ཤིན་ཧྭ་གསར་འགྱུར་ཁང་ནན་ཅིང་ནས་གློག་འཕྲིན་འབྱོར་གསལ། ཉེ་ཆར། “རྒྱལ་ཁབ་རེར་སྤུས་རྟགས་རེ”ཡི་བྱ་སྤྱོད་ཞི་བདེ་རྒྱ་མཚོ་ཆེན་པོའི་གླིང་ཕྲན་རྒྱལ་ཁབ་ཀྱི་འགོ་ཚུགས་ཚོགས་འདུ་དང་ཞིབ་བསྡུར་ཚོགས་འདུ་ཅང་སུའུ་ནན་ཅིང་དུ་འགོ་ཚུགས་ཤིང་། མཉམ་འབྲེལ་རྒྱལ་ཚོགས་འབྲུ་རིགས་དང་ཞིང་ལས་རྩ་འཛུགས་དང་། ཞི་བདེ་རྒྱ་མཚོ་ཆེན་པོའི་གླིང་ཕྲན་རྒྱལ་ཁབ། ཀྲུང་གོའི་མཐོ་སློབ་སློབ་གླིང་། ཁེ་ལས་ལས་རིགས་བཅས་ཀྱི་འཐུས་མི་ཁྱོན་མི་120ལྷག་ཙམ་ཚོགས་འདུར་ཞུགས་པ་རེད།

ད་ཐེངས་ཀྱི་བྱེད་སྒོ་ནི་མཉམ་འབྲེལ་རྒྱལ་ཚོགས་འབྲུ་རིགས་དང་ཞིང་ལས་རྩ་འཛུགས་དང་། ཀྲུང་གོ་དང་ཞི་བདེ་རྒྱ་མཚོ་ཆེན་པོའི་གླིང་ཕྲན་རྒྱལ་ཁབ་ཀྱི་ཞིང་ལས་མཉམ་ལས་དཔེ་སྟོན་ལྟེ་གནས། སོ་ལོ་མོན་གླིང་ཚོམ་གྱི་ཞིང་ལས་དང་འབྲོག་ལས་པུའུ་བཅས་ཀྱིས་མཉམ་འབྲེལ་ཐོག་གཙོ་གཉེར་བྱས་པ་དང་ཅང་སུའུ་ཞིང་ཆེན་ཞིང་ལས་ཚན་རིག་ཁང་གིས་སྒྲུབ་འགན་འཁུར་བ་ཞིག་རེད། འགོ་ཚུགས་མཛད་སྒོའི་ཐོག གཙོ་གཉེར་ཕྱོགས་ཀྱི་འཐུས་མི་དང་ཞི་བདེ་རྒྱ་མཚོ་ཆེན་པོ་ཁུལ་གྱི་གླིང་ཕྲན་རྒྱལ་ཁབ་ཀྱི་འཐུས་མིས་ཞི་བདེ་རྒྱ་མཚོ་ཆེན་པོ་ཁུལ་གྱི་གླིང་ཕྲན་རྒྱལ་ཁབ་ཀྱི“རྒྱལ་ཁབ་རེར་སྤུས་རྟགས་རེ”ཡི་བྱ་སྤྱོད་ཀྱི་མཛད་སྒོ་ཐུན་མོང་ཐོག་སྤེལ་འགོ་བཙུགས་པ་རེད། ཁུའུ་ཁེ་གླིང་ཚོམ་དང་། ཧྥི་ཅི། ནོ་རུ། ཕ་ཕུ་ཡ་ཀུའེ་ནེ་ཡ་གསར་པ། ས་མོ་ཡ། སོ་ལོ་མོན་གླིང་ཚོམ། ཐང་ཀ ཝ་ནུ་ཨ་ཐུ་བཅས་ཞི་བདེ་རྒྱ་མཚོ་ཆེན་པོའི་གླིང་ཕྲན་རྒྱལ་ཁབ་8དེའི་ནང་ཞུགས་ཡོད་པ་རེད།

ཅང་སུའུ་ཞིང་ཆེན་མི་དམངས་སྲིད་གཞུང་གི་ཧྲེང་ཀྲང་གཞོན་པ་ཀྲའོ་ཡན་གྱིས་ངོ་སྤྲོད་བྱས་པར་གཞིགས་ན། ན་ནིང་ཀྲུང་གོ་དང་ཞི་བདེ་རྒྱ་མཚོ་ཆེན་པོ་ཁུལ་གྱི་གླིང་ཕྲན་རྒྱལ་ཁབ་ཀྱི་ཞིང་ལས་དང་ཉ་ལས་པུའི་པུའུ་ཀྲང་གི་ཚོགས་འདུ་ནན་ཅིང་དུ་འཚོགས་པ་དང་། ཚོགས་འདུའི་ཐོག 《ནན་ཅིང་གི་ཐུན་མོང་ངོས་འཛིན》ཁྱབ་བསྒྲགས་བྱས་པ་དང་འབྲེལ། “ཀྲུང་གོ་དང་ཞི་བདེ་རྒྱ་མཚོ་ཆེན་པོ་ཁུལ་གྱི་གླིང་ཕྲན་རྒྱལ་ཁབ་ཀྱི་ཞིང་ལས་མཉམ་ལས་དཔེ་སྟོན་ལྟེ་གནས”ཀྱི་སྒོ་བྱང་གི་ཡོལ་བའང་ཕྱེ་བ་རེད། འབྱུང་འགྱུར་ཅང་སུའུ་ཡིས་སྒོ་དབྱེ་མཉམ་ལས་དང་མཐུན་སྒྲིལ་གཉིས་ཕན་གྱི་འདུ་ཤེས་མུ་མཐུད་རྒྱུན་འཛིན་བྱེད་པ་དང“རྒྱལ་ཁབ་རེར་སྤུས་རྟགས་རེ”ཡི་བྱ་སྤྱོད་ལ་སྐུལ་འདེད་གཏོང་བའི་ནང་ཧུར་ཐག་ཞུགས་ཏེ་ཞི་བདེ་རྒྱ་མཚོ་ཆེན་པོའི་གླིང་ཕྲན་རྒྱལ་ཁབ་དང་ཞིང་ལས་སོགས་ཀྱི་ཁྱབ་ཁོངས་སུ་དངོས་སྒྲུབ་མཉམ་ལས་རྒྱུན་ཆད་མེད་པར་ཟབ་ཏུ་གཏོང་རྒྱུ་ཡིན་པ་རེད།