ཉེ་བའི་ལོ་ཤས་རིང་། བོད་ལྗོངས་མི་རིགས་སློབ་ཆེན་གྱིས་སློབ་གྲྭ་བཙུགས་ནས་ལོ་60ལྷག་ཙམ་སོང་བའི་སློབ་གཉེར་དམིགས་ཡུལ་ལ་བརྩི་སྲུང་མཐའ་གཅིག་ཏུ་ཞུས་ནས“ཀྲུང་གོའི་སེམས་པ། མི་རིགས་ཀྱི་བླ་སྲོག བོད་ཀྱི་བརྩེ་སེམས”བཅས་ཀྱི་བསམ་བློ་ཆབ་སྲིད་རིགས་པའི་གཞུང་ལུགས་སློབ་ཁྲིད་སྤུས་རྟགས་གཏན་འཁེལ་བྱས་པ་དང་འབྲེལ། ནུས་ཤུགས་ཡོད་རྒུས་བཏོད་དེ་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་རྒྱུ་མཐོ་སློབ་ཀྱི་བསམ་བློ་ཆབ་སྲིད་རིགས་པའི་གཞུང་ལུགས་ཀྱི་སློབ་ཚན(གཤམ་དུ“བསམ་བློ་ཆབ་སྲིད་སློབ་ཚན”ཞེས་བསྡུ་རྒྱུ)འཛུགས་སྐྱོང་ནང་མཉམ་འདྲེས་ཐུབ་པར་བྱས་ནས། རྒྱ་ཆེའི་དགེ་སློབ་ཀྱི་སྣེ་ཁྲིད་དེ་ཧྲའན་ཤིས་ཀྱི་ས་གཞི་ཆེན་པོར་གསོན་ཉམས་དོད་ལ། དོན་སྙིང་ལྡན་པའི་བསམ་བློ་ཆབ་སྲིད་ཀྱི་སློབ་ཚན་ཐེངས་མང་ཁྲིད་ཡོད།

“ཀྲུང་གོའི་སེམས་པ། མི་རིགས་ཀྱི་བླ་སྲོག བོད་ཀྱི་བརྩེ་སེམས”བཅས་ཀྱི་བསམ་བློ་ཆབ་སྲིད་སློབ་ཁྲིད་སྤུས་རྟགས་ལ་ནང་དོན་ཕུན་སུམ་ཚོགས་ཤིང་། “ཀྲུང་གོའི་སེམས་པ”ནི་རྒྱལ་གཅེས་རིང་ལུགས་ཀྱི་སློབ་གསོར་ཤུགས་སྣོན་བརྒྱབ་ནས“རང་རེའི་ཀྲུང་ཧྭ་ལ་དགའ་བའི་ས་བོན་གཞོན་ནུ་ལོ་ཆུང་ཚང་མའི་སེམས་གཏིང་ལ་ཟུག་པར”བྱས་ཏེ། རྒྱ་ཆེའི་གཞོན་ནུ་སློབ་མར་རྒྱལ་གཅེས་ཀྱི་བརྩེ་སེམས་དང་། རྒྱལ་སྟོབས་ཀྱི་ཕུགས་འདུན། རྒྱལ་ཁབ་ཀྱི་བཀའ་དྲིན་འཇལ་བ་བཅས་ཀྱི་འདུ་ཤེས་བརྟན་པོ་འཛུགས་པར་སློབ་གསོ་ཁྲིད་སྟོན་བྱེད་རྒྱུ་དེ་ཡིན་པ་དང་། “མི་རིགས་ཀྱི་བླ་སྲོག”ནི་མི་རིགས་མཐུན་སྒྲིལ་ཡར་ཐོན་གྱི་སློབ་གསོར་ཤུགས་སྣོན་བརྒྱབ་ནས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པ་དང་། རྒྱ་ཆེའི་གཞོན་ནུ་སློབ་མར་སྐྱིད་སྡུག་མཉམ་མྱོང་དང་། གཟི་ཁྲེལ་མཉམ་ཁུར། མཉམ་ཤི་མཉམ་གསོན། ལས་དབང་གཅིག་མཐུན་བཅས་ཀྱི་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པར་སློབ་གསོ་ཁྲིད་སྟོན་བྱེད་པ། “ཁ་འབྲལ་ཐབས་མེད་པ་གསུམ”ལག་ལེན་ཏན་ཏིག་བསྟར་བ་བཅས་བྱས་ཏེ་ལྗོངས་ཡོངས་ཀྱི་མི་རིགས་མཐུན་སྒྲིལ་ཡར་ཐོན་གྱི་བྱ་གཞག་རྒྱལ་ཡོངས་ཀྱི་མདུན་གྲལ་དུ་སླེབས་པར་སྐུལ་འདེད་གཏོང་ཆེད་བོད་ལྗོངས་མི་རིགས་སློབ་ཆེན་གྱི་སྟོབས་ཤུགས་སྐྱེས་སུ་འབུལ་རྒྱུ་དེ་ཡིན་པ། “བོད་ཀྱི་བརྩེ་སེམས”ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བོད་ཀྱི་ལས་དོན་སྐོར་གྱི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་དང་། དེ་བཞིན་བོད་ཀྱི་དམིགས་བསལ་ལྗོངས་བབ་སོགས་ཐད་ཀྱི་སློབ་གསོར་ཤུགས་སྣོན་བརྒྱབ་ནས། མི་རིགས་ཁག་གི་གཞོན་ནུ་སློབ་མར་ཡུན་རིང་བོད་སྐྲུན་གྱི་བསམ་བློ་བརྟན་པོ་འཛུགས་པར་སློབ་གསོ་ཁྲིད་སྟོན་བྱས་ཏེ“བླ་ན་མེད་པའི་རྒྱལ་ཁོངས་སྲུང་མཁན་ཞིག་དང་བདེ་སྐྱིད་ལྡན་པའི་ཁྱིམ་གཞིས་སྐྲུན་མཁན་ཞིག”བརྩོན་ལེན་བྱེད་རྒྱུ་དེ་རེད།

ཇུས་འགོད་ཞིབ་ཚཌ་དང་བསམ་བཀོད་མཁས་པོ་བྱས་པའི“ཀྲུང་གོའི་སེམས་པ། མི་རིགས་ཀྱི་བླ་སྲོག བོད་ཀྱི་བརྩེ་སེམས”བཅས་ཀྱི་བསམ་བློ་ཆབ་སྲིད་ཀྱི་སློབ་ཚན་ལ་སློབ་མ་ཚོས་ཉན་སྤྲོ་ལ་སྦྱོང་རྒྱུར་དགའ་ཞིང་གོ་བ་ལེན་པ་དང་ཤེས་ཐུབ་པ་བྱུང་བ་མ་ཟད། ཕྱོགས་གཞན་ལ་ཡང་གྲུབ་འབྲས་མངོན་གསལ་དོད་པོ་ཐོབ་ཡོད། སློབ་གསོ་པུས་སྒྲིག་འཛུགས་བྱས་པའི“སློབ་གྲྭ་ཆེ་མོ་བས་བསམ་བློ་ཆབ་སྲིད་ཀྱི་སློབ་ཚན་འཁྲིད་པ”དང“སློབ་གྲྭ་ཆེ་མོ་བའི་གློག་བརྙན་ཐུང་གྲས”ཀྱི་འགྲེམས་སྟོན་བྱེད་སྒོར་ཉི་མ་གཡང་འཛོམས་དང་། ནོར་སྒྲོན། བཀྲ་ཤིས་དཔལ་ལྡན་བཅས་གྲངས་ཉུང་མི་རིགས་ཀྱི་སློབ་གྲོགས་གསུམ་ལ་བྱ་དགའ་ཐོབ་པ་དང་། འདི་ནི་བྱེད་སྒོ་དེ་རིགས་སྤེལ་རིང་བོད་ཀྱི་མཐོ་སློབ་སློབ་གྲྭ་ཆེ་མོ་བར་བྱ་དགའ་ཐོབ་པ་འབའ་ཞིག་དེ་རེད། དེ་དང་ཆབས་ཅིག སློབ་ཚན་དེའི་སློབ་མ་དཀྱུས་མ་རྒྱུགས་ཚད་མི་ལོན་པ་ཆེས་ཆེར་ཉུང་དུ་ཕྱིན་ནས་ཐོབ་སྣང་མངོན་གསལ་དོད་པོས་ཆེ་རུ་ཕྱིན་ཡོད།

བོད་ལྗོངས་མི་རིགས་སློབ་ཆེན་གྱི་བསམ་བློ་ཆབ་སྲིད་སློབ་ཚན་ཇུས་འགོད་དང་སློབ་ཁྲིད་ཀྱི་བརྒྱུད་རིམ་ཧྲིལ་པོ་ཉིན་རེ་བཞིན་གནད་སྨིན་འཐུས་སྒོ་ཚང་དུ་ཕྱིན་པ་དང་བསྟུན་ནས། དགེ་རྒན་ཚོགས་པ་ཡང་ཉིན་རེ་བཞིན་རྒྱ་སྟོབས་ཆེ་རུ་ཕྱིན་ཏེ་ཕུལ་དུ་བྱུང་བའི་དགེ་རྒན་མང་པོ་ཐོན་ཡོད། 2024ལོའི་ཟླ་3པའི་བར། མི་1སློབ་གསོ་པུའི་བསམ་བློ་ཆབ་སྲིད་སློབ་ཁྲིད་མཛུབ་ཁྲིད་ཨུ་ཡོན་ལ་བདམས་ཐོན་བྱུང་བ་དང་། མི་6བོད་རང་སྐྱོང་ལྗོངས་ཀྱི་མཐོ་རིམ་སློབ་གྲྭའི་བསམ་བློ་ཆབ་སྲིད་སློབ་ཁྲིད་མཛུབ་ཁྲིད་ཨུ་ཡོན་ལྷན་ཁང་གི་ཨུ་ཡོན་ལ་བདམས་ཐོན་བྱུང་བ། མི་2བོད་རང་སྐྱོང་ལྗོངས་ཀྱི་སློབ་ཁྲིད་དགེ་རྒན་གྲགས་ཅན་ལ་བདམས་ཐོན་བྱུང་བ། མི་8ལ་བསམ་བློ་ཆབ་སྲིད་སློབ་ཚན་གྱི“སློབ་ཁྲིད་འཇོན་ཐང་ཅན”དང“སློབ་ཁྲིད་དཔེ་དམག”སོགས་ཀྱི་གཟི་བརྗིད་མཚན་སྙན་ཐོབ་ཡོད། གཞི་རིམ་དུ་བསམ་བློ་ཆབ་སྲིད་སློབ་ཚན་ཡག་པོ་འཁྲིད་ཐུབ་པ་བྱ་ཆེད། 2016ལོ་ཚུན། “དུས་རབས་ཀྱི་གདོང་ལེན”གྱི་སློབ་གྲྭ་ཆེ་མོ་བའི་རིགས་པའི་གཞུང་ལུགས་སྒྲོག་འགྲེལ་ཚོགས་པས་སློབ་གྲྭ་ཡོངས་ཀྱི་སློབ་གྲྭ་ཆེ་མོ་བར་ཕྱོགས་པའི་རིགས་པའི་གཞུང་ལུགས་སྒྲོག་འགྲེལ་ཐེངས་30ལྷག་ཙམ་བྱས་ཡོད། བོད་ལྗོངས་མི་རིགས་སློབ་ཆེན་སྡེ་ཚོགས་ཨུ་ལྷན་གྱི་གཅིག་གྱུར་སྒྲིག་འཛུགས་འོག་བསམ་བློ་ཆབ་སྲིད་སློབ་ཚན་གྱི་དགེ་རྒན་གྱིས་རུ་སྣེ་ཁྲིད་དེ“གཤམ་སྤེལ་གསུམ”གྱི་བྱེད་སྒོ་སྤེལ་ནས། མལ་གྲོ་གུང་དཀར་སོགས་སུ་ཞིང་འབྲོག་མང་ཚོགས་ལ་ཏང་དང་རྒྱལ་ཁབ་ཀྱི་དམིགས་བསལ་གཟིགས་སྐྱོང་སྲིད་ཇུས་སྒྲོག་འགྲེལ་བྱས་ཡོད། མཐའ་མའི་སློབ་ཁྲིད་ཀྱི་གྲུབ་འབྲས་ལ་བརྟེན་ནས་བོད་ལྗོངས་མི་རིགས་སློབ་ཆེན་གྱི“ཀྲུང་གོའི་སེམས་པ། མི་རིགས་ཀྱི་བླ་སྲོག བོད་ཀྱི་བརྩེ་སེམས”བཅས་ཀྱི་བསམ་བློ་ཆབ་སྲིད་རིགས་པའི་གཞུང་ལུགས་སློབ་ཁྲིད་སྤུས་རྟགས་ལ་2020ལོར་སློབ་གྲྭའི་སློབ་ཁྲིད་གྲུབ་འབྲས་ཀྱི་དམིགས་བསལ་རིམ་པའི་བྱ་དགའ་དང་། 2021ལོར་བོད་རང་སྐྱོང་ལྗོངས་ཀྱི་མཐོ་སློབ་སློབ་ཁྲིད་གྲུབ་འབྲས་ཀྱི་བྱ་དགའ་ཨང་དང་པོ་ཐོབ་རྗེས། 2024ལོར་རྒྱལ་ཁབ་ཀྱི་སློབ་ཁྲིད་གྲུབ་འབྲས་ཀྱི་བྱ་དགའ་ཨང་གཉིས་པ་ཐོབ་ཡོད་པ་རེད།