་འཕྲུལ་མིར་བརྟེན་ནས་སྨན་སྒམ་འཇོག་པ་དང་། སྨན་བླུགས་པ། ཤེལ་དམ་ཁ་རྒྱག་པ། སྨན་འདོན་པ་བཅས་ཀྱི་འགྲན་བསྡུར་བྱས་མཐར་ཧྥེ་ལི་མིང་ལ་འགྲན་བསྡུར་འདིའི་ཨང་དང་པོ་ཐོབ།

ཟླ་བ་ལྔའི་གོང་དུ། ཧྥེ་ལི་མིང་ཀྲུང་གོར་ཡོང་ནས་ཀྲེ་ཅང་ཅིན་ཧྭ་ལས་རིགས་ལག་རྩལ་སློབ་ཆེན་དུ་གློག་ཤུགས་རང་འགུལ་ཅན་གྱི་ཆེད་ལས་སྦྱངས། རྒན་ལགས་ཀྱི་ས་ནས་ཨ་ཧྥེ་རི་ཁའི་ལས་རིགས་རྩལ་ནུས་འགྲན་སློང་འགྲན་བསྡུར་བྱ་རྒྱུ་ཡིན་པ་ཐོས་རྗེས། འཕྲལ་དུ་མིང་ཐོ་བཀོད།

“ཀྲུང་གོར་སློབ་སྦྱོང་ལ་མ་ཡོང་གོང་། ངས་དངོས་སུ་བཀོལ་སྤྱོད་བྱེད་པའི་གོ་སྐབས་ཐོབ་ཚད་ཧ་ཅང་ཉུང་ཉུང་ཡིན”ཅིན་ཧྭ་རུ་སློབ་སྦྱོང་དང་འགྲན་བསྡུར་གྱི་གྲ་སྒྲིག་བྱེད་རིང་། སྔོན་ཐོན་གྱི་སློབ་ཁྲིད་སྒྲིག་ཆས་མང་པོ་བཀོལ་སྤྱོད་བྱ་རྒྱུ་བྱུང་ལ་དངོས་སྦྱོང་གི་གོ་སྐབས་ཀྱང་མང་པོ་ཐོབ་བྱུང་། ད་ཐེངས་ཀྱི་འགྲན་བསྡུར་ཁྲོད་ངའི་ལས་རིགས་རྩལ་ནུས་མཐོ་རུ་ཕྱིན་པ་དང་ཆེད་ལས་ཤེས་བྱ་སྦྱོང་ཐུབ་པ་བྱུང་བས། འགྲན་སློང་ནི་སྤྲོ་སྣང་དང་འཚར་ལོངས་ཀྱི་གོ་སྐབས་ཤིག་ཡིན་པའི་ཚོར་སྣང་ཟབ་མོ་བྱུང”ཞེས་ཧྥེ་ལི་མིང་གིས་བརྗོད།

“ཤེས་བྱ་དང་རྩལ་ནུས་དེ་དག་མི་དེ་བས་མང་བར་བརྒྱུད་སྤྲོད་བྱེད་ཀྱི་ཡིན”

མཉམ་སྤྱོད་རྐང་འཁོར་བཞོན་ནས་པེ་ཅིང་གི་སྲང་ལམ་དུ་བསྐྱོད་པ་དང་། མྱུར་བགྲོད་ལྕགས་ལམ་བསྡད་དེ་ཀྲུང་གོའི་གྲོང་ཁྱེར་མི་འདྲ་བར་བསྐྱོད་པ། གཞུང་ལས་ཁང་དུ་གློག་ཀླད་སྤྱོད་པ་བཅས་ནི་སྐབས་འདིའི་ཨ་ཧྥེ་རི་ཁའི་ལས་རིགས་རྩལ་ནུས་འགྲན་སློང་འགྲན་བསྡུར་ནང་ཞུགས་མ་ཐག་པའི་ཨ་ཧྥེ་རི་ཁའི་ན་གཞོན་ཧོ་ལི་སི·ལཱ་ཤིས་མུའུ·ལཱ་ཤིས་ཏེ་ཡིས་གྲོགས་ཚོགས་ནང་མཉམ་སྤྱོད་བྱེད་པའི་ནང་དོན་རེད། རྒྱ་སྐད་ཀྱི་མིང་ལ་ཁྲེང་ལུང་ཞེས་ཟེར་བའི་ཐན་ཙན་ནི་ཡའི་ཕོ་གཞོན་དེས་ན་ནིང་ཟླ་10པ་ནས་བཟུང་། ཁྲུང་ཆིང་བཟོ་སྐྲུན་ལས་རིགས་ལག་རྩལ་སློབ་གླིང་དུ་ཨར་ལས་བཟོ་སྐྲུན་ཆེད་ལས་སྦྱངས། ད་ཕན་ལོ་ཤས་རིང་། ཨ་ཧྥེ་རི་ཁའི་གཞོན་ནུ་དེ་བས་མང་བ་ལཱ་ཤིས་ཏེ་དང་འདྲ་བར་ཀྲུང་གོའི་ལས་རིགས་སློབ་གསོའི་སློབ་གླིང་དུ་ཟབ་སྦྱོང་བྱེད་པར་སླེབས་ཡོད།

