ཤིན་ཧྭ་གསར་འགྱུར་ཁང་ཧང་ཀྲོའུ་ནས་ཟླ་10ཚེས་17ཉིན་གློག་འཕྲིན་འབྱོར་གསལ། ཚེས་17ཉིན་གྱི་སྔ་དྲོར། ཀྲུང་གོའི་མཚོ་ཐོག་ཉེན་རྟོག་མེ་ཧྲན་དམག་གྲུ་དང་ཤིའུ་ཧྲན་དམག་གྲུ་ལས་གྲུབ་པའི་དམག་གྲུའི་དཔུང་རུས“2024ལོའི་ཞི་བདེ་རྒྱ་མཚོ་ཆེན་པོའི་སྐོར་གཡེང”གི་ཀྲུང་ཨུའི་མཚོ་ཐོག་ཉེན་རྟོག་པའི་མཉམ་འབྲེལ་ནང་སྦྱོང་དང་སྐོར་གཡེང་ཕུན་སུམ་ཚོགས་པོས་ལེགས་སྒྲུབ་བྱས་ཏེ་བདེ་བླག་ངང་གྲུ་ཁར་ལོག་པ་རེད། ཟླ་9ཚེས་13ཉིན་དཔུང་རུས་ཀྲོའུ་ཧྲན་ནས་ཐོན་ཏེ་རི་པིན་རྒྱ་མཚོ་དང་། ཨེ་ཧོ་ཚེ་ཁེ་རྒྱ་མཚོ། པའེ་ལིང་རྒྱ་མཚོ། ཁྲུའུ་ཁོ་ཆི་རྒྱ་མཚོ་བཅས་བརྒྱུད་འཁྱགས་རོམ་རྒྱ་མཚོ་བྱང་མར་བསྐྱོད་པ་དང་། ཟླ་10ཚེས་17ཉིན་ཀྲོའུ་ཧྲན་དུ་ལོག་པ་དང་དུས་ཡུན་ཉིན་35ཡི་རིང་དམག་གྲུ་གཉིས་ཀྱིས་སྤྱིའི་ལམ་ཐག་མཚོ་ལེ་17000ལྷག་ཙམ་བསྐྱོད་པ་དང་རིམ་རྩིས་བྱས་ན་ཆུ་ཚོད་1200ལྷག་ཙམ་བསྐྱོད་ཡོད་པ་རེད།

ཟླ་9ཚེས་16ནས་20ཉིན་བར་ཕྱོགས་གཉིས་པོས་ཐུན་མོང་ཐོག་དམག་གྲུ་སྒོ་དབྱེའི་ཉིན་མོ་དང་། གྲུ་གཟིངས་ཀྱི་གཅལ་ཐོག་སྣེ་ལེན་ཚོགས་འདུ། རིག་གནས་དང་ལུས་རྩལ་སྤེལ་རེས་སོགས་ཀྱི་བྱེད་སྒོ་རབ་དང་རིམ་པ་སྤེལ་ནས་ཨུ་རུ་སུའི་པི་ཏེ་ཏ་ཏི་མཚོ་ཁུག་ཉེ་འགྲམ་གྱི་མཚོ་ཁོངས་སུ་དམག་གྲུས་མཉམ་འབྲེལ་ཐོག་བཙལ་འཚོལ་དང་། ཉེས་གསོག་དོགས་ཡོད་གྲུ་གཟིངས་བཀག་འགོག་དང་ཞིབ་བཤེར་བྱེད་པ། ཆུར་ལྷུངས་པའི་མི་སྣ་དང་དེ་བཞིན་མེ་ཤོར་བའི་གྲུ་གཟིངས་རོགས་སྐྱོབ་སོགས་ཀྱི་ནང་སྦྱོང་བྱས་ནས་ཕྱོགས་གཉིས་པོས་ཐུན་མོང་ཐོག་མཚོ་ཐོག་གི་བདེ་འཇགས་ཉེན་ཁར་ཁ་གཏད་གཅོག་པའི་ནུས་པར་ཞིབ་བཤེར་བྱས་པ་རེད།

ཟླ་9ཚེས་21ཉིན་མཉམ་འབྲེལ་སྐོར་གཡེང་དུས་མཚམས་སུ་སླེབས་རྗེས་འབྲེལ་ཡོད་གཏན་འབེབས་གཞིར་བཟུང་། ཕྱོགས་གཉིས་པོའི་དམག་གྲུས་མ་གྲོས་གཅིག་མཐུན་ངང་གཞོགས་འདེགས་དང་མཐུན་སྦྱོར་དམ་ཟབ་བྱས་ཏེ་ཐོག་མར་དཔུང་རུ་བསྒྲིགས་ནས་ཞི་བདེ་རྒྱ་མཚོ་བྱང་མའི་སྤྱི་པའི་རྒྱ་མཚོར་མཉམ་འབྲེལ་སྐོར་གཡེང་བྱས་ཤིང་། ལས་སྒྲུབ་གྲུ་གཟིངས་ལ་ཁྲིམས་ལྟར་སྐོར་ཞིབ་ལྟ་འདོམས་བྱས་ཏེ་ཞི་བདེ་རྒྱ་མཚོ་བྱང་མའི་སྤྱི་པའི་རྒྱ་མཚོའི་ཉ་ལས་ཐོན་སྐྱེད་ཀྱི་སྒྲིག་ལམ་སྲུང་སྐྱོང་ཧུར་ཐག་བྱས་པ་རེད། དེའི་རིང་ཕྱོགས་གཉིས་པོས་ད་དུང་མཉམ་འབྲེལ་འཚོལ་སྐྱོབ་དང་མཉམ་དུ་ཁྲིམས་འགལ་གྲུ་གཟིངས་འཚོལ་བ་སོགས་ནང་སྦྱོང་བྱས་པ་རེད།

ཀྲུང་གོའི་མཚོ་ཐོག་ཉེན་རྟོག་ཅུས་ཀྱི་འབྲེལ་ཡོད་འགན་འཁུར་བས། ད་ཐེངས་ཀྲུང་ཨུའི་མཚོ་ཐོག་ཉེན་རྟོག་པའི་མཉམ་འབྲེལ་ནང་སྦྱོང་དང་མཉམ་འབྲེལ་སྐོར་གཡེང་ནི་རྒྱལ་ཁབ་གཉིས་པོའི་མཚོ་ཐོག་ཉེན་རྟོག་པའི་ཕན་ཚུན་ཡིད་ཆེས་དང་མཉམ་ལས་ཟབ་ཏུ་གཏོང་བ་དང་ཞི་བདེ་རྒྱ་མཚོ་བྱང་མའི་མཚོ་ཁོངས་ཀྱི་བདེ་འཇགས་དང་བརྟན་ལྷིང་སྲུང་སྐྱོང་བྱེད་པར་དོན་སྙིང་གལ་ཆེན་ལྡན་ཡོད། གོམ་སྟབས་རྗེས་མར་ཀྲུང་གོའི་མཚོ་ཐོག་ཉེན་རྟོག་པས་ཕྱོགས་གཉིས་དང་ཕྱོགས་མང་གི་མཚོ་ཐོག་ཁྲིམས་འཛིན་མཉམ་ལས་ཡག་པོ་བྱས་ནས་རྒྱལ་སྤྱི་དང་ས་ཁུལ་གྱི་རྒྱ་མཚོ་བཅོས་སྐྱོང་ནང་ཧུར་ཐག་ཞུགས་རྒྱུ་རེད་ཅེས་བརྗོད།