སྟོན་ཟླ་ར་བའི་དུས་སུ། ལྷ་སའི་ཁྲོམ་གཞུང་གང་སར་ཉི་འོད་རབ་ཏུ་འཚེར་ཞིང་ལམ་བར་དུ་མཛེས་ལྗོངས་མང་པོ་མཐོང་རྒྱུ་ཡོད། ཉེ་བའི་ལོ་ཤས་རིང་། ལྷ་སས་རིག་གནས་དང་ཡུལ་སྐོར་མཉམ་འདྲེས་བྱེད་སྟངས་གསར་པ་རྒྱུན་ཆད་མེད་པར་འཚོལ་ཞིབ་བྱས་ནས། ཐུན་མོང་མ་ཡིན་པའི་ས་མཐོའི་ཡུལ་ལྗོངས་དང་དམངས་སྲོལ་གོམས་གཤིས་དང་། དེ་བཞིན་ཕུན་སུམ་ཚོགས་པའི་ལོ་རྒྱུས་རིག་གནས་ཀྱི་ཤུལ་བཞག་ལ་བརྟེན་ནས་ཡུལ་སྐོར་བས་དགའ་པོ་བྱེད་པའི“གཱ་ཐོ་འགོད་ཡུལ”ཞིག་ཏུ་གྱུར་ཡོད། གྲངས་གཞི་ལས་མངོན་པར་གཞིགས་ན། 2024ལོའི་ཟླ་1པོ་ནས་7པའི་བར། ལྷ་སས་རྒྱལ་ཁབ་ཕྱི་ནང་གི་ཡུལ་སྐོར་བ་མི་ཐེངས་ཁྲི་2671.38ལ་སྣེ་ལེན་ཞུས་པ་དེ་དུས་མཚུངས་ལས་16.85%འཕར་ནས་ཡུལ་སྐོར་ཡོང་འབབ་བསྡོམས་འབོར་སྒོར་དུང་ཕྱུར་342.12ཟིན་པ་དེ་དུས་མཚུངས་ལས་13.95%འཕར་ཡོད་པ་རེད།

རིག་གནས་ནི་ཡུལ་སྐོར་གྱི་བླ་སྲོག་ལྟ་བུ་དང་ཡུལ་སྐོར་ནི་རིག་གནས་ཀྱི་གཞི་རྟེན་ལྟ་བུ་ཡིན། ཇི་ལྟར་བྱས་ནས་མི་རིགས་ཀྱི་ཁྱད་ལྡན་རིག་གནས་སྔར་བས་སྲུང་སྐྱོང་རྒྱུན་འཛིན་དང་རིག་གནས་ཡུལ་སྐོར་ཐོན་ལས་ཀྱི་མཐོ་ས་གསར་པ་གཏོད་དགོས་ཞེ་ན། ལྷ་ས་གྲོང་ཁྱེར་ཁྲེང་ཀོན་ཆུས་བར་སྐོར་ཁྲོམ་གཞུང་གིས་ལན་གསལ་པོ་ཞིག་བཏབ་ཡོད། རྒྱལ་སྟོན་རིང་། བར་སྐོར་ནམ་རྒྱུན་ལས་འཁྲུག་ཆ་དོད་ཅིང་། ཁྲོམ་གཞུང་གི་གཞོགས་གཉིས་སུ་ཚོང་ཁང་མང་པོ་ཡོད་ལ་ཕར་འགྲོ་ཚུར་འོང་བྱེད་མཁན་ཡུལ་སྐོར་བ་དེ་བས་མང་པོ་ཡོད། བར་སྐོར་ནས་ཡུལ་སྐོར་བརྙན་པར་རྒྱག་རྒྱུ་དར་སོ་ཆེན་པོ་བྱུང་སྟེ་ཁྲོམ་གཞུང་གང་སར་བོད་ཆས་སྤྲས་ནས་པར་རྒྱག་མཁན་ཡུལ་སྐོར་བ་མང་པོ་མཐོང་ཐུབ། བོད་དུ་ཡུལ་སྐོར་བྱས་པའི་དྲན་ཤེས་རྩ་ཆེན་ཞིག་ཡིན་པའི་ཆ་ནས། ཡུལ་སྐོར་བརྙན་པར་ཁང་གི་སྦྱིན་བདག་གིས་ཡུལ་སྐོར་བ་ཚོར་བོད་ཆས་སྣ་ཚོགས་མཁོ་འདོན་བྱས་ཡོད། གནའ་གྲོང་གི་སྲོལ་རྒྱུན་གྱི་རྣམ་པ་དང་འཚོ་སྡོད་བྱེད་སྟངས་ཅུང་ཆ་ཚང་བའི་སྒོ་ནས་ཉར་ཚགས་བྱས་ཡོད་པར་བརྟེན་བར་སྐོར་ཁྲོམ་གཞུང་འདི་ད་ཆ་བོད་ཆས་གྱོན་ནས་པར་རྒྱག་མཁན་ཡུལ་སྐོར་བས་གཱ་ཐོ་འགོད་ས་གཙོ་བོ་ཞིག་ཏུ་གྱུར་ཡོད་པ་རེད།

ས་སྲོད་སྐབས། 《འུན་ཤིང་ཀོང་ཇོ》འཁྲབ་སྟོན་མ་བྱས་གོང་འཁྲབ་སྟོན་པ་300ལྷག་ཙམ་གྱིས་འཁྲབ་ཆས་སྙིང་རྗེ་པོ་གྱོན་ཏེ་བྱེད་སྒོ་གཟབ་རྒྱས་སྤེལ་ཞིང་། མངའ་རིས་ཀྱི་ཤོན་དང་། ནང་མ་སྟོད་གཞས། སྒོར་གཞས། ལྷ་མོ་སོགས་མངོན་མིན་རིག་གནས་ཤུལ་བཞག་གི་ཞབས་བྲོ་སྣ་ཚོགས་འཁྲབ་སྟོན་བྱས་ནས་ལྟད་མོ་བའི་ཡིད་དབང་འགུག་གི་ཡོད།

བོད་ལྗོངས་རིག་གནས་ཡུལ་སྐོར་བློ་གསར་གླིང་དོ་དམ་ཨུ་ལྷན་གྱི་རིམ་པ་དང་པོའི་བརྟག་ཞིབ་པ་ཡོན་ཏན་ཚེ་རིང་གིས་གསར་འགོད་པར། ལོ་རྒྱུས་སྙན་ངག་གི་དངོས་ལྗོངས་ཟློས་གར་ཆེ་གྲས《འུན་ཤིང་ཀོང་ཇོ》དང་། གར་སྟེགས་ཟློས་གར《གྱིམ་ཤིང་ཀོང་ཇོ》 ཚེ་མཆོག་གླིང་བོད་ཁྱིམ་ཡུལ་སྲོལ་ཁྲོམ་གཞུང་། འུན་ཤིང་ཀོང་ཇོ་རིག་གནས་ཡུལ་སྐོར་བརྗོད་དོན་གཙོ་བོའི་གླིང་བཅས་ཀྱི་ཐུན་མོང་སྐུལ་འདེད་འོག ལྷ་སའི་ཚེ་མཆོག་གླིང་ཡུག་ཁུལ་དུ་མིག་སྔར“ཟློས་གར་གཉིས་དང་། ཁྲོམ་གཞུང་གཅིག གླིང་གཅིག”བཅས་ཀྱི་རིག་གནས་ཡུལ་སྐོར་ཐོན་ལས་གཅིག་སྡུད་མཉམ་འདྲེས་ཀྱི་འཕེལ་རྒྱས་གཏོང་སྟངས་ཤིག་ཆགས་ནས། “ཟ་སྡོད་འགྲོ་གསུམ་དང་། ཡུལ་སྐོར། ཉོ་སྒྲུབ། རོལ་རྩེད”བཅས་མཉམ་འགུལ་དམ་ཟབ་བྱེད་པའི་རིག་གནས་ཡུལ་སྐོར་གྱི་ཐོན་ལས་འཁོར་འབྲེལ་ཆ་ཚང་ཞིག་བསྐྲུན་ནས། རིག་གནས་ཡུལ་སྐོར་ཁེ་ལས་དང་ཞབས་ཞུའི་ཁེ་ལས་བརྒྱ་ཕྲག་ཁ་ཤས་ཀྱི་ཡིད་དབང་བཀུག་ཡོད་པ་མ་ཟད། ད་དུང་མཐའ་འཁོར་ས་ཁོངས་ལ་ཁྱབ་འགྱེད་སྐུལ་ཁྲིད་ཐུབ་ནས་མ་དངུལ་སྒོར་དུང་ཕྱུར་བརྒྱ་ལྷག་ཙམ་བཏང་སྟེ་ལྷ་སའི་རིག་གནས་ཡུལ་སྐོར་ཐོན་ལས་འཕེལ་རྒྱས་ཀྱི་མཐོ་ས་གསར་པ་ཞིག་ཏུ་གྱུར་ཡོད་ཅེས་བཤད་པ་རེད།