ཤིན་ཧྭ་གསར་འགྱུར་ཁང་གྲོང་ཁྱེར་ལི་གཡོད་རེ་ནེ་ལུའུ་ནས་གློག་འཕྲིན་འབྱོར་གསལ། ཉེ་ཆར། རྒྱལ་ཁབ་ཉི་ཤུ་ཚོགས་པའི(Ｇ20)ཇུས་འདོན་ཚོགས་པའི་གླེང་སྟེགས་ཀྱི“གོ་ལ་ཧྲིལ་པོ་བཅོས་སྐྱོང་དང་ཀྲུང་པར་མཉམ་ལས”ཞེས་པའི་རྒྱལ་སྤྱིའི་བགྲོ་གླེང་ཚོགས་འདུ་པར་ཙིར་གྱི་གྲོང་ཁྱེར་ལི་གཡོད་རེ་ནེ་ལུའུ་རུ་འཚོགས་པ་རེད། ཀྲུང་པར་རྒྱལ་ཁབ་གཉིས་ནས་ཡོང་བའི་རིགས་གཅིག་མཁས་ཅན་དང་། མཁས་དབང་། ཁེ་ལས་མཁས་ཅན་བཅས་བརྒྱ་ལྷག་ཙམ་གྱིས“ཕྱོགས་མང་རིང་ལུགས་དང་གོ་ལ་ཧྲིལ་པོ་བཅོས་སྐྱོང”དང“རྒྱུན་མཐུད་འཕེལ་རྒྱས་དང་གསར་གཏོད་སྐུལ་འདེད”“འབྱུང་འགྱུར་ལ་ཕྱོགས་པའི་ཀྲུང་པར་གྱི་མཉམ་ལས”སོགས་ཀྱི་གྲོས་གཞིར་དམིགས་ནས་བགྲོ་གླེང་སྤེལ་རེས་གཏིང་ཟབ་བྱས་པ་རེད།

ཀྲུང་གོ་ཕྱོགས་ཀྱི་སྐུ་མགྲོན་གྱིས་འདི་ལོ་ནི་ཀྲུང་པར་དབར་ཕྱི་འབྲེལ་བཙུགས་ནས་ལོ་50འཁོར་བའི་ལོ་ཞིག་རེད། ཀྲུང་པར་གྱི་འབྲེལ་བས་འཕེལ་རྒྱས་འགྲོ་བཞིན་པའི་རྒྱལ་ཁབ་ཆེན་པོའི་དབར་འཐབ་ཇུས་ཐད་ཕན་ཚུན་ཡིད་ཆེས་བྱེད་པའི་དཔེ་མཚོན་གསར་པ་བཏོད་པ་དང་། ཕྱོགས་གཉིས་པོའི་མཉམ་ལས་ཀྱིས་གསར་དར་དཔལ་འབྱོར་སྒྲིག་གཞི་ཐུན་མོང་ཐོག་འཕེལ་རྒྱས་འགྲོ་རྒྱུར་བར་མཐོངས་གསར་པ་རྒྱ་ཆེར་བཏང་བ། རྒྱལ་ཁབ་གཉིས་པོས་ལག་གདང་སྦྲེལ་ནས་གོ་ལ་ཧྲིལ་པོའི་བཅོས་སྐྱོང་འཐུས་སྒོ་ཚང་དུ་གཏོང་ཆེད་སྒུལ་ཤུགས་གསར་པ་བསྣན་ཡོད་ཅེས་བརྗོད་པ་རེད། Ｇ20འགོ་ཁྲིད་མི་སྣའི་དབུ་ཚོགས་དེ་ཟླ་11པར་ལི་གཡོད་རེ་ནེ་ལུའུ་རུ་འཚོག་རྒྱུ་རེད།

པར་ཙིར་རྒྱལ་ཁབ་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་དངུལ་ཁང་གི་ཧང་ཀྲང་ཨ་ལུའོ་དབྱི་ཆི་ཨའོ·མེར་ཁ་ཏན་ཐེས་དབུས་ཤར་ས་ཁུལ་དང་ཡོ་རོབ་ཏུ་དམག་འཁྲུག་གི་ཟིང་ཆ་རྒྱུན་ཆད་མེད་པར་ལངས་པ་དང་། གོ་ལ་ཧྲིལ་པོའི་ཚོང་དོན་རྩོད་གཞི་ཛ་དྲག་ཏུ་སོང་བ། འབྱོར་ཕྱུག་རྒྱལ་ཁབ་ཀྱིས་གསར་དར་རྒྱལ་ཁབ་ཀྱི་འཕེལ་རྒྱས་ལ་སླར་ཡང་བཀག་རྒྱ་སྣ་ཚོགས་བཟོས་པས་གོ་ལ་ཧྲིལ་པོའི་ལྷོ་ཕྱོགས་རྒྱལ་ཁབ་དབར་གྱི་མཉམ་ལས་ལ་ཤུགས་སྣོན་རྒྱག་རྒྱུ་དེ་ཧ་ཅང་གལ་འགངས་ཆེན་པོ་ཞིག་ཏུ་འགྱུར་ཡོད་ཅེས་བརྗོད།