“ངས་ཀྲུང་གོ་ནས་ཤེས་བྱ་མང་པོ་སྦྱངས་ཐུབ་བྱུང་ལ། རྩལ་ནུས་མང་པོ་ཤེས་བྱུང་། ཤེས་བྱ་དང་རྩལ་ནུས་དེ་དག་མི་དེ་བས་མང་བར་བརྒྱུད་སྤྲོད་བྱེད་ཀྱི་ཡིན”ཞེས་ལཱ་ཤིས་ཏེས་གསར་འགོད་པར་བརྗོད་པ་དང་། ཡང་ཁོང་གིས“ཀྲུང་གོར་སློབ་སྦྱོང་ཧུར་ཐག་བྱས་ཚེ། ང་ཡང་ཁོང་ཚོ་དང་འདྲ་བའི་ཕུལ་བྱུང་གི་བཟོ་སྐྲུན་པ་ཞིག་ཏུ་འགྱུར་བའི་ཡིད་ཆེས་ཡོད”ཅེས་བརྗོད།

“ཨ་ཧྥེ་རི་ཁའི་བཟོ་ལས་ཅན་འཕེལ་རྒྱས་ལ་རོགས་རམ་བྱས་ཡོད”

“སྔོན་ལ་གསོ་སྦྱོང་དང་རྗེས་སུ་འགྲན་བསྡུར”བྱས་པ་དེས་ཁེན་ནི་ཡའི་བདམས་ཐོན་པ་ཉིའུ་ཏུན་ལ་བག་ཆགས་ཟབ་མོ་བཞག་ཡོད། ཉིའུ་ཏུན་གྱིས“འཕྲུལ་ཆས་བཀོལ་སྤྱོད་གསོ་སྦྱོང་ནང་ཞུགས་རྗེས། ངའི་ལག་རྩལ་མངོན་གསལ་དོད་པོས་ཡག་ཏུ་ཕྱིན་སོང་། དུས་ཡུན་གཟའ་འཁོར་ལྔ་དང་དྲུག་གི་གསོ་སྦྱོང་ནང་ངས་ཨ་ཧྥེ་རི་ཁའི་རྒྱལ་ཁབ་ཁག་གི་ཆེད་ལས་པ་མང་པོ་དང་གྲོགས་པོ་སྒྲིག་པ་ཡིན། ད་ལྟའང་ཁོང་ཚོ་དང་འབྲེལ་བ་བྱས་ཏེ་ལས་རིགས་འཕེལ་རྒྱས་ཀྱི་སྐོར་དང་ཀྲུང་གོའི་ཁེ་ལས་སུ་ལས་ཀ་བྱེད་མྱོང་བའི་མྱོང་ཚོར་གླེང་གི་ཡོད”ཅེས་བརྗོད།

ཁེན་ཉི་སི·ཅི་ཕུའུ་ཐུའུ་ནི་ཨ་ཧྥེ་རི་ཁའི་ལས་རིགས་རྩལ་ནུས་འགྲན་སློང་འགྲན་བསྡུར་སྐབས་གསུམ་པའི་ཨང་དང་པོ་ཡིན་ཞིང་། ཀྲུང་གོ་མཁའ་འགྲུལ་རྒྱལ་སྤྱིའི་ཁེན་ནི་ཡའི་ཡན་ལག་ཀུང་སིར་ལས་ཀ་བྱེད་པ་དང་ཀྲུང་གོའི་བཟོ་སྐྲུན་ཆེ་མོ་བའི་རོགས་རམ་འོག་གཞི་རིམ་གྱི་སྒྲིག་སྦྱོར་ལག་རྩལ་པ་ནས་ལས་རོགས་བཟོ་སྐྲུན་ཆེ་མོ་བ་ཞིག་ཏུ་འཚར་ལོངས་བྱུང་ཡོད།

ཅི་ཕུའུ་ཐུའུ་ཡིས“ཀྲུང་གོའི་སྒྲིག་ཆས་དང་ལག་རྩལ་གྱིས་ཨ་ཧྥེ་རི་ཁའི་བཟོ་ལས་ཅན་འཕེལ་རྒྱས་ལ་རོགས་རམ་བྱས་ཡོད་ལ། ལྷག་པར་དུ་ཨ་ཧྥེ་རི་ཁའི་ན་གཞོན་ཚོའི་མཐོང་རྒྱ་ཆེ་རུ་ཕྱིན་པ་དང་ཀྲུང་གོའི་ཁེ་ལས་སུ་ལས་ཀ་བྱས་པར་བརྟེན་ཨ་ཧྥེ་རི་ཁའི་ན་གཞོན་ཚོའི་ལག་རྩལ་འཇོན་ཐང་ཆེ་རུ་ཕྱིན་ཡོད། ‘རྒྱུད་གཅིག་ལམ་གཅིག’མཉམ་སྐྲུན་ལས་ཨ་ཧྥེ་རི་ཁའི་ན་གཞོན་ཚོར་དེ་བས་རོགས་རམ་ཐུབ་ངེས་རེད”ཅེས་བརྗོད།