ཤིན་ཧྭ་གསར་འགྱུར་ཁང་པེ་ཅིང་ནས་གློག་འཕྲིན་འབྱོར་གསལ། ཚེས་15ཉིན། 2024ལོའི་ཀྲུང་གོ་དང་ཡོ་རོབ་ཀྱི་ཤེས་ལྡན་པའི་གླེང་སྟེགས་པེ་ཅིང་དུ་འཚོགས་ཤིང་། གླེང་སྟེགས་ཀྱིས“མཉམ་སྤྱོད་དང་། མཉམ་འཚོ། གཉིས་ཁེ་བཅས་ཀྱིས་ཀྲུང་གོ་དང་ཡོ་རོབ་ཀྱི་སྲོལ་རྒྱུན་མཛའ་གྲོགས་ཟབ་ཏུ་བཏང་ནས་ཤེས་ལྡན་པའི་མཉམ་ལས་དང་སྤེལ་རེས་རྒྱ་ཆེར་གཏོང་དགོས”ཞེས་པ་བརྗོད་དོན་གཙོ་བོར་བྱས་ཏེ་ཀྲུང་གོ་དང་། སུའེ་ཙེར། སི་ཕེན་སོགས་རྒྱལ་ཁབ་དང་ས་ཁུལ་གྱི་སྐུ་མགྲོན་240ལྷག་ཙམ་ཚོགས་འདུར་ཞུགས་པའི་ཡིད་དབང་བཀུག་ཡོད། ཀྲུང་གོ་དང་ཕྱི་རྒྱལ་གྱི་སྐུ་མགྲོན་ཚོས་རྒྱལ་སྤྱིའི་སྤེལ་རེས་དང་མཉམ་ལས་ཀྱི་ཡངས་ཤིང་རྒྱ་ཆེ་བའི་མདུན་ལམ་ལ་ཐུན་མོང་ཐོག་དཔྱད་བསྡུར་བྱས་པ་དང་མི་ཐབས་རིག་ནུས་དང་ཚན་རྩལ་གསར་གཏོད་སོགས་ཀྱི་ཁྱབ་ཁོངས་དོ་ཁུར་བྱ་ཡུལ་དུ་གྱུར་ཡོད།

“ཤེས་ལྡན་པ་ནི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་ཐོན་ཁུངས་ཨང་དང་པོ་རེད། ཀྲུང་གོ་དང་ཡོ་རོབ་ནི་འཛམ་གླིང་གི་དཔལ་འབྱོར་སྡེ་གཞི་གལ་ཆེན་དང་ཚན་རྩལ་གྱི་མཐོ་ས་གལ་ཆེན་གཉིས་ཡིན་པའི་ངོས་ནས་ཕན་ཚུན་གསབ་རེས་ཀྱི་རང་བཞིན་ཆེན་པོ་དང་ཡངས་ཤིང་རྒྱ་ཆེ་བའི་མཉམ་ལས་ཀྱི་བར་མཐོངས་ལྡན་ཡོད” ཕྱི་འབྲེལ་པུའི་པུའུ་ཀྲང་གཞོན་པ་ཏེང་ལི་ཡིས་བཞེད་དོན་གཙོ་བོའི་གཏམ་བཤད་སྤེལ་སྐབས“ཉེ་བའི་ལོ་ཤས་རིང་ཕྱོགས་གཉིས་པོའི་ཤེས་ལྡན་པའི་ཁྱབ་ཁོངས་ཀྱི་སྤེལ་རེས་མཉམ་ལས་ཀྱི་གོམ་སྟབས་ཟམ་མི་ཆད་པར་མགྱོགས་སུ་ཕྱིན་ནས་ཚན་རྩལ་གསར་གཏོད་དང་ཤེས་ལྡན་པའི་སྤེལ་རེས་ལ་སྐུལ་འདེད་གཏོང་བ་སོགས་ཀྱི་ཐད་སྦྲེལ་ཟམ་དང་སྦྲེལ་ཐག་གི་ནུས་པ་གལ་ཆེན་བཏོན་ཡོད”ཅེས་བརྗོད།

ཧྥ་རན་སེའི་ཙུང་ལི་ཟུར་པ་ལཱ་ཧྥ་ལན་གྱིས་བརྙན་ལམ་ཐོག་ནས་ཤིས་ཚིག་སྒྲོན་སྐབས་གསར་གཏོད་ཀྱི་ནུས་པ་ཆེན་པོ་ལྡན་པའི་གཞོན་ནུ་ཡིན་ནའང་འདྲ། ཡང་ན་ཉམས་མྱོང་ཕུན་སུམ་ཚོགས་པའི་བསླབ་པ་རྒན་གྲས་ཡིན་ཡང་རུང་དེ་དག་ཚང་མ་སྤྱི་ཚོགས་འཕེལ་རྒྱས་ཡག་པོ་ཡོང་བར་སྐུལ་འདེད་གཏོང་བའི་འགག་རྩའི་སྟོབས་ཤུགས་ཡིན། རྒྱལ་སྤྱིའི་མི་ཆོས་རིག་གནས་ཀྱི་སྤེལ་རེས་དེ་ཧ་ཅང་གལ་ཆེན་ཞིག་ཡིན་པས་བྱེད་སྟངས་དང་བྱེད་ཐབས་ལ་དོ་སྣང་བྱས་ནས་མི་རྣམས་ཀྱི་མཐོང་རྒྱ་ཆེ་རུ་གཏོང་རོགས་བྱེད་དགོས་ཞེས་བརྗོད།

ད་ཐེངས་ཀྱི་གླེང་སྟེགས་འཚོག་ཡུལ་དུ《2024ལོའི་གོ་ལ་ཧྲིལ་པོའི་གྲོང་ཁྱེར་གྱི་ཤེས་ལྡན་པ་གནས་ཐུབ་པའི་སྟོན་གྲངས་སྙན་ཞུ》ཁྱབ་བསྒྲགས་བྱས་ཡོད